1 Yahiya 5:6 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁶ Na si Isa ilay, luu buktiꞌ man tabi toon iya Anak Tuhan bay pinapitu pa junyaꞌ. Disu buktiꞌ yana jaman na bay tasakup meꞌ jama pinandi ka boheꞌ. Kaduwa na, jaman lahaꞌ na bay pinaduwai. Dari siꞌ, sarī man jaman si Isa bay pinandi, kapatoy na pun, buktiꞌ du iya yana Anak Tuhan. Katallu na, luu gi Rū Sutsiꞌ makitau ningkitabi. Boꞌ mimon ina ma pinakitau meꞌ Rū Sutsiꞌ, mastiꞌ bana sadjaꞌ.

1 Yahiya 5:6 ပူးပေါင်းရင်းမြစ်များ

Matiyu 26:28

Ingatun bi inaa lahaꞌ ku song tinumpahan supaya meka na jama taampun sampay puwas na dusa da labbasakayi. Batan lahaꞌ ku ina, inaa na muwan kasāhan ni pagsulutan bahau ni antaraꞌ Tuhan ka manusiyaꞌ.

Matiyu 3:16

Pag tunga si Isa man jawom boheꞌ, sarunduun takita na langit pabukaꞌ maka luu na Rū Sutsiꞌ duwai meꞌ dagbos atsang, boꞌ na nampi taꞌ baran na.

Malkus 14:24

Yuk si Isa ninsila, “Ingatun bi inaa lahaꞌ ku song tinumpahan supaya meka na jama koleꞌ kaampunan. Batan lahaꞌ ku ina, inaa na muwan kasāhan ni pagsulutan bahau antaraꞌ Tuhan ka manusiyaꞌ.”

Lukas 22:20

Pag lupus da mangan, lay na baw ya ngaddoꞌ pabalik mbuwaꞌ sawan tubaꞌ anggul, boꞌ sinongan ni ga mulit na sambayan na halling, “Ingatun bi tubaꞌ anggul njawom sawan tuu yana lahaꞌ ku song tinumpahan kalnaꞌ kaam. Lahaꞌ ku ina, inaa na muwan kasāhan ni pagsulutan bahau antaraꞌ Tuhan ka manusiyaꞌ.

Yahiya 14:17

Awnan ku ilay siꞌ yana Rū Sutsiꞌ, tukang malahil kabanahan. Sugaꞌ kuwan sagannap ma yaꞌ pitsayaꞌ niyaku, yaꞌ sina sila ngahasi Rū Sutsiꞌ sabap yaꞌ sila ngita atawa kakila iya. Boꞌ kaam ina, takila bi ya sabap luu na pin ya ngunungan kaam sampay patattog na sina ya mintu njawom atay bi.

Yahiya 14:6

Tampung si Isa, “Aku na bitu lān na. Damikiyan, aku du kabanahan sampay poonan kaallum. Yaꞌ sina luu takka pa mman Mmaꞌ ku bong saꞌ aku lān tinūs.

Yahiya 15:26

Pag-anu yuk si Isa lagi, “Yaꞌ na situ hallom, papitu ku sa pa mman bi Tukang Nabang, yana Rū Sutsiꞌ lakka man Mmaꞌ ku. Iya sa malahil kabanahan ningkaam. Pag takka na, iya sa muwanan jama pangahati pasal aku.

Yahiya 16:13

Pag ina mintu takka na tukang malahil kabanahan, yana Rū Sutsiꞌ, binuwanan na du sina kam meꞌ na pangahati ni kabanahan. Boꞌ kabanahan ma pinasampay meꞌ na ina, saꞌ du silay mintu lakka man dī na, arapun masampay jaꞌ ya ilooy ma takale na lakka man aku. Maka malahil gi sina ya ningkaam siga pakaradjaan ma magkadarihan ni sinōng.

Yahiya 3:5

Pag tampung si Isa, “Baan ta ko banahan, yaꞌ sina jama kapatabeꞌ ni pamarinta Tuhan bong yaꞌ doꞌ duhuꞌ bay pinamaddihan meꞌ boheꞌ ka Rū Sutsiꞌ.

Yahiya 4:10

Pag tampung si Isa baw siꞌ tu niiya, “Bong siꞌ ina bay tasayu nu ladjikiꞌ ma pamuwan Tuhan, maka bong siꞌ tasayu nu bong soy tu ituu ma nohoꞌ pinainuman ningkau, gam pin kau gi siꞌ bay duhuꞌ maku inuman mman ku, boꞌ nu buwanan ku boheꞌ ma llum.”

Yahiya 4:14

Boꞌ boheꞌ ma pamuwan ku, bong jama bay kainum, yaꞌ na tohoꞌ kallong na pabalik. Batan boheꞌ ma pamuwan ku padari meꞌ karuha poon boheꞌ njawom atay jama. Niyaꞌ sina kuhi kumattaꞌ, boꞌ muwanan manusiyaꞌ lagi kasampulnaan nyawa saumu-umu.”

Yahiya 6:55

Isi ku yana makanan sabanna, damikiyan lahaꞌ ku yana inuman sabanna du.

