Epesus 2:10 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹⁰ Sugaꞌ saꞌ baw ina ga yaꞌ na puntukan hāl meꞌ buwat mahap. Arapun Tuhan bay muwanan kitabi kaallum bahau njawman si Isa Almasi supaya tabi buwat siga pabuwatan mahap. Batan ndang inaa bay garaꞌ na ningkitabi.

Epesus 2:10 ပူးပေါင်းရင်းမြစ်များ

Matiyu 5:16

Kaam pun ina, subay du kam yaꞌ napuk dantaꞌ bi ni manusiyaꞌ. Hati na, subay kam makitahan jama kawul-piil ayad supaya mudji na sila Mmaꞌ bi Tuhan ni sulgaꞌ sabapan bi.

Yahiya 3:21

Boꞌ sagannap ma nabiat buwat kaintongan ina, ilooy karomanan da njawom dantaꞌ batan yaꞌ luu subay na pin tinapuk meꞌ da. Katoonan da sumilan-sumilan nililing siga pabuwatan da, tarang-tarang magbēꞌ jaꞌ ni kahandak Tuhan.

Salsila siga Rasul 9:31

Na pus meꞌ looy, yaꞌ na baw bay luu laug njataꞌ siga baanan sukuꞌ si Isa ni sikaliput Yahudiya ka Jalil sampay Samariya. Boꞌ na, pabasag na pin pangando da ni Papuꞌ maka yaꞌ maglumba meꞌ da ngisbat iya. Dari man tabang Rū Sutsiꞌ njataꞌ sukuꞌ si Isa, pasōng na pin eka jama ma pitsayaꞌ ni si Isa.

Salsila siga Rasul 9:36

Na ni lahat looy siꞌ, luu gi disu daira inawnan Joppa. Ndooy siꞌ, luu disu danda ma mmeꞌ ni si Isa inawnan si Tabita. Bong ni pallun Greek, si Dolkas. Iya ilay wā buwat mahap ni jama sampay nulung jama miskin.

Suwat si Pol pa mman Baanan Sukuꞌ si Isa ndooy ni Rom 8:1

Sangkon, pagka tibuuk na kitabi ka si Isa Almasi, yaꞌ na luu hukuman mulkaꞌ njataꞌ tabi.

Suwat si Pol pa mman Baanan Sukuꞌ si Isa ndooy ni Rom 8:29

Labba man sibuwa, ndang katoonan Tuhan na bong soy tumabeꞌ ni sukuꞌ na. Boꞌ ndang luu na silay garaꞌ na ngahalin arat-tabiat da supaya sumibuꞌ na du ka arat-tabiat Anak na, yana si Isa. Kon na ilay buwat meꞌ looy supaya sila pataꞌ inawnan siyali si Isa ma ginalla Anak Siyaka.

1 Korin 3:9

Sangkon, bong inawnan kami ka si Apolos, sosohoan sadjaꞌ situ kami maglimbang buwat kalnaꞌ Tuhan. Kuwan kaam ina, meꞌ sapantun huma Tuhan inintu meꞌ kami. Dan jinis meꞌ halling, kaam ina meꞌ sapantun lumaꞌ Tuhan pinabuwat.

2 Korin 5:17

Pag batnaa, tabista tabi na, soysoy tibuuk ka Almasi, sibuꞌ du karuha da ka jama bahau bay pinapayak. Pagkajama da maruhuꞌ ma nabiat nulut dī da, yaꞌ na luu. Yaꞌ na sibuꞌ ka maruhuꞌ batan luu na pagkajama da bahau ka kaallum da bahau.

2 Korin 5:5

Kitabi itu, ndang lay na sinaddiya meꞌ Tuhan koleꞌ baran lakka man sulgaꞌ. Lagiꞌ na, Tuhan du sina bay maasok Rū Sutsiꞌ ningkitabi, yana buktiꞌ man tabi kasiguru koleꞌ mimon bay sinukuꞌ ningkitabi bbos-bbos.

2 Korin 9:8

Intomun bi, takaya du sina meꞌ Tuhan muwanan kaam san labi gi man balanjaꞌ bi supaya wā luu man bi nulung ka buwat jinisan kaayaran ni jama.

Galatiya 6:15

Meꞌ kitabi itu mmeꞌ ni Almasi, yaꞌ na puntukan bong kitabi bay inislam atawa niyaꞌ. Ilooy ya puntukan bong luu na pagkajama tabi bahau.

