2 Timuti 1:9 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁹ Maka ndang-ndang, iya du bay nalamat kita sampay ngaliyun kita supaya kita dari sukuꞌ na ma sutsiꞌ halloman ta llum. Sugaꞌ iya ilay bay nalamat kita, saꞌ baw ga man sabapan ni lilingan na mahap arat-tabiat ta. Arapun kon na ilay bay nalamat kita sabap ndang inaa garaꞌ na yaꞌ gi san junyaꞌ bay pinapayak. Ndang luu na garaꞌ na makitahan manusiyaꞌ aseꞌ-tabang na njataꞌ pabuwatan si Isa Almasi.

2 Timuti 1:9 ပူးပေါင်းရင်းမြစ်များ

Matiyu 1:21

Pag maddi na ina mintu, lalla anak na. Awnan nu ya si Isa, hati na tukang nalamat, sabap iya na sina mintu nalamat siga sukuꞌ na mari sila yaꞌ minulkaan sabapan bay dusa da.”

Lukas 10:21

Na ni waktu looy siꞌ, katakkahan na si Isa kagakan mehe meꞌ Rū Sutsiꞌ sampay yuk na pa Tuhan, “Maꞌ, meꞌ kau Papuꞌ mimon-mimon taꞌ gumi sampay taꞌ langit, pudji ta ko. Magsuku ku ningkau sabap kabanahan ma bay limbuhan nu ni siga jama ma milang dī da halul-akka ka lawom pangahati, palahil nu na ni jama ma kuhi tinoan meꞌ karuha anak-anak. Lay na gantaꞌ nu meꞌ looy batan ilooy kasulut ningkau.”

Yahiya 17:24

“Maꞌ, kainagon ku sila ma bay halap nu niyaku wā dambuwaꞌ ka aku. Meꞌ looy ilay, takita da na ehe kabantugan ku, yana kabantugan bay pamuwan nu niyaku sabap ndang kakasi nu ku yaꞌ gi bay pinapayak junyaꞌ.

Yahiya 17:9

“Batnaa pakuhan ku na sila duwaa ningkau. Yaꞌ na ku ngalapis jama sarī. Ituu jaꞌ pakuhan ku sagannap ma bay hinalap meꞌ nu niyaku sabap sila sukuꞌ nu.

Yahiya 6:37

Sugaꞌ sagannap ma bay sinukuꞌ leꞌ Mmaꞌ ku niyaku, mastiꞌ mmeꞌ jaꞌ sina niyaku. Boꞌ na, sagannap ma mmeꞌ niyaku, yaꞌ sina luu tuwak ku.

Salsila siga Rasul 15:18

Mimon ma bay sabbut ku siꞌ, ndang bay na ginantaꞌ meꞌ ku man awwal jaman lagi.’

Salsila siga Rasul 2:47

Wā sila mudji Tuhan sampay kamahapan na mimon jama ni Jerusalem ni arat da. Dari llaw pa dangallaw, pasampun boꞌ pasampun na pin eka jama ma sinalamat meꞌ Tuhan.

Suwat si Pol pa mman Baanan Sukuꞌ si Isa ndooy ni Rom 11:14

Kainagon ku ilohan na sila ningkaam sampay man da na pitsayaꞌ, boꞌ da sinalamat.

Suwat si Pol pa mman Baanan Sukuꞌ si Isa ndooy ni Rom 11:29

Sangkon masi luu dapat siga Yahudi salamat batan Tuhan ina, bong lay na muwan ladjikiꞌ, yaꞌ na mawiꞌ. Damikiyan, bong ya ngaliyun jama pa mman na, yaꞌ du ya nambo lawang.

Suwat si Pol pa mman Baanan Sukuꞌ si Isa ndooy ni Rom 16:25

Na katapusan bitsala ku, pudji tabi Tuhan. Iya ina nganggaosan kaam mari kam yaꞌ usik man umanat ma bay tinōꞌ ningkaam. Umanat ma awnan ku yana umanat mahap pasal si Isa Almasi ma pinasaplag meꞌ ku. Umanat mahap itu, ndang luu na njawom siga suwat kanabi-nabihan, sat na jaꞌ yaꞌ gi bay tumampak kamaatunan na.

Suwat si Pol pa mman Baanan Sukuꞌ si Isa ndooy ni Rom 3:20

Tud yaꞌ sina luu san disu initung meꞌ Tuhan intong sabap meꞌ na mogbogan saraꞌ. Gam pin, sabapan saraꞌ, tasayu jama na dusahan sila pa Tuhan.

Suwat si Pol pa mman Baanan Sukuꞌ si Isa ndooy ni Rom 9:11

Sugaꞌ yaꞌ gi san sila bay pinamaddihan, ndang bay ginantaꞌ meꞌ Tuhan bong oy sukuꞌ da man majatu garaꞌ na. Dari sasang da masi njawom kūn induꞌ da lagi, jaman yaꞌ gi san luu dapat da buwat mahap atawa maat,

Suwat si Pol pa mman Baanan Sukuꞌ si Isa ndooy ni Rom 9:24

Awnan ku ilay siꞌ yana kitabi ma bay lliyun meꞌ Tuhan binuwat sukuꞌ na. Boꞌ sukuꞌ na ina saꞌ sat lakka man bangsa Yahudi, arapun sampay lakka man mimon bangsa.

1 Korin 1:18

Na umanat pasal kapatoy si Isa taꞌ tehang ina, tuktuk na pinasaplag, bong ni sagannap ma song pa nalkaꞌ, meꞌ da mista, karupangan jaꞌ. Boꞌ ningkitabi itu ma sinalamat, katoonan tabi na njataꞌ umanat mahap luu na dapat manusiyaꞌ ngissa kawasa Tuhan nalamat.

Epesus 1:11

Na bangsa kami itu bay duhuꞌ ngaholat ni katakka Almasi. Maka kami du bay ginantaꞌ meꞌ Tuhan binuwat sukuꞌ na ma subay moo sanglit ka kabantugan niiya. Labba man tagnaꞌ junyaꞌ lagi, ndang ilooy na silay bay garaꞌ Tuhan. Boꞌ garaꞌ Tuhan ina labbasakayi mastiꞌ pinajatu jaꞌ sina ni jalan ma sikatuwaꞌ ka kahandak na.

Epesus 1:9

Boꞌ garaꞌ na ilay, ndang bay ginantaꞌ pinajatu njataꞌ si Isa Almasi, batan ndang inaa nulut ni kahandak na. Kamaatunan garaꞌ na ilay yaꞌ gi bay tasayu meꞌ manusiyaꞌ maruhuꞌ. Sakayi na pinalahil noy ningkitabi na ni timpu batnaa.

Epesus 2:5

Batan minsan kitabi meꞌ karuha jama matoy sibuwa ni mata Tuhan sabapan dusa tabi, lay na du kitabi tabeꞌ ni Almasi pinakallum. Dari salamat na kitabi isu-isu sabapan aseꞌ Tuhan.

Epesus 3:11

Ilooy na silay siꞌ bay garaꞌ Tuhan man awwal jaman lagi. Boꞌ lay na pinajatu man sabapan mimon bay pabuwat Papuꞌ tabi si Isa Almasi.

Pilipi 3:14

Aku itu meꞌ sapantun jama lalumbaan magtuyuꞌ sonse pa tōng lumbaan mari takoleꞌ ku haddiya ma ndean meꞌ Tuhan. Batan ndang inaa sina maksud Tuhan bay ngaliyun kitabi pa jawom okoman na. Kahandak Tuhan ina, takoleꞌ tabi na kaallum meꞌ looy man sabapan pagkatibuuk tabi ka si Isa Almasi.

1 Tesaloneka 4:7

Kitabi ilay bay lliyun meꞌ Tuhan pa jawom okoman na supaya kitabi mōꞌ kawul-piil sutsiꞌ, saꞌ ga buwat kalalamaan.

1 Timuti 1:1

Ituu itu aku, yana si Pol, disu rasul si Isa Almasi man panohoan Tuhan, yana poonan kasalamatan tabi maka man panohoan si Isa Almasi, yana pag-asa tabi.

2 Timuti 1:1

Ituu itu aku, yana si Pol, disu rasul si Isa Almasi man kahandak Tuhan. Aku itu bay sinohoꞌ meꞌ Tuhan masaplag pasal kaallum bahau ma bay njanjiꞌ meꞌ Tuhan ni soysoy ma tibuuk ka si Isa Almasi.

Hibrani 3:1

Na siga danganakan ku, yana sukuꞌ Tuhan, kaam ina, meꞌ aku na du, lay na lliyun meꞌ Tuhan pa jawom okoman na. Sangkon kannahun bi na si Isa ma pinagbāꞌ meꞌ tabi ni manusiyaꞌ iya rasul Tuhan ka panghuluꞌ imam ma asahan tabi.

1 Pitel 1:20

Halloman junyaꞌ yaꞌ gi bay pinapayak, ndang lay na bay ginantaꞌ meꞌ Tuhan Almasi maddusan kitabi man komkoman Ibilis. Sugaꞌ noy ni timpu batnaa na, ni ahil jaman, boꞌ luu na Almasi bay pinalahil meꞌ Tuhan ningkaam.

1 Pitel 2:9

Boꞌ kaam ina ma pitsayaꞌ ni Almasi, lay na kam pineneꞌ meꞌ Tuhan binuwat baanan siga imam ka sultan njawman pamarinta na. Boꞌ lay gi kam pabuwat Tuhan bangsa sutsiꞌ ma inaku leꞌ na sukuꞌ na. Kahandak na masaplag na kam kaayaran na. Batan lay na kam pinōꞌ meꞌ na man jawom kalindoman, sampay lay na kam lliyun pa jawom karantaan na ma yaꞌ luu sibuꞌ sabanding na.

Siga Pakaradjaan bay Pinalahil 13:8

Dari dak mimon na manusiyaꞌ taꞌ babaw junyaꞌ numba sattuwa looy na. Ilooy du yaꞌ numba iya yana sagannap ma lay na sinuwatan awon da njawom Būk Kaallum man ngalista awon sagannap ma luu kasampulnaan nyawa da saumu-umu. Awon da ilay ndang lay na sinuwatan njawom būk looy labba man kapayak junyaꞌ. Ilooy ma dapu būk looy yana Bili-bili looy ma bay pingkaꞌ pinapatoy.

Siga Pakaradjaan bay Pinalahil 17:8

Kuwan sattuwa looy siꞌ ma bay takita nu, ndang bay luu silay maruhuꞌ-ruhuꞌ, pag batnaa lay na ya limbu. Sugaꞌ yaꞌ na du sina hallom, luu na du ya kaluwa pabalik man jawom lowang tangob looy ma yaꞌ mag-ngkoran lawom na. Sugaꞌ pag beleng na ina mintu, yaꞌ du hallom, tanalkaꞌ du ya. Pag ilay mintu pōꞌ sattuwa looy, tud inu-inu jama sukuꞌ junyaꞌ, yana sagannap ma ndang yaꞌ bay sinuwatan awon da njawom Būk Kaallum labba man kapayak junyaꞌ. Ngkon da ina mintu inu-inu ni sattuwa looy sabap ndang luu na ya maruhuꞌ, pag-anu, lay na limbu, sugaꞌ luu na sina mintu kaluwa pabalik.”