1 Tesaloneka 5:6 - Sabahagiꞌ Kitab Tawrat: Panagnaan ni Awwal Jaman maka Kitab Injil

^6-8 Batan jama sukuꞌ sangom ina, katanaman da wā tuli atawa maglangohan. Sangkon pagka kitabi siga sukuꞌ llaw, daa na kitabi ngakig sagannap ma meꞌ sapantun wā tuli. Arapun subay kitabi iyakin, wā saddiya buwat kahandak Tuhan. Maka subay kitabi papatong. Kitabi itu meꞌ karuha sundalu njawom bonoꞌ mehe. Tiyap-tiyap sundalu langkap, luu ampi bassi na para dakan na ka saruk bassi para kōk na mari ya yaꞌ binasa. Kuwan kitabi baw itu, ilooy ya tabilang ampi dakan tabi, yana pangando tabi pa Tuhan ka aseꞌ tabi niiya. Maka saruk bassi tabi yana holat tabi pa Tuhan majatu kasalamatan tabi.

1 Tesaloneka 5:6 ပူးပေါင်းရင်းမြစ်များ

Matiyu 13:25

Pag disu sangom njawom na tuli, luu na baw banta na lay naburan bigi lumput ni jawom huma na.

Matiyu 24:42

Sangkon, iyakin kam mari kam sakap batan yaꞌ tatunaꞌ bi llaw mamooy man Papuꞌ bi takka.

Matiyu 25:13

“Sangkon,” yuk si Isa, “subay ndang saddiya na kam, batan yaꞌ tatunaꞌ bi bong llaw oy atawa lisag dangoy katakka ku ni sinōng.”

Matiyu 25:5

Dari sabap lay lantan katakka pangantin ma lalla, song hallom tintōꞌ na sila mimon sampay lay na ga kapatuli.

Matiyu 26:38

Dari yuk na ninsila sikatallu, “Biddaꞌ na baw tu susa jawom atay ku. Agon dak kapatoy na niyaku. Ntuu jaꞌ doꞌ kam maka unungan bi na doꞌ ku matiꞌ.”

Malkus 13:37

Sangkon batnaa ndang baan ta na kam sampay na sikamimon, basta subay kam iyakin.”

Lukas 12:37

Bong ina siga ata ndang saddiya na ni katakka papuꞌ da, mastiꞌ sinupaatan jaꞌ sila. Tandaꞌ papuꞌ da kasulutan ninsila, saynan na na sina badjuꞌ na, boꞌ na matingkōꞌ ga ata na ni lamisahan na. Pag-anu, boꞌ iya na ya motangan sila.

Lukas 12:39

“Indanan bi. Jama ina bong tasayu na sumilan takka panangkaw pa lumaꞌ na, mastiꞌ saddiya jaꞌ ya maka jaga mari ya niyaꞌ katangkawan.

Lukas 21:36

Sangkon, subay kam wā saddiya. Maka maku na pin kam duwaa mari taggu iman bi natasan mimon katiksaan ma bay sabbut ku siꞌ. Maka maku na pin kam duwaa, kamura-murahan yaꞌ du luu meꞌ bi hinaꞌ pag taabut bi ngawpan aku, yana Anak Manusiyaꞌ, bbos-bbos.”

Lukas 22:46

Dari yuk si Isa, “Uy la, tuli bitu kam! Matiꞌ kam ba. Maku na pin kam duwaa pa Tuhan mari yaꞌ tungkas iman bi.”

Salsila siga Rasul 20:31

Sangkon, amay-amay iyakin kam. Daa takupan bi bay tōꞌ ku ningkaam. Njawom tallun taun, llaw-sangom yaꞌ na bay luu hantiꞌ ku noan kaam kabanahan saliꞌ-saliꞌ. Sampay lay na ga latak boheꞌ mata ku ni kabasag luuy ku ningkaam.

