Kolossa 2:11 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹¹ Dari san kam saꞌ bangsa Yahudi, pagka tibuuk na kam ka Almasi, sibuꞌ na du kam ka lay na inislam tandaꞌ bi sukuꞌ Tuhan na. Sat na jaꞌ, islaman bi ina, niyaꞌ sibuꞌ karuha na ka islaman biyasa ma lakka man kapandoyan manusiyaꞌ. Batan Almasi ina, meꞌ na bay ngislam kaam, yaꞌ ya bay ngalakkahan kuwit awpan bi, arapun iya bay lakkahan na yana pagkajama bi maruhuꞌ ma nabiat buwat dusa.

Kolossa 2:11 ပူးပေါင်းရင်းမြစ်များ

Malkus 14:58

“Bay situ takale kami lalla tuu magsambatan, bbos-bbos langkat na konoꞌ langga mehe ma bay pinaghulas-sangsaan meꞌ manusiyaꞌ. Pag-anu, boꞌ na konoꞌ matangge sarī njawom tallu ngallaw du ma saꞌ man pabuwatan manusiyaꞌ.”

Lukas 2:21

Na ngabut jaꞌ siꞌ wawuꞌ ngallaw umu anak-anak looy, lay na inislam. Maka lai na du inawnan si Isa, yana awon ma bay ndean leꞌ malaikat looy waktuhan na yaꞌ gi bay pinabattongan meꞌ nneꞌ na.

Salsila siga Rasul 17:24

Iya na sina Tuhan ma bay mapayak junyaꞌ sampay mimon isi na pa jawom, pa poan. Iya na Magbayaꞌ ni mimon-mimon taꞌ babaw junyaꞌ sampay ni sulgaꞌ. Yaꞌ ya maglumaꞌ ni siga langga ma bay jaꞌ pinabuwat meꞌ manusiyaꞌ.

Salsila siga Rasul 7:48

Mingkan ilay, bong inawnan Tuhan Mahatinggi, mastiꞌ yaꞌ du patannaꞌ ni siga langga pinatangge meꞌ manusiyaꞌ. Batan saꞌ ba, luu palman bay sinuwatan meꞌ disu nabi, ilooy ma yuk Tuhan,

Suwat si Pol pa mman Baanan Sukuꞌ si Isa ndooy ni Rom 2:29

Arapun ilooy ya initung siga Yahudi sabanna, yana jama ma luu na pangatayan da bahau, ma muhung sanglit man Tuhan, saꞌ ga sanglit manusiyaꞌ. Batan inislam sabanna ina yana pabuwatan Rū Tuhan njawom atay tabi nutsiꞌ, saꞌ ga pasal kuwit baran kinehet man mogbogan saraꞌ Nabi Musa.

Suwat si Pol pa mman Baanan Sukuꞌ si Isa ndooy ni Rom 6:6

Dari tahati tabi na, pagkajama tabi maruhuꞌ ma maabak dusa, lay na tabeꞌ ni kapatoy si Isa nilansang taꞌ tehang. Sangkon batnaa, kawul-piil tabi yaꞌ na sibuꞌ ka maruhuꞌ. Sibuwa napsu tabi buwat dusa subay ga papuꞌ tabi magbayaan kitabi. Pag batnaa lay na lungay kawasa na njataꞌ tabi.

Suwat si Pol pa mman Baanan Sukuꞌ si Isa ndooy ni Rom 7:24

Sangkon, tud kaluuy-luuy situ ku, batan minsan njawom pikilan ku magkainagon mean saraꞌ Tuhan, gam pin sigi-sigi ku nganduwan napsu ku. Dari njawom atay ku, “Soy sa tu katabang niyaku mari ku kapaddus man komkoman napsu baran ku ma wā niksaꞌ nyawa ku?” Kahapan, magsuku pa Tuhan, lay na ya maddusan aku. Batan lay na ya muwanan aku kasalamatan njataꞌ Papuꞌ tabi si Isa Almasi.

