Kolossa 3:11 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹¹ Dari pagka tibuuk na kitabi ka Almasi saliꞌ-saliꞌ, yaꞌ na situ kitabi minig jama. Yaꞌ na kitabi magsibiddaꞌ bong jama bangsa Yahudi atawa ssaꞌ, bong jama bay inislam atawa niyaꞌ, iskulan atawa niyaꞌ, bong ata atawa ssaꞌ. Isu-isu Almasi pandang tabi. Boꞌ iya ina luu na patannaꞌ njawom atay tabi sikamimon ma pitsayaꞌ niiya.

Kolossa 3:11 ပူးပေါင်းရင်းမြစ်များ

Yahiya 14:23

Pag tampung si Isa, “Bong jama maaseꞌ niyaku, bean na jaꞌ sina bitsala ku. Jama meꞌ looy ilay kinaasean meꞌ Mmaꞌ ku. Dari patiluꞌ sina kami ka Mmaꞌ ku pa mman na, boꞌ kami patannaꞌ njawom atay na.

Yahiya 15:5

“Na meꞌ halling sambat ku na siꞌ, aku na situ poon anggul sabanna. Kuwan kaam, yana siga engas ku. Basta kam langkit ka aku, maka aku pun langkit ka kaam, malaingkan sibuꞌ du karuha bi ka engas ma buwaꞌ paeka. Sugaꞌ bong ina kam pasakkat mman ku, malaingkan yaꞌ luu tapabuwat bi ma kaboo kabantugan pa Tuhan.

Yahiya 17:23

Kainagon ku tibuuk na sila meꞌ karuha pagkatibuuk ku ka sila atawa meꞌ karuha pagkatibuuk nu ka aku. Kamura-murahan dambuwaꞌ atay na sila banahan supaya tumatandaꞌ ni manusiyaꞌ kau bay mapitu aku. Meꞌ looy ilay, tabista jama na aseꞌ nu ni siga sukuꞌ ku sibuꞌ du ka aseꞌ nu niyaku.

Salsila siga Rasul 15:17

Pag toklas na, jama man mimon kabangsa-bangsahan halin na mundaꞌ da pa jawom okoman ku. Sila ina yana sagannap manusiyaꞌ ma liyun ku binuwat sukuꞌ ku. Aku na situ Tuhan, yana poonan umanat tuu siꞌ.

Salsila siga Rasul 28:2

Kahapan jama lahat looy tud bay mahap meꞌ da ka kami. Lay gi kami pakalluman da api man kami nohoꞌ mapasuꞌ-pasuꞌ baran kami batan uwan lahat boꞌ tanne lagi.

Salsila siga Rasul 28:4

Pag takita leꞌ jama lahat looy patonton na sō looy ni tangan si Pol, yuk dangan pa dangan, “Batiꞌ ta la, lalla naa pamomonoꞌ. San ya bay kapuwas man bahaya ni dilawut, pag batnaa basta yaꞌ na baw tu tatangkis na kisas ni jataꞌ na.”

Suwat si Pol pa mman Baanan Sukuꞌ si Isa ndooy ni Rom 1:14

Aku itu, pangissahan ku talpaksaꞌ ku ngalataan lahat masaplag umanat mahap pasal si Isa ni sikamimon. Yaꞌ ku minig jama, san gi oy bangsa da, ma iskulan atawa niyaꞌ, ma halul-akka atawa niyaꞌ.

Suwat si Pol pa mman Baanan Sukuꞌ si Isa ndooy ni Rom 10:12

Na kasalamatan tuu itu para ni mimon bangsa, saꞌ biddaꞌ bong sila Yahudi atawa ssaꞌ, batan Tuhan yaꞌ magsitingka manusiyaꞌ. Mimon kitabi manusiyaꞌ, disu du Papuꞌ tabi. Boꞌ meka sina kaayaran ndean meꞌ na ni sikamimon ma maku tabang niiya.

Suwat si Pol pa mman Baanan Sukuꞌ si Isa ndooy ni Rom 3:22

Dari man gantaan Tuhan, initung na manusiyaꞌ intong basta sila pitsayaꞌ jaꞌ ka mangando ni si Isa Almasi. Tuhan ina yaꞌ magsibiddaꞌ san gi oy bangsa jama.

Suwat si Pol pa mman Baanan Sukuꞌ si Isa ndooy ni Rom 3:29

Boꞌ timbang Tuhan ina, saꞌ sat para ni bangsa Yahudi, arapun sampay ni mimon bangsa. Batan bangsa Yahudi atawa ssaꞌ, basta iya du Tuhan tabi saliꞌ-saliꞌ.

1 Korin 12:13

Lay na kitabi tinibuuk meꞌ Tuhan pa disu baran sa batan lay na kitabi saliꞌ-saliꞌ pinaasokan disu Rū, yana Rū Sutsiꞌ. Kasohean kitabi bangsa Yahudi, kasohean ssaꞌ, kasohean ata, kasohean ssaꞌ, sugaꞌ saliꞌ-saliꞌ kitabi bay pinaasokan Rū Sutsiꞌ.

