2 Tesaloneka 2:16 - Sabahagiꞌ Kitab Tawrat: Panagnaan ni Awwal Jaman maka Kitab Injil

^16-17 Na siga danganakan, kakasi Tuhan, kamura-murahan pinagamgaman na pin atay bi meꞌ Mmaꞌ tabi Tuhan ka Papuꞌ tabi si Isa Almasi. Kamura-murahan ginaosan na pin kam meꞌ Tuhan mari mahap jaꞌ mimon tangge-tingkōꞌ bi ka bitsala bi. Batnaa, sabap Tuhan poonan tabang mehe ningkitabi, luu na kagakan njawom atay tabi saumu sampay holat ayad saꞌ alang-alang.

2 Tesaloneka 2:16 ပူးပေါင်းရင်းမြစ်များ

Lukas 16:25

“Sugaꞌ tampung Nabi Ibrahim, ‘Nges, intomun doꞌ jaman nu llum ni junyaꞌ. Lay jaꞌ ko masannang dī nu ngissahan jinisan pakaradjaan ayad halloman nu ni junyaꞌ. Boꞌ si Lasarus itu, ilooy du bay takissa na katiksaan. Pag batnaa, iya doꞌ baw magparasahan ayad. Kuwan kau, nnaa na jaꞌ ko njawom tiksaꞌ.

Yahiya 13:1

Na tapit jaꞌ siꞌ paballangan Ngalingkaꞌ, ndang katoonan si Isa na tapit na waktu man na ngambanan junyaꞌ sampay pabeleng pa mman Mmaꞌ na. Na iya siꞌ tu, labba man sibuwa ngabut sampay pa katapusan, ndang maaseꞌ ya ni siga mulit na ntuu ni junyaꞌ.

Yahiya 15:13

Bong inawnan aseꞌ, yaꞌ na sina luu aseꞌ lumabi man aseꞌ jama ma nongan umu na kalnaꞌ kabagayan na.

Yahiya 15:9

“Yana meꞌ Mmaꞌ ku maaseꞌ niyaku, meꞌ naa du aseꞌ ku ningkaam. Sangkon, kasengan bi aseꞌ ku.

Yahiya 16:22

Damikiyan, meꞌ naa du sina mintu kahalan bi. Batnaa susa gi kam bay kabaan sakkat na kitabi, sugaꞌ sitammu du sina kitabi pabalik. Taabut mintu ni llaw looy, biddaꞌ na sina ehe kagakan njawom atay bi. Boꞌ yaꞌ sina takaddoan meꞌ soy maka soy na.

Yahiya 3:16

Biddaꞌ na sina ehe aseꞌ Tuhan ni manusiyaꞌ. Sangkon lay na pinaglillaꞌ meꞌ na Anak tungga na pinapatoy supaya soysoy pitsayaꞌ niiya yaꞌ na tanalkaꞌ, gam pin koleꞌ gi kasampulnaan nyawa ma yaꞌ luu katapusan na.

Yahiya 4:14

Boꞌ boheꞌ ma pamuwan ku, bong jama bay kainum, yaꞌ na tohoꞌ kallong na pabalik. Batan boheꞌ ma pamuwan ku padari meꞌ karuha poon boheꞌ njawom atay jama. Niyaꞌ sina kuhi kumattaꞌ, boꞌ muwanan manusiyaꞌ lagi kasampulnaan nyawa saumu-umu.”

Salsila siga Rasul 15:11

Mingkan, man sabapan aseꞌ-tabang Papuꞌ Isa, batnaa ilooy du tinaat ningkitabi siga Yahudi yana pitsayaꞌ niiya. Sangkon sapatut na, subay meꞌ looy jaꞌ du ni siga bangsa saꞌ Yahudi.”

