Epesus 2:14 - Sabahagiꞌ Kitab Tawrat: Panagnaan ni Awwal Jaman maka Kitab Injil

^14-15 Maruhuꞌ, ndang katoonan bi du, bong inawnan kami siga Yahudi ka kaam siga bangsa saꞌ Yahudi, wā magsaggaꞌ. Boꞌ poonan pagsaggaan tabi ilay yana saraꞌ agama kami. Sangka kami hagaan gi kami man kaam sabap kami bay peneꞌ Tuhan sukuꞌ na. Boꞌ kami lagi man Tuhan bay ma-ntan saraꞌ na. Sangkon dari ko ngawon, saraꞌ agama kami yana agpang man tabi yaꞌ kapagdambuwaꞌ. Kahapan, lay na nilangkat meꞌ Almasi agpang looy njataꞌ kapatoy na taꞌ tehang. Kon na bay buwat meꞌ looy supaya bay duwam baanan tapagsitibuuk na na kitabi pa disu baanan sa. Dari sabapan kapatoy Almasi, bilang disu bangsa bahau na kitabi. Maka luu na kasalassayan tabi batan bukaꞌ na lawang bahau man mimon manusiyaꞌ taitung sukuꞌ Tuhan. Sangkon bong inawnan saraꞌ Yahudi ddas ka jinisan aturan tinaat, yaꞌ na luu kabigiꞌ-bigian na ni hāl meꞌ jama initung sukuꞌ Tuhan.

Epesus 2:14 ပူးပေါင်းရင်းမြစ်များ

Lukas 1:79

Batan iya ina yana sūꞌ para ni manusiyaꞌ ma njawom lindom, yana sagannap ma awam ni kabanahan sampay tawu ni kapatoy. Maka iya na sina magmundaan kitabi supaya mahap na kitabi pa Tuhan maka supaya tatammu tabi na lān kasalassayan ka pagkahi tabi manusiyaꞌ.”

Lukas 2:14

“Pudji mehe pa Tuhan ni sulgaꞌ! Luu na kasalassayan bay papitu na pa junyaꞌ ni kaehe timbang na pa manusiyaꞌ.”

Yahiya 10:16

Sarī man siga bili-bili ku ni baanan tuu, luu gi sina kasohean ma saꞌ ni baanan tuu. Sila pun ina subay du liyun ku pa jawom okoman ku. Sila ina mintu pakale du ni suwara ku. Pag ina mintu sila pinaasok na du meꞌ ku pa jawom okoman ku, mimon sukuꞌ ku dari disu baanan sa njawman disu tukang ipat.

Yahiya 11:52

Boꞌ kapatoy na ilay, saꞌ silay sat kalnaꞌ bangsa Yahudi, arapun sampay kalnaꞌ jama man mimon kabangsa-bangsahan. Batan tabeꞌ du sila dari siga anak Tuhan bbos-bbos. Kahandak Tuhan ina sagannap siga anak na ni sikaliput junyaꞌ, bangsa Yahudi sampay na siga bangsa saꞌ Yahudi, tibuuk na na pa disu baanan sa.

Yahiya 16:33

Ni junyaꞌ tuu tu, mastiꞌ lumingkaꞌ jaꞌ sina kam ni jinisan kamalasahiyan. Sugaꞌ pagakun bi jaꞌ atay bi batan lay na situ ku tumanjataꞌ man mimon kasusahan njawom junyaꞌ. Aku ilay bay maan kaam ilooy siꞌ labbasakayi supaya sannang na atay bi man sabapan pagkatibuuk bi ka aku.”

Salsila siga Rasul 10:28

Dari yuk na ninsila, “Kaam ma luntuu, katoonan bi du, tagga ni saraꞌ agama kami Yahudi maglaw-lamud atawa paasok pa jawom lumaꞌ bangsa sarī. Sugaꞌ bahau jaꞌ situ bay pinakitau meꞌ Tuhan niyaku subay ku yaꞌ ngitung soy maka soy na manusiyaꞌ haram.

Salsila siga Rasul 10:36

“Batnaa pasampay ku na ningkaam umanat mahap ma lay na palahil Tuhan duhuꞌ ningkami bangsa Israil. Meꞌ tuu: Luu na situ jalan man manusiyaꞌ mahap na pa Tuhan man sabapan pabuwatan si Isa Almasi, yana Papuꞌ manusiyaꞌ sikamimon.

