Kolossa 2:13 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹³ Maruhuꞌ ilay, matoy kam ni mata Tuhan sabapan dusa bi. Bay jaꞌ kam pinagmundaan meꞌ napsu bi buwat kalaatan. Lipara batnaa, lay na kam binuwanan kaallum bahau sabap lay na kam tabeꞌ ni Almasi pinakallum. Maka lay na kam inampun meꞌ Tuhan ni mimon dusa bi.

Kolossa 2:13 ပူးပေါင်းရင်းမြစ်များ

Lukas 15:24

Batan anak ku itu subay ga lay na matoy, pag batnaa llum na pabalik. Bay na ya lungay, pag batnaa luu na ya tatammu.’ Dari siꞌ, lay na sila ballang maglami-lami.

Lukas 15:32

Pasal ariꞌ nu ina, pataꞌ subay paglami-lamihan ta ka ballang mehe sabap iya ina, sibuꞌ du kadari na ka jama bay na matoy llum na pabalik. Bay na ya lungay, pag batnaa luu na tatammu.’ ”

Lukas 9:60

Pag tampung si Isa, lay ya ngandalil, yuk na, “Bbiyahun na ba sagannap ma matoy ngubu jama matoy. Boꞌ kau, sukuꞌ nu ngalataan lahat masaplag umanat mahap pasal pamarinta Tuhan.”

Yahiya 5:21

Batan yana meꞌ Mmaꞌ ku makallum jama lay na matoy, damikiyan meꞌ aku pun Anak na, kapakallum du soysoy karomanan ku.

Yahiya 6:63

Baan ta kam banahan, bong itu tud isi baran ku, mastiꞌ yaꞌ kabuwan kasampulnaan nyawa. Ilooy ya muwan kasampulnaan nyawa, yana Rū Sutsiꞌ. Boꞌ bay bitsala ku ilay siꞌ ningkaam, lakka man iya. Sangkon soysoy pitsayaꞌ ni bitsala ku koleꞌ kasampulnaan nyawa.

Suwat si Pol pa mman Baanan Sukuꞌ si Isa ndooy ni Rom 4:17

Boꞌ sikatuwaꞌ bana ka suwat njawom kitab, ilooy ma yuk Tuhan ni Nabi Ibrahim, “Lai na ko bay peneꞌ ku binuwat mmaꞌ jinisan bangsa.” Na palman looy ilay siꞌ, lay na silay bana binakbul. Batan bong pa Tuhan, basta jama ngikut Nabi Ibrahim pitsayaꞌ, binilang na sila panubuꞌ Nabi Ibrahim san gi oy bangsa da. Na Nabi Ibrahim ilay, halloman yaꞌ gi ya bay anakan, amu-amu ya pitsayaꞌ ni janjiꞌ Tuhan binuwanan anak san ndaꞌ mata tunmanūn meꞌ na tinuman. Bistahun bi doꞌ, mag-umu na ya ga dahatus taun. Inaa ko ngawon, mas mehe gi dapat jama lay na matoy hanak man iya. Sitti Sara pun, bantuk yaꞌ na du luu dapat na battong sabap tupa na. Sugaꞌ san meꞌ looy, yaꞌ du bay maglumba meꞌ Nabi Ibrahim pitsayaꞌ. Batan bistahan na, Tuhan ma asahan na, yaꞌ luu saꞌ yaꞌ tapabuwat na. San jama lay na matoy, tapakallum na du. Damikiyan, bbuwatan ma yaꞌ gi bay luu, mastiꞌ tapaluu na du.

Suwat si Pol pa mman Baanan Sukuꞌ si Isa ndooy ni Rom 6:13

Amay-amay daa na pakoy tabi baran tabi buwat dusa. Gam pin paglillaꞌ tabi na baran tabi labbasakayi pa Tuhan supaya tapakoy man buwat kaintongan. Batan pagkajama tabi maruhuꞌ ma baldusa lay na matoy, pag batnaa, luu na kaallum tabi bahau.

