2 Korin 11:23 - Sabahagiꞌ Kitab Tawrat: Panagnaan ni Awwal Jaman maka Kitab Injil

²³ Bong yuk da sosohoan Almasi sila, labi na aku. Na bong siꞌ itu yaꞌ talpaksaꞌ, subay ga ku jama yaꞌ luu honaꞌ-honaꞌ na magpabantug meꞌ tuu. Para na pin, bana du bitsala ku. Pooy-pooy jaꞌ ina meꞌ guru bi bay maghulas-sangsāꞌ kalnaꞌ Almasi, basta yaꞌ baw ina sila lumabi man aku. San du sila min dangoy bay tajīl kalnaꞌ iya, basta yaꞌ baw sina lumabi man niyaku. Maka bong ni hāl lagpiꞌ, basta min meka gi niyaku. Kansang gi ku nontongan kapatoy ku.

2 Korin 11:23 ပူးပေါင်းရင်းမြစ်များ

Salsila siga Rasul 14:19

Na sasang ga si Pol masi ndooy ni Listra, luu na baw takka siga Yahudi lakka man Antiyok ka man Ikoniyum. Sasang da ndooy, meka na baw jama bay takoleꞌ da binoo-boo mmeꞌ ninsila nulang ga si Pol. Dari lay na ga paglupung-lupungan da si Pol hiniyak ka batu. Pag ndaꞌ da meꞌ bantuk lay na matoy si Pol, lay na guyud da pa poan daira looy, boꞌ lay jaꞌ mbanan da.

Salsila siga Rasul 20:23

Ilooy du katoonan ku, ni mimon daira ma bay lingkaan ku, bay pinalahil meꞌ Rū Sutsiꞌ niyaku, mastiꞌ luu jaꞌ katuwaꞌ aku kabinsanaan bong saꞌ jīl.

Salsila siga Rasul 21:11

Sasang na siꞌ ndooy, lay ya pasōng pa mman kami. Maka lay gi ya ngindam kambot si Pol. Pag-anu, boꞌ na makkos battis-tangan na mismu ka kambot looy sambayan na halling, “Ituu bay bāꞌ Rū Sutsiꞌ nohoꞌ pinahati ningkaam: Meꞌ tuu du situ mintu meꞌ siga Yahudi ni Jerusalem ngingkotan jama ma dapu kambot tuu, boꞌ na pina-ntan pa mman bangsa Rom hinukum.”

Salsila siga Rasul 25:14

Hallom-hallom jaꞌ siꞌ sila ndooy, lay na baw tuntutan Gubnul Pestus Sultan Agripa hāl palkalaꞌ si Pol, yuk na, “Luu situ ntuu disu pilisu yaꞌ gi san bay sinalassay palkalaꞌ na meꞌ si Pilik jaman na bay maggubnul.

Salsila siga Rasul 27:1

Dari katobtoban pamiki Gubnul Pestus subay sohoꞌ na si Pol binoo taꞌ adjung pilay pa mman Panghuluꞌ Sultan ndooy ni Itali. Dari lay na pina-ntan si Pol ka ga kasohean pagkahi na pilisu pa mman si Juliyus. Si Juliyus ilay disu kapitan baanan sundalu Rom inawnan Batalyon Panghuluꞌ Sultan. Aku pun lay du ku ngunungan iya.

Salsila siga Rasul 28:16

Na takka jaꞌ siꞌ kami pa Rom, lay baw pinadari si Pol maglumaꞌ di-dī na. Sugaꞌ luu na pin baw disu sundalu nohoꞌ nganjagahan iya.

Salsila siga Rasul 28:30

Na si Pol siꞌ tu, luu duwan taun halloman na bay tamban ni lumaꞌ looy ma bay sukayan na. Maka luu-luu jama luꞌ pilay ngandaꞌ-ngandaꞌ iya, lay jaꞌ du hinasi meꞌ na.

Salsila siga Rasul 9:16

Baan ku sa ya, mastiꞌ lumingkaꞌ jaꞌ sina ya mintu njawom jinisan kabinsanaan sabap meꞌ na masaplag pasal aku.”

Suwat si Pol pa mman Baanan Sukuꞌ si Isa ndooy ni Rom 8:36

Na bong luu kasusahan tuwaꞌ ningkitabi meꞌ looy, daa sa kitabi jayip, batan ndang bay silay sinuwatan jawom kitab, ilooy ma yuk na, “Papuꞌ, llaw pa dangallaw njawom bahaya jaꞌ kami, adak-adak na kami pinapatoy kalnaꞌ kau. Pangandaan jama subay ga kami bili-bili jaꞌ pataꞌ san sinumbaliꞌ.”

1 Korin 15:10

Sugaꞌ san meꞌ looy, lay gi ku dari rasul man sabapan aseꞌ Tuhan niyaku. Boꞌ aseꞌ na ina yaꞌ du bay pasensengan ku sabap labi gi tuyuꞌ ku maghulas-sangsāꞌ kalnaꞌ si Isa man mimon pagkahi ku rasul na. Sugaꞌ saꞌ du baw silay ni kabasag gaos ku, arapun man gaos Tuhan ni jataꞌ ku.

1 Korin 3:5

Doꞌ kam bi. Soy doꞌ itu kami ka si Apolos? Kami bitu sosohoan sadjaꞌ ma bay mitsalahan kaam supaya kam pitsayaꞌ ni si Isa. Kami itu dangoy na, buwat jaꞌ kami saliꞌ-saliꞌ ma bay sinukuꞌ meꞌ Papuꞌ ningkami.

1 Korin 4:1

Dari meꞌ halling sambat ku na siꞌ, kuwan kami ma noan kaam, subay ingatun bi saliꞌ-saliꞌ du kami sosohoan Almasi sadjaꞌ. Maka saliꞌ-saliꞌ du kami bay sinukuan meꞌ Tuhan nohoꞌ masampay kabanahan ma yaꞌ gi bay tumampak kamaatunan na maruhuꞌ.

1 Korin 4:11

Ngabut sampay batnaa, daran gi kami kalingantuhan sampay katohoan kallong. Boꞌ kulang pamakoy lagi kami. Daran kami llagpiꞌ, boꞌ yaꞌ san luu lumaꞌ kami.

1 Korin 4:9

Pangandaan ku, meꞌ ga doman sa Tuhan kami siga rasul si Isa ni bukutan. Dari ko ngawon, lay na kami tinakdil meꞌ na diyoꞌ gi man jama mimon. Subay ga kami jama bay binotangan hukuman kapatoy. Labba man manusiyaꞌ sampay siga malaikat, matong kami na jaꞌ saula-ula pabuwatan ag-agan kami.

2 Korin 10:7

Kaam ina kasohean, meꞌ bi manding jama, mindoga jaꞌ kam ni hāl ma takita bi ni poan, boꞌ niyat njawom atay, niyaꞌ san paruli bi. Baꞌ-bāꞌ kasohean nnaa, sila du bay binuwanan kapatut meꞌ Almasi binuwat sosohoan na. Sugaꞌ subay siꞌ tabista da, bong sila sosohoan Almasi, kami pun iyadu.

2 Korin 11:5

Sugaꞌ bistahan ku, san gi soy guru bi nnaa ma kanna bi rasul si Isa ninggi taꞌ mimon rasul, basta yaꞌ baw tu ku tamban leꞌ da.

2 Korin 3:6

Maka Tuhan du sina nganggaosan kami masaplag pagsulutan bahau ni antaraꞌ iya ka manusiyaꞌ mari jama mahap na niiya. Ni pagsulutan bahau ina, Rū Sutsiꞌ ndean meꞌ Tuhan ni manusiyaꞌ. Boꞌ ni pagsulutan sibuwa, saraꞌ bay ndean ni manusiyaꞌ. Ni pagsulutan sibuwa ina, bong jama doman mahap na pa Tuhan, subay bogbogan da sara. Salla na, ilooy du takoleꞌ jama man saraꞌ yana katiksaan nyawa batan yaꞌ luu kabogbog labbasakayi. Boꞌ ni pagsulutan bahau ina, koleꞌ na kitabi kaallum bahau sampay kasampulnaan nyawa saumu-umu man sabapan Rū Sutsiꞌ.

2 Korin 6:9

Meꞌ kasohean buwat kami, subay ga jama yaꞌ takila. Mingkan, kinatoonan kami meꞌ sikamimon. Daran gi kami nontongan kapatoy. Kahapan masi gi du baw kami llum. Damikiyan, daran kami binonoꞌ. Kahapan yaꞌ gi du baw kami bay matoy.

Galatiya 6:17

Katapusan bitsala ku, kainagon ku yaꞌ na kam kagundalaꞌ ni pamiki ku. Yaꞌ sina sikatuwaꞌ bong luu nnaa māꞌ yaꞌ ku bay buwanan Almasi kapatut noan jama. Aku tu, tandaꞌ ku sosohoan Almasi, lapat na baran ku meꞌ pawut hangat llagpiꞌ sampay hiniyak ka batu sabap meꞌ ku nanggehan kabanahan pasal iya.

Epesus 3:1

Dari kalnaꞌ kaam siga bangsa saꞌ Yahudi, itu na ga ku lay tajīl sabap meꞌ ku bay masaplagan kaam kabanahan pasal si Isa Almasi.