2 Korin 5:1

Na baran tabi itu meꞌ sapantun lumaꞌ sandaꞌ-sandaꞌ jaꞌ man tabi pahantiꞌ halloman tabi taꞌ junyaꞌ. Maka katoonan tabi du, bong lay na langkat, mastiꞌ luu du gantiꞌ na lumaꞌ bahau ndooy ni sulgaꞌ. Intong na, baran bahau. Boꞌ lumaꞌ looy ilay mintu saꞌ na meꞌ hantang lumaꞌ ma pinabuwat meꞌ manusiyaꞌ, batan lakka man Tuhan ka natas saumu-umu.

2 Korin 5:17

Pag batnaa, tabista tabi na, soysoy tibuuk ka Almasi, sibuꞌ du karuha da ka jama bahau bay pinapayak. Pagkajama da maruhuꞌ ma nabiat nulut dī da, yaꞌ na luu. Yaꞌ na sibuꞌ ka maruhuꞌ batan luu na pagkajama da bahau ka kaallum da bahau.

Galatiya 2:20

Pag batnaa, Almasi na llum ni baran ku, saꞌ na aku. Sangkon kahandak na jaꞌ bean ku, saꞌ na kahandak ku. Maka batnaa, halloman ku llum, mangando jaꞌ ku ni Anak Tuhan. Batan maaseꞌ ya niyaku sampay lay na ga paglillaꞌ na dī na pinapatoy kalnaꞌ aku.

Galatiya 5:24

Meꞌ kitabi itu tibuuk na ka si Isa Almasi, bong kinawnan pabuwatan tagga pa Tuhan, timanan tabi na. Meꞌ tabi ngingat, pagkajama tabi maruhuꞌ ma wā pinagbayaan meꞌ napsu tabi, lay na tabeꞌ matoy ni si Isa Almasi llansang taꞌ tehang.

Epesus 4:22

Maka ndang lay na kam binaan ni hāl pagkajama bi maruhuꞌ, bong ibaratan badjuꞌ lamaꞌ, urusan bi na, batan kabinasa sina ni kaallum bi. Maruhuꞌ ilay, bay jaꞌ kam taboo-boo meꞌ napsu bi buwat jinisan kalaatan.

Pilipi 3:3

Sugaꞌ daa kam hidjab. Kitabi ya situ sabana-bana sukuꞌ Tuhan. Batan kitabi na situ pinagmundaan meꞌ Rū Sutsiꞌ numba Tuhan. Maka kitabi itu gāk sabapan pagkatibuuk tabi ka si Isa Almasi. Boꞌ na, poonan tabi salamat sabap meꞌ tabi mangando niiya, saꞌ ga sabapan pabuwatan tabi mogbogan jinisan saraꞌ meꞌ sapantun ngislam.

Kolossa 3:5

Sangkon, timanan bi na mimon kalaatan meꞌ sapantun jina ka mimon jinisan kasabuhan sampay pamiki maat. Maka daa na kam magnapsu mulakab ni altaꞌ. Batan bong ina inaa tabiat bi, sibuꞌ du kam ka numba altaꞌ.

Hibrani 9:11

Lipara, bay na pitu Almasi sampay lay ya dari panghuluꞌ imam ma asahan tabi. Dari takissa tabi na siga supaat poonan pagsulutan bahau ma bay pinasampay meꞌ na. Kuwan langga man na bay paasok mag-imam, patingkat man langga kabboꞌ-bboan tabi. Langga ma bay asok na, yaꞌ luu kulang na sabap saꞌ manusiyaꞌ bay matangge. Intong na, saꞌ silay meꞌ siga pakaradjaan ni junyaꞌ tuu.

Hibrani 9:24

Sangkon na ilay lahaꞌ Almasi na bay tumpa. Pag-anu, lay na ya paasok pa jawom sulgaꞌ. Pag batnaa, ndooy na ya ni awpan Tuhan kalnaꞌ kitabi. Yaꞌ na ya bay paasok ni langga bay pinatangge meꞌ manusiyaꞌ meꞌ ilooy ma bay asok panghuluꞌ imam mattoꞌ. Batan langga looy ilay sipat sadjaꞌ ni Lugar Pinakasutsiꞌ ni sulgaꞌ.