Galatiya 3:14 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹⁴ Na si Isa Almasi ilay bay maglillaꞌ pinapatoy supaya takoleꞌ meꞌ mimon kabangsa-bangsahan supaat ma bay njanjiꞌ ni Nabi Ibrahim, maka supaya kitabi ma pitsayaꞌ, pinaasokan na Rū Sutsiꞌ ma bay njanjiꞌ meꞌ Tuhan.

Galatiya 3:14 ပူးပေါင်းရင်းမြစ်များ

Panagnaan 22:18

Maka bbos-bbos ina mimon kabangsa-bangsahan sinupaatan man sabapan panubuꞌ nu sabap meꞌ nu bay ngasip niyaku.’ ”

Lukas 11:13

Na bong kaam manusiyaꞌ pandoy muwan pakaradjaan ayad ni anak bi san meka kalaatan bi, labi na Mmaꞌ bi Tuhan ni sulgaꞌ saꞌ pandoy muwanan kaam pakaradjaan ayad. Sampay Rū Sutsiꞌ, dean na du sina soysoy maku.”

Lukas 24:49

Yaꞌ na du sina hallom, papitu ku sa Rū Sutsiꞌ ma bay njanjiꞌ meꞌ Mmaꞌ ku pa mman bi. Ngagad jaꞌ kam ni daira tuu ngkod-ngkoran yaꞌ gi kam bay pinatannaan kawasa man sulgaꞌ meꞌ Rū Sutsiꞌ.”

Yahiya 7:39

Na boheꞌ llum ilay ma bay inawnan meꞌ si Isa, yana Rū Sutsiꞌ ma song pinaasok ni soysoy pitsayaꞌ niiya. Sugaꞌ hallang-hallangan looy, yaꞌ gi bay pinaasok Rū Sutsiꞌ pa jawom atay jama sabap yaꞌ gi si Isa bay pabeleng pa sulgaꞌ.

Salsila siga Rasul 2:33

Boꞌ lay gi ya inangkat pa sulgaꞌ sampay lay na pinatingkōꞌ ni bihing Mmaꞌ na Tuhan huwin pa kawnan njawom kabantugan mehe. Boꞌ lay gi ya binuwanan kapatut matannaan siga sukuꞌ na Rū Sutsiꞌ meꞌ ndang bay njanjiꞌ meꞌ Mmaꞌ na. Dari ituu tu siꞌ ma bahau jaꞌ bay takita bi sampay takale bi ni baanan kami poonan man Rū Sutsiꞌ ma bay pinatannaꞌ ningkami.

Salsila siga Rasul 4:12

Na iya ilay, isu-isu iya kasalamat ningkitabi. Batan yaꞌ luu taꞌ babaw junyaꞌ sarī man iya bay papitu Tuhan nalamat manusiyaꞌ.”

Salsila siga Rasul 5:32

Kami itu, lay jaꞌ kami pineneꞌ meꞌ si Isa tukang masaplag mimon ma bay tasakup kami ni bay kadarihan na. Subay kam pitsayaꞌ ni umanat kami batan luu na sina Rū Sutsiꞌ mōꞌ buktiꞌ tud mawjud bitsala kami. Boꞌ Rū Sutsiꞌ ina lay na ndean meꞌ Tuhan ni mimon ma ngasip niiya.”

1 Korin 12:13

Lay na kitabi tinibuuk meꞌ Tuhan pa disu baran sa batan lay na kitabi saliꞌ-saliꞌ pinaasokan disu Rū, yana Rū Sutsiꞌ. Kasohean kitabi bangsa Yahudi, kasohean ssaꞌ, kasohean ata, kasohean ssaꞌ, sugaꞌ saliꞌ-saliꞌ kitabi bay pinaasokan Rū Sutsiꞌ.

2 Korin 1:22

Damikiyan iya na du sina bay maasok Rū Sutsiꞌ pa jawom atay tabi tandaꞌ sukuꞌ na na kitabi. Boꞌ Rū Sutsiꞌ ina yana buktiꞌ man tabi kasiguru koleꞌ mimon ma bay njanjiꞌ meꞌ Tuhan ni sukuꞌ na.

Galatiya 3:16

Meꞌ naa du sina karuha bay pagsulutan Tuhan ka Nabi Ibrahim. Yaꞌ du dari sinampunan atawa kinulangan. Hati na, janjiꞌ Tuhan ni pagsulutan da ka Nabi Ibrahim yaꞌ du tasampunan ka saraꞌ Nabi Musa ma bay pasunuꞌ paddus mpat hatus tallumpūꞌ taun. Na bong ina lay na baw sinampunan ka saraꞌ, malaingkan yaꞌ na sā pagsulutan Tuhan ka Nabi Ibrahim. Na njawom janjiꞌ Tuhan ni Nabi Ibrahim, yuk na, “Bbos-bbos mimon kabangsa-bangsahan sinupaatan man sabapan panubuꞌ nu.” Na jaman Tuhan ilay bay halling, “man sabapan panubuꞌ nu,” saꞌ silay ga panubuꞌ Nabi Ibrahim ma meka bay awnan Tuhan, arapun tuwaꞌ pa disu du panubuꞌ na, yana Almasi.

Galatiya 3:2

Tilaw ta teꞌ kam. Pooy meꞌ bi bay koleꞌ Rū Sutsiꞌ? Man sabapan meꞌ bi kilay bay mogbogan saraꞌ? Mastiꞌ ssaꞌ silay! Arapun ngkon bi ilay bay pinaasokan Rū Sutsiꞌ sabap meꞌ bi bay pitsayaꞌ ni umanat mahap ma bay takale bi man kami.

Galatiya 4:6

Dari pagka anak Tuhan na kitabi, lay na kitabi pinaasokan leꞌ Tuhan Rū Anak na pa jawom atay tabi. Maka ilooy na poonan tabi dari na ngawnan Tuhan Mmaꞌ tabi.

Epesus 2:18

Dari sabapan Almasi, labba man kami siga Yahudi sampay na kaam ma saꞌ Yahudi, saliꞌ-saliꞌ na kitabi kapatapit pa mman Mmaꞌ tabi Tuhan. Batan saliꞌ-saliꞌ na kitabi lay pinaasokan Rū na, yana Rū Sutsiꞌ.

Epesus 2:22

Dari meꞌ kaam ina tibuuk na du ka Almasi, lay na du kam nilangkit ni lumaꞌ looy man Rū Tuhan patannaꞌ.

Epesus 3:16

Paku ku duwaa pa Tuhan Sangat Kawasa, kamura-murahan ni kaehe kawasa na ka aseꞌ na, binuwanan du kam leꞌ Rū na gaos mari magsasōng na pin taggu iman bi.

Epesus 4:30

Maka daa pasusahun bi Rū Sutsiꞌ ka kawul-piil ma naggaꞌ ni kahandak na. Iya ina yana katakkoan man tabi katantu sukuꞌ Tuhan na kitabi. Maka iya du sina katakkoan man tabi katantu mastiꞌ pinaddusan jaꞌ kitabi man mimon kalaatan junyaꞌ bbos-bbos.

1 Pitel 1:22

Na pagka lay na du kam mmeꞌ ni tōꞌ sabanna, pasutsiꞌ na pin sina pangatayan bi. Sangkon pakutuun bi na meꞌ bi sikaaseꞌ-kaaseꞌ. Maka subay hilas aseꞌ bi meꞌ karuha jama magdanganakan.

1 Pitel 3:9

Sagannap ma buwat maat ningkaam, daa na tungbasan bi ka maat. Damikiyan, bong luu madiyoꞌ kaam, san daa na umbangan bi. Gam pin buwat gi kam kaayaran ninsila, batan ndang inaa sina kahandak Tuhan ningkaam. Bong siꞌ inaa bean tabi, mastiꞌ sinupaatan jaꞌ kitabi meꞌ Tuhan.