Epesus 4:5 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁵ Maka kabanahan ma kinapitsayaan meꞌ tabi sibuꞌ du. Papuꞌ tabi pun disu du. Damikiyan, pandihan tabi pun disu du.

Epesus 4:5 ပူးပေါင်းရင်းမြစ်များ

Matiyu 28:19

Sangkon, lataan bi na junyaꞌ boꞌ toan bi na sikamimon bangsa pasal aku supaya sila mmeꞌ niyaku. Maka pandihun bi na sila ni awon Mmaꞌ ku, Anak na, ka Rū Sutsiꞌ.

Salsila siga Rasul 10:36

“Batnaa pasampay ku na ningkaam umanat mahap ma lay na palahil Tuhan duhuꞌ ningkami bangsa Israil. Meꞌ tuu: Luu na situ jalan man manusiyaꞌ mahap na pa Tuhan man sabapan pabuwatan si Isa Almasi, yana Papuꞌ manusiyaꞌ sikamimon.

Salsila siga Rasul 2:36

“Sangkon,” yuk si Pitel, “subay katoonan bi na sampay mimon pagkahi tabi bangsa Israil, inawnan si Isa ma bay lansang bi taꞌ tehang, iya na silay bay pineneꞌ meꞌ Tuhan binuwat Papuꞌ tabi ka Tukang Nalamat tabi.”

Suwat si Pol pa mman Baanan Sukuꞌ si Isa ndooy ni Rom 3:30

Disu du sina Tuhan, maka disu du jalan man na ngitung manusiyaꞌ intong, yana meꞌ da pitsayaꞌ ni si Isa, bangsa Yahudi atawa ssaꞌ.

1 Korin 1:13

Uy la, bitsala meꞌ looy bilay subay tinagongan. Batan sat bi saꞌ māꞌ lay na ga sinalik-salik baran Almasi. Tilaw ta teꞌ kam, ongoy subay na pin aku pinaehe? Saꞌ silay aku bay matoy llansang taꞌ tehang kalnaꞌ kaam. Boꞌ na, kaam ina bay pinandi, saꞌ du ga ni awon ku saula-ula sukuꞌ ta kam.

1 Korin 1:2

pa mman bi ma pitsayaꞌ ni si Isa nnaa ni Korin. Kaam ina, lay na lliyun meꞌ Tuhan pa jawom okoman na sampay lay na sinutsiꞌ sabapan pagkatibuuk bi ka si Isa Almasi. Dari lay na kam dari sukuꞌ Tuhan tabeꞌ ni sikamimon jama nnoy-nnoy lahat ma ngisbat si Isa Almasi, yana Papuꞌ da sampay na ningkitabi labbasakayi.

1 Korin 12:13

Lay na kitabi tinibuuk meꞌ Tuhan pa disu baran sa batan lay na kitabi saliꞌ-saliꞌ pinaasokan disu Rū, yana Rū Sutsiꞌ. Kasohean kitabi bangsa Yahudi, kasohean ssaꞌ, kasohean ata, kasohean ssaꞌ, sugaꞌ saliꞌ-saliꞌ kitabi bay pinaasokan Rū Sutsiꞌ.

1 Korin 12:5

Damikiyan, kajinisan du pabuwatan sinukuꞌ ningkitabi man masambu nyawa pagkahi tabi, sugaꞌ disu du Papuꞌ tabi saliꞌ-saliꞌ.

1 Korin 8:6

Sugaꞌ bong baw ningkitabi, basta disu du Tuhan, yana Mmaꞌ tabi ma bay mapayak mimon-mimon. Maka danan tabi itu llum kalnaꞌ iya. Damikiyan, disu du Papuꞌ tabi, yana si Isa Almasi ma bay man Tuhan mapayak mimon-mimon. Maka njataꞌ na du sina man tabi koleꞌ kaallum bahau.

2 Korin 11:4

Gampang ku la ningkaam. Bong luu jama pilu moo tōꞌ sarī pasal si Isa ma yaꞌ magbēꞌ ka tōꞌ kami, kuhi-kuhi jaꞌ kam pitsayaꞌ. Damikiyan, bong luu noan kaam pasal Rū Sutsiꞌ atawa pasal umanat mahap, kuhi-kuhi jaꞌ du kam pitsayaꞌ san yaꞌ sikatuwaꞌ tōꞌ da ka ningkami.

Galatiya 5:6

Dari meꞌ kitabi itu tibuuk na ka si Isa Almasi, katoonan tabi na yaꞌ luu pagbiddaan pa Tuhan bong jama bay inislam atawa niyaꞌ. Ilooy du puntukan banahan yana pangando tabi niiya ma takita ni aseꞌ tabi ni pagkahi tabi manusiyaꞌ.

Epesus 4:13

Pag toklas na, dambuwaꞌ atay na kitabi mmeꞌ ni umanat mahap. Maka pasōng na pin meꞌ tabi toon Almasi, yana Anak Tuhan. Dari song hallom, sukup iman na tabi ngabut sampay sumibuꞌ na du arat-tabiat tabi ka Almasi.

Pilipi 2:11

Boꞌ da mangaku na si Isa Almasi yana Papuꞌ, pamaehe sanglit ni Mmaꞌ tabi Tuhan.

