2 Timuti 4:5 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁵ Na kuwan kau Timuti, subay ko wā ngagak dī nu ni mimon kahalan nu. Bong ko tumabbaꞌ njawom kamalasahiyan kalnaꞌ Papuꞌ, tatasan nu jaꞌ. Pagbuli-bulihan nu masaplag umanat mahap pasal si Isa. Pajatuhun na mimon ma bay hinalap meꞌ Tuhan ningkau.

2 Timuti 4:5 ပူးပေါင်းရင်းမြစ်များ

Matiyu 25:16

Likutan bōs da, kuwan ilooy ma bay inambanan limampūꞌ libu, magti du pinalān meꞌ na sampay lay ya nguntung limampūꞌ libu.

Malkus 13:34

Subay kam meꞌ karuha siga ata wā saddiya ni katakka papuꞌ da ma bay lome. Yaꞌ gi bay patuwak papuꞌ da, lay doꞌ ya ngahalap lumaꞌ na ninsila, boꞌ lay gi sila sinukuan saliꞌ-saliꞌ ka pabuwatan da. Kuwan ilooy ma tukang jaga lawang, lay tugun na nohoꞌ iyakin.

Malkus 13:37

Sangkon batnaa ndang baan ta na kam sampay na sikamimon, basta subay kam iyakin.”

Lukas 12:37

Bong ina siga ata ndang saddiya na ni katakka papuꞌ da, mastiꞌ sinupaatan jaꞌ sila. Tandaꞌ papuꞌ da kasulutan ninsila, saynan na na sina badjuꞌ na, boꞌ na matingkōꞌ ga ata na ni lamisahan na. Pag-anu, boꞌ iya na ya motangan sila.

Salsila siga Rasul 21:8

Pag meꞌ sumawung, lay na kami patuwak sampay lay na kami nakka Sesariya. Ndooy siꞌ, lay kami pahantiꞌ ni lumaꞌ si Pilip. Iya ilay yana disu ni ga lalla looy siꞌ sikapituꞌ ma bay pineneꞌ maruhuꞌ ni Jerusalem tukang muwanan siga bawu danda balanjaꞌ ndooy. Pag batnaa, bbuwatan na ngalataan lahat na baw masaplag umanat mahap pasal si Isa.

Suwat si Pol pa mman Baanan Sukuꞌ si Isa ndooy ni Rom 15:19

Man kawasa Rū Tuhan njataꞌ ku, lay na ku kapōꞌ siga pabuwatan kahaylan-haylan. Maka man gaos Rū Tuhan, lay na du ku ngalataan lahat masaplag umanat mahap pasal Almasi labba man Jerusalem ngabut sampay pa Ilirikum.

Epesus 4:11

Na ni kapasal jinisan kapandoyan bilang ladjikiꞌ ma ndean meꞌ Almasi, kasohean jama pineneꞌ binuwat rasul na. Kasohean binuwat tukang masampay siga umanat bay pinalahil meꞌ Rū Sutsiꞌ ninsila. Kasohean binuwat tukang masaplag umanat mahap. Kasohean pineneꞌ binuwat pa-mmean ngayaran siga baanan sukuꞌ si Isa. Maka kasohean binuwat guru.

Epesus 4:12

Sila ilay bay binuwanan ladjikiꞌ meꞌ looy man da malangkapan siga sukuꞌ Tuhan majatu oy-oy sinukuꞌ meꞌ Tuhan ninsila, maka supaya pasōng na pin hāp sambuhan nyawa sikamimon ma binilang baran Almasi.

Kolossa 1:25

Aku tu lay pineneꞌ meꞌ Tuhan binuwat sosohoan na kalnaꞌ kaam kabangsa-bangsahan ma saꞌ Yahudi. Sangkon tuyuan ku ngalataan kalahat-lahatan bi masaplag umanat Tuhan.

Kolossa 4:17

Maka baan bi si Alkipus, meꞌ iya jama bay kawakilan nohoꞌ maghulas-sangsāꞌ kalnaꞌ Papuꞌ, subay pabuwat na ilooy ma bay sinukuꞌ niiya.

