1 Yahiya 2:17 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹⁷ Lagiꞌ na, mimon ma kinanapsuhan meꞌ manusiyaꞌ ntuu ni junyaꞌ sampay junyaꞌ tuu na mismu, lungay jaꞌ du bbos-bbos. Sugaꞌ sagannap ma buwat kahandak Tuhan, mastiꞌ sampulnaꞌ jaꞌ nyawa da saumu-umu.

1 Yahiya 2:17 ပူးပေါင်းရင်းမြစ်များ

Matiyu 21:31

Pag-anu, tilaw si Isa ni siga pa-mmean looy, “Bong kaam, mamooy ilay bay ngasip mmaꞌ da?” Pag tampung da, “Ilooy bilay ma siyaka.” Yuk si Isa, “Dari ongoy baw ilay ilooy ya disu akig bi? Baan ta kam banahan, siga tukang ninga sukay sampay siga puta, luu na paasok pa jawom pamarinta Tuhan duhuꞌ gi man kaam.

Matiyu 24:35

Indanan bi. Lanyap jaꞌ sina mintu gumi ka langit, sugaꞌ bong bitsala ku, yaꞌ baw situ kuhi baluba saumu-umu.

Matiyu 7:21

Maka yuk si Isa, “San ina meka jama ngawnan aku ‘Papuꞌ,’ saꞌ du baw sina mintu mimon sila tabeꞌ ni pamarinta Tuhan. Ilooy du ilay mintu tabeꞌ yana sagannap ma mean kahandak Mmaꞌ ku ni sulgaꞌ.

Malkus 3:35

Batan sagannap ma mean kahandak Tuhan, sila pun ina bilang ku du ga danganakan ku ka nneꞌ ku.”

Yahiya 4:14

Boꞌ boheꞌ ma pamuwan ku, bong jama bay kainum, yaꞌ na tohoꞌ kallong na pabalik. Batan boheꞌ ma pamuwan ku padari meꞌ karuha poon boheꞌ njawom atay jama. Niyaꞌ sina kuhi kumattaꞌ, boꞌ muwanan manusiyaꞌ lagi kasampulnaan nyawa saumu-umu.”

Yahiya 6:58

Batan aku na situ makanan sabanna man sulgaꞌ. Makanan tuu tu yaꞌ sibuꞌ ka ilooy ma bay kakan kabboꞌ-bboan tabi. Makanan looy ilay, san sila bay mangan, masi du sila bay matoy. Sugaꞌ soysoy mangan makanan tuu, llum saumu-umu.”

Yahiya 7:17

Soysoy ina doman mean kahandak Tuhan, malaingkan tasilang na jaꞌ bong tōꞌ ku tud lakka man Tuhan atawa lakka man dī ku sadjaꞌ.

Suwat si Pol pa mman Baanan Sukuꞌ si Isa ndooy ni Rom 12:2

Daa na kam mmeꞌ meꞌ uwahan jama ma yaꞌ pitsayaꞌ ni Almasi. Halinun bi na pamiki bi mari sikatuwaꞌ na ka pamiki Almasi. Meꞌ looy ilay, tapabahauwan na leꞌ Tuhan pangatayan bi supaya katoonan bi na kahandak na sampay tapabuwat bi na. Boꞌ inawnan kahandak Tuhan ina, mastiꞌ mahap jaꞌ, boꞌ kagak-gāk lagi maka yaꞌ luu salla na.

1 Korin 7:31

Arapun iya subay numbul satu ningkitabi yana hāl meꞌ makutuꞌ kahandak Papuꞌ, saꞌ na hāl junyaꞌ. Batan mimon pakaradjaan njawom junyaꞌ tuu, song lungay jaꞌ du sina.

Kolossa 1:9

Dari labba man llaw kami bay kaakahan pasal kaam, yaꞌ na situ bakkat meꞌ kami makuhan kaam duwaa pa Tuhan. Kamura-murahan binuwanan na pin kam meꞌ Rū Sutsiꞌ akka lawom ka pangahati supaya tahati bi na banahan bong oy kahandak Tuhan ningkaam.

Kolossa 4:12

Maka luu gi ntuu jama lahat bi du, yana si Epapras, lay du bay nohoꞌ masampay salam duwaa na ningkaam. Iya itu sabana-bana sosohoan si Isa Almasi. Basag ya makuhan kaam duwaa supaya taggu iman bi maka supaya tatantu bi bong oy kahandak Tuhan ningkaam.

1 Tesaloneka 4:3

Kahandak Tuhan ina subay kitabi sutsiꞌ. Sangkon bong kinawnan jina, basta palawak kam.

1 Tesaloneka 5:18

Maka mahap-maat kahalan bi, daa dohongan bi meꞌ bi muwanan Tuhan pagsukuhan. Batan ndang inaa sina kahandak Tuhan ningkitabi ma tibuuk na ka si Isa Almasi.

Hibrani 10:36

Subay kam natas njawom kabinsanaan supaya tapabuwat bi kahandak Tuhan sampay pa katapusan. Meꞌ looy ilay, takoleꞌ bi na sina mintu mimon ma bay njanjiꞌ meꞌ Tuhan ni sukuꞌ na.

Yaꞌkub 4:14

Na salla na, yaꞌ san katoonan bi bong oy katuwaꞌ kaam sumawung-sumilan. Kaallum bi ina meꞌ karuha humbu du, batan samantalaꞌ du luu, pag-anu, lanyap du.

1 Pitel 1:5

Maka man sabapan pangando bi ni si Isa, agpangan Tuhan na pin sina kam ni kaehe kawasa na ngkod-ngkoran yaꞌ gi bay takoleꞌ bi kasalamatan ma song pinalahil ni llaw dambuli.

1 Pitel 4:2

Honaꞌ-honaꞌ na, ddong na ya nganduwan napsu na ma maat. Ilooy sa karomanan na sinulut yana kahandak Tuhan halloman na masi llum.