Lukas 20:38 - Sabahagiꞌ Kitab Tawrat: Panagnaan ni Awwal Jaman maka Kitab Injil

³⁸ “Na ilooy ilay siꞌ yana disu pamintangan man tabi mindoga jama matoy pinakallum pabalik. Batan jaman Tuhan ilay bay magpalman ni Nabi Musa, hallom na banahan ga Nabi Ibrahim bay matoy. Sugaꞌ hantak bitsala Tuhan jaman na magpalman, san sila bay na matoy, lay na sila llum pabalik. Batan yaꞌ sina luu jama matoy kasumba Tuhan. Ilooy du kasumba, yana sagannap ma llum.”

Lukas 20:38 ပူးပေါင်းရင်းမြစ်များ

Matiyu 22:32

‘Aku na situ Tuhan ma sinumba meꞌ Nabi Ibrahim, Nabi Isahak ka Nabi Yaꞌkub.’ “Na san ilay hallom na ga Nabi Ibrahim bay matoy, llum na sila pabalik. Batan yaꞌ sina luu jama matoy kasumba Tuhan. Ilooy du kasumba, sagannap ma llum.”

Malkus 12:27

“Na mandooy siꞌ tumatandaꞌ na luu gi masa jama matoy pinakallum. Batan jaman Tuhan ilay bay magpalman ni Nabi Musa, ndang hallom na banahan ga Nabi Ibrahim bay matoy. Sugaꞌ hantak bitsala njawom palman Tuhan, san sila bay matoy, llum na du batnaa. Batan yaꞌ sina luu jama matoy kasumba Tuhan. Ilooy du kasumba, sagannap ma llum. Inaa na tandaꞌ tud mattan du kam magsāꞌ.”

Lukas 20:39

Dari yuk siga guru saraꞌ agama baw siꞌ tu kasohean, “Inaa ya tampung ayad Guru.”

Yahiya 14:19

Yaꞌ na situ hallom, yaꞌ na ku takita leꞌ sagannap ma saꞌ sukuꞌ ku. Sugaꞌ bong baw kaam, sikita gi du sina mintu kitabi. Maka pagka ku itu mintu pinakallum du pabalik, mastiꞌ koleꞌ jaꞌ kam kaallum bahau.

Yahiya 6:57

Aku tu, luu kaallum ku sabapan Mmaꞌ ku ma bay mapitu aku, batan iya poonan kaallum. Damikiyan, soysoy mangan aku, koleꞌ du kaallum bahau sabapan ku.

2 Korin 13:4

Bana na, jaman Almasi llansang taꞌ tehang, bantuk yaꞌ luu kawasa na, sugaꞌ man kawasa Tuhan njataꞌ na, lay du ya llum pabalik. Kami pun, siga rasul Almasi, meꞌ bantuk yaꞌ du tu meꞌ noy kawasa kami. Sugaꞌ mastiꞌ takita du sina mintu kawasa Tuhan njataꞌ kami mainsapan kaam nnaa ma amu-amu buwat kalaatan.

2 Korin 6:16

Lagiꞌ na, yana meꞌ lumaꞌ Tuhan yaꞌ dari llamuran siga tuhan-tuhan, damikiyan kitabi pun, yaꞌ du dari mmeꞌ meꞌ uwahan jama ma yaꞌ pitsayaꞌ ni si Isa. Batan kitabi na situ binilang lumaꞌ Tuhan sabap Tuhan sabanna ma llum saumu-umu patannaꞌ njawom baran tabi. Meꞌ halling sambat palman Tuhan njawom kitab, yuk na, “Patannaꞌ na sina ku mintu njawom baran da maka luu na pin ku ngunungan sila. Aku na sina mintu Tuhan da maka sukuꞌ ku na sila.” Maka lay gi magpalman Tuhan, yuk na,

Hibrani 11:16

Sugaꞌ iya bay agad da yana paglahat mahap gi man mimon paglahat ni junyaꞌ, yana paglahat man sulgaꞌ. Dari sabapan kainagon da magdautan daira ma ndang bay pinanyap meꞌ Tuhan ninsila, gāk sina Tuhan inawnan Tuhan da.

Siga Pakaradjaan bay Pinalahil 22:1

Pag-anu siꞌ, pinakitahan na baw ku meꞌ malaikat looy disu sōng ma muwan kaallum saumu boheꞌ na. Sōng looy siꞌ nginggat na maka tallak meꞌ sammin na, pōꞌ man paningkoan Tuhan ka Bili-bili looy.