Epesus 1:1

Ituu itu aku, yana si Pol, disu rasul si Isa Almasi man kahandak Tuhan. Itu suwat ku pa mman bi siga sukuꞌ Tuhan, yana kaam ma magkanaalla mmeꞌ ni si Isa Almasi nnaa ni Epesus.

Epesus 1:4

Bistahun bi doꞌ, yaꞌ lagi san bay pinapayak junyaꞌ, ndang lay na kitabi pineneꞌ meꞌ Tuhan binuwat sukuꞌ na njawman Almasi. Maksud Tuhan ilay, subay kitabi sutsiꞌ sampay yaꞌ na luu sutsutan njataꞌ tabi ni mata na. Ni kaehe aseꞌ Tuhan,

Epesus 2:13

Lipara batnaa, pagka kam luu na njawman si Isa Almasi, san kam bay lawak man Tuhan, tapit na kam sabapan lahaꞌ Almasi ma bay tumpa ni kapatoy na.

Epesus 2:2

Jaman looy ilay, bbuwatan bi mandang hāl junyaꞌ jaꞌ sabap bay kam pinagmundaan meꞌ panghuluꞌ siga seytan, yana Ibilis. Iya ilay ndang magbayaan sagannap ma yaꞌ doman mmeꞌ ni kahandak Tuhan.

Epesus 2:6

Maka pagka kitabi lay na tabeꞌ ni Almasi pinakallum, meꞌ tabi ngingat, lay na du kitabi pinatabeꞌ niiya pinatingkōꞌ ndooy ni sulgaꞌ.

Epesus 4:1

Na meꞌ aku itu disu sosohoan Papuꞌ njawom jīl sabap meꞌ ku masaplag, junjung ku na ningkaam, bogbogan bi kawul-piil ma tawop ni jama ma bay lliyun meꞌ Tuhan binuwat sukuꞌ na.

Epesus 4:24

Sangkon ni hāl pagkajama bi ma bahau, ndang lay na du kam binaan, bong ibaratan badjuꞌ sutsiꞌ, patukun bi na. Batan lay na kam buwanan Tuhan kaallum bahau supaya kam meꞌ karuha iya na du sabana-bana intong ka sutsiꞌ.

Pilipi 1:6

Aseꞌ bi ina yana buktiꞌ tud hinalin na pin meꞌ Tuhan pangatayan bi pa kaayaran. Maka tatantu ku pagka Tuhan lay na nagnaꞌ ngahalin pangatayan bi, mastiꞌ ndarahan na pin sina meꞌ na ngabut sampay magjatu na garaꞌ na ningkaam ni llaw Almasi pabeleng.

Pilipi 2:13

Yaꞌ sina luu danan na saꞌ takaya bi batan luu na pin Tuhan muwanan kaam dawom ka gaos buwat mimon ma kasulut niiya.

Kolossa 1:10

Maka kamura-murahan mōꞌ na pin kam kawul-piil ma kasulut ni Papuꞌ Isa mari kam wā tawop inawnan sukuꞌ na. Maka njawom duwaa kami, kamura-murahan tamba-manamba na pin kaayaran pabuwat bi maka magsasōng na pin meꞌ bi lungbid ka Tuhan.

Kolossa 3:10

sampay lay na saynan bi ka pagkajama bahau. Dari mangkin pasōng pangahati bi ni ilooy ma bay mapayak kaam, mangkin magsasōng na pin meꞌ arat-tabiat bi hinalin ngkod-ngkoran yaꞌ gi taabut bi arat-tabiat na.

1 Timuti 2:10

Arapun ilooy ya pataꞌ pakutuꞌ da meꞌ da buwat kaayaran ni jama. Inaa ya sina arat tawop ni karandahan ma ngingat dī da ngisbat Tuhan.

1 Timuti 5:10

Lagiꞌ na, subay sila bay tamasa nabiat buwat mahap. Hati na, subay mahap meꞌ da bay nganad anak da maka ndang nabiat ngahulmat jama. Maka subay sila biyasa magpangintu siga pagkahi da sukuꞌ si Isa. Maka subay sila biyasa magpanulung jama njawom kasusahan. Hantak bitsala ku ilay siꞌ, subay sila bay tamasa buwat jinisan kaayaran.

1 Timuti 5:25

Damikiyan kasohean ina jama, ndang tumatandaꞌ na sila buwat mahap. Boꞌ kasohean, san sila buwat mahap, hallom-hallom gi boꞌ tasayu.

