1 Timuti 1:5 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁵ Baan nu sila ngkon tabi noan jama umanat Tuhan supaya sila maasean pagkahi da manusiyaꞌ. Maaseꞌ ina, mastiꞌ takaya da jaꞌ bong sutsiꞌ niyat atay da, maka yaꞌ na sila buwat oy maka oy na ma nulang ni honaꞌ-honaꞌ da, maka bong sila kanaalla mangando ni si Isa Almasi.

1 Timuti 1:5 ပူးပေါင်းရင်းမြစ်များ

Matiyu 12:35

Jama mahap ina, mahap du kawul-piil da sabap kahapan jaꞌ kinanna njawom atay da. Boꞌ jama maat ina, maat du kawul-piil da sabap pannoꞌ atay da leꞌ kalaatan.

Matiyu 5:8

Njawom supaat sina sagannap ma sutsiꞌ niyat atay da batan takita da du sina mintu Tuhan.

Salsila siga Rasul 15:9

Hantak bitsala ku ilay siꞌ, labba man kitabi bangsa Yahudi sampay na sila ma saꞌ Yahudi, yaꞌ pinagsitingka meꞌ Tuhan. Lay na du sinutsiꞌ atay da sabapan pangando da ni si Isa meꞌ bay karuha ningkitabi du.

Salsila siga Rasul 23:1

Na luu jaꞌ siꞌ si Pol, lay doꞌ ya ngandaꞌ pa mman baanan Sanhidrin looy, boꞌ na mitsala ninsila, yuk na, “Siga mbuwaꞌ danganakan, labba man sibuwa ngabut sampay batnaa, yaꞌ situ ku bay buwat oy maka oy na bong bistahan ku maat ni mata Tuhan.”

Salsila siga Rasul 24:16

Sangkon sabuli-buli ku situ buwat mahap supaya tallak njawom honaꞌ-honaꞌ ku yaꞌ luu sutsutan njataꞌ ku pa Tuhan sampay ni pagkahi ku manusiyaꞌ.

Suwat si Pol pa mman Baanan Sukuꞌ si Isa ndooy ni Rom 10:4

Yaꞌ tahati da lay na ginantian meꞌ Tuhan jalan sibuwa ka jalan bahau. Batnaa tu, Almasi na yana jalan bahau man manusiyaꞌ initung intong, basta sila pitsayaꞌ jaꞌ niiya.

Suwat si Pol pa mman Baanan Sukuꞌ si Isa ndooy ni Rom 12:9

Na meꞌ kitabi itu sikaaseꞌ-kaaseꞌ, subay hilas aseꞌ tabi. Subay kitabi wā lammis ni kalaatan. Maka subay kitabi wā makutuꞌ kaayaran.

Suwat si Pol pa mman Baanan Sukuꞌ si Isa ndooy ni Rom 14:15

Sarī gi, bong ina mbuwaꞌ danganakan ta bay ngita kita mangan lawuk ma kanna na haram, mastiꞌ lingog jaꞌ kōk na. Dari bong ya mangan sabapan ta san nulang ni honaꞌ-honaꞌ na, tumatandaꞌ yaꞌ luu aseꞌ ta niiya. Intomun bi, iya ina hagaan ni Almasi, batan atas Almasi bay nongan umu na bong pin salamat jaꞌ ya. Sangkon, yaꞌ sikatuwaꞌ bong mintu pangando danganakan ta binasa sabap meꞌ ta bay mangan lawuk yaꞌ biddaꞌ ni awpan na.

Suwat si Pol pa mman Baanan Sukuꞌ si Isa ndooy ni Rom 9:1

Na pasal pagkahi ku bangsa Israil ma nuwak Almasi, yana tukang nalamat man Tuhan, biddaꞌ na situ susa ku ninsila. Sila ilay sibuꞌ du ka danganakan ku. Tud yaꞌ kuhi maglumba karukkaan njawom atay ku batan yaꞌ sila pitsayaꞌ ni Almasi. Bong siꞌ bay dari, atas ku na pinagantiꞌ ninsila minulkaan sampay man ku na sakkat man Almasi bong pin sila tasalamat jaꞌ. Tud bana situ bitsala ku. Meꞌ aku itu njawman Almasi, yaꞌ ku nawakka ngandustaꞌ. Luu du situ Rū Sutsiꞌ māꞌ njawom honaꞌ-honaꞌ ku tud hilas bay halling ku siꞌ.

1 Korin 13:1

San kita sawpama pandoy mitsala kajinisan pallun manusiyaꞌ sampay pallun siga malaikat, bong kita yaꞌ du pandoy maaseꞌ ni pagkahi ta manusiyaꞌ, yaꞌ du luu pūs ta. Bong yaꞌ luu aseꞌ ta, sibuꞌ du hagaꞌ bitsala ta ka agung pinepek yaꞌ biddaꞌ atawa sembal pinagsipangkiꞌ manunsāp.

2 Korin 1:12

Siga danganakan, ituu itu kagakan kami: Tatantu kami sutsiꞌ jaꞌ niyat atay kami ni mata Tuhan. Maka katoonan kami yaꞌ luu pabuwat kami man kami taawnan yaꞌ bonto ni mimon jama, awla na ningkaam. Ni mimon pabuwatan kami, yaꞌ kami mangasa ni akka kami dī kami. Ilooy ya asahan kami yana aseꞌ-tabang Tuhan.

Galatiya 5:22

Boꞌ jama ma pinagbayaan meꞌ Rū Sutsiꞌ ina, sibuꞌ karuha da ka poon kayu ayad jaꞌ buwaꞌ na. Batan jinisan kahapan takita ni kawul-piil da, yana aseꞌ, kagakan, sannang atay, pasensiya, bbuwatan ayad ni pagkahi da ka arat mahap. Tapangandohan sila

Galatiya 5:6

Dari meꞌ kitabi itu tibuuk na ka si Isa Almasi, katoonan tabi na yaꞌ luu pagbiddaan pa Tuhan bong jama bay inislam atawa niyaꞌ. Ilooy du puntukan banahan yana pangando tabi niiya ma takita ni aseꞌ tabi ni pagkahi tabi manusiyaꞌ.

1 Timuti 1:18

Na Timuti, meꞌ kau sibuꞌ na ka anak ku, amay-amay mimon ma bay tugun ku siꞌ ningkau, pasampayun sa ni siga sukuꞌ si Isa nnaa. Ndang-ndang pabuwatan nu ina masampay kabanahan sikatuwaꞌ bana ka bay tunaꞌ siga pa-mmean sukuꞌ si Isa pasal kau. Bong ina tud kinanna du meꞌ nu bay tunaꞌ njataꞌ nu, inaa na sina buwansang mehe ningkau nulang kalaatan. Dari sibuꞌ du sina karuha nu ka sundalu basag ngatu njawom bonoꞌ mehe.

1 Timuti 1:19

Njawom nu nulang kalaatan, subay wā hallot pangando nu ni Papuꞌ Isa. Maka ilagan nu mimon pabuwatan ma nulang ni honaꞌ-honaꞌ nu. Luu sina kasohean ma yaꞌ na maruli honaꞌ-honaꞌ da sampay man pangando da na ni Papuꞌ Isa langkat. Pangando da ina, bong ndalil pa adjung, lay na binasa bay lumangga ni manunggu.

1 Timuti 3:9

Subay sila tattap pitsayaꞌ ni kabanahan ma bay pinalahil meꞌ Tuhan ningkitabi. Maka subay sila yaꞌ buwat oy maka oy na ma nulang ni honaꞌ-honaꞌ da.

2 Timuti 1:3

Mehe pagsukuhan ku pa Tuhan ma bay inisbat meꞌ kabboꞌ-bboan ku sampay na aku. Meꞌ aku itu ngisbat Tuhan, sannang na atay ku, batan katoonan ku yaꞌ na luu pabuwat ku ma nulang ni honaꞌ-honaꞌ ku. Magsuku ku pa Tuhan sabapan nu. Sangkon, tuktuk ku maku duwaa pa Tuhan, sangom na ka, llaw na ka, yaꞌ situ lipas meꞌ ku nabbut awon nu.

2 Timuti 1:5

Niyaꞌ takupan ku hilas pangando nu ni Papuꞌ Isa. Pangando nu ina, sibuꞌ du hantang na ka pangando bboꞌ nu Daꞌ Lowis ka nneꞌ nu si Yunis. Tumatandaꞌ na niyaku meꞌ bay na sinaynan pangando da ni jataꞌ nu.

2 Timuti 2:22

Sangkon, san meka meꞌ pag-umuhan nu taboo-boo meꞌ napsu da buwat jinisan karupangan, bong kau, basta palawak ko man arat-tabiat meꞌ looy. Iya pakutuun, yana kaintongan, pangando ni si Isa, aseꞌ ni jama maka kasalassayan. Sagannap ma ngisbat Papuꞌ ni kasutsiꞌ atay da, ndang meꞌ naa sina angan-angan da.

Taytus 1:15

Jama meꞌ looy ilay ma yaꞌ pitsayaꞌ ni si Isa, ndang yaꞌ du bay sinutsiꞌ meꞌ Tuhan atay da. Yaꞌ luu niyat atay da sutsiꞌ batan ndang lamaꞌ pamiki da. Maka yaꞌ na san luu nulang ni honaꞌ-honaꞌ da bong sila buwat maat. Boꞌ sagannap ma pitsayaꞌ ni si Isa ina, lay na sinutsiꞌ atay da. Sangkon katoonan da na san gi oy sinagid atawa pun kinakan meꞌ da, yaꞌ du luu katamak ninsila.

Hibrani 10:22

Patapit na kitabi pa Tuhan ni kahilas atay tabi ka ni kabasag pangando tabi niiya. Tatantu tabi na hinasi jaꞌ kitabi meꞌ Tuhan batan lay na sinutsiꞌ atay tabi ka lahaꞌ si Isa. Baran tabi pun, lay na du bay pinandi ka boheꞌ sutsiꞌ. Maka yaꞌ na du luu jawom honaꞌ-honaꞌ tabi ga masi kitabi dusahan pa Tuhan.

Hibrani 13:18

Siga danganakan, pakuhan bi na pin kami duwaa supaya wā kami moo kabantugan pa Tuhan man sabapan kawul-piil kami. Kamasaꞌ, san itu kami maku meꞌ tuu, katoonan kami du yaꞌ luu ni kawul-piil kami gantaꞌ pataꞌ man kami sinusunan.

Hibrani 9:14

Na bong lahaꞌ hayop kasutsiꞌ, labi na bong lahaꞌ Almasi saꞌ kasutsiꞌ. Batan lahaꞌ Almasi ina kasutsiꞌ sampay ni honaꞌ-honaꞌ tabi ma bay tamakan sabap meꞌ tabi bay maabak jinisan ma katiksaꞌ ni nyawa tabi. Dari man kawasa Rū Sutsiꞌ ma luu saumu-umu, lay na Almasi nongan umu na pa Tuhan bilang kulban ma yaꞌ luu salla na. Kon na buwat meꞌ looy supaya bean tabi na kahandak Tuhan.

Yaꞌkub 4:8

Patapit na kam pa Tuhan, boꞌ na patapit pa mman bi. Kaam ma amu-amu buwat dusa, labbahan bi na dusa bi. Kaam ma duwa-duwa pikilan bi, patattogun bi na pamiki bi mmeꞌ ni Papuꞌ.

1 Pitel 1:22

Na pagka lay na du kam mmeꞌ ni tōꞌ sabanna, pasutsiꞌ na pin sina pangatayan bi. Sangkon pakutuun bi na meꞌ bi sikaaseꞌ-kaaseꞌ. Maka subay hilas aseꞌ bi meꞌ karuha jama magdanganakan.

1 Pitel 3:16

Maka bila kam nampungan jama, subay bitsala hanunut-hanunut man bi magmaltabat ninsila. Maka ilagan bi buwat oy maka oy na ma nulang ni honaꞌ-honaꞌ bi. Meꞌ naa ina, bong luu bay mitsala kaam pa kalaatan, iyaꞌ jaꞌ sina sila pag takita da hāp tangge-tingkōꞌ bi njawman Papuꞌ Isa.

1 Pitel 3:21

Kasalamatan da ilay ni boheꞌ dunuk looy mattoꞌ, tadalil tabi pa boheꞌ man tabi bay pinandi tandaꞌ tabi lay na salamat man hukuman Tuhan. Kitabi ilay bay pinandi, saꞌ ga pandihan man ngalakkahan lumut ni baran tabi. Arapun pandihan tabi ina yana sipat lay na kitabi maku ampun man Tuhan mari hayang na pamiki tabi. Boꞌ kasalamatan tabi itu mawjud na batan lay na pinakallum pabalik si Isa Almasi.

1 Pitel 4:8

Maka numbul satu isbatun bi meꞌ bi sikaaseꞌ-kaaseꞌ ni kahilas atay bi. Batan bong ina kam maasean siga pagkahi bi, mastiꞌ ampun bi jaꞌ sila san du pooy eka dusa da ningkaam.

2 Pitel 1:7

Njawom bi ngikut arat-tabiat Tuhan, kaasean bi du siga pagkahi bi sukuꞌ si Isa sampay na mimon manusiyaꞌ.

1 Yahiya 3:10

Na meꞌ tabi ngila bong soy siga anak Tuhan maka soy siga anak Ibilis meꞌ tuu: Soysoy yaꞌ buwat kaintongan maka yaꞌ maasean siga pagkahi na manusiyaꞌ, saꞌ ya anak Tuhan.

1 Yahiya 3:23

Ga panohoan na ina meꞌ tuu: Subay kitabi pitsayaꞌ ni Anak na si Isa Almasi. Maka subay kitabi sikaaseꞌ-kaaseꞌ batan ndang inaa bay sohoꞌ si Isa ningkitabi.

1 Yahiya 3:3

Dari sagannap ma ngagad kajatuhan meꞌ looy bbos-bbos, malaingkan labbahan da na mimon kawul-piil ma yaꞌ mahap mari sila meꞌ Almasi na du sutsiꞌ.