Salsila siga Rasul 18:27

Na hallom maka hallom na, doman na baw si Apolos patuwak pa Akaya masaplag. Boꞌ lay du inaminan garaꞌ na meꞌ siga pagkahi na sukuꞌ si Isa ni Epesus. Sampay lay gi sila nuwat pa mman sagannap ma mmeꞌ ni si Isa ndooy ni Akaya supaya hinasi meꞌ da paayad si Apolos. Na pag takka na pa Korin ndooy ni Akaya, man sabapan gaos Tuhan njataꞌ na, tud bay mehe tabang tōꞌ na ni sagannap ma pitsayaꞌ na ni si Isa.

Suwat si Pol pa mman Baanan Sukuꞌ si Isa ndooy ni Rom 1:7

Meꞌ kaam siga kakasi Tuhan nnaa ni Rom ma bay lliyun binuwat sukuꞌ na, kamura-murahan binuwanan na pin kam kasannangan ka barakat meꞌ Mmaꞌ tabi Tuhan ka Papuꞌ tabi si Isa Almasi.

Suwat si Pol pa mman Baanan Sukuꞌ si Isa ndooy ni Rom 4:16

Sangkon, man gantaan Tuhan, isu-isu sila ma pitsayaꞌ niiya koleꞌ siga supaat ma bay njanjiꞌ meꞌ na. Siga supaat looy ilay ndean meꞌ Tuhan ni kaehe aseꞌ na ni sikamimon ma binilang meꞌ na siga anak Nabi Ibrahim. Na siga anak ma awnan ku ilay siꞌ, saꞌ silay sat siga Yahudi ma pitsayaꞌ, arapun sampay mimon bangsa ma pitsayaꞌ ni janjiꞌ Tuhan meꞌ bay jaman Nabi Ibrahim. Sangkon Nabi Ibrahim ilay binilang na mmaꞌ sikamimon manusiyaꞌ ma pitsayaꞌ.

Suwat si Pol pa mman Baanan Sukuꞌ si Isa ndooy ni Rom 4:4

Dari mandooy siꞌ, katoonan tabi na bay jaman Nabi Ibrahim bay initung intong, yana ladjikiꞌ man Tuhan sabap meꞌ na bay pitsayaꞌ, saꞌ ga tungbas ni bay pabuwatan na. Ladjikiꞌ man Tuhan ina tadalil pa sīn ndean jama. Bong jama bay binuwanan sīn, boꞌ yaꞌ san bay luu pabuwat na oy maka oy na, ilooy inawnan ladjikiꞌ. Boꞌ jama ma bay magtuyuꞌ buwat ni tawki, taabut na binuwanan sīn, yaꞌ taawnan ladjikiꞌ, arapun gadji.

Suwat si Pol pa mman Baanan Sukuꞌ si Isa ndooy ni Rom 5:8

Boꞌ Tuhan ina, tandaꞌ ehe aseꞌ na ningkitabi, lay na ga bay pinaglillaꞌ meꞌ na Almasi pinapatoy kalnaꞌ kitabi jaman tabi masi gi baldusa.

Epesus 5:2

Subay kitabi wā maasean pagkahi tabi manusiyaꞌ meꞌ karuha Almasi bay maasean kitabi. Tandaꞌ aseꞌ na, lay na ga ya nongan umu na kalnaꞌ kitabi. Yana meꞌ jama bay numbaliꞌ bili-bili man ngulban maruhuꞌ, Almasi pun lay na du bay pinapatoy binuwat kulban kalnaꞌ kitabi. Bay pabuwatan Almasi ilay nulut ni kahandak Tuhan. Bong ibaratan bawu, tud kahamutan ya.

Epesus 5:25

Na kuwan kaam baw siga kalallahan ma ndahan, subay kam maasean nda bi. Akigun bi jaꞌ aseꞌ Almasi ningkitabi ma pitsayaꞌ niiya. Tandaꞌ aseꞌ na, lay na ga ya bay nongan umu na kalnaꞌ kitabi

Kolossa 1:23

basta kam tattap jaꞌ pitsayaꞌ ni umanat mahap pasal si Isa. Sangkon daa na kam kuhi pinagsian man kabanahan njawom umanat mahap ma bay takale bi. Maka daa kam jamu ngaholat Tuhan numan mimon janjiꞌ na njawom umanat mahap. Umanat mahap ina, liput na junyaꞌ man na pinasaplag. Na ni sagannap ma bay pineneꞌ masaplag, kuwan disu, yana aku na situ.

