Hibrani 1:2 - Sabahagiꞌ Kitab Tawrat: Panagnaan ni Awwal Jaman maka Kitab Injil

² Sugaꞌ ni masa batnaa, yana ni ahil jaman, Anak na na mismu man Tuhan bay masampay umanat na ningkitabi. Anak na ilay, ilooy na man Tuhan bay mapayak alam sikamimon. Damikiyan man gantaan Tuhan, Anak na du dapu mimon-mimon.

Hibrani 1:2 ပူးပေါင်းရင်းမြစ်များ

Panagnaan 49:1

Pus meꞌ looy, lay na tawag si Yaꞌkub ga anak na. Luu jaꞌ siꞌ sikamimon, yuk na, “Kumpo kam ni bihing ku, boꞌ bi baan ku bong oy kaadaan bi ni sinōng.

Matiyu 13:39

Banta ma naburan lumput yana Ibilis. Timpu ngattom, yana llaw dambuli. Maka sagannap ma tukang ngattom yana siga malaikat.

Matiyu 17:5

Pag-anu, sasang si Pitel siꞌ mitsala, liput na sila meꞌ tayiꞌ baliyu poteꞌ malaas, ninag na. Maka luu gi suwara pōꞌ man jawom tayiꞌ baliyu looy, yuk na, “Inaa ina Anak ku, kakasi ku. Kasulutan ku banahan niiya. Indanan bi bitsala na.”

Matiyu 21:38

Sugaꞌ pag takita leꞌ ga panungguꞌ kabbun looy, gam pin lay sila isun, yuk da, ‘Inaa na sina lalla kapusakahan kabbun tuu. Tu kam, papatoy tabi na mari kapakitabi na kabbun tuu.’

Matiyu 26:63

Pag yaꞌ jaꞌ siꞌ nampung si Isa, mitsala na baw bbalik panghuluꞌ imam, yuk na, “Sapahan nu teꞌ ba batnaa ni awpan Tuhan sabanna ma llum saumu-umu bong bana kau na Almasi, yana Anak Tuhan.”

Matiyu 28:18

Pag-anu, yuk si Isa ninsila, “Sikamimon kapatut ni sulgaꞌ sampay ni junyaꞌ lay na ndean aku.

Matiyu 3:17

Maka luu suwara man sulgaꞌ, yuk na, “Ituu tu Anak ku, kakasi ku. Kasulutan ku banahan niiya.”

Malkus 1:1

Ituu tu umanat mahap pasal si Isa Almasi, yana Anak Tuhan. Duhuꞌ-duhuꞌ,

Malkus 12:6

“Katapusan, disu sa takapin tasohoꞌ na, yana anak na na mismu, kakasi na. Honaꞌ-honaꞌ na, ‘Bong itu anak ku na mismu sohoꞌ ku, mastiꞌ magmaltabat na sila niiya.’

Malkus 12:7

Sugaꞌ pag takita leꞌ ga panungguꞌ kabbun looy, yuk da padisu-padisu, ‘Inaa na sina lalla kapusakahan kabbun tuu. Tu kam, papatoy tabi na mari kapakitabi na kabbun tuu.’

Yahiya 1:10

Sūꞌ looy ilay yana Palman man Tuhan bay mapayak junyaꞌ. Salla na, san ya bay pitu pa junyaꞌ, yaꞌ san tasayu jama bong soy ya.

Yahiya 1:14

Na Palman ilay bay dari manusiyaꞌ sampay lay gi pingkaꞌ magdambuwaꞌ ka kami. Biddaꞌ na ehe aseꞌ na maka bana sadjaꞌ mimon bitsala na. Kami mismu bay kasakup ehe kaayaran na, yana kaayaran Anak tungga ma bay pitu lakka man Mmaꞌ na Tuhan.

Yahiya 1:3

Boꞌ Palman ilay, iya na man bay mapayak mimon-mimon. Niyaꞌ gi silay luu oy maka oy na bong saꞌ Palman man bay mapayak.

Yahiya 13:3

Pus da siꞌ mangan, lay doꞌ si Isa nangge boꞌ na ngurusan juba na. Pag-anu, boꞌ na basahan ka tuwala. Na iya siꞌ tu, katoonan na du lay na dean Mmaꞌ na niiya kawasa-kapatut njataꞌ mimon-mimon. Maka katoonan na du iya lakka man Tuhan, damikiyan, Tuhan du polean na. Sugaꞌ san meꞌ looy, lay gi ya magpadiyoꞌ ni siga mulit na.

Yahiya 13:32

Dari pagka ina mintu Tuhan koleꞌ kabantugan njataꞌ Anak Manusiyaꞌ, magti du sina Tuhan muwanan iya kabantugan.”

Yahiya 15:15

Na meꞌ kaam ina ngawnan aku Papuꞌ bi, subay ga kam ata ku. Sugaꞌ bong inawnan ata ina, yaꞌ katoonan da bong oy garaꞌ papuꞌ da. Sangkon yaꞌ na kam awnan ku ata ku. Arapun awnan ta na kam bagay, batan lay na kam baan ku mimon ma bay takale ku man Mmaꞌ ku.