Salsila siga Rasul 8:36

Sasang da palanja, lay na sila nakka disu lugar bohean. Pag-anu, yuk manijel looy ni si Pilip, “Alay la boheꞌ. Bong siꞌ kadarihan ningkau, pandihun doꞌ ku.”

Suwat si Pol pa mman Baanan Sukuꞌ si Isa ndooy ni Rom 3:25

Si Isa ilay bay pinapitu meꞌ Tuhan nongan umu na supaya tatanggung na dusa tabi. Dari sabapan lahaꞌ na bay tinumpahan kalnaꞌ kitabi, inaa na man tabi bay koleꞌ kaampunan basta kitabi pitsayaꞌ sadjaꞌ. Njataꞌ kapatoy si Isa, ndooy na man Tuhan bay makitahan manusiyaꞌ kaintongan hukuman na. Batan bong ilay Tuhan bay mabiya manusiyaꞌ madara dusa da, boꞌ yaꞌ san luu pidjalaꞌ ni bay dusa da, malaingkan yaꞌ intong hukuman na. Maruhuꞌ, ni katahaꞌ pasensiya Tuhan, bantuk lay jaꞌ ya mabiya manusiyaꞌ sigi-sigi buwat dusa.

Epesus 1:7

Sabapan lahaꞌ Almasi bay tumpa, ilooy na silay bay maddusan kitabi man pidjalaꞌ ni dusa tabi. Sangkon luu na kaampunan ningkitabi tandaꞌ landuꞌ ehe aseꞌ Tuhan ningkitabi.

Kolossa 1:4

Batan lay situ kami kaakahan pasal pangando bi ni si Isa Almasi ka aseꞌ bi ni mimon sukuꞌ Tuhan.

1 Timuti 3:16

Kabanahan ina ma kinapitsayaan meꞌ tabi, yaꞌ tapakilubaan, boꞌ tud kahaylan-haylan. Maruhuꞌ yaꞌ gi bay tahati meꞌ manusiyaꞌ. Pag batnaa, lay na pinalahil meꞌ Tuhan ningkitabi. Meꞌ tuu situ karuha na: Almasi ina bay dari manusiyaꞌ ntuu ni junyaꞌ. Maka iya ilay, luu na pin Rū Sutsiꞌ bay mōꞌ buktiꞌ bong soy ya. Boꞌ lay gi ya tinammuhan meꞌ siga malaikat. Awon na lay na pinasaplag pa kabangsa-bangsahan. Maka kinapitsayaan na ya meꞌ manusiyaꞌ ni sikaliput junyaꞌ. Boꞌ lay gi ya inangkat pa sulgaꞌ njawom kabantugan mehe.

Taytus 3:5

Lay na ya nalamat kitabi. Boꞌ tud kainu-inu silay batan yaꞌ luu kaayaran bay pabuwat tabi gantaꞌ man tabi pataꞌ sinalamat. Arapun kon Tuhan bay nalamat kitabi sabap ehe timbang na ni manusiyaꞌ. Dari man sabapan pabuwatan si Isa Almasi, tukang nalamat kitabi, lay na puwasan Tuhan dusa tabi. Dari ko ngawon, lay na kosoan na atay tabi supaya kinaddoan dusa tabi. Boꞌ lay gi ya nupaatan kitabi ka Rū na, yana Rū Sutsiꞌ bay pinaasok njawom atay tabi. Dari sabapan Rū Sutsiꞌ, sibuꞌ na du kitabi ka lay na pinamaddihan pabalik, batan luu na kaallum tabi bahau.

Hibrani 10:29

Na bong meꞌ naa bohat pidjalaꞌ ni jama ma bay nuwak saraꞌ, labi na saꞌ bohat pidjalaꞌ ni sagannap ma nikutan Anak Tuhan saula-ula puus boboꞌ sadjaꞌ ya. Sat da saꞌ māꞌ yaꞌ na luu kapansahaliyan lahaꞌ si Isa bay pinaduwai. Padahal, lahaꞌ na ilay bay man da pingkaꞌ sinutsiꞌ sampay muwan kasāhan ni pagsulutan bahau antaraꞌ Tuhan ka manusiyaꞌ. Ga jama meꞌ looy ilay, sibuꞌ du sila ka bay mahinaꞌ Rū Sutsiꞌ ma bay masampayan sila aseꞌ.

Hibrani 12:24

Maka lay na kitabi takka pa mman si Isa ma bay mōꞌ pagsulutan bahau antaraꞌ Tuhan ka manusiyaꞌ. Boꞌ toklas lahaꞌ na bay tumpa mas ayad man toklas lahaꞌ si Habil bay tumpa ni awwal jaman. Batan lahaꞌ si Habil bay moo sumpaꞌ, boꞌ lahaꞌ si Isa bay moo kasalamatan.