1 Korin 14:11

Sugaꞌ bong sabagay luu disu pagkahi ku bay mitsala niyaku ka pallun ma yaꞌ tahati ku, pangissahan ku jama sampi ya. Iya pun ina, bong ku bay mitsala niiya ka pallun yaꞌ tahati na, pangissahan na sampi du ku.

1 Korin 7:19

Batan inislam yaꞌ inislam ina, yaꞌ du luu paluntungan na. Ilooy ya mehe pa Tuhan bong tabi mmeꞌ ni kahandak na.

Galatiya 2:20

Pag batnaa, Almasi na llum ni baran ku, saꞌ na aku. Sangkon kahandak na jaꞌ bean ku, saꞌ na kahandak ku. Maka batnaa, halloman ku llum, mangando jaꞌ ku ni Anak Tuhan. Batan maaseꞌ ya niyaku sampay lay na ga paglillaꞌ na dī na pinapatoy kalnaꞌ aku.

Galatiya 5:6

Dari meꞌ kitabi itu tibuuk na ka si Isa Almasi, katoonan tabi na yaꞌ luu pagbiddaan pa Tuhan bong jama bay inislam atawa niyaꞌ. Ilooy du puntukan banahan yana pangando tabi niiya ma takita ni aseꞌ tabi ni pagkahi tabi manusiyaꞌ.

Epesus 1:23

yana kitabi ma binilang baran na. Baran na ina, ginaosan leꞌ na malahil mimon arat-tabiat na, batan iya nganggaosan mimon-mimon nnoy-nnoy jaꞌ.

Epesus 2:14

Maruhuꞌ, ndang katoonan bi du, bong inawnan kami siga Yahudi ka kaam siga bangsa saꞌ Yahudi, wā magsaggaꞌ. Boꞌ poonan pagsaggaan tabi ilay yana saraꞌ agama kami. Sangka kami hagaan gi kami man kaam sabap kami bay peneꞌ Tuhan sukuꞌ na. Boꞌ kami lagi man Tuhan bay ma-ntan saraꞌ na. Sangkon dari ko ngawon, saraꞌ agama kami yana agpang man tabi yaꞌ kapagdambuwaꞌ. Kahapan, lay na nilangkat meꞌ Almasi agpang looy njataꞌ kapatoy na taꞌ tehang. Kon na bay buwat meꞌ looy supaya bay duwam baanan tapagsitibuuk na na kitabi pa disu baanan sa. Dari sabapan kapatoy Almasi, bilang disu bangsa bahau na kitabi. Maka luu na kasalassayan tabi batan bukaꞌ na lawang bahau man mimon manusiyaꞌ taitung sukuꞌ Tuhan. Sangkon bong inawnan saraꞌ Yahudi ddas ka jinisan aturan tinaat, yaꞌ na luu kabigiꞌ-bigian na ni hāl meꞌ jama initung sukuꞌ Tuhan.

Epesus 3:17

Maka kamura-murahan luu na pin Almasi patannaꞌ njawom atay bi man sabapan pangando bi niiya. Maka kamura-murahan tattog na pin aseꞌ bi pa Tuhan sampay pa manusiyaꞌ meꞌ karuha kayu nganggamut palawom njawom tanaꞌ.

Epesus 3:6

Na garaꞌ ma bay awnan ku ilay siꞌ yana ituu: Mimon ma bay hinalliꞌ meꞌ Tuhan ni sukuꞌ na, saꞌ du silay sat para ni bangsa Yahudi, arapun sampay ni mimon kabangsa-bangsahan. Batan sikamimon ma pitsayaꞌ ni umanat mahap tabilang na dambuwaꞌ baran sabap meꞌ da tibuuk ka si Isa Almasi. Maka saliꞌ-saliꞌ na sila hampit ni mimon bay njanjiꞌ meꞌ Tuhan.

Epesus 6:8

Katoonan bi du sina, oy-oy jaꞌ kaayaran pabuwat tabi, mastiꞌ tinungbasan du meꞌ Papuꞌ Isa, saꞌ biddaꞌ bong kitabi ata atawa ssaꞌ.

Kolossa 2:10

Almasi ina magbayaꞌ ni mimon ma ngantanan kawasa-kapatut sampay siga seytan ka malaikat. Sangkon kaam ina, langkap-samat na kam sabap tibuuk na kam ka iya.

1 Yahiya 5:20

Damikiyan, katoonan tabi na du luu na bay pitu Anak Tuhan pa junyaꞌ. Maka lay na ya muwanan kitabi pangahati supaya dari na kitabi lungbid ka Tuhan sabanna. Pag batnaa tibuuk na kitabi ka Tuhan sabanna sabap meꞌ tabi tibuuk na ka Anak na si Isa Almasi. Iya ina Tuhan sabanna maka poonan kasampulnaan nyawa ma yaꞌ luu katapusan na.

2 Yahiya 1:9

Batan soysoy yaꞌ tattap mmeꞌ ni tōꞌ Almasi, boꞌ magsiꞌ lagi, mastiꞌ yaꞌ ya tibuuk ka Tuhan. Sugaꞌ soysoy tattap mmeꞌ ni tōꞌ Almasi, malaingkan tibuuk ya ka Tuhan sampay Anak na.