Yahiya 16:15

Mimon ma luu ni Mmaꞌ ku, niyaku du. Sangkon mimon ma karomanan na pinalahil ni manusiyaꞌ, lay na hinalap niyaku. Boꞌ hinalap na baw meꞌ ku ni Rū Sutsiꞌ. Inaa sina kon ku bay māꞌ Rū Sutsiꞌ malahil ningkaam ilooy ma lakka man aku.”

Yahiya 17:2

Lay na ku buwanan nu kapatut ni jataꞌ mimon manusiyaꞌ supaya ku kabuwan kasampulnaan nyawa ma yaꞌ luu katapusan na ni sagannap ma bay hinalap meꞌ nu niyaku.

Yahiya 3:16

Biddaꞌ na sina ehe aseꞌ Tuhan ni manusiyaꞌ. Sangkon lay na pinaglillaꞌ meꞌ na Anak tungga na pinapatoy supaya soysoy pitsayaꞌ niiya yaꞌ na tanalkaꞌ, gam pin koleꞌ gi kasampulnaan nyawa ma yaꞌ luu katapusan na.

Yahiya 3:25

Na sasang ga si Yahiya ndooy, kasohean mulit na lay magjawap ka disu pagkahi da Yahudi pasal aturan agama da hāl meꞌ nutsiꞌ.

Yahiya 5:26

Batan yana meꞌ Mmaꞌ ku poonan kaallum, damikiyan man gantaan na, aku pun poonan kaallum du.

Yahiya 5:27

Maka sabap aku Anak Manusiyaꞌ, lay na du ku buwanan Mmaꞌ ku kapatut ngahukum manusiyaꞌ.

Yahiya 9:29

Kami tu, katoonan kami Tuhan bay magpalman ni Nabi Musa. Boꞌ lalla looy, yaꞌ san katoonan kami bong lakka man ninggai ya.”

Salsila siga Rasul 10:36

“Batnaa pasampay ku na ningkaam umanat mahap ma lay na palahil Tuhan duhuꞌ ningkami bangsa Israil. Meꞌ tuu: Luu na situ jalan man manusiyaꞌ mahap na pa Tuhan man sabapan pabuwatan si Isa Almasi, yana Papuꞌ manusiyaꞌ sikamimon.

Salsila siga Rasul 2:17

Yuk Tuhan, ‘Ni ahil jaman, patannaꞌ ku Rū ku njataꞌ bangsa sikamimon. Kuwan siga anak bi, danda-lalla, masampay na siga umanat ma pinalahil meꞌ Rū ku ninsila. Kuwan kalallahan bi ma anak-anak bahau, pinakitahan na siga pandapat. Kuwan ga kalallahan bi pun ma toa na, luu du palahil Rū ku ninsila njawom siga upihan da.

Suwat si Pol pa mman Baanan Sukuꞌ si Isa ndooy ni Rom 8:17

Maka pagka anak Tuhan na kitabi, mastiꞌ mimon supaat ma dean Tuhan ni Almasi, dean na du sina ningkitabi. Maka hampit na du sina mintu tabi ni kabantugan Almasi basta kitabi mangatas jaꞌ natasan jinisan kabinsanaan meꞌ niiya.

1 Korin 2:7

Arapun tōꞌ ma awnan ku itu yana pasal lawom akka Tuhan ka garaꞌ na ma yaꞌ gi bay pinalahil maruhuꞌ. Yaꞌ gi luu junyaꞌ, ndang luu na garaꞌ Tuhan matabeꞌ kitabi ni kabantugan na.

1 Korin 8:6

Sugaꞌ bong baw ningkitabi, basta disu du Tuhan, yana Mmaꞌ tabi ma bay mapayak mimon-mimon. Maka danan tabi itu llum kalnaꞌ iya. Damikiyan, disu du Papuꞌ tabi, yana si Isa Almasi ma bay man Tuhan mapayak mimon-mimon. Maka njataꞌ na du sina man tabi koleꞌ kaallum bahau.

Galatiya 4:4

Sugaꞌ pag taabut na gantaan Tuhan, lay na papitu na Anak na pa junyaꞌ, boꞌ na dari manusiyaꞌ pinamaddihan leꞌ danda meꞌ karuha kitabi du. Maka iya ilay bay du lumingkaꞌ njawman sakup saraꞌ Nabi Musa.

Epesus 1:10

Na garaꞌ Tuhan ilay meꞌ tuu: Pag mintu taabut waktu bay ginantaꞌ meꞌ na, labba man junyaꞌ sampay pa sulgaꞌ subay tinibuuk mimon-mimon pa jawman sakup Almasi.

Epesus 3:9

Boꞌ lay gi ku sinohoꞌ meꞌ ilooy ma bay mapayak mimon-mimon, yana Tuhan, mahatiyan jama garaꞌ na ma bay llimbuhan maruhuꞌ.

Hibrani 1:5

Buktiꞌ na langkaw gi ya man siga malaikat, luu palman njawom kitab, ilooy ma yuk Tuhan ni Almasi, “Kau ina Anak ku. Labba man llaw tuu tumatandaꞌ na aku Mmaꞌ nu.” Boꞌ siga malaikat ina, yaꞌ luu san disu bay pingkaꞌ ginalla meꞌ looy. Damikiyan, saꞌ du silay malaikat awnan Tuhan jaman na bay magpalman, ilooy ma yuk na, “Aku na Mmaꞌ na, maka iya na Anak ku.”

Hibrani 1:8

Boꞌ ni Anak na ina, yuk Tuhan, “Meꞌ kau ina Tuhan, mastiꞌ natas saumu-umu pagkasultan nu. Maka intong jaꞌ meꞌ nu marintahan siga raayat nu.

Hibrani 2:3

Na bong meꞌ looy bay katuwaꞌ ninsila, pooy meꞌ tabi kailag mulkaꞌ Tuhan bong pabiya tabi umanat kasalamatan, meꞌ naa na ehe hagaꞌ na? Umanat looy ilay, Papuꞌ Isa mismu bay duhuꞌ masaplag. Pag-anu, kuwan sila ma bay kale niiya balharapan, sila na baw bay masaplag sampay muwanan kitabi buktiꞌ tud bana bitsala na.

Hibrani 3:6

Boꞌ Almasi baw ilay, saꞌ ya tindog meꞌ karuha Nabi Musa, arapun iya ilay tud Anak Tuhan mismu kanaalla magtakōk ni siga jama lumaꞌ Mmaꞌ na. Boꞌ kitabi na situ initung jama lumaꞌ Tuhan basta tattap jaꞌ pangando tabi ni Almasi, maka basta yaꞌ jaꞌ kitabi jamu ngagad ni mimon ma bay njanjiꞌ meꞌ Tuhan ni siga sukuꞌ na.

Hibrani 4:14

Lipara luu du panghuluꞌ imam asahan tabi ma yaꞌ luu sibuꞌ sabanding na, lay na duhuꞌ pilay pa sulgaꞌ, yana si Isa Almasi, Anak Tuhan. Sangkon, subay yaꞌ labbahan tabi ilooy ma kinapitsayaan meꞌ tabi pasal iya.

Hibrani 5:8

Iya ilay, san ya Anak Tuhan, lay du ya lumingkaꞌ njawom jinisan kabinsanaan supaya takissa na parasahan manusiyaꞌ mean kahandak Tuhan tanne-pasuꞌ.

Hibrani 7:28

Boꞌ sagannap ma bay inuwakilan magpanghuluꞌ imam njawman saraꞌ Nabi Musa, saliꞌ-saliꞌ sila manusiyaꞌ sadjaꞌ ma ndang dusahan pa Tuhan. Kahapan, hallom maka hallom na, lay na baw Tuhan napa subay Anak na inuwakilan magpanghuluꞌ imam saumu. Boꞌ Anak na ina yaꞌ luu dusa na atawa salla na samasakali.

Hibrani 7:3

Si Melkisedek ilay saꞌ meꞌ kaimaman ilooy kasohean. Yaꞌ luu induꞌ-mmaꞌ na atawa usuwan kabboꞌ-bboan na. Damikiyan, kaallum na yaꞌ du luu panagnaan na maka yaꞌ du luu katapusan na. Batan meꞌ Anak Tuhan du ya mag-imam saumu-umu.

Hibrani 9:26

Batan bong siꞌ ilay yaꞌ bay tasakup lahaꞌ na muwasan dusa sakayi labba du, malaingkan talpaksaꞌ ya min meka malasahi labba man waktu junyaꞌ bay pinapayak. Sugaꞌ iya ilay bay pitu pa junyaꞌ ni masa batnaa ma pinag-awnan ahil jaman supaya tasongan na na umu na man ngalakkahan dusa tabi sakayi labba du.

1 Pitel 1:20

Halloman junyaꞌ yaꞌ gi bay pinapayak, ndang lay na bay ginantaꞌ meꞌ Tuhan Almasi maddusan kitabi man komkoman Ibilis. Sugaꞌ noy ni timpu batnaa na, ni ahil jaman, boꞌ luu na Almasi bay pinalahil meꞌ Tuhan ningkaam.

2 Pitel 3:3

Sugaꞌ ilooy duhuꞌ subay tahati bi meꞌ tuu: Ni ahil jaman, meka sina mintu pangaludjum. Ilooy du meꞌ punu njawom atay da nganduwan napsu da sadjaꞌ.

Suwat Lakka man si Jūd 1:18

Saꞌ ba, ndang lay sila halling ningkaam, luu ni sinōng pōꞌ siga pangaludjum ma nganduwan napsu da sadjaꞌ ni jinisan hāl tagga pa Tuhan?