2 Pitel 2:18 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹⁸ Basag sila ngabbu saula-ula pandoy sila, boꞌ ko, karupangan jaꞌ bitsala da. Baꞌ-bāꞌ da, san gi oy kinanapsuhan meꞌ jama, dari jaꞌ nduwan. Sabapan tōꞌ da meꞌ looy, kasohean jama ma bahau jaꞌ pitsayaꞌ ni Papuꞌ Isa, ma bahau jaꞌ bay ngalabbahan napsu da ma maat, lay na baw taboo-boo bbeleng pabalik pa bay kalaatan da.

2 Pitel 2:18 ပူးပေါင်းရင်းမြစ်များ

Salsila siga Rasul 2:40

Na sarī man ilooy siꞌ, meka gi bitsala si Pitel man na noan sila kabanahan. Sigi-sigi ya nganjunjung ninsila, yuk na, “Bean bi na bay halling ku siꞌ mari kam salamat man mulkaꞌ ma labuꞌ bbos-bbos ni siga jama maat ni angkat-angkatan batnaa.”

Salsila siga Rasul 8:9

Na ni daira looy siꞌ, luu disu lalla inawnan si Saymon. Iya ilay disu tukang mōꞌ jinisan majik. Hallom na ya bay mahaylan jama Samariya ni kapandoy na mōꞌ majik. Boꞌ tigiꞌ gi ya ngabbu bahasa iya pinakapandoy.

Suwat si Pol pa mman Baanan Sukuꞌ si Isa ndooy ni Rom 13:13

Sangkon, subay mahap jaꞌ kawul-piil tabi. Daa na kitabi mmeꞌ meꞌ uwahan kasohean baanan danda ka lalla buwat kasabuhan. Maka daa na kitabi maglangohan, magjina atawa buwat oy-oy kalalamaan. Maka ilagan tabi na sasaꞌ ka dangkiꞌ.

Epesus 4:17

Na ni kapatut bay dean Papuꞌ Isa niyaku, ituu halap ku ningkaam: Amay-amay daa na kam mmeꞌ meꞌ uwahan siga kapil batan yaꞌ sina luu sōng pamiki da.

2 Tesaloneka 2:4

Bbuwatan na ngangkat dī na saula-ula patingkat ya man mimon ma pinag-awnan meꞌ manusiyaꞌ tuhan da atawa oy-oy sinumba meꞌ da. Boꞌ patabbaꞌ gi sina ya pa jawom lumaꞌ Tuhan, yana langga mehe, boꞌ na ningkōꞌ ndooy magladjaꞌ-ladjaꞌ ngawnan dī na Tuhan.

Yaꞌkub 5:5

Kaam ina, lay jaꞌ ngumpohan dī bi altaꞌ ka nganduwan oy-oy jaꞌ ma kinanapsuhan meꞌ bi ntuu ni junyaꞌ. Sibuꞌ du karuha bi ka sapiꞌ pinalammok yaꞌ san tabista na song sinumbaliꞌ na ya.

2 Pitel 1:4

Dari man sabapan ehe kabantugan na ka kaayaran na, lay na kitabi buwanan na siga supaat tud hagaan ka ayad banahan ma ndang bay janjiꞌ na. Maksud Tuhan ilay bay ngandean siga supaat meꞌ looy supaya taikut tabi arat-tabiat na. Maka maksud na supaya yaꞌ na tabi pinagbayaan meꞌ napsu tabi buwat dusa ma kabinasa ningkitabi.

2 Pitel 2:14

Bila sila ngita danda, lanji jaꞌ njawom pamiki da. Tud yaꞌ luu dohong da buwat dusa. Bbuwatan da ngaliboy jama ma kulang iman mmeꞌ ni kalaatan da. Maka alistu sila ngulihal altaꞌ jama ni kamulakab napsu da. Jama meꞌ sila ilay minulkaan meꞌ Tuhan.

2 Pitel 2:2

Meka na sina mintu ni baanan bi takoleꞌ binitsalahan meꞌ da sampay mmeꞌ meꞌ uwahan da buwat jinisan kasabuhan. Dari pag toklas na, binitsala na sina mintu pa kalaatan kabanahan ma inantanan meꞌ tabi.

2 Pitel 2:20

Na sibuwa ilay, siga guru palsu looy siꞌ bay ngahasi kabanahan pasal tukang nalamat kitabi, yana Papuꞌ tabi si Isa Almasi. Pag toklas na, lay na labbahan da mimon kawul-piil da maat ma katamak ni manusiyaꞌ. Pag batnaa, meꞌ ga takawum na baw sila balik meꞌ napsu da buwat dusa. Dari mas maat gi kaadaan da ni batnaa man jaman da yaꞌ gi bay mmeꞌ ni si Isa.

2 Pitel 2:7

Sugaꞌ ndooy ilay ni Sodom, luu gi baw disu lalla, yana si Lut, lay sinalamat meꞌ Tuhan. Iya ilay jama intong. Halloman na maglahat ka ga jama jahat ni daira looy, ndang tud kamaatan ya lassa ngandaꞌ kadarihan da. Batan llaw pa dangallaw, takita na sila buwat jinisan kasabuhan sampay takale na jinisan bitsala da lakaꞌ-lakaꞌ.

2 Pitel 3:17

Sangkon, siga kakasi ku, pagka katoonan bi na mimon bay sabbut ku siꞌ, iyakinan bi tōꞌ jama ma yaꞌ ngisbat Tuhan, taggahaꞌ lay na baw kam mintu takoleꞌ da binoo magsiꞌ sampay man bi na ngalabbahan ntan bi.

Suwat Lakka man si Jūd 1:13

Pabuwatan da ina kaiyaꞌ-iyaꞌ. Sibuꞌ du karuha da ka lamba dilawut ma sigi-sigi nuran boboꞌ ma kasabu jaꞌ ni tapiyan. Hangat sila magsian jama, subay ga sila potean gaga yaꞌ taasahan man mindoga. Sugaꞌ ndang luu na silay lugar lindom saꞌ na gantaꞌ na bay hinalliꞌ ninsila. Boꞌ yaꞌ na silay mintu sila kapōꞌ mandooy saumu-umu.

Siga Pakaradjaan bay Pinalahil 13:11

Pag-anu siꞌ, ngita na baw ku disu sattuwa pōꞌ man jawom gumi. Luu tanduk na duwa meꞌ tanduk bili-bili. Bila ya mitsala, subay ga suwara naga.