1 Tesaloneka 5:24 - Sabahagiꞌ Kitab Tawrat: Panagnaan ni Awwal Jaman maka Kitab Injil

²⁴ Tuhan ina kanaalla. Dari pagka iya na mismu bay ngaliyun kaam pa jawom okoman na, mastiꞌ kinabbul jaꞌ sina meꞌ na mimon ma bay paku ku siꞌ para ningkaam.

1 Tesaloneka 5:24 ပူးပေါင်းရင်းမြစ်များ

Matiyu 24:35

Indanan bi. Lanyap jaꞌ sina mintu gumi ka langit, sugaꞌ bong bitsala ku, yaꞌ baw situ kuhi baluba saumu-umu.

Yahiya 1:17

Maruhuꞌ, bay pamuwan Tuhan yana saraꞌ ma bay pinasampay meꞌ Nabi Musa. Pag batnaa, ilooy na baw pamuwan na yana aseꞌ ka kabanahan pinasampay meꞌ si Isa Almasi.

Yahiya 3:33

Sugaꞌ soysoy baw ina pitsayaꞌ ni umanat na, malaingkan sibuꞌ du ya ka bay mangaku bana palman Tuhan.

Suwat si Pol pa mman Baanan Sukuꞌ si Isa ndooy ni Rom 8:30

Na sagannap ma bay pineneꞌ meꞌ Tuhan binuwat sukuꞌ na, lay doꞌ silay sila duhuꞌ lliyun meꞌ Tuhan. Lay jaꞌ sila takoleꞌ lliyun, lay na pinuwasan dusa da. Puwas jaꞌ siꞌ dusa da, lay na baw sila pinatabeꞌ meꞌ Tuhan ni kabantugan na labba man junyaꞌ sampay pa ahirat.

Suwat si Pol pa mman Baanan Sukuꞌ si Isa ndooy ni Rom 9:24

Awnan ku ilay siꞌ yana kitabi ma bay lliyun meꞌ Tuhan binuwat sukuꞌ na. Boꞌ sukuꞌ na ina saꞌ sat lakka man bangsa Yahudi, arapun sampay lakka man mimon bangsa.

1 Korin 1:9

Tuhan ina taasahan. Boꞌ iya na sina bay ngaliyun kitabi supaya kitabi kapagrahasiyaꞌ na ka Anak na, yana Papuꞌ tabi si Isa Almasi.

1 Korin 10:13

Intomun bi, oy-oy ina sasat ma tuwaꞌ ningkitabi, sibuꞌ du sina ka siga sasat ma tuwaꞌ ni manusiyaꞌ sikamimon. Kahapan, kanaalla du Tuhan nabangan kitabi. Yaꞌ du sina ya mabiya kitabi njawom sasat ma gantaꞌ yaꞌ takaya tabi. Oy-oy ina sasat njataꞌ tabi, binuwanan du sina tabi meꞌ na gaos supaya kitabi katatas ngilagan dusa.

Galatiya 1:15

Sugaꞌ pag taabut gantaan Tuhan, lay na ku lliyun meꞌ na binuwat sosohoan na ni kaehe timbang na niyaku. Boꞌ ko hati, niyaꞌ gi san ku bay pōꞌ man jawom kūn induꞌ ku, ndang lay na ku peneꞌ Tuhan.

1 Tesaloneka 2:12

Batan sigi-sigi kami bay maintoman kaam ka muwansangan kaam pa kaayaran. Maka bay gi kam tugun kami subay pagsitawpun bi kawul-piil bi ka kaam inawnan siga sukuꞌ Tuhan. Ndang-ndang Tuhan du bay ngaliyun kaam supaya kam tabeꞌ ni pamarinta na sampay ni ehe kabantugan na.

2 Tesaloneka 2:14

Magsuku kami sabap lay na pakoy Tuhan umanat mahap lakka man kami man ngaliyun kaam supaya kam tumabeꞌ na ni kabantugan Papuꞌ tabi si Isa Almasi.

2 Tesaloneka 3:3

Kahapan kanaalla du Papuꞌ tabi si Isa. Taasahan bi sina ya mataggu iman bi sampay nganjagahan kaam supaya kam yaꞌ takoleꞌ sinasat meꞌ Ibilis.

2 Timuti 1:9

Maka ndang-ndang, iya du bay nalamat kita sampay ngaliyun kita supaya kita dari sukuꞌ na ma sutsiꞌ halloman ta llum. Sugaꞌ iya ilay bay nalamat kita, saꞌ baw ga man sabapan ni lilingan na mahap arat-tabiat ta. Arapun kon na ilay bay nalamat kita sabap ndang inaa garaꞌ na yaꞌ gi san junyaꞌ bay pinapayak. Ndang luu na garaꞌ na makitahan manusiyaꞌ aseꞌ-tabang na njataꞌ pabuwatan si Isa Almasi.

2 Timuti 2:13

Bong itu kitabi yaꞌ kanaalla, basta iya, mastiꞌ kanaalla jaꞌ batan ndang inaa tabiat na. Boꞌ tunmanūn sina meꞌ na maluba tabiat na.

1 Pitel 5:10

Sugaꞌ pus bi bay natas samantalaꞌ njawom kabinsanaan, tinabang du sina kam meꞌ Tuhan. Pahallotan na sina pangando bi maka pinataggu meꞌ na iman bi supaya kam meꞌ karuha poon kayu ma yaꞌ kuhi habbaꞌ sabap lawom gamut na. Bistahun bi doꞌ, ni kaehe aseꞌ-tabang Tuhan, lay na kam liyun na pa jawom okoman na. Maksud na supaya kam tumabeꞌ ni kabantugan na man sabapan pagkatibuuk bi ka si Isa Almasi. Boꞌ kabantugan na ina yaꞌ luu katapusan na.

2 Pitel 1:3

Ni kaehe kawasa Tuhan, luu na bay dean na kitabi kaallum bahau sampay mimon ma gunahan ningkitabi man ngikut arat-tabiat na. Lay na dean na kitabi ilooy siꞌ sikamimon pag lay jaꞌ tabi lungbid ka iya. Maka lay na kitabi liyun na pa jawom okoman na supaya kitabi tumabeꞌ ni kabantugan na ka kaayaran na.

Siga Pakaradjaan bay Pinalahil 17:14

Bbuwatan da ina mintu, moo Bili-bili looy sibonoꞌ. Sugaꞌ ā du sila meꞌ Bili-bili looy ka siga sukuꞌ na, yana sagannap ma bay peneꞌ na sampay liyun na pa jawom okoman na, ma magkanaalla mmeꞌ niiya. Kon na ina mintu ga Bili-bili looy kaā sabap iya Papuꞌ ninggi taꞌ mimon papuꞌ; Sultan ninggi taꞌ mimon sultan.”