1 Yahiya 3:5 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁵ Sugaꞌ ndang katoonan bi na du, Almasi bay pitu pa junyaꞌ supaya tapuwasan na dusa manusiyaꞌ. Boꞌ iya ilay, yaꞌ luu dusa na samasakali.

1 Yahiya 3:5 ပူးပေါင်းရင်းမြစ်များ

Matiyu 1:21

Pag maddi na ina mintu, lalla anak na. Awnan nu ya si Isa, hati na tukang nalamat, sabap iya na sina mintu nalamat siga sukuꞌ na mari sila yaꞌ minulkaan sabapan bay dusa da.”

Lukas 23:41

Kita itu pataꞌ pinapatoy sabap tawop ka dusa ta. Boꞌ iya ina yaꞌ dusahan.”

Lukas 23:47

Na pag takita kapitan sundalu bangsa Rom meꞌ looy bay kadari si Isa, kapamudji na ga ya Tuhan, maka yuk na, “Tud bana du la lalla tuu yaꞌ magdusa.”

Yahiya 1:29

Pag meꞌ sumawung, takita si Yahiya na si Isa pasōng pa mman na. Dari yuk na ni baanan jama ndooy, “Alu na lalla ma ginalla Bili-bili Tuhan ma muwasan dusa manusiyaꞌ.

Yahiya 1:31

Aku tu maruhuꞌ, yaꞌ gi bay katoonan ku bong soy lalla ma pasunuꞌ niyaku. Sugaꞌ lay ku sinohoꞌ pitu mandi siga pagkahi ku bangsa Israil supaya sila saddiya ni lalla looy pinakila ninsila.

Yahiya 14:30

Yaꞌ na patahaꞌ ku bitsala ku sabap song takka na Ibilis ngalān aku. Iya ilay magbayaan manusiyaꞌ ma yaꞌ pitsayaꞌ niyaku. Sugaꞌ bong baw aku, basta yaꞌ baw tu luu kawasa-kapatut na njataꞌ ku.

Yahiya 8:46

“Doꞌ kam la. Luu kina kam nnaa san lasa disu kapōꞌ buktiꞌ bay ku buwat dusa? Pagka kabanahan jaꞌ bitsala ku, ongoy baw taggahaꞌ yaꞌ kam kuhi pitsayaꞌ niyaku?

2 Korin 5:21

Bistahun bi doꞌ, san yaꞌ luu dusa Almasi samasakali, lay na ga ya binuwat meꞌ Tuhan subay ga baldusa batan mimon dusa tabi lay na tinanggung meꞌ na. Kon na bay buwat meꞌ looy supaya dari jama intong na kitabi meꞌ karuha kaintongan Tuhan man sabapan pagkatibuuk tabi ka Almasi.”

1 Timuti 1:15

Na ituu tu bitsala kanaalla ka pataꞌ kinanna meꞌ sikamimon: Maksud si Isa Almasi bay pitu pa junyaꞌ supaya tasalamat na siga baldusa. Man ku kasiguru, batan bong kinawnan baldusa, yaꞌ luu bay lumabi man aku.

1 Timuti 3:16

Kabanahan ina ma kinapitsayaan meꞌ tabi, yaꞌ tapakilubaan, boꞌ tud kahaylan-haylan. Maruhuꞌ yaꞌ gi bay tahati meꞌ manusiyaꞌ. Pag batnaa, lay na pinalahil meꞌ Tuhan ningkitabi. Meꞌ tuu situ karuha na: Almasi ina bay dari manusiyaꞌ ntuu ni junyaꞌ. Maka iya ilay, luu na pin Rū Sutsiꞌ bay mōꞌ buktiꞌ bong soy ya. Boꞌ lay gi ya tinammuhan meꞌ siga malaikat. Awon na lay na pinasaplag pa kabangsa-bangsahan. Maka kinapitsayaan na ya meꞌ manusiyaꞌ ni sikaliput junyaꞌ. Boꞌ lay gi ya inangkat pa sulgaꞌ njawom kabantugan mehe.

Taytus 2:14

Iya ilay, lay na ga bay nongan umu na kalnaꞌ kitabi supaya tapaddusan na na kitabi man tabiat tabi buwat dusa, maka supaya tapasutsiꞌ na kitabi. Batan kahandak na ina, luu na sukuꞌ na ma tinagi buwat mahap, ma pabiddaꞌ man kasohean manusiyaꞌ.

Hibrani 1:3

Maka njataꞌ Anak na, takita tabi na kawasa ka kaayaran Mmaꞌ na Tuhan, batan iya sabana-bana limbagan arat-tabiat Tuhan. Pooy-pooy kadari Tuhan, meꞌ naa du sina Anak na. Boꞌ Anak na ina magbayaan mimon-mimon ni sikaliput alam man kawasa palman na mari yaꞌ pulak-palik. Maka iya ilay bay muwasan dusa tabi mari kitabi sutsiꞌ na pa Tuhan. Pus meꞌ looy, lay na ya pabeleng pa sulgaꞌ boꞌ na ningkōꞌ ni bihing Tuhan Sangat Kawasa huwin pa kawnan.

Hibrani 4:15

Meꞌ iya ina panghuluꞌ imam tabi, tahati na kulang kawasa manusiyaꞌ man naggaꞌ siga sasat seytan. Takissa na parasahan tabi sabap iya mismu lay du lumingkaꞌ ni jinisan sasat seytan meꞌ karuha ningkitabi du. Sat na jaꞌ kuwan niiya, yaꞌ luu dusa na samasakali.