Suwat si Pol pa mman Baanan Sukuꞌ si Isa ndooy ni Rom 5:1

Na kitabi itu, lay na kitabi initung intong sabap meꞌ tabi pitsayaꞌ ni si Isa Almasi. Dari sabapan Papuꞌ tabi si Isa, mahap na kitabi pa Tuhan.

Galatiya 3:28

Sangkon yaꞌ na kitabi magsitingka jama bong sila Yahudi atawa ssaꞌ, bong sila ata atawa ssaꞌ, bong sila danda atawa lalla. Sibuꞌ-sibuꞌ na kitabi sabap tibuuk na du kitabi saliꞌ-saliꞌ ka si Isa Almasi.

Epesus 2:17

Dari maksud Almasi ilay bay pitu pa junyaꞌ masaplag umanat mahap supaya luu na lawang man manusiyaꞌ mahap na pa Tuhan. Boꞌ umanat na ina, lay na pinasampay ni bangsa Yahudi ma milang dī da tapit pa Tuhan sampay na ningkaam ma bay lawak man Tuhan.

Epesus 3:15

sikamimon sukuꞌ na, yana sagannap ma inawnan meꞌ na rahasiyaꞌ na ni lumaꞌ na, labba man taꞌ babaw junyaꞌ sampay pa sulgaꞌ.

Epesus 4:16

Kuwan kitabi ma pitsayaꞌ niiya meꞌ karuha baran na. Na tiyap-tiyap baran manusiyaꞌ, mimon kalangkapan na langkit ka tibuuk. Maka baran ina, bong siga kalangkapan na saliꞌ-saliꞌ buwat ilooy ma bay sinukuꞌ ninsila, mastiꞌ paehe jaꞌ sina maka pabasag na pin. Damikiyan, meꞌ naa du sina baran si Isa bong kitabi sikaaseꞌ-kaaseꞌ ka sama-sama buwat ilooy ma bay sinukuꞌ meꞌ na ningkitabi.

Kolossa 1:20

Maka ndang luu du garaꞌ Tuhan muwan lawang man mimon-mimon labba man junyaꞌ sampay taꞌ langit mahap na niiya. Garaꞌ na ilay bay pinajatu njataꞌ lahaꞌ Anak na bay pinaduwai taꞌ tehang.

Kolossa 2:20

Na kitabi itu sukuꞌ Almasi, meꞌ tabi ngingat, lay na kitabi tabeꞌ ni kapatoy na. Sangkon paddus na kitabi man siga aturan ma binista meꞌ kasohean subay binogbogan man da salamat. Sugaꞌ kaam baw tu, tatammu bi na baw ga mean siga aturan ma inikut meꞌ jama ma saꞌ sukuꞌ Almasi. Kuhi-kuhi jaꞌ kam mmeꞌ bong yuk da,

Kolossa 3:11

Dari pagka tibuuk na kitabi ka Almasi saliꞌ-saliꞌ, yaꞌ na situ kitabi minig jama. Yaꞌ na kitabi magsibiddaꞌ bong jama bangsa Yahudi atawa ssaꞌ, bong jama bay inislam atawa niyaꞌ, iskulan atawa niyaꞌ, bong ata atawa ssaꞌ. Isu-isu Almasi pandang tabi. Boꞌ iya ina luu na patannaꞌ njawom atay tabi sikamimon ma pitsayaꞌ niiya.

Kolossa 3:15

Tuhan ina bay ngaliyun kitabi supaya kitabi tibuuk pa disu baran sa njawman Almasi maka supaya kitabi wā njawom kasalassayan. Sangkon daa kam buwat oy maka oy na ma kalangkat ni kasalassayan ma lakka man Almasi. Maka subay kam tattap magsuku pa Tuhan.

Hibrani 13:20

Tuhan ina poonan kasannangan. Ni kaehe kawasa na, lay ya makallum Papuꞌ tabi si Isa. Dari si Isa na sina numbul satu tukang ngipat kitabi ma awnan na siga bili-bili na. Man sabapan lahaꞌ na bay tumpa, inaa na kasāhan ni pagsulutan bahau ma yaꞌ luu katapusan na antaraꞌ Tuhan ka sukuꞌ na.