Hibrani 13:20

Tuhan ina poonan kasannangan. Ni kaehe kawasa na, lay ya makallum Papuꞌ tabi si Isa. Dari si Isa na sina numbul satu tukang ngipat kitabi ma awnan na siga bili-bili na. Man sabapan lahaꞌ na bay tumpa, inaa na kasāhan ni pagsulutan bahau ma yaꞌ luu katapusan na antaraꞌ Tuhan ka sukuꞌ na.

Hibrani 9:14

Na bong lahaꞌ hayop kasutsiꞌ, labi na bong lahaꞌ Almasi saꞌ kasutsiꞌ. Batan lahaꞌ Almasi ina kasutsiꞌ sampay ni honaꞌ-honaꞌ tabi ma bay tamakan sabap meꞌ tabi bay maabak jinisan ma katiksaꞌ ni nyawa tabi. Dari man kawasa Rū Sutsiꞌ ma luu saumu-umu, lay na Almasi nongan umu na pa Tuhan bilang kulban ma yaꞌ luu salla na. Kon na buwat meꞌ looy supaya bean tabi na kahandak Tuhan.

Hibrani 9:7

Sugaꞌ bong ni bilik ni kaduwa, yana Bilik Pinakasutsiꞌ, bāꞌ njawom saraꞌ Nabi Musa, yaꞌ luu dari paasok sarī man panghuluꞌ imam, boꞌ sakayi du njawom dantaun. Maka taabut na paasok, subay luu boo na lahaꞌ kulban sinongan pa Tuhan para ni dusa na mismu ka dusa siga raayat na, dusa ma tasayu sampay ma niyaꞌ.

1 Pitel 1:2

Halloman tabi yaꞌ gi bay lahil pa junyaꞌ, ndang katoonan Tuhan na pitsayaꞌ kitabi ni si Isa bbos-bbos. Dari man gantaan Tuhan, lay na kitabi sinutsiꞌ meꞌ Rū na. Maksud na supaya kitabi ngasip ni si Isa Almasi, maka supaya puwas na dusa tabi sabapan lahaꞌ si Isa bay pinaduwai kalnaꞌ kitabi. Kamura-murahan lipat man lipat na pin kasannangan ningkaam ka barakat man Tuhan.

1 Pitel 3:21

Kasalamatan da ilay ni boheꞌ dunuk looy mattoꞌ, tadalil tabi pa boheꞌ man tabi bay pinandi tandaꞌ tabi lay na salamat man hukuman Tuhan. Kitabi ilay bay pinandi, saꞌ ga pandihan man ngalakkahan lumut ni baran tabi. Arapun pandihan tabi ina yana sipat lay na kitabi maku ampun man Tuhan mari hayang na pamiki tabi. Boꞌ kasalamatan tabi itu mawjud na batan lay na pinakallum pabalik si Isa Almasi.

1 Yahiya 1:7

Sugaꞌ bong itu kitabi tattog njawom dantaꞌ meꞌ karuha Tuhan, dambuwaꞌ atay na kitabi. Maka puwas na dusa tabi sabapan lahaꞌ Anak Tuhan, yana si Isa. Sangkon sutsiꞌ na kitabi.

1 Yahiya 4:10

Na inawnan aseꞌ sabanna, saꞌ ga aseꞌ tabi pa Tuhan, arapun aseꞌ Tuhan ningkitabi. Batan atas na bay mapitu Anak na nohoꞌ nanggung mulkaꞌ ma subay siꞌ bay labuꞌ pa jataꞌ tabi. Dari puwas na dusa tabi maka lay na kitabi inampun meꞌ Tuhan.

Siga Pakaradjaan bay Pinalahil 1:5

Maka kamura-murahan binuwanan na pin kam kasannangan ka barakat meꞌ si Isa Almasi, ilooy ma kanaalla masampay kabanahan pasal Tuhan. Iya ilay bay duhuꞌ pinakallum pabalik ka baran ma yaꞌ na kuhi matoy. Maka iya du marintahan mimon panghuluꞌ ni sikaliput junyaꞌ. Ni kaehe aseꞌ na ningkitabi, atas na man lahaꞌ na bay tumpa supaya tapaddusan na kitabi man hisab ni dusa tabi.

Siga Pakaradjaan bay Pinalahil 5:9

Maka bbuwatan da ngalang kalangan bahau man mudji Bili-bili looy, yuk da, “Kau du tawop ngaddoꞌ suwat naa sampay ngalukap siga kanjiꞌ na sabap lay ko bay nongan umu nu man maddusan manusiyaꞌ man komkoman Ibilis. Lahaꞌ nu bay pinaduwai supaya dari sukuꞌ Tuhan na jama ni mimon kalahat-lahatan ka mimon kabangsa-bangsahan, kaniya-kaniya ka jinisan pallun da.

Siga Pakaradjaan bay Pinalahil 7:14

Pag tampung ku, “Tuwan, yaꞌ katoonan ku. Kau ya bina toon.” Dari yuk na niyaku, “Inaa na sina ga jama ma bay na lumingkaꞌ njawom kabinsanaan mehe. Labbasakayi sila bay mopoan juba da ka lahaꞌ Bili-bili looy supaya poteꞌ na, hati na, puwas na dusa da.