Epesus 4:13 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹³ Pag toklas na, dambuwaꞌ atay na kitabi mmeꞌ ni umanat mahap. Maka pasōng na pin meꞌ tabi toon Almasi, yana Anak Tuhan. Dari song hallom, sukup iman na tabi ngabut sampay sumibuꞌ na du arat-tabiat tabi ka Almasi.

Epesus 4:13 ပူးပေါင်းရင်းမြစ်များ

Matiyu 11:27

Pag-anu, yuk si Isa na baw ni baanan jama ndooy, “Mimon-mimon lay na hinalap meꞌ Mmaꞌ ku niyaku. Yaꞌ luu toon njawom atay ku sarī man Mmaꞌ ku. Damikiyan, yaꞌ du luu toon njawom atay Mmaꞌ ku sarī man aku ka sagannap ma karomanan ku baan ku.

Yahiya 1:16

Na sabap biddaꞌ na ehe aseꞌ Anak Tuhan, tinggi-maninggi na supaat bay takoleꞌ tabi sikamimon ma pitsayaꞌ niiya.

Yahiya 16:3

Kon da ilay buwat meꞌ looy sabap yaꞌ katoonan da Mmaꞌ ku atawa pun aku.

Yahiya 17:21

Maꞌ, paku ku batnaa, pagsidambuwaun sa atay da sikamimon. Yana meꞌ kita dambuwaꞌ atay, kamura-murahan sila pun dambuwaꞌ atay du ka kita supaya pitsayaꞌ na manusiyaꞌ tud kau bay mapitu aku.

Yahiya 17:3

Katoonan ku du bong sila lungbid ka kau, yana isu-isu Tuhan sabanna, sampay si Isa Almasi, yana aku ma bay papitu nu, inaa na hatiyan kasampulnaan nyawa ma yaꞌ luu katapusan na.

Yahiya 6:69

Kami itu pitsayaꞌ jaꞌ ningkau maka katoonan kami kau na ilooy ma bay tinunaꞌ Mahasutsiꞌ lakka man Tuhan.”

Salsila siga Rasul 4:32

Na mimon ilay siꞌ ma pitsayaꞌ ni si Isa ndooy ni Jerusalem dambuwaꞌ atay ka dambuwaꞌ maksud. Yaꞌ luu ninsila mista altaꞌ da para ni dī da sadjaꞌ. Saliꞌ-saliꞌ sila mahampitan soysoy sila kabus.

1 Korin 1:10

Na siga danganakan, kalnaꞌ awon Papuꞌ tabi si Isa Almasi, junjung ku na ningkaam, subay kam dambuwaꞌ pamiki. Yaꞌ sikatuwaꞌ bong magsulemaꞌ pamiki bi dambaanan. Subay kam dambuwaꞌ atay sampay dambuwaꞌ angan-angan.

1 Korin 14:20

Siga danganakan, kaam ina ma bay kaladjikian mitsala ni siga pallun ag-agan, sibuꞌ du karuha bi ka anak-anak luu kuli-kulihan na bahau tud kinasengan meꞌ na. Sugaꞌ ddong na kam ngakig pamiki anak-anak. Akigun bi na siga matatoa patong pamiki da. Luu baw beꞌ disu pakaradjaan ma pataꞌ man bi ngantanan pamiki anak-anak dikiꞌ, yana hāl meꞌ da yaꞌ kapiki nulun-nulun kalaatan.

1 Korin 2:6

Na kami tu, saꞌ baw ga yaꞌ na kami mōꞌ tōꞌ lawom. Batan tuktuk kami noan sagannap ma taggu iman da, mastiꞌ mōꞌ du kami. Sugaꞌ tōꞌ lawom ma pinasampay meꞌ kami saꞌ ga tōꞌ ma hagaan ni jama ma yaꞌ pitsayaꞌ ni si Isa. Maka saꞌ du tōꞌ ma hagaan ni siga pa-mmean ni junyaꞌ ma yaꞌ ngisbat Tuhan, yana sagannap ma yaꞌ luu kasongan da.

2 Korin 4:6

Na jaman junyaꞌ ilay bay pinapayak, lay Tuhan nohoꞌ dantaꞌ ninag njawom lindom. Pag batnaa, sibuꞌ du ka lay balikan na batan lay na baw ya marantaan pamiki tabi. Dari tahati tabi na ehe kaayaran na man sabapan pabuwatan na bay mapitu si Isa Almasi pa junyaꞌ.

Galatiya 4:19

Siga anak, halloman ku ilay bay ngagad kaam pitsayaꞌ ni Almasi, tud bay gampang ku ningkaam. Sibuꞌ du parasahan ku ka danda magkamaddi-maddi ngagad anak na pōꞌ. Pag batnaa, meꞌ ga pabalik na baw gampang ku ningkaam, batan kahalloman ku la ngagad kawul-piil Almasi tumatandaꞌ ni jataꞌ bi.

