2 Timuti 1:8 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁸ Sangkon daa na ko tawu maan jama pasal Papuꞌ ta. Damikiyan, daa na du ko tawu mangaku ga aku soheꞌ nu sukat ku njawom jīl. Gam pin, magpalapay na ko niyaku natasan oy-oy kamalasahiyan kalnaꞌ umanat mahap pasal Papuꞌ ta. Ndang-ndang luu du kawasa Tuhan nganggaosan kita.

2 Timuti 1:8 ပူးပေါင်းရင်းမြစ်များ

Malkus 8:38

“Jama ni angkat-angkatan batnaa ina tinagi buwat dusa. Yaꞌ sila kanaalla pa Tuhan. Sugaꞌ indanan bi. Soysoy ina iyaꞌ mangaku mmeꞌ niyaku atawa pun iyaꞌ mōꞌ tōꞌ ku, malaingkan iyaꞌ du ku mangaku iya sukuꞌ ku pag beleng ku, yana Anak Manusiyaꞌ, ddas ka kabantugan Mmaꞌ ku ka siga malaikat man sulgaꞌ.”

Lukas 9:26

“Soysoy ina iyaꞌ mangaku mmeꞌ niyaku ka tōꞌ ku, malaingkan aku, yana Anak Manusiyaꞌ, iyaꞌ du ku mangaku iya sukuꞌ ku pag beleng ku pa junyaꞌ ddas ka kawasa lakka man kami ka Mmaꞌ ku sampay ga malaikat na.

Yahiya 15:27

Kaam pun, subay du kam mahati kabanahan pasal aku sabap kaam bay dambuwaꞌ ka aku labba man sibuwa.”

Yahiya 19:35

Na mimon pakaradjaan tuu siꞌ, makibana ku batan aku mismu bay kasakup. Sampay itu na tuntut ku ningkaam supaya pitsayaꞌ na du kam.

Salsila siga Rasul 5:41

Pag lakka ga rasul looy man baanan Sanhidrin, tud bay gāk sila batan kabantugan mehe ninsila bay natas pinakiyaꞌ kalnaꞌ awon si Isa.

Suwat si Pol pa mman Baanan Sukuꞌ si Isa ndooy ni Rom 1:16

Tud manganna situ ku ni kawasa Tuhan njawom umanat mahap tuktuk na pinasaplag. Sangkon yaꞌ ku loman masaplag. Batan katoonan ku mimon jama ma pitsayaꞌ ni umanat mahap tattap jaꞌ nammu kasalamatan, nagnaꞌ man bangsa Yahudi sampay pa kabangsa-bangsahan ma saꞌ Yahudi.

Suwat si Pol pa mman Baanan Sukuꞌ si Isa ndooy ni Rom 16:25

Na katapusan bitsala ku, pudji tabi Tuhan. Iya ina nganggaosan kaam mari kam yaꞌ usik man umanat ma bay tinōꞌ ningkaam. Umanat ma awnan ku yana umanat mahap pasal si Isa Almasi ma pinasaplag meꞌ ku. Umanat mahap itu, ndang luu na njawom siga suwat kanabi-nabihan, sat na jaꞌ yaꞌ gi bay tumampak kamaatunan na.

Suwat si Pol pa mman Baanan Sukuꞌ si Isa ndooy ni Rom 8:36

Na bong luu kasusahan tuwaꞌ ningkitabi meꞌ looy, daa sa kitabi jayip, batan ndang bay silay sinuwatan jawom kitab, ilooy ma yuk na, “Papuꞌ, llaw pa dangallaw njawom bahaya jaꞌ kami, adak-adak na kami pinapatoy kalnaꞌ kau. Pangandaan jama subay ga kami bili-bili jaꞌ pataꞌ san sinumbaliꞌ.”

Suwat si Pol pa mman Baanan Sukuꞌ si Isa ndooy ni Rom 9:33

Boꞌ magbēꞌ du bana ka suwat njawom kitab, ilooy ma yuk Tuhan, “Ndaun bi sa. Luu sina mintu nnaꞌ ku ni Zayon batu man jama sumantuk. Sampay ilooy na poonan man mandung imukka da. Sugaꞌ soysoy baw ina mintu pitsayaꞌ ni batu looy, yaꞌ kaap-apan saumu-umu.”

1 Korin 1:6

tandaꞌ pitsayaꞌ na kam ni umanat mahap pasal si Isa Almasi.

2 Korin 6:7

Bila kami magnasihat, kabanahan jaꞌ mimon ma pinōꞌ meꞌ kami, boꞌ tumatandaꞌ luu jaꞌ kawasa Tuhan njataꞌ kami. Kaintongan kawul-piil kami yana pakakas kami man ngatuhan soysoy nguntra kami.

Epesus 3:1

Dari kalnaꞌ kaam siga bangsa saꞌ Yahudi, itu na ga ku lay tajīl sabap meꞌ ku bay masaplagan kaam kabanahan pasal si Isa Almasi.

