Galatiya 4:26 - Sabahagiꞌ Kitab Tawrat: Panagnaan ni Awwal Jaman maka Kitab Injil

²⁶ Boꞌ nda Nabi Ibrahim, ilooy ma saꞌ ata, yana Sitti Sara, yana sipat ni daira sarī yana Jerusalem ni sulgaꞌ. Batan yana meꞌ Sitti Sara ka anak na saꞌ ata, damikiyan, siga raayat ni daira looy pun saꞌ du ata. Dari pagka mimon kitabi ma pitsayaꞌ ni Almasi bay dari siga raayat ni daira looy, dari ko ngawon, inaa na daira ma tabilang nneꞌ tabi.

Galatiya 4:26 ပူးပေါင်းရင်းမြစ်များ

Hibrani 12:22

Boꞌ ningkitabi itu batnaa, sarī na punu bay inabut meꞌ tabi. Awon na Punu Zayon, daira Tuhan sabanna ma llum saumu-umu, yana daira Jerusalem man sulgaꞌ. Ndooy ilay, libu-libuhan malaikat kumpo-kumpo njawom kagakan.

Pilipi 3:20

Boꞌ kitabi baw tu sukuꞌ Tuhan, lahat tabi sabanna yana sulgaꞌ. Maka ilooy ma agad tabi lakka man sulgaꞌ du, yana Papuꞌ tabi si Isa Almasi ma tukang nalamat kitabi.

Siga Pakaradjaan bay Pinalahil 21:2

Maka luu gi takita ku duwai man sulgaꞌ daira sutsiꞌ, yana Jerusalem bahau lakka man Tuhan. Daira looy siꞌ tud dorogan. Bong nnaꞌ ta pa danda, subay ga disu pangantin danda ayad gamis na. Maka lakkop na ya meꞌ mmas man na magpalingkat banahan pag taabut na kinawin ka pangantin ma lalla.

Siga Pakaradjaan bay Pinalahil 3:12

“Na soysoy ina kanaalla mmeꞌ niyaku tanne-pasuꞌ, malaingkan pabuwat ku ya meꞌ karuha tehang pagon ni lumaꞌ Tuhan batan tattap ndooy na ya saumu-umu. Maka sāpan ku ya ka awon Tuhan sampay awon daira Tuhan, yana Jerusalem ma bahau ma pinaduwai man sulgaꞌ lakka man Tuhan. Damikiyan sāpan ku du ya ka awon ku ma bahau.

Galatiya 4:22

Njawom kitab ilay, luu bay sinuwatan pasal Nabi Ibrahim bay anakan duwa lalla. Disu yana anak na ka ata na. Kuwan ilooy disu, yana anak na ka nda na poon ma saꞌ ata.

Suwat si Pol pa mman Baanan Sukuꞌ si Isa ndooy ni Rom 6:18

Batnaa lay na kam pinaddusan man sakup dusa maka lay na kam maglillaꞌ pa Tuhan buwat kaintongan.

Suwat si Pol pa mman Baanan Sukuꞌ si Isa ndooy ni Rom 6:14

Dari yaꞌ na kitabi pinagbayaan meꞌ napsu tabi buwat dusa sabap njawman sakup aseꞌ Tuhan na kitabi. Saꞌ na kitabi njawman sakup saraꞌ Nabi Musa.

Yahiya 8:36

Sangkon, bong anak papuꞌ bay maddusan disu ata, mastiꞌ paddus jaꞌ ya man pagkaata na. Damikiyan ningkaam, bong Anak Tuhan bay maddusan kaam, malaingkan bohoꞌ sabana-bana paddus na kam man pagkaata bi.

1 Pitel 2:16

Kaam ina, lay na kam pinaddusan man mulkaꞌ Tuhan. Sugaꞌ daa jaꞌ buwatun bi kasumunsayaan bi subay ga katarangan man bi buwat kalaatan. Gam pin, bogbogan bi arat-tabiat ma ndang hinolat ni siga ata Tuhan.

Galatiya 5:1

Na siga danganakan, kon ilay Almasi bay maddusan kitabi man jawom sakup saraꞌ supaya kitabi sumunsayaꞌ na. Sangkon amay-amay daa na kam kuhi pinahata meꞌ saraꞌ pabalik. Takkoan bi na kasumunsayaan bi.

Siga Pakaradjaan bay Pinalahil 17:5

Taꞌ tundun danda looy siꞌ, luu bay sinuwatan awon lawom kamaatunan na. Batsahan na: “Aku itu Babilon, daira tanyag, induꞌ siga puta ka poonan mimon kasabuhan taꞌ junyaꞌ.”

Siga Pakaradjaan bay Pinalahil 12:1

Pag-anu siꞌ, luu na baw kahaylan-haylan takita ku taꞌ langit. Batan luu ndooy disu danda ma pamakoy na mataallaw, boꞌ lay gi nangge taꞌ buwan. Maka luu sapu-duwa potean taꞌ kōk na meꞌ bantuk karuna.