Epesus 1:17

Maku na pin situ ku duwaa pa Mmaꞌ tabi ma yaꞌ luu sibuꞌ sabanding na, yana Tuhan Papuꞌ tabi si Isa Almasi. Kamura-murahan binuwanan du kam pangahati lawom ni hāl Tuhan supaya magsasōng na pin meꞌ bi lungbid ka iya.

Epesus 1:23

yana kitabi ma binilang baran na. Baran na ina, ginaosan leꞌ na malahil mimon arat-tabiat na, batan iya nganggaosan mimon-mimon nnoy-nnoy jaꞌ.

Epesus 4:12

Sila ilay bay binuwanan ladjikiꞌ meꞌ looy man da malangkapan siga sukuꞌ Tuhan majatu oy-oy sinukuꞌ meꞌ Tuhan ninsila, maka supaya pasōng na pin hāp sambuhan nyawa sikamimon ma binilang baran Almasi.

Epesus 4:3

Kaam ina, lay na pinagsidambuwaꞌ atay meꞌ Rū Sutsiꞌ. Sangkon sabuli-buli bi wā miha kasalassayan mari yaꞌ langkat pagkatibuuk bi.

Epesus 4:5

Maka kabanahan ma kinapitsayaan meꞌ tabi sibuꞌ du. Papuꞌ tabi pun disu du. Damikiyan, pandihan tabi pun disu du.

Pilipi 3:10

Kainagon ku magsasōng na pin meꞌ ku toon Almasi. Maka kainagon ku luu na pin kawasa Tuhan njataꞌ ku ngahalin pangatayan ku, meꞌ karuha basag kawasa na bay makallum Almasi pabalik. Maka doman du ku nūs limpaꞌ Almasi bay lumingkaꞌ ni jinisan kamalasahiyan kalnaꞌ Tuhan. Maka doman du ku ngikut tabiat na. Dari meꞌ iya na du ku yaꞌ mean kahandak ku supaya tabean ku na kahandak Tuhan san gi man ku patuhut meꞌ bay kapatoy Almasi.

Pilipi 3:8

Sampay mimon-mimon, bilang ku na du yaꞌ na luu hagaꞌ na bong bista ku ka ehe hagaꞌ pagkalungbid ku ka Papuꞌ ku si Isa Almasi. Kalnaꞌ iya, lay na labbahan ku mimon ma bay hagaan niyaku maruhuꞌ. Meꞌ ku ngingat, mimon ilooy siꞌ boboꞌ jaꞌ. Kon meꞌ looy batan ituu na batnaa hagaan niyaku pasal meꞌ ku madara pagkalungbid ku ka Almasi.

Kolossa 1:28

Dari inaa na sina kon kami masaplag pasal iya ni sikamimon bangsa. Sabuli-buli kami na situ mupusan kapandoyan bay pamuwan Tuhan ningkami man kami noan sila sampay ngawalan sila. Batan kainagon kami sikamimon ma mmeꞌ ni Almasi yaꞌ na luu sutsutan njataꞌ da ni mata Tuhan.

Kolossa 2:2

Kon ku magtuyuꞌ supaya pataggu na pin iman bi maka supaya kam wā dambuwaꞌ atay ka tattap sikaaseꞌ-kaaseꞌ. Kainagon ku sukup na pangahati bi ni garaꞌ Tuhan ma yaꞌ gi bay tumampak ni siga angkat-angkatan maruhuꞌ, yana garaꞌ na pasal Almasi.

Hibrani 5:14

Boꞌ jama ma nganna sampay tattap mean kabanahan, malaingkan biyasa na sila nilang tōꞌ ma mahap ka tōꞌ palsu. Sila ilay meꞌ sapantun jama mehe na ma takaya da na mangan sumbalian.

2 Pitel 1:4

Dari man sabapan ehe kabantugan na ka kaayaran na, lay na kitabi buwanan na siga supaat tud hagaan ka ayad banahan ma ndang bay janjiꞌ na. Maksud Tuhan ilay bay ngandean siga supaat meꞌ looy supaya taikut tabi arat-tabiat na. Maka maksud na supaya yaꞌ na tabi pinagbayaan meꞌ napsu tabi buwat dusa ma kabinasa ningkitabi.

2 Pitel 3:18

Katapusan bitsala ku: Duhunan bi na pin meꞌ bi ngikut arat-tabiat Papuꞌ tabi si Isa Almasi, yana tukang nalamat kitabi. Maka mangasa na pin kam ni aseꞌ-tabang na ningkaam. Songan bi lagi meꞌ bi lungbid ka iya. Kamura-murahan pinudji na pin ya labba man batnaa sampay saumu-umu! Amin. Wassalam

1 Yahiya 5:20

Damikiyan, katoonan tabi na du luu na bay pitu Anak Tuhan pa junyaꞌ. Maka lay na ya muwanan kitabi pangahati supaya dari na kitabi lungbid ka Tuhan sabanna. Pag batnaa tibuuk na kitabi ka Tuhan sabanna sabap meꞌ tabi tibuuk na ka Anak na si Isa Almasi. Iya ina Tuhan sabanna maka poonan kasampulnaan nyawa ma yaꞌ luu katapusan na.