1 Timuti 6:18

Maka baan nu sila subay sila tigiꞌ buwat mahap ni jama. Mangkin meka na pilak da, mangkin subay meka na kaayaran pabuwat da. Daa sila sohoun sēng nulung jama njawom tiksaꞌ, gam pin subay sila mahampitan jama tiksaꞌ paeka.

2 Timuti 2:21

Na mimon manganan looy siꞌ tuwaꞌ pa siga sukuꞌ Tuhan. Sagannap ma lay na ngalabbahan mimon kalaatan, sibuꞌ na sina karuha da ka ga manganan looy ma hinalliꞌ ni siga llaw mulliya. Sutsiꞌ sila maka kaboo kabantugan pa Tuhan. Tawop na sila pinakoy meꞌ na man majatu jinisan pabuwatan ayad.

2 Timuti 3:17

Bong ina tud kinanna du meꞌ siga sukuꞌ Tuhan isi kitab, malaingkan yaꞌ na luu kulang da man da majatu mimon pabuwatan mahap bay sinukuꞌ ninsila.

Taytus 2:14

Iya ilay, lay na ga bay nongan umu na kalnaꞌ kitabi supaya tapaddusan na na kitabi man tabiat tabi buwat dusa, maka supaya tapasutsiꞌ na kitabi. Batan kahandak na ina, luu na sukuꞌ na ma tinagi buwat mahap, ma pabiddaꞌ man kasohean manusiyaꞌ.

Taytus 2:7

Labi na kau Taytus, subay bogbogan nu hāp kawul-piil nu mari luu suntuan ayad inakig meꞌ siga soheꞌ nu. Maka mimon tangge-tingkōꞌ nu subay magbēꞌ jaꞌ ka kabanahan ma tinōꞌ meꞌ nu.

Taytus 3:1

Paintoman nu siga danganakan ta nnaa nohoꞌ maglillaꞌ ni siga pa-mmean parinta sampay ngasip ni sagannap ma ngantanan saraꞌ. Maka subay sila pinaintoman nohoꞌ wā saddiya buwat mahap.

Taytus 3:14

Kuwan siga pagkahi ta sukuꞌ si Isa nnaa, sohoun sila makutuꞌ meꞌ da buwat kaayaran. Maka sohoun sila nulung jama tiksaꞌ. Meꞌ naa ina, mehe kapansahaliyan da ni manusiyaꞌ.

Taytus 3:8

Na siga tōꞌ ku itu tud kanaalla. Sangkon Taytus, sohoun na kinanna ni mimon nnaa ma mangando pa Tuhan. Meꞌ looy ilay, inisbat na meꞌ da buwat jinisan kaayaran ni siga pagkahi da manusiyaꞌ. Na bitsala ku itu, mahap jaꞌ labbasakayi, boꞌ kasampulnaꞌ ni jama.

Hibrani 10:24

Sarī man naa siga danganakan, subay kitabi basag sipaintom-paintom mari pasōng na pin meꞌ tabi sikaaseꞌ-kaaseꞌ sampay buwat kaayaran.

Hibrani 13:21

Kamura-murahan pinalangkapan na pin kam meꞌ Tuhan ka mimon ma gunahan ningkaam supaya tapabuwat bi kahandak na. Kamura-murahan man sabapan pagkatibuuk bi ka si Isa Almasi, pinajatu du meꞌ Tuhan maksud na ni kaallum bi. Ilooy ilay siꞌ pamaehe sanglit niiya pangkat-mamangkat saumu. Amin.

1 Pitel 2:12

Tamūd ina, sagannap ma yaꞌ pitsayaꞌ ni si Isa mitsala kaam pa kalaatan san yaꞌ luu dusa bi. Sangkon, amay-amay subay kam mogbogan kawul-piil ayad ni pag-awpan da. Kawu-kawu bukaꞌ na puad da pitsayaꞌ hangat sila ngita hāp tangge-tingkōꞌ bi. Dari pag taabut masa man Tuhan marantaan pamiki da, pudji da na du sina ya.

1 Yahiya 1:7

Sugaꞌ bong itu kitabi tattog njawom dantaꞌ meꞌ karuha Tuhan, dambuwaꞌ atay na kitabi. Maka puwas na dusa tabi sabapan lahaꞌ Anak Tuhan, yana si Isa. Sangkon sutsiꞌ na kitabi.

1 Yahiya 2:6

Na soysoy mangaku tibuuk ka Tuhan, subay nabiat mōꞌ arat-tabiat meꞌ kadari ni si Isa Almasi.