Suwat si Pol pa mman Baanan Sukuꞌ si Isa ndooy ni Rom 8:11

Dan jinis meꞌ halling, pagka Tuhan bay makallum si Isa, mastiꞌ muwan du ya kasampulnaan nyawa ningkitabi man kawasa Rū na ma patannaꞌ na njawom baran tabi.

1 Korin 15:36

Na jama ma nilaw meꞌ looy ilay, yaꞌ san bay pakoy da honaꞌ-honaꞌ da. Subay siꞌ mindoga doꞌ kam ni karuha bigi tinanom. Yaꞌ sina tomoꞌ bong yaꞌ doꞌ bay duhuꞌ llabbong, boꞌ tinambunan meꞌ kadari jama matoy.

1 Korin 15:45

Baran biyasa ina, ilooy ma luu isi na ka lahaꞌ na, luu bay sinuwatan njawom kitab bong pooy meꞌ na bay pinapayak. Baran sibuwa ina yana tanaꞌ bay pinabuwat meꞌ Tuhan lalla, boꞌ na bay pinakallum. Boꞌ ilooy na silay Boꞌ Adam ma ginalla Adam Sibuwa lakka man tanaꞌ junyaꞌ. Sugaꞌ hallom maka hallom na, luu na baw bay lahil Adam ni kaduwa, ginalla Adam Dambuli yana Almasi lakka man sulgaꞌ. Boꞌ luu gi sina pagbiddaan da mehe, batan Adam Sibuwa ilay bay binuwanan kaallum. Boꞌ Adam Dambuli, lay ya dari Rū ma muwan kaallum ma natas saumu-umu. Sangkon, ndang mastiꞌ luu doꞌ duhuꞌ baran ma mandang ni hāl junyaꞌ, boꞌ pasunuꞌ baran ma mandang ni hāl Tuhan.

2 Korin 3:6

Maka Tuhan du sina nganggaosan kami masaplag pagsulutan bahau ni antaraꞌ iya ka manusiyaꞌ mari jama mahap na niiya. Ni pagsulutan bahau ina, Rū Sutsiꞌ ndean meꞌ Tuhan ni manusiyaꞌ. Boꞌ ni pagsulutan sibuwa, saraꞌ bay ndean ni manusiyaꞌ. Ni pagsulutan sibuwa ina, bong jama doman mahap na pa Tuhan, subay bogbogan da sara. Salla na, ilooy du takoleꞌ jama man saraꞌ yana katiksaan nyawa batan yaꞌ luu kabogbog labbasakayi. Boꞌ ni pagsulutan bahau ina, koleꞌ na kitabi kaallum bahau sampay kasampulnaan nyawa saumu-umu man sabapan Rū Sutsiꞌ.

2 Korin 5:19

Dari meꞌ tuu situ umanat bay sohoꞌ Tuhan pinasampay ningkitabi: Njataꞌ kapatoy Almasi, ilooy na man Tuhan muwanan sikamimon manusiyaꞌ lawang man da mahap na niiya sampay yaꞌ na initung meꞌ na dusa da.

Epesus 2:1

Na maruhuꞌ, kaam ina, bong pa Tuhan, matoy jaꞌ kam sabapan dusa bi hangat ngalangga kahandak na. Yaꞌ gi luu kaallum bi bahau.

Epesus 2:11

Na kaam nnaa ma saꞌ bangsa Yahudi, intomun bi doꞌ bay kahalan bi. Maruhuꞌ, kaam ina bay pinag-awnan meꞌ bangsa Yahudi kapil sabap yaꞌ kam bay ngikut saraꞌ da inislam. Padahal, bila jama inislam, ilooy du bay halin, kuwit awpan da. Bong pangatayan da, sibuꞌ du ka maruhuꞌ.

Epesus 5:14

Yaꞌ sina luu oy maka oy na tumampak bong yaꞌ luu dantaꞌ. Sangkon indanan bi palman, ilooy ma yuk na, “Matiꞌ na teꞌ kam. Ddong na kam tuli-tuli buwat dī bi subay ga mayat. Bangun na teꞌ kam boꞌ bi karantaan na meꞌ Almasi.”