Kolossa 1:5

Sabapan kabanahan bay takale bi, yana umanat mahap pasal si Isa, ilooy na poonan bi ngaholat koleꞌ mimon supaat ma bay hinallian kaam ni sulgaꞌ. Maka ilooy na kon bi mangando ni si Isa ka maasean pagkahi bi manusiyaꞌ.

1 Tesaloneka 3:11

Kamura-murahan pinatakka du kami pilu meꞌ Mmaꞌ tabi Tuhan ka Papuꞌ tabi si Isa.

2 Tesaloneka 2:13

Boꞌ kaam ina, siga danganakan, pabiddaꞌ man sila. Sangkon pataꞌ du kami wā muwan pagsukuhan pa Tuhan sabapan bi, yana siga kakasi Tuhan. Labba man sibuwa lagi, ndang lay na kam peneꞌ Tuhan tabeꞌ ni sukuꞌ na. Maksud Tuhan supaya kam salamat man sabapan Rū na nutsiꞌ pangatayan bi maka sabap meꞌ bi pitsayaꞌ ni kabanahan.

Taytus 2:13

Ilooy ilay siꞌ subay isbat tabi sasang tabi ngagad llaw kagak-gāk ma pinagdautan meꞌ tabi. Awnan ku ilay siꞌ katakka si Isa Almasi, yana Tuhan tabi Sangat Kawasa ma tukang nalamat kitabi.

Hibrani 7:19

Batan yaꞌ luu njawom saraꞌ ma kasutsiꞌ ni pangatayan manusiyaꞌ supaya sila mahap na pa Tuhan. Sangkon lay na Tuhan muwanan kitabi pag-asa mas mahap man saraꞌ man tabi mahap na niiya.

1 Yahiya 3:16

Na man tabi toon bong oy aseꞌ sabanna, mindoga jaꞌ tabi ni si Isa, batan lay na ga ya nongan umu na kalnaꞌ kitabi. Sangkon kitabi pun subay du mangatas nongan umu tabi kalnaꞌ siga pagkahi tabi sukuꞌ si Isa.

Siga Pakaradjaan bay Pinalahil 1:5

Maka kamura-murahan binuwanan na pin kam kasannangan ka barakat meꞌ si Isa Almasi, ilooy ma kanaalla masampay kabanahan pasal Tuhan. Iya ilay bay duhuꞌ pinakallum pabalik ka baran ma yaꞌ na kuhi matoy. Maka iya du marintahan mimon panghuluꞌ ni sikaliput junyaꞌ. Ni kaehe aseꞌ na ningkitabi, atas na man lahaꞌ na bay tumpa supaya tapaddusan na kitabi man hisab ni dusa tabi.

Siga Pakaradjaan bay Pinalahil 22:5

Njawom daira looy siꞌ, yaꞌ luu sangom. San yaꞌ na luu palitaan siga sukuꞌ Tuhan atawa dantaꞌ mataallaw ndooy sabap luu du Papuꞌ da Tuhan mismu muwan dantaꞌ ninsila. Maka maglimbang na sila ka iya marinta saumu-umu.

Siga Pakaradjaan bay Pinalahil 3:9

“Na luu siga jama nnaa ma mangaku bangsa Yahudi sila bahasa sukuꞌ Tuhan sila, sugaꞌ ngandustaꞌ jaꞌ sina sila. Ni sabana na, sukuꞌ Ibilis sila. Ndaun bi sa, pasujud ku du sina mintu sila ni battis bi. Maka bohoꞌ da ina mintu makibana na kaasean ta kam.