Galatiya 3:16 - Sabahagiꞌ Kitab Tawrat: Panagnaan ni Awwal Jaman maka Kitab Injil

^16-17 Meꞌ naa du sina karuha bay pagsulutan Tuhan ka Nabi Ibrahim. Yaꞌ du dari sinampunan atawa kinulangan. Hati na, janjiꞌ Tuhan ni pagsulutan da ka Nabi Ibrahim yaꞌ du tasampunan ka saraꞌ Nabi Musa ma bay pasunuꞌ paddus mpat hatus tallumpūꞌ taun. Na bong ina lay na baw sinampunan ka saraꞌ, malaingkan yaꞌ na sā pagsulutan Tuhan ka Nabi Ibrahim. Na njawom janjiꞌ Tuhan ni Nabi Ibrahim, yuk na, “Bbos-bbos mimon kabangsa-bangsahan sinupaatan man sabapan panubuꞌ nu.” Na jaman Tuhan ilay bay halling, “man sabapan panubuꞌ nu,” saꞌ silay ga panubuꞌ Nabi Ibrahim ma meka bay awnan Tuhan, arapun tuwaꞌ pa disu du panubuꞌ na, yana Almasi.

Galatiya 3:16 ပူးပေါင်းရင်းမြစ်များ

Panagnaan 12:3

Sagannap ma mitsala kau pa kaayaran, supaatan ku du sina. Sugaꞌ soysoy baw ina numpaan kau, sumpaan ku du. Bbos-bbos kau ina poonan man mimon kabangsa-bangsahan taꞌ babaw junyaꞌ koleꞌ supaat.”

Panagnaan 12:7

Pag-anu siꞌ, tinammuhan na baw si Ibram meꞌ Tuhan, yuk na, “Ituu na situ lahat ma pamuwan ku ga panubuꞌ nu bbos-bbos.” Pag-anu, lay nambak si Ibram batu binuwat pangulbanan man na ngulban pa Tuhan batan ndooy man na bay tinammuhan meꞌ Tuhan.

Panagnaan 15:5

Pus meꞌ looy, lay na baw si Ibram binoo meꞌ Tuhan pa poan maka yuk na, “Pahangad ko pilay pa taꞌ langit. Ndaun teꞌ bong taitung nu ga potean naa. Meꞌ naa du sina eka panubuꞌ nu bbos-bbos.”

Panagnaan 21:12

Sugaꞌ yuk Tuhan niiya, “Daa na ko ba susahan si Ismail ka ata bi si Hajal. Duwanun na jaꞌ oy-oy sohoꞌ si Sara ningkau. Ndang-ndang si Isahak du bay peneꞌ ku binuwat poonan panubuꞌ ma bay janjiꞌ ku ningkau.

Panagnaan 49:10

Maka Juda, luu sina mintu siga panubuꞌ nu magsunuꞌ-sunuꞌ magsultan ni lahat tabi. Boꞌ luu gi sina mintu lahil panubuꞌ nu ilooy ma yaꞌ na kuhi labbos pagkasultan na saumu. Iya ina mintu yana sultan ma inasip meꞌ mimon kabangsa-bangsahan.

Matiyu 1:1

Ituu tu usuwan siga pangkatan kabboꞌ-bboan si Isa Almasi, panubuꞌ Sultan Daud, yana disu panubuꞌ Nabi Ibrahim.

Salsila siga Rasul 3:25

“Kitabi itu siga Yahudi yana panubuꞌ siga kanabi-nabihan looy ma bay masampay siga janjiꞌ Tuhan ni bangsa tabi. Maka tabeꞌ na du kitabi ni pagsulutan Tuhan ka kabboꞌ-bboan tabi. Na njawom pagsulutan da, lay nganjanjiꞌ Tuhan ni bboꞌ tabi Nabi Ibrahim, yuk na, ‘Bbos-bbos mimon kabangsa-bangsahan sinupaatan man sabapan panubuꞌ nu.’

Suwat si Pol pa mman Baanan Sukuꞌ si Isa ndooy ni Rom 12:5

Damikiyan, meꞌ kitabi itu binilang baran Almasi, san kitabi meka, tibuuk du kitabi. Maka siguna-guna sina kitabi saliꞌ-saliꞌ.

Suwat si Pol pa mman Baanan Sukuꞌ si Isa ndooy ni Rom 4:13

Na ni awwal jaman, ndang bay nganjanjiꞌ Tuhan ni Nabi Ibrahim ngandean junyaꞌ niiya sampay ni ga panubuꞌ na bbos-bbos. Na Tuhan ilay bay nganjanjiꞌ meꞌ looy, saꞌ ga sabap meꞌ Nabi Ibrahim bay mogbogan saraꞌ, arapun sabap meꞌ na pitsayaꞌ pa Tuhan. Sampay ilooy na man na bay initung intong. Sangkon, bong inawnan mogbogan saraꞌ, yaꞌ luu kabigiꞌ-bigian na ni bay janjiꞌ Tuhan ni Nabi Ibrahim.