Epesus 3:13

Siga danganakan, san itu ku batnaa njawom jinisan kabinsanaan, junjung ku na ningkaam, yaꞌ dari man tungkas iman bi. Batan aku tu bay magka meꞌ tuu pa kaayaran du ningkaam.

Epesus 4:1

Na meꞌ aku itu disu sosohoan Papuꞌ njawom jīl sabap meꞌ ku masaplag, junjung ku na ningkaam, bogbogan bi kawul-piil ma tawop ni jama ma bay lliyun meꞌ Tuhan binuwat sukuꞌ na.

Epesus 4:17

Na ni kapatut bay dean Papuꞌ Isa niyaku, ituu halap ku ningkaam: Amay-amay daa na kam mmeꞌ meꞌ uwahan siga kapil batan yaꞌ sina luu sōng pamiki da.

Pilipi 1:7

Pataꞌ du baw situ ku mamiki meꞌ looy siꞌ pasal kaam sabap yaꞌ kam kuhi lakka man jawom atay ku. Batan man maruhuꞌ lagi ngabut sampay batnaa, yaꞌ kam bay jamu nabangan aku. Njawom jīl ku atawa ni poan masaplag sampay nampungan jama ma nual pasal umanat mahap, basta mehe du bay tabang bi niyaku.

Pilipi 3:10

Kainagon ku magsasōng na pin meꞌ ku toon Almasi. Maka kainagon ku luu na pin kawasa Tuhan njataꞌ ku ngahalin pangatayan ku, meꞌ karuha basag kawasa na bay makallum Almasi pabalik. Maka doman du ku nūs limpaꞌ Almasi bay lumingkaꞌ ni jinisan kamalasahiyan kalnaꞌ Tuhan. Maka doman du ku ngikut tabiat na. Dari meꞌ iya na du ku yaꞌ mean kahandak ku supaya tabean ku na kahandak Tuhan san gi man ku patuhut meꞌ bay kapatoy Almasi.

Pilipi 4:13

batan man sabapan Papuꞌ Isa nganggaosan aku, yaꞌ luu saꞌ yaꞌ takaya ku.

Kolossa 1:11

Maka kamura-murahan binuwanan du kam meꞌ Tuhan gaos lakka man kawasa na ma yaꞌ luu sibuꞌ sabanding na. Dari san gi oy katuwaꞌ ningkaam, katatas kam maka masi na pin kam gāk. Sarī gi, patahaꞌ na pin pasensiya bi.

Kolossa 1:24

Na san ku tu batnaa tiksaꞌ sabap meꞌ ku wā masaplag, yaꞌ du tu lungay kagakan ku. Kon meꞌ looy batan lay jaꞌ du bay pa kaayaran ningkaam. San pun Almasi, bay du lumingkaꞌ njawom jinisan kamalasahiyan kalnaꞌ siga sukuꞌ na. Pag batnaa, aku na baw pagantiꞌ niiya ngissahan kamalasahiyan kalnaꞌ sagannap ma pitsayaꞌ niiya, yana kitabi ma binilang baran na.

1 Tesaloneka 3:4

Jaman kami masi nnaa ni lahat bi, saꞌ ba, ndang bay kam baan kami mastiꞌ song nilaugan jaꞌ kitabi? Pag batnaa, tasayu bi na du, lay na du bana binakbul bay bitsala kami.

1 Timuti 2:6

Iya ilay, atas na bay nongan umu na supaya tatanggung na dusa manusiyaꞌ sikamimon mari sila kapaddus man hukuman ni dusa da. Boꞌ ituu na situ masa bay ginantaꞌ man umanat pasal iya pinasaplag.

2 Timuti 1:10

Boꞌ lai na situ pinalahil aseꞌ-tabang na pag taabut na bay mapitu si Isa Almasi pa junyaꞌ, yana tukang nalamat kitabi. Batan lay langkat si Isa kawasa kapatoy pag taabut na pinakallum pabalik. Maka lay gi ya masampay umanat mahap supaya soysoy pitsayaꞌ niiya koleꞌ kasampulnaan nyawa ma yaꞌ luu katapusan na.

2 Timuti 1:12

Boꞌ ituu na situ kon ku tiksaꞌ ntuu njawom jīl. Kamasaꞌ, yaꞌ du tu ku iyaꞌ batan katoonan ku ilooy ma asahan ku, yana si Isa Almasi. Boꞌ na, tatantu ku du mastiꞌ takaya na jaꞌ ngayaran ma bay pa-ntan ku niiya ngabut sampay llaw katapusan.

2 Timuti 1:16

Sugaꞌ kuwan si Onesiporus ka ga paglūng na, kamura-murahan pinanimbangan du sila meꞌ Papuꞌ. Batan takdang na ilay bay takka pitu pa Rom, yaꞌ bay luu katagong na miha ngkod-ngkoran ku yaꞌ gi bay tatammu na. Yaꞌ san ya bay iyaꞌ takita magpangandaꞌ aku san ku bay taingkot ka karina. Daran ya bay magamgaman aku.

