1 Yahiya 5:20 - Sabahagiꞌ Kitab Tawrat: Panagnaan ni Awwal Jaman maka Kitab Injil

²⁰ Damikiyan, katoonan tabi na du luu na bay pitu Anak Tuhan pa junyaꞌ. Maka lay na ya muwanan kitabi pangahati supaya dari na kitabi lungbid ka Tuhan sabanna. Pag batnaa tibuuk na kitabi ka Tuhan sabanna sabap meꞌ tabi tibuuk na ka Anak na si Isa Almasi. Iya ina Tuhan sabanna maka poonan kasampulnaan nyawa ma yaꞌ luu katapusan na.

1 Yahiya 5:20 ပူးပေါင်းရင်းမြစ်များ

Matiyu 13:11

Tampung si Isa, “Kon meꞌ looy sabap pangahati pasal pamarinta Tuhan ma yaꞌ gi bay lahil maruhuꞌ, ndean na ningkaam, saꞌ ninsila.

Lukas 21:15

Aku sa muwanan kaam kapandoyan ka bitsala ayad man bi nampung. Dari sagannap ma nulang kaam, yaꞌ na luu dapat da tumanjataꞌ atawa māꞌ magsāꞌ kam.

Lukas 24:45

Dari siꞌ, supaya tahati da na banahan, meka na suwat pasal iya njawom kitab lay passaꞌ na hatiyan na ninsila.

Yahiya 1:18

Na inawnan Tuhan, yaꞌ bay pingkaꞌ takita leꞌ manusiyaꞌ. Sugaꞌ lay na baw ya pinalahil ningkitabi meꞌ Anak tungga na, yana Tuhan du ma tattap njawom atay Mmaꞌ na.

Yahiya 10:30

Kami tu ka Mmaꞌ ku tibuuk.”

Yahiya 14:20

Ni waktu looy ilay mintu, bohoꞌ tabistu bi na kami ka Mmaꞌ ku tibuuk, maka kaam pun ka aku tibuuk du.

Yahiya 14:23

Pag tampung si Isa, “Bong jama maaseꞌ niyaku, bean na jaꞌ sina bitsala ku. Jama meꞌ looy ilay kinaasean meꞌ Mmaꞌ ku. Dari patiluꞌ sina kami ka Mmaꞌ ku pa mman na, boꞌ kami patannaꞌ njawom atay na.

Yahiya 14:6

Tampung si Isa, “Aku na bitu lān na. Damikiyan, aku du kabanahan sampay poonan kaallum. Yaꞌ sina luu takka pa mman Mmaꞌ ku bong saꞌ aku lān tinūs.

Yahiya 14:9

Pag tampung si Isa, “Uy Pilip, meꞌ looy na bay hallom tabi lungbid, masi gi ku yaꞌ katoonan nu? Bong bina jama bay na ngita aku, malaingkan bay du ya ngita Mmaꞌ ku. Ongoy taggahaꞌ nohoꞌ gi ko pinakitahan Mmaꞌ ku?

Yahiya 15:4

“Yaꞌ sina luu dapat engas anggul buwaꞌ bong yaꞌ langkit ka poon na. Damikiyan kaam pun, bong kam yaꞌ langkit ka aku, yaꞌ du luu dapat bi buwat kaayaran ma sinukuꞌ meꞌ Tuhan ningkaam. Sangkon subay kam tattog langkit ka aku. Basta meꞌ naa, aku pun tattog du langkit ka kaam.

Yahiya 17:14

Umanat nu lay na pasampay ku ninsila. Dari batnaa, kinalammisan na sila meꞌ sagannap ma yaꞌ pitsayaꞌ niyaku. Kon meꞌ looy batan meꞌ aku na du sila, saꞌ sukuꞌ junyaꞌ tuu.

Yahiya 17:25

“Maꞌ, kau ma intong gi man intong, minsan ko yaꞌ kinatoonan meꞌ sagannap ma yaꞌ pitsayaꞌ niyaku, bong aku, mastiꞌ katoonan ta jaꞌ ko. Maka siga mulit ku pun itu, katoonan da na du kau bay mapitu aku.

Yahiya 17:3

Katoonan ku du bong sila lungbid ka kau, yana isu-isu Tuhan sabanna, sampay si Isa Almasi, yana aku ma bay papitu nu, inaa na hatiyan kasampulnaan nyawa ma yaꞌ luu katapusan na.

Yahiya 20:28

Yuk si Tomas niiya, “Papuꞌ ta ko! Tuhan ta ko!”

Yahiya 8:42

Yuk si Isa baw siꞌ tu, “Bong siꞌ bay mattan Tuhan Mmaꞌ bi, mastiꞌ maaseꞌ jaꞌ kam niyaku batan aku tu bay pitu lakka mman na. Yaꞌ ku bay pitu ni pamiki ku dī ku, arapun iya mismu bay mapitu aku.

Salsila siga Rasul 20:28

Pag-anu, yuk si Pol lagi ni ga pa-mmean looy, “Ilagan bi dī bi. Maka ayaran bi mimon sukuꞌ si Isa ma bay hinalap meꞌ Rū Sutsiꞌ ningkaam. Tud kinasengan sina sila meꞌ Tuhan. Sila ilay meꞌ sapantun altaꞌ Tuhan ma bay binalli meꞌ na ka lahaꞌ Anak tungga na.

Suwat si Pol pa mman Baanan Sukuꞌ si Isa ndooy ni Rom 9:5

Maka kabboꞌ-bboan kami ilay yana Nabi Ibrahim, Nabi Isahak ka Nabi Yaꞌkub. Boꞌ na, pōꞌ man bangsa kami lagi Almasi bong inikut usuwan pagkamanusiyaꞌ na. Iya ilay yana Tuhan, ilooy ma magbayaꞌ ni sikamimon. Pudji mehe niiya saumu-umu. Amin.

1 Korin 1:30

Kahapan man kahandak Tuhan, tibuuk na kitabi ka si Isa Almasi, yana poonan man tabi koleꞌ kapandoyan man Tuhan. Lagiꞌ na, sabapan si Isa Almasi, lay na kitabi initung meꞌ Tuhan intong sampay lay na kitabi dari sukuꞌ Tuhan. Maka sabapan si Isa, lay na kitabi pinaddusan man hukuman ni mimon dusa tabi.

2 Korin 4:6

Na jaman junyaꞌ ilay bay pinapayak, lay Tuhan nohoꞌ dantaꞌ ninag njawom lindom. Pag batnaa, sibuꞌ du ka lay balikan na batan lay na baw ya marantaan pamiki tabi. Dari tahati tabi na ehe kaayaran na man sabapan pabuwatan na bay mapitu si Isa Almasi pa junyaꞌ.

2 Korin 5:17

Pag batnaa, tabista tabi na, soysoy tibuuk ka Almasi, sibuꞌ du karuha da ka jama bahau bay pinapayak. Pagkajama da maruhuꞌ ma nabiat nulut dī da, yaꞌ na luu. Yaꞌ na sibuꞌ ka maruhuꞌ batan luu na pagkajama da bahau ka kaallum da bahau.

Epesus 3:18

Pakuhan ta na pin kam duwaa sampay na mimon sukuꞌ Tuhan, kamura-murahan tahati bi na bong pooy ehe aseꞌ Almasi ningkitabi. Aseꞌ na ina ningkitabi yaꞌ luu hād gantaꞌ na.

Pilipi 3:9

Maka ituu gi tu hagaan niyaku ni hāl meꞌ ku initung meꞌ Tuhan intong. Sugaꞌ kaintongan ku itu, saꞌ ga sabap meꞌ ku bay mogbogan saraꞌ agama, arapun sabap meꞌ ku pitsayaꞌ ni si Isa Almasi. Batan kaintongan ku tu, yana ladjikiꞌ man Tuhan niyaku.

1 Timuti 3:16

Kabanahan ina ma kinapitsayaan meꞌ tabi, yaꞌ tapakilubaan, boꞌ tud kahaylan-haylan. Maruhuꞌ yaꞌ gi bay tahati meꞌ manusiyaꞌ. Pag batnaa, lay na pinalahil meꞌ Tuhan ningkitabi. Meꞌ tuu situ karuha na: Almasi ina bay dari manusiyaꞌ ntuu ni junyaꞌ. Maka iya ilay, luu na pin Rū Sutsiꞌ bay mōꞌ buktiꞌ bong soy ya. Boꞌ lay gi ya tinammuhan meꞌ siga malaikat. Awon na lay na pinasaplag pa kabangsa-bangsahan. Maka kinapitsayaan na ya meꞌ manusiyaꞌ ni sikaliput junyaꞌ. Boꞌ lay gi ya inangkat pa sulgaꞌ njawom kabantugan mehe.

Taytus 2:13

Ilooy ilay siꞌ subay isbat tabi sasang tabi ngagad llaw kagak-gāk ma pinagdautan meꞌ tabi. Awnan ku ilay siꞌ katakka si Isa Almasi, yana Tuhan tabi Sangat Kawasa ma tukang nalamat kitabi.

Hibrani 1:8

Boꞌ ni Anak na ina, yuk Tuhan, “Meꞌ kau ina Tuhan, mastiꞌ natas saumu-umu pagkasultan nu. Maka intong jaꞌ meꞌ nu marintahan siga raayat nu.

1 Yahiya 2:23

Maka soysoy māꞌ yaꞌ ya pitsayaꞌ Almasi yana Anak Tuhan, lawak ya man Mmaꞌ Almasi. Sugaꞌ soysoy mangaku Almasi yana Anak Tuhan, mastiꞌ lungbid ya ka Mmaꞌ Almasi.

1 Yahiya 2:24

Sangkon amay-amay kannahun bi na pin tōꞌ ma bay takale bi jaman bi bahau jaꞌ bay pitsayaꞌ. Meꞌ looy ilay, mastiꞌ yaꞌ maglumba meꞌ bi lungbid ka Mmaꞌ tabi Tuhan ka Anak na.

1 Yahiya 2:6

Na soysoy mangaku tibuuk ka Tuhan, subay nabiat mōꞌ arat-tabiat meꞌ kadari ni si Isa Almasi.

1 Yahiya 4:14

Kami situ mismu bay ngita Anak Tuhan. Sangkon kabāꞌ kami tud mawjud Mmaꞌ na bay mapitu iya nohoꞌ nalamat manusiyaꞌ.

1 Yahiya 4:16

Kitabi itu, katoonan tabi maka manganna kitabi tud kinaasean kitabi meꞌ Tuhan. Na meꞌ halling sambat ku na siꞌ, tabiat Tuhan ina yana maaseꞌ. Sangkon soysoy ina tattap maaseꞌ, mastiꞌ tattog Tuhan niiya, maka iya pun tattog du ni Tuhan.

1 Yahiya 4:2

Man bi ngila guru ma pinagmundaan meꞌ Rū Tuhan meꞌ tuu: Soysoy māꞌ si Isa Almasi yana Anak Tuhan bay dari manusiyaꞌ, tumatandaꞌ bana-bana ya sosohoan Tuhan.

1 Yahiya 5:1

Na sagannap ma pitsayaꞌ si Isa yana Almasi, sila na bay dari anak Tuhan. Maka bong ina kitabi maasean Mmaꞌ tabi Tuhan, mastiꞌ maaseꞌ du kitabi ni siga pagkahi tabi anak Tuhan.

1 Yahiya 5:15

Dari pagka katoonan tabi na Tuhan pakale ni paku tabi, mastiꞌ katoonan tabi du nduwan jaꞌ kitabi.

1 Yahiya 5:18

Na kitabi itu, katoonan tabi na sikamimon jama ma bay dari anak Tuhan, patagong na sila buwat dusa batan luu na pin Anak Tuhan nganggaosan sila buwat kaintongan. Sangkon yaꞌ na sila tumandiyoꞌ meꞌ Ibilis.

1 Yahiya 5:5

Dari sagannap ma pitsayaꞌ si Isa yana Anak Tuhan, sila du sina ngantanan gaos nuwak siga sasat njawom junyaꞌ.

Siga Pakaradjaan bay Pinalahil 15:3

sambayan da ngalang kalangan ata Tuhan mattoꞌ, yana Nabi Musa. Kalangan looy siꞌ yana kalangan Bili-bili looy du. Kalangan looy siꞌ meꞌ tuu: “Papuꞌ, meꞌ kau Tuhan Sangat Kawasa, mimon pabuwat nu kainu-inu ka biddaꞌ na hāp na. Kau sultan mimon kabangsa-bangsahan. Mimon-mimon ma pabuwat nu intong jaꞌ maka yaꞌ luu salla na.

Siga Pakaradjaan bay Pinalahil 19:11

Pus meꞌ looy siꞌ, takita ku na langit bukaꞌ maka luu ndooy kuraꞌ poteꞌ. Ilooy siꞌ ma bakuraꞌ njataꞌ na inawnan Kanaalla ka Bonto. Intong jaꞌ hukuman na, maka bila ya monoꞌ banta na, mastiꞌ intong jaꞌ du sabapan na.

Siga Pakaradjaan bay Pinalahil 3:14

Pasunuꞌ, yuk na niyaku, “Nuwat gi ko pilay pa mman pa-mmean looy ma ngantanan baanan sukuꞌ ku ndooy ni Leyodisiya. Bong ko nuwat, yuk nu meꞌ tuu, “Bitsala tuu lakka man ilooy ma ginalla Amin, yana ilooy ma kanaalla maka taasahan masampay kabanahan pasal Tuhan. Iya na sina man Tuhan bay mapayak mimon-mimon. Yuk na meꞌ tuu,

Siga Pakaradjaan bay Pinalahil 3:7

Pasunuꞌ, yuk Papuꞌ Isa niyaku, “Nuwat gi ko pilay pa mman pa-mmean looy ma ngantanan baanan sukuꞌ ku ndooy ni Piladelpiya. Bong ko nuwat, yuk nu meꞌ tuu, “Bitsala tuu lakka man iya, ilooy ma Mahasutsiꞌ ka intong saꞌ alang-alang. Iya ilay ngantanan kunsiꞌ lawang pa jawom pamarinta Tuhan meꞌ karuha kawasa-kapatut Sultan Daud bay ngantanan pamarinta na. Bong iya bay mukisan lawang looy, yaꞌ luu soy maka soy na katambo. Damikiyan bong ya bay nambo, yaꞌ du luu kabukis. Yuk na meꞌ tuu,

Siga Pakaradjaan bay Pinalahil 6:10

Bbuwatan da mitsala pahaddo, yuk da, “Ū Tuhan, meꞌ kau sutsiꞌ ka intong, meꞌ noy gi tu hallom na boꞌ nu ngalabuꞌ hukuman ni siga jama maat taꞌ junyaꞌ? Sumilan kami bawsan nu sabapan lahaꞌ kami bay tumpahan da?”