1 Korin 15:34

Sangkon, mamiki doꞌ kam paayad. Pakutuun bi na kaintongan maka tagongan bi na meꞌ bi buwat dusa. Batan kaam ina nnaa ma amu-amu buwat dusa, tumatandaꞌ na masi gi kam awam pasal Tuhan. Kon ku halling meꞌ tuu mari kam iyaꞌ.

1 Korin 16:13

Na katapusan bitsala ku, daa kam kuhi usik man umanat mahap ma kinapitsayaan meꞌ tabi. Iyakin kam mari kam yaꞌ taboo magsiꞌ. Subay kam bahani mōꞌ kabanahan. Maka patagguhun bi iman bi.

Epesus 2:3

Kamasaꞌ, mimon ilay kitabi lay jaꞌ du bay lumingkaꞌ meꞌ looy jaman tabi bay maabak meꞌ nganduwan napsu tabi. Bay jaꞌ du kitabi buwat oy-oy kalaatan bay talangga pamiki tabi. Dari pagka meꞌ looy bay tabiat tabi, mastiꞌ tumiluꞌ jaꞌ kitabi pa jawom mulkaꞌ Tuhan meꞌ karuha mimon manusiyaꞌ ma yaꞌ ngisbat iya.

Epesus 5:14

Yaꞌ sina luu oy maka oy na tumampak bong yaꞌ luu dantaꞌ. Sangkon indanan bi palman, ilooy ma yuk na, “Matiꞌ na teꞌ kam. Ddong na kam tuli-tuli buwat dī bi subay ga mayat. Bangun na teꞌ kam boꞌ bi karantaan na meꞌ Almasi.”

Epesus 6:18

Maka njawom bi makoy siga kalangkapan ma bay sabbut ku siꞌ, maku na pin kam duwaa pa Tuhan. Maka bean bi jaꞌ Rū Sutsiꞌ magmundaan kaam njawom bi maku tabang pa Tuhan. Meꞌ kaam ina sundalu Almasi, iyakin kam. Maka daa kam jamu makuhan siga pagkahi bi sukuꞌ Almasi duwaa pa Tuhan.

Pilipi 4:5

Maka subay lammaꞌ pangatayan bi ni jama sikamimon. Intomun bi, tapit na sina Papuꞌ.

Kolossa 4:2

Na kaam sikamimon, maku na pin kam duwaa pa Tuhan. Maka bila kam maku duwaa, jagahan bi niyat atay bi maka muwan kam pagsukuhan pa Tuhan.

1 Tesaloneka 4:13

Siga danganakan, doman kami mahati ningkaam pasal siga pagkahi tabi sukuꞌ si Isa ma lay na matoy. Kon kami mahati, taggahaꞌ kalanduꞌ na baw kam susa meꞌ karuha siga jama ma saꞌ sukuꞌ si Isa bila sila kapatoyan. Meꞌ sila ilay, kon da susa, batan yaꞌ luu kaayaran hinolat meꞌ da ni ahirat.

1 Tesaloneka 5:10

Si Isa ilay, atas na bay nongan umu na kalnaꞌ kitabi supaya pag beleng na, kapagdambuwaꞌ na kitabi ka iya saumu-umu, labba man siga sukuꞌ na ma masi llum sampay sagannap ma lay na matoy.

1 Timuti 2:15

Inaa na sina kon karandahan kabisahan maddi. Sugaꞌ masi du baw ina sila salamat pa Tuhan bong yaꞌ du labbahan da pangando da ni si Isa, ka aseꞌ da, sampay kasutsian da ma tumatandaꞌ ni hatu kawul-piil da.

1 Timuti 2:9

Kuwan siga karandahan, karomanan ku meꞌ da mamakoy subay pakayan basanayan ma yaꞌ kaiyaꞌ-iyaꞌ. Daa subay na pin meꞌ punu njawom atay da hāl lingkat dagbos da. Daa sila ngakig tabiat kasohean ma tigiꞌ magdanda-danda maka magmmas-mmas sampay matuk pamakoy hagaan.