2 Timuti 2:3

Magpalapay ko niyaku natasan jinisan katiksaan kalnaꞌ si Isa Almasi meꞌ karuha sundalu kanaalla natas njawom bonoꞌ mehe.

2 Timuti 2:8

Kannahun na pin kabanahan pasal si Isa Almasi. Numbul satu, pus na bay pinapatoy, lay du ya pinakallum pabalik. Maka iya na Sultan bay tinunaꞌ mattoꞌ, ma panubuꞌ Sultan Daud. Inaa ina yana umanat mahap ma ndang pinasaplag meꞌ ku.

2 Timuti 2:9

Salla na, sabap meꞌ ku masaplag, daran na ga ku bininsanaꞌ. Sampay lay na ga taabut man ku tatalungkuꞌ njawom jīl binuwat subay ga jama tukang ngalangga saraꞌ. Sugaꞌ san itu ku pinusas ka karina, bong inawnan umanat Tuhan, basta yaꞌ baw sina takoleꞌ kinarinahan.

2 Timuti 4:17

Para na pin, jaman ku bay sinumariya, lai du ku bana inunungan meꞌ Papuꞌ Isa. Boꞌ bay gi ya nganggaosan aku masaplag umanat na labbasakayi ni mimon jama saꞌ Yahudi ndooy. Sat na jaꞌ, sasang ku ilay siꞌ bay sinumariya, parasahan ku subay ga ku hayop liput na meꞌ baanan halimaw. Kahapan, lay du ku sinalamat meꞌ Papuꞌ man bahaya looy.

2 Timuti 4:5

Na kuwan kau Timuti, subay ko wā ngagak dī nu ni mimon kahalan nu. Bong ko tumabbaꞌ njawom kamalasahiyan kalnaꞌ Papuꞌ, tatasan nu jaꞌ. Pagbuli-bulihan nu masaplag umanat mahap pasal si Isa. Pajatuhun na mimon ma bay hinalap meꞌ Tuhan ningkau.

1 Pitel 1:5

Maka man sabapan pangando bi ni si Isa, agpangan Tuhan na pin sina kam ni kaehe kawasa na ngkod-ngkoran yaꞌ gi bay takoleꞌ bi kasalamatan ma song pinalahil ni llaw dambuli.

1 Yahiya 4:14

Kami situ mismu bay ngita Anak Tuhan. Sangkon kabāꞌ kami tud mawjud Mmaꞌ na bay mapitu iya nohoꞌ nalamat manusiyaꞌ.

Suwat Lakka man si Jūd 1:24

Pudji tabi Tuhan. Iya na sina katabang ningkitabi supaya yaꞌ na kitabi taboo-boo buwat dusa. Damikiyan, iya na du sina kapuwasan dusa tabi supaya yaꞌ na luu sutsutan njataꞌ tabi pag mintu taabut tabi nangge ni awpan sahayaꞌ na. Ndooy ilay mintu ni pag-awpan na, tud gāk na kitabi saꞌ alang-alang.

Siga Pakaradjaan bay Pinalahil 1:2

Dari suwatan ku na mimon ma bay tasakup ku sampay umanat Tuhan ma bay pinalahil meꞌ si Isa Almasi niyaku.

Siga Pakaradjaan bay Pinalahil 1:9

Na ni kapasal aku itu ma nuwat, meꞌ halling sambat ku na siꞌ, aku itu si Yahiya, disu danganakan bi meꞌ kaam du tibuuk ka Papuꞌ Isa. Aku itu sibuꞌ du ka kaam bininsanaꞌ. Saliꞌ-saliꞌ du kitabi natasan laug ma tuwaꞌ ni sagannap ma tabeꞌ ni pamarinta Tuhan. Lay situ ku tasungkub sampay luu na ku bay binoo pitu tinahan ni nusa Patmos. Kon ku bay tasungkub sabap meꞌ ku bay masaplag palman Tuhan ka umanat pasal si Isa.

Siga Pakaradjaan bay Pinalahil 12:11

Lipara lay na tumanjataꞌ siga pagkahi tabi man Ibilis man sabapan lahaꞌ Bili-bili looy bay tumpa man muwasan dusa da. Maka disu gi danan man da bay tumanjataꞌ sabap meꞌ da bay masaplag umanat Tuhan. Yaꞌ na sila bay sēngan umu da san gi man da matoy kalnaꞌ Bili-bili looy.”

Siga Pakaradjaan bay Pinalahil 19:10

Pag takale ku meꞌ looy, ilooy ma lay na ku sujud ni battis na numba iya. Sugaꞌ yuk na, “Daa ko ba buwat meꞌ naa. Tuhan jaꞌ sumbahun. Aku bitu ata Tuhan sadjaꞌ meꞌ kaam du ka siga danganakan nu ma ngantanan umanat Papuꞌ Isa. Boꞌ umanat looy ilay ma bay pinasampay meꞌ Papuꞌ Isa yana kabanahan ma bay tinunaꞌ meꞌ kanabi-nabihan mattoꞌ.”