Kolossa 2:12

Batan takdang bi ilay bay llobloban pinandi, meꞌ bi ngingat, lay na kam tabeꞌ ni Almasi kinubu. Pag tunga bi man jawom boheꞌ, damikiyan, meꞌ bi ngingat, lay na du kam tabeꞌ ni Almasi pinakallum pabalik. Dari sabap meꞌ bi pitsayaꞌ Tuhan bay makallum Almasi pabalik, kaam pun ina lay na du bay binuwanan kaallum bahau.

1 Timuti 5:6

Sugaꞌ kuwan siga bawu danda ma yaꞌ luu kainagon da sarī man nganduwan dī da ka oy-oy kinanapsuhan meꞌ da, san daa na tulungun bi. Ga bawu danda meꞌ looy ilay, minsan sila llum, sibuꞌ du sila ka matoy bong ni bandingan Tuhan.

1 Timuti 6:13

Na Timuti, ni mata Tuhan ma makallum labbasakayi ka ni mata si Isa Almasi ma bay nawakka mōꞌ kabanahan bong soy ya ni awpan Gubnul Puntus Pilatu, ituu halap ku ningkau:

Hibrani 6:1

Sangkon, ddong na kitabi kataddasan ni tōꞌ ma ndang lay na takoleꞌ tabi jaman tabi bahau bay mmeꞌ ni Almasi. Palanja na kitabi pa pangahati lawom mari pataggu na iman tabi. Ibaratan buwat lumaꞌ, bong kita lay na matangge tehang, san kita yaꞌ na matangge pabalik. Hati na, san yaꞌ na pagsibalik-balik tabi tōꞌ ma ndang katoonan tabi na. Awnan ku ilay siꞌ yana hāl meꞌ sapantun nawbatan dusa, pangando pa Tuhan,

Hibrani 9:14

Na bong lahaꞌ hayop kasutsiꞌ, labi na bong lahaꞌ Almasi saꞌ kasutsiꞌ. Batan lahaꞌ Almasi ina kasutsiꞌ sampay ni honaꞌ-honaꞌ tabi ma bay tamakan sabap meꞌ tabi bay maabak jinisan ma katiksaꞌ ni nyawa tabi. Dari man kawasa Rū Sutsiꞌ ma luu saumu-umu, lay na Almasi nongan umu na pa Tuhan bilang kulban ma yaꞌ luu salla na. Kon na buwat meꞌ looy supaya bean tabi na kahandak Tuhan.

Yaꞌkub 2:17

Damikiyan, bong ina kitabi mangaku pitsayaꞌ ni si Isa, boꞌ yaꞌ du luu kaayaran pabuwat tabi ni pagkahi tabi tandaꞌ hilas meꞌ tabi pitsayaꞌ, malaingkan yaꞌ du luu pūs meꞌ tabi pitsayaꞌ.

Yaꞌkub 2:20

Na kaam ina, bong kam mista sukup pitsayaꞌ jaꞌ ni si Isa, tud kulang pangahati bi. Subay siꞌ soysoy pitsayaꞌ niiya, mastiꞌ subay gapiꞌ ka siga pabuwatan mahap. Bong ina niyaꞌ, yaꞌ du luu pūs meꞌ na pitsayaꞌ.

Yaꞌkub 2:26

Sangkon, hantak bitsala ku ilay siꞌ, bong inawnan pitsayaꞌ ka tangge-tingkōꞌ ayad, tadalil ta pa baran ka napas. Baran ina, bong yaꞌ magnapas, yaꞌ du luu kapuspusan na. Damikiyan, bong yaꞌ luu tangge-tingkōꞌ tabi ayad, yaꞌ du luu kapuspusan tabi pitsayaꞌ.

1 Yahiya 2:12

Siga anak ku, suwatan ta kam batan lay na kam inampun meꞌ Tuhan ni mimon dusa bi man sabapan pabuwatan si Isa Almasi.