Suwat si Pol pa mman Baanan Sukuꞌ si Isa ndooy ni Rom 4:16

Sangkon, man gantaan Tuhan, isu-isu sila ma pitsayaꞌ niiya koleꞌ siga supaat ma bay njanjiꞌ meꞌ na. Siga supaat looy ilay ndean meꞌ Tuhan ni kaehe aseꞌ na ni sikamimon ma binilang meꞌ na siga anak Nabi Ibrahim. Na siga anak ma awnan ku ilay siꞌ, saꞌ silay sat siga Yahudi ma pitsayaꞌ, arapun sampay mimon bangsa ma pitsayaꞌ ni janjiꞌ Tuhan meꞌ bay jaman Nabi Ibrahim. Sangkon Nabi Ibrahim ilay binilang na mmaꞌ sikamimon manusiyaꞌ ma pitsayaꞌ.

Suwat si Pol pa mman Baanan Sukuꞌ si Isa ndooy ni Rom 9:4

Tud senseng ehe kabantugan njataꞌ da. Bistahun bi doꞌ, sila ilay bangsa ku Israil, yana bangsa bay pineneꞌ meꞌ Tuhan binuwat anak na. Maka sila du man Tuhan bay makitahan ehe kawasa na. Boꞌ ninsila lagi man Tuhan bay mōꞌ siga pagsulutan sampay man na bay ngandean saraꞌ na ka siga aturan pasal lanan meꞌ numba iya. Damikiyan, ninsila du man Tuhan bay muwan jinisan janjiꞌ.

1 Korin 12:12

Na san yaꞌ sibuꞌ-sibuꞌ ladjikiꞌ bay ndean kitabi, masi du sina kitabi tibuuk. Mamintang kam ni baran jama. Tiyap-tiyap disu baran, san meka kalangkapan na, disu baran du ya masi. Damikiyan, kitabi pun itu, san kitabi meka, binilang disu baran du, batan ginalla kitabi baran Almasi.

1 Korin 12:27

Na hantak bitsala ku siꞌ, mimon kitabi ma pitsayaꞌ ni Almasi binilang disu baran, yana baran Almasi. Maka saliꞌ-saliꞌ kitabi binilang kalangkapan ni baran na.

2 Korin 11:22

Bong pinag-abbu meꞌ da sila bangsa Hibrani, aku pun bangsa Hibrani du. Bong yuk da sila panubuꞌ si Israil ka Nabi Ibrahim, aku pun iyadu.

Galatiya 3:19

Na adakala yuk kasohean na baw mintu, “Bong meꞌ naa, ongoy baw lay lagi Tuhan malahil saraꞌ na?” Bong yaꞌ katoonan bi, ngkon ilay saraꞌ bay pinalahil supaya tumatandaꞌ ni manusiyaꞌ dusahan sila pa Tuhan. Sugaꞌ saraꞌ ina, luu ka ngkoran na. Batan pag luu jaꞌ bay takka panubuꞌ looy disu ma bay njanjiꞌ meꞌ Tuhan, saꞌ na saraꞌ padduman tabi. Saraꞌ Tuhan ilay, bay sinohoꞌ meꞌ na pinalahil ni siga malaikat pa mman Nabi Musa. Pag-anu, boꞌ pinasampay na baw meꞌ Nabi Musa ni kabboꞌ-bboan kami.

Galatiya 3:8

Sarī gi, man maruhuꞌ-ruhuꞌ lagi, ndang luu na garaꞌ Tuhan ngitung manusiyaꞌ intong lakka man mimon kabangsa-bangsahan basta sila pitsayaꞌ ni Almasi. Umanat mahap looy ilay siꞌ bay pinalahil meꞌ Tuhan ni Nabi Ibrahim. Batan njawom kitab, yuk Tuhan niiya, “Bbos-bbos kau ina poonan man mimon kabangsa-bangsahan taꞌ babaw junyaꞌ koleꞌ supaat.”

Epesus 5:32

Na suwat looy ilay siꞌ, luu gi kamaatunan na lawom ma yaꞌ gi bay kinatoonan maruhuꞌ. Batan ilooy ilay tuwaꞌ du pa Almasi ka kitabi sikamimon ma pitsayaꞌ niiya, batan tibuuk na kitabi ka iya meꞌ karuha jama sitampu.

Kolossa 2:19

Ga jama meꞌ looy ilay yaꞌ na ngantanan tōꞌ Almasi. Padahal Almasi ina, yana takōk ningkitabi ma binilang baran na. Iya sina poonan man mimon kalangkapan baran na koleꞌ oy-oy gunahan ninsila. Dari tiyap-tiyap ina baran langkit ka kōk na, tibuuk jaꞌ sina sikamimon. Mimon kalangkapan na sama-sama usik. Boꞌ magsasōng na pin meꞌ da sampulnaꞌ magbēꞌ ka gantaan Tuhan.

Kolossa 3:11

Dari pagka tibuuk na kitabi ka Almasi saliꞌ-saliꞌ, yaꞌ na situ kitabi minig jama. Yaꞌ na kitabi magsibiddaꞌ bong jama bangsa Yahudi atawa ssaꞌ, bong jama bay inislam atawa niyaꞌ, iskulan atawa niyaꞌ, bong ata atawa ssaꞌ. Isu-isu Almasi pandang tabi. Boꞌ iya ina luu na patannaꞌ njawom atay tabi sikamimon ma pitsayaꞌ niiya.