Epesus 4:1

Na meꞌ aku itu disu sosohoan Papuꞌ njawom jīl sabap meꞌ ku masaplag, junjung ku na ningkaam, bogbogan bi kawul-piil ma tawop ni jama ma bay lliyun meꞌ Tuhan binuwat sukuꞌ na.

Epesus 6:20

Ituu tu man ku halling meꞌ tuu batan luu situ ku ntuu tatalungkuꞌ njawom jīl sabap meꞌ ku masaplag. Pakuhan bi na pin ku duwaa mari ku nawakka mitsala batan ndang inaa pataꞌ subay pabuwat ku.

Pilipi 1:13

Batan sikamimon ntuu sampay siga sundalu ma nganjagahan astanaꞌ sultan, katoonan da na danan ku bay tajīl isu-isu sabap meꞌ ku masaplag pasal Almasi.

Pilipi 2:17

Meꞌ ku ngingat, mimon hulas-sangsāꞌ bi man sabapan pangando bi ni si Isa meꞌ karuha jakat ma bay sinongan meꞌ siga imam pa Tuhan mattoꞌ. Kuwan aku itu, bong sawpama lay na ku mintu pinapatoy sabap meꞌ ku masaplag, meꞌ ku ngingat, lahaꞌ ku tumpa meꞌ karuha tubaꞌ anggul ma bay tinumpahan meꞌ siga imam taꞌ kulban da mattoꞌ. Sugaꞌ san gi oy katuwaꞌ aku, masi du ku gāk maka gāk du ku ningkaam.

Kolossa 1:24

Na san ku tu batnaa tiksaꞌ sabap meꞌ ku wā masaplag, yaꞌ du tu lungay kagakan ku. Kon meꞌ looy batan lay jaꞌ du bay pa kaayaran ningkaam. San pun Almasi, bay du lumingkaꞌ njawom jinisan kamalasahiyan kalnaꞌ siga sukuꞌ na. Pag batnaa, aku na baw pagantiꞌ niiya ngissahan kamalasahiyan kalnaꞌ sagannap ma pitsayaꞌ niiya, yana kitabi ma binilang baran na.

Kolossa 1:29

Sangkon man kawasa Almasi nganggaosan aku, magtuyuꞌ-tuyuꞌ ku majatu pabuwatan ma bay sinukuꞌ niyaku.

1 Timuti 4:6

Na bong itu pasampay nu du bay bitsala ku siꞌ ni siga danganakan ta nnaa, malaingkan kau sosohoan si Isa Almasi kanaalla. Maka sasang nu nōꞌ kabanahan ma kinapitsayaan meꞌ ta sampay mmeꞌ ni tōꞌ ayad ma ndang binean meꞌ nu, mastiꞌ pasambu nu na nyawa nu.

2 Timuti 1:16

Sugaꞌ kuwan si Onesiporus ka ga paglūng na, kamura-murahan pinanimbangan du sila meꞌ Papuꞌ. Batan takdang na ilay bay takka pitu pa Rom, yaꞌ bay luu katagong na miha ngkod-ngkoran ku yaꞌ gi bay tatammu na. Yaꞌ san ya bay iyaꞌ takita magpangandaꞌ aku san ku bay taingkot ka karina. Daran ya bay magamgaman aku.

2 Timuti 1:8

Sangkon daa na ko tawu maan jama pasal Papuꞌ ta. Damikiyan, daa na du ko tawu mangaku ga aku soheꞌ nu sukat ku njawom jīl. Gam pin, magpalapay na ko niyaku natasan oy-oy kamalasahiyan kalnaꞌ umanat mahap pasal Papuꞌ ta. Ndang-ndang luu du kawasa Tuhan nganggaosan kita.

2 Timuti 2:9

Salla na, sabap meꞌ ku masaplag, daran na ga ku bininsanaꞌ. Sampay lay na ga taabut man ku tatalungkuꞌ njawom jīl binuwat subay ga jama tukang ngalangga saraꞌ. Sugaꞌ san itu ku pinusas ka karina, bong inawnan umanat Tuhan, basta yaꞌ baw sina takoleꞌ kinarinahan.

2 Timuti 3:11

Yaꞌ na du ko awam pasal kabinsanaan maka laug bay talingkaꞌ ku jaman ku ndooy ni Antiyok ka ni Ikoniyum sampay ndooy ni Listra. Kahapan song hallom, lay du ku bay pinaddusan meꞌ Papuꞌ.

Hibrani 10:34

Maka lay gi kam nulung siga pagkahi bi ma njawom jīl. Minsan bay inagaw altaꞌ bi, yaꞌ du bay lungay kagakan bi. Batan tasayu bi na luu na siga supaat njataꞌ bi mas hagaan man altaꞌ ni junyaꞌ, boꞌ natas lagi saumu-umu.