1 Tesaloneka 5:6

Batan jama sukuꞌ sangom ina, katanaman da wā tuli atawa maglangohan. Sangkon pagka kitabi siga sukuꞌ llaw, daa na kitabi ngakig sagannap ma meꞌ sapantun wā tuli. Arapun subay kitabi iyakin, wā saddiya buwat kahandak Tuhan. Maka subay kitabi papatong. Kitabi itu meꞌ karuha sundalu njawom bonoꞌ mehe. Tiyap-tiyap sundalu langkap, luu ampi bassi na para dakan na ka saruk bassi para kōk na mari ya yaꞌ binasa. Kuwan kitabi baw itu, ilooy ya tabilang ampi dakan tabi, yana pangando tabi pa Tuhan ka aseꞌ tabi niiya. Maka saruk bassi tabi yana holat tabi pa Tuhan majatu kasalamatan tabi.

1 Timuti 4:12

Timuti, daa ko loman nōꞌ bong sabagay luu nnaa nahawi kau sukat yaꞌ gi sangkad umu nu. Gam pin buwat na pin ko suntuan ayad ni mimon sukuꞌ si Isa nnaa. Pakitahan nu sila kawul-piil ayad ka aseꞌ. Maka subay tumatandaꞌ kasutsian nu ka basag pangando nu ni si Isa.

1 Timuti 4:15

Kamura-murahan mimon bay halap ku ningkau, bogbogan nu du supaya tumatandaꞌ na ni mimon nnaa lay na du pasōng kapandoyan nu magpa-mmean.

2 Timuti 1:8

Sangkon daa na ko tawu maan jama pasal Papuꞌ ta. Damikiyan, daa na du ko tawu mangaku ga aku soheꞌ nu sukat ku njawom jīl. Gam pin, magpalapay na ko niyaku natasan oy-oy kamalasahiyan kalnaꞌ umanat mahap pasal Papuꞌ ta. Ndang-ndang luu du kawasa Tuhan nganggaosan kita.

2 Timuti 2:10

Umanat Tuhan ilay siꞌ kaboo kasalamatan ni soysoy pitsayaꞌ. Sangkon atas ku na natasan oy-oy jaꞌ kamalasahiyan kalnaꞌ sagannap ma bay pineneꞌ meꞌ Tuhan. Kainagon ku koleꞌ jaꞌ sila kasalamatan njataꞌ si Isa Almasi sampay tumabeꞌ ni kabantugan na saumu-umu.

2 Timuti 2:3

Magpalapay ko niyaku natasan jinisan katiksaan kalnaꞌ si Isa Almasi meꞌ karuha sundalu kanaalla natas njawom bonoꞌ mehe.

2 Timuti 4:17

Para na pin, jaman ku bay sinumariya, lai du ku bana inunungan meꞌ Papuꞌ Isa. Boꞌ bay gi ya nganggaosan aku masaplag umanat na labbasakayi ni mimon jama saꞌ Yahudi ndooy. Sat na jaꞌ, sasang ku ilay siꞌ bay sinumariya, parasahan ku subay ga ku hayop liput na meꞌ baanan halimaw. Kahapan, lay du ku sinalamat meꞌ Papuꞌ man bahaya looy.

Hibrani 13:17

Asipun bi siga pa-mmean bi sukuꞌ si Isa. Lillaꞌ jaꞌ kam ninsila batan sila ina ngayaran kaam mari sambu nyawa bi. Maka katoonan da du sina, luu jaꞌ masa ni sinōng paawop na sila pa Tuhan magsabanna bong pooy meꞌ da bay buwat ilooy ma bay sinukuꞌ ninsila. Dari bong ina bean bi jaꞌ sila, mastiꞌ gāk du sila ngayaran kaam. Sugaꞌ bong ina niyaꞌ, susa sina sila. Boꞌ na, kalugian gi ningkaam.

1 Pitel 1:13

Dari pagka lay na kam sinalamat leꞌ Tuhan, patattogun bi na pamiki bi makutuꞌ kahandak na, maka agakun bi dī bi. Maka daa kam jamu ngaholat ni supaat ma ndean kaam pag beleng si Isa Almasi.

Siga Pakaradjaan bay Pinalahil 3:2

Sangkon matiꞌ na teꞌ kam. Patakkoun bi na pangando bi niyaku padpad luu gi takapin dangkitiꞌ, taggahaꞌ lungay na baw mintu labbasakayi. Batan ndaꞌ ku tangge-tingkōꞌ bi yaꞌ gi sikatuwaꞌ ka kahandak Tuhan.