Hibrani 7:26

Danan si Isa ilay tawop binuwat panghuluꞌ imam ma asahan tabi sabap sutsiꞌ ya. Yaꞌ luu sutsutan njataꞌ na maka yaꞌ luu tamak na. Yaꞌ ya bay pingkaꞌ mmeꞌ meꞌ uwahan siga baldusa. Maka sa langkaw-langkaw langit, mas langkaw gi kabantugan na ka kapatut na.

Hibrani 9:26

Batan bong siꞌ ilay yaꞌ bay tasakup lahaꞌ na muwasan dusa sakayi labba du, malaingkan talpaksaꞌ ya min meka malasahi labba man waktu junyaꞌ bay pinapayak. Sugaꞌ iya ilay bay pitu pa junyaꞌ ni masa batnaa ma pinag-awnan ahil jaman supaya tasongan na na umu na man ngalakkahan dusa tabi sakayi labba du.

Hibrani 9:28

Damikiyan Almasi pun, sakayi du bay matoy mari tatanggung na dusa manusiyaꞌ. Pabeleng gi du ya ni sinōng, sugaꞌ saꞌ na maksud na mintu nanggung dusa. Arapun ilooy sa kon na lahil pabalik supaya tasalamat na sagannap ma ngagad ni katakka na.

1 Pitel 1:18

Intomun bi doꞌ bong pooy ehe gastus man Tuhan bay maddusan kaam man arat-tabiat bi maruhuꞌ. Yaꞌ silay luu sōng na arat-tabiat bi maruhuꞌ ma bay labuꞌ pa kaam man kabboꞌ-bboan bi. Kahapan, lay na kam pinaddusan man arat-tabiat looy. Sugaꞌ saꞌ ga silay mmas atawa pilak porol ma yaꞌ natas saumu bay man maddusan kaam.

1 Pitel 1:20

Halloman junyaꞌ yaꞌ gi bay pinapayak, ndang lay na bay ginantaꞌ meꞌ Tuhan Almasi maddusan kitabi man komkoman Ibilis. Sugaꞌ noy ni timpu batnaa na, ni ahil jaman, boꞌ luu na Almasi bay pinalahil meꞌ Tuhan ningkaam.

1 Pitel 2:22

Bistahun bi doꞌ, yaꞌ san ya bay buwat dusa samasakali. Dustaꞌ pun, yaꞌ du luu bay pōꞌ man jawom behe na san sakayi.

1 Pitel 2:24

Boꞌ lay gi paglillaꞌ na baran na llansang taꞌ tehang bong pin tatanggung na jaꞌ dusa tabi. Kon na buwat meꞌ looy supaya patagong na kitabi buwat dusa boꞌ tabi makutuꞌ meꞌ buwat kaintongan. Dari meꞌ halling njawom kitab, “Man sabapan siga bakat bisa ni baran na, kaulian na kitabi.”

1 Pitel 3:18

Mamintang jaꞌ kam ni Almasi. San ya intong gi man intong, lay du ya bininsanaꞌ. Sampay lay na ga ya matoy sakayi labba du kalnaꞌ mimon baldusa pangkat-mamangkat. Lay na tanggung na mimon dusa tabi supaya kitabi mahap na pa Tuhan. Dari siꞌ, bay na pinapatoy jasad na, sugaꞌ lay na baw ya pinakallum ka jasad bahau ma yaꞌ na kuhi matoy.

1 Yahiya 1:7

Sugaꞌ bong itu kitabi tattog njawom dantaꞌ meꞌ karuha Tuhan, dambuwaꞌ atay na kitabi. Maka puwas na dusa tabi sabapan lahaꞌ Anak Tuhan, yana si Isa. Sangkon sutsiꞌ na kitabi.

1 Yahiya 2:1

Na kon ku tu nuwat ningkaam, siga anak, supaya kam yaꞌ buwat dusa. Sugaꞌ bong sipais, luu kam bay sumilap buwat dusa, luu du sina tukang nganjamin kitabi pa mman Mmaꞌ tabi Tuhan. Awnan ku ilay siꞌ ilooy ma intong saꞌ alang-alang, yana si Isa Almasi.

1 Yahiya 2:2

Ni gasad bayaꞌ na, lay na sambut na mulkaꞌ Tuhan mari tatanggung na mimon dusa tabi supaya tabi taampun na meꞌ Tuhan. Boꞌ saꞌ sat mimon dusa tabi bay tanggung na, arapun sampay dusa manusiyaꞌ labbasakayi, lai du tanggung na.

1 Yahiya 2:29

Almasi ina, ndang katoonan tabi du, wā intong. Sangkon tatantu tabi soysoy buwat kaintongan, malaingkan anak Tuhan du ya.

1 Yahiya 3:8

Sugaꞌ sagannap ma amu-amu buwat dusa, tumatandaꞌ anak Ibilis sila. Kon sila taawnan anak Ibilis batan Ibilis ndang nabiat buwat dusa labba man awwal tagnaꞌ lagi. Lipara bay na pinapitu Anak Tuhan pa junyaꞌ ngalangkat kawasa Ibilis ma moo-moo manusiyaꞌ buwat dusa.

Siga Pakaradjaan bay Pinalahil 1:5

Maka kamura-murahan binuwanan na pin kam kasannangan ka barakat meꞌ si Isa Almasi, ilooy ma kanaalla masampay kabanahan pasal Tuhan. Iya ilay bay duhuꞌ pinakallum pabalik ka baran ma yaꞌ na kuhi matoy. Maka iya du marintahan mimon panghuluꞌ ni sikaliput junyaꞌ. Ni kaehe aseꞌ na ningkitabi, atas na man lahaꞌ na bay tumpa supaya tapaddusan na kitabi man hisab ni dusa tabi.