Pilipi 3:8

Sampay mimon-mimon, bilang ku na du yaꞌ na luu hagaꞌ na bong bista ku ka ehe hagaꞌ pagkalungbid ku ka Papuꞌ ku si Isa Almasi. Kalnaꞌ iya, lay na labbahan ku mimon ma bay hagaan niyaku maruhuꞌ. Meꞌ ku ngingat, mimon ilooy siꞌ boboꞌ jaꞌ. Kon meꞌ looy batan ituu na batnaa hagaan niyaku pasal meꞌ ku madara pagkalungbid ku ka Almasi.

Taytus 1:1

Ituu itu aku, si Pol, disu ata Tuhan saltaꞌ na rasul si Isa Almasi. Itu suwat ku pa mman nu Taytus. Meꞌ ku ngingat, sibuꞌ du ko ka anak ku rahasiyaꞌ sabap meꞌ ta dambuwaꞌ atay pitsayaꞌ ni umanat mahap pasal si Isa. Kamura-murahan binuwanan na pin ko kasannangan ka barakat meꞌ Mmaꞌ tabi Tuhan ka tukang nalamat kitabi, yana si Isa Almasi. Ndang katoonan nu du, meꞌ aku disu rasul, bay ku kawakilan noan sagannap ma bay peneꞌ Tuhan supaya patakkoꞌ pangando da ni si Isa. Kamura-murahan man sabapan umanat mahap ma pasampay ku, pasōng du dawom da ngakig arat-tabiat Tuhan. Boꞌ na, bong siꞌ ina umanat mahap kinapitsayaan, tatantu jama luu na kasampulnaan nyawa da saumu-umu. Kasampulnaan nyawa ina, ndang lay na bay njanjiꞌ meꞌ Tuhan ni manusiyaꞌ maruhuꞌ-ruhuꞌ lagi. Boꞌ bila ina Tuhan, yana tukang nalamat kitabi, bay nganjanjiꞌ, mastiꞌ mmeꞌ jaꞌ ya ni lapa na. Dari pag taabut masa ma bay ginantaꞌ meꞌ Tuhan, lay na pinalahil meꞌ na si Isa yana lān man manusiyaꞌ koleꞌ kaallum bahau. Na umanat mahap pasal kaallum bahau ina, yana umanat ma bay sinohoꞌ pinasaplag niyaku.

Hibrani 13:7

Sarī man naa, daa takupan bi siga pa-mmean bi ma bay noan kaam palman Tuhan. Kannahun bi ayad kawul-piil da maka akigun bi pangando da ni si Isa.

Yaꞌkub 2:18

Na adakala luu na baw halling, “Yaꞌ bina sibuꞌ pamiki jama. Kasohean mista sukup na basta pitsayaꞌ jaꞌ kitabi ni si Isa, boꞌ kasohean mista subay du luu tabeꞌ pabuwatan mahap.” Na bong aku bay soheꞌ na magbitsala, yuk ku niiya, “Pooy meꞌ ku toon mattan ko pitsayaꞌ bong yaꞌ luu buktiꞌ na ni tangge-tingkōꞌ nu? Boꞌ aku itu, tapakitahan ta ko buktiꞌ ku pitsayaꞌ ni tangge-tingkōꞌ ku.”

1 Pitel 3:21

Kasalamatan da ilay ni boheꞌ dunuk looy mattoꞌ, tadalil tabi pa boheꞌ man tabi bay pinandi tandaꞌ tabi lay na salamat man hukuman Tuhan. Kitabi ilay bay pinandi, saꞌ ga pandihan man ngalakkahan lumut ni baran tabi. Arapun pandihan tabi ina yana sipat lay na kitabi maku ampun man Tuhan mari hayang na pamiki tabi. Boꞌ kasalamatan tabi itu mawjud na batan lay na pinakallum pabalik si Isa Almasi.

2 Pitel 1:1

Ituu itu aku, si Saymon Pitel, disu ata si Isa Almasi. Maka aku itu disu rasul na. Itu suwat ku pa mman bi ma pitsayaꞌ na du ni si Isa Almasi, yana Tuhan tabi ka tukang nalamat kitabi. Ni kaintong na, yaꞌ ya minig jama, batan kaam pun ina, meꞌ kami na du, bay kaladjikian saliꞌ-saliꞌ buwatan hagaan, yana pangando tabi niiya.

Suwat Lakka man si Jūd 1:20

Kahapan kaam, siga kakasi ku, saꞌ du meꞌ naa. Sangkon sibuwansang-buwansang na pin kam mari patakkoꞌ na pin pangando bi pa Tuhan. Daa labbahan bi tōꞌ sutsiꞌ ma kinapitsayaan meꞌ tabi. Maka maku na pin kam duwaa pa Tuhan man tabang Rū Sutsiꞌ njataꞌ bi.

Suwat Lakka man si Jūd 1:3

Siga kakasi ku, sibuwa ilay, tud doman ku nuwat ningkaam pasal kasalamatan ma lay na takoleꞌ tabi saliꞌ-saliꞌ. Sugaꞌ bistahan ku gam na ku nuwat nohoꞌ kaam ngandapitan siga tōꞌ ayad ma kinapitsayaan meꞌ tabi. Batan siga tōꞌ naa ina, si Isa mismu bay masampay ni siga sukuꞌ na. Boꞌ saumu na sina yaꞌ na baluba samasakali.