1 Timuti 3:11

Damikiyan, kuwan nda tukang nabang, subay du hatu maka subay yaꞌ pandoy mitna. Subay ya pandoy ngagak dī na sampay taasahan buwat mimon ma sinukuꞌ niiya.

1 Timuti 3:2

Sangkon, bila kam meneꞌ pa-mmean, subay ya jama ma yaꞌ luu sutsutan njataꞌ na maka subay disu du nda na. Boꞌ na, subay ya jama pandoy ngagak dī na. Maka subay ya patong mamiki maka hatu. Subay ya pangahulmat maka alistu noan jama.

2 Timuti 4:5

Na kuwan kau Timuti, subay ko wā ngagak dī nu ni mimon kahalan nu. Bong ko tumabbaꞌ njawom kamalasahiyan kalnaꞌ Papuꞌ, tatasan nu jaꞌ. Pagbuli-bulihan nu masaplag umanat mahap pasal si Isa. Pajatuhun na mimon ma bay hinalap meꞌ Tuhan ningkau.

Taytus 2:12

Aseꞌ-tabang Tuhan ina ningkitabi matomoꞌ kainagon tabi nimanan kawul-piil ma yaꞌ nulut ni kahandak na sampay nimanan oy-oy napsu ma maat. Maka aseꞌ-tabang Tuhan sina matomoꞌ kainagon tabi papatong mamiki ka buwat kaintongan sampay ngakig arat-tabiat na halloman tabi ni junyaꞌ tuu.

Taytus 2:6

Damikiyan kalallahan pun ma yaꞌ gi toa, sohoun du sila papatong mamiki.

1 Pitel 1:13

Dari pagka lay na kam sinalamat leꞌ Tuhan, patattogun bi na pamiki bi makutuꞌ kahandak na, maka agakun bi dī bi. Maka daa kam jamu ngaholat ni supaat ma ndean kaam pag beleng si Isa Almasi.

1 Pitel 4:7

Na katapusan junyaꞌ ina, yaꞌ na hallom. Sangkon paayarun bi na pamiki bi maka ilagan bi dī bi supaya yaꞌ na luu kasanggalang ningkaam maku duwaa pa Tuhan.

1 Pitel 5:8

Iyakin kam maka papatong kam mamiki sabap Ibilis ina, yana banta bi, doman jaꞌ nasat supaya kam patatak man si Isa. Sibuꞌ du sina karuha Ibilis ka halimaw ngallong, parampong-parampong miha sabbatan na.

Siga Pakaradjaan bay Pinalahil 16:15

Na siga sultan looy siꞌ, lay du takoleꞌ meꞌ siga seytan looy inoyo-oyohan sampay lay na binoo ddas ka ga sundalu da pa lahat inawnan Armageddon ni pallun Hibrani. Pag-anu siꞌ, takale ku na baw suwara Papuꞌ Isa, yuk na, “Indanan bi. Ni katakka ku ina mintu, kakuratan sina manusiyaꞌ meꞌ karuha jama kakuratan meꞌ sugaru. Sugaꞌ njawom supaat sina soysoy ma ngilagan dī na ka saddiya ni katakka ku. Sibuꞌ du sina mintu karuha na ka jama ndang lay na mamakoy, saddiya ni katakka bōs na. Yaꞌ sina ya mintu meꞌ karuha jama kaiyaꞌ-iyaan taabut nantang.”

Siga Pakaradjaan bay Pinalahil 3:2

Sangkon matiꞌ na teꞌ kam. Patakkoun bi na pangando bi niyaku padpad luu gi takapin dangkitiꞌ, taggahaꞌ lungay na baw mintu labbasakayi. Batan ndaꞌ ku tangge-tingkōꞌ bi yaꞌ gi sikatuwaꞌ ka kahandak Tuhan.