1 Tesaloneka 5:23 - Sabahagiꞌ Kitab Tawrat: Panagnaan ni Awwal Jaman maka Kitab Injil

²³ Kamura-murahan tinabangan du kam meꞌ Tuhan, yana poonan kasannangan, supaya sutsiꞌ na banahan mimon kawul-piil bi. Kamura-murahan inayaran na pin meꞌ na nyawa bi, pamiki bi, sampay baran bi supaya yaꞌ luu sutsutan njataꞌ bi pag beleng Papuꞌ tabi si Isa Almasi.

1 Tesaloneka 5:23 ပူးပေါင်းရင်းမြစ်များ

Lukas 1:46

Yuk si Mariyam baw siꞌ tu, “Pupus hilas njawom atay ku muwan pudji pa Tuhan.

Yahiya 17:19

Kalnaꞌ sila, paglillaꞌ ku na umu ku supaya dari sukuꞌ nu na sila mmeꞌ ni kabanahan.

Salsila siga Rasul 20:32

“Batnaa tu, paku ku pa Tuhan, iya sa ngayaran kaam. Kannahun bi na pin umanat mahap pasal aseꞌ-tabang na ningkitabi. Umanat tuu itu kapahallot pangando bi supaya takoleꞌ bi mimon supaat ma bay janjiꞌ Tuhan ni sagannap ma bay pabuwat na sukuꞌ na.

Salsila siga Rasul 26:18

makallat mata da supaya sila kapōꞌ na man jawom lindom pa jawom dantaꞌ. Man sabapan pangahati ma pasampay nu ninsila, kapōꞌ na sina mintu sila man jawom sakup Ibilis pa jawom sakup Tuhan. Maka sabapan pangando da ina mintu niyaku, puwas na mimon dusa da, boꞌ da kapatabeꞌ na ni siga sukuꞌ Tuhan.’

Suwat si Pol pa mman Baanan Sukuꞌ si Isa ndooy ni Rom 15:13

Na meꞌ Tuhan ina pag-asa tabi, kamura-murahan buwanan na du kam kagakan mehe maka kasannangan njawom atay bi sabap meꞌ bi pitsayaꞌ ni Papuꞌ Isa. Kamura-murahan sabap meꞌ bi pitsayaꞌ, ginaosan du kam meꞌ kawasa Rū Sutsiꞌ supaya pabasag na pin holat bi pa Tuhan.

Suwat si Pol pa mman Baanan Sukuꞌ si Isa ndooy ni Rom 15:33

Kamura-murahan inunungan na pin kam meꞌ Tuhan, yana poonan kasannangan. Amin.

Suwat si Pol pa mman Baanan Sukuꞌ si Isa ndooy ni Rom 15:5

Tuhan ina yana poonan gaos tabi maka tukang mataggu iman tabi supaya kitabi natas njawom kasusahan. Kamura-murahan tinabangan du kam meꞌ na supaya kam dambuwaꞌ pamiki njawom kasalassayan sasang bi ngikut siga tōꞌ si Isa Almasi.

Suwat si Pol pa mman Baanan Sukuꞌ si Isa ndooy ni Rom 16:20

Luu du sina Tuhan, yana poonan kasannangan, tattap nabangan kaam nalloban Ibilis. Dambuli man inaa, kamura-murahan luu na pin aseꞌ-tabang Papuꞌ tabi si Isa Almasi njataꞌ bi.

1 Korin 1:2

pa mman bi ma pitsayaꞌ ni si Isa nnaa ni Korin. Kaam ina, lay na lliyun meꞌ Tuhan pa jawom okoman na sampay lay na sinutsiꞌ sabapan pagkatibuuk bi ka si Isa Almasi. Dari lay na kam dari sukuꞌ Tuhan tabeꞌ ni sikamimon jama nnoy-nnoy lahat ma ngisbat si Isa Almasi, yana Papuꞌ da sampay na ningkitabi labbasakayi.

1 Korin 1:30

Kahapan man kahandak Tuhan, tibuuk na kitabi ka si Isa Almasi, yana poonan man tabi koleꞌ kapandoyan man Tuhan. Lagiꞌ na, sabapan si Isa Almasi, lay na kitabi initung meꞌ Tuhan intong sampay lay na kitabi dari sukuꞌ Tuhan. Maka sabapan si Isa, lay na kitabi pinaddusan man hukuman ni mimon dusa tabi.

1 Korin 14:33

batan kahandak Tuhan ina, subay hatu meꞌ tabi numba iya. Yaꞌ ya doman hipos njawom baanan tabi. Na kuwan karandahan ma mmeꞌ numba, subay akig da tabiat inikut meꞌ mimon baanan sukuꞌ Papuꞌ Isa.

2 Korin 5:19

Dari meꞌ tuu situ umanat bay sohoꞌ Tuhan pinasampay ningkitabi: Njataꞌ kapatoy Almasi, ilooy na man Tuhan muwanan sikamimon manusiyaꞌ lawang man da mahap na niiya sampay yaꞌ na initung meꞌ na dusa da.

Pilipi 1:10

mari kam pandoy meneꞌ bong oy pataꞌ subay pabuwat bi llaw pa dangallaw. Batan bong ina mahap pabuwatan bi, mastiꞌ sutsiꞌ jaꞌ kawul-piil bi sampay yaꞌ na luu sutsutan njataꞌ bi pag taabut llaw Almasi pabeleng.

Pilipi 1:6

Aseꞌ bi ina yana buktiꞌ tud hinalin na pin meꞌ Tuhan pangatayan bi pa kaayaran. Maka tatantu ku pagka Tuhan lay na nagnaꞌ ngahalin pangatayan bi, mastiꞌ ndarahan na pin sina meꞌ na ngabut sampay magjatu na garaꞌ na ningkaam ni llaw Almasi pabeleng.

Pilipi 4:9

Maka ikutun bi na pin mimon ma bay takoleꞌ bi man ku, labba man siga tōꞌ ku sampay na kawul-piil ma bay tasakup bi njataꞌ ku. Bong siꞌ ina inaa pakutuꞌ bi, mastiꞌ inunungan jaꞌ sina kam meꞌ Tuhan ma muwan kasannangan njawom atay bi.

Kolossa 1:22

Lipara, luu na Anak na bay dari manusiyaꞌ, boꞌ na nongan umu na kalnaꞌ kaam supaya kam mahap na pa Tuhan. Pag batnaa, sabapan Anak na, sutsiꞌ na kam. Yaꞌ na luu sutsutan njataꞌ bi ni mata Tuhan,

1 Tesaloneka 2:19

Kainagon kami sitammu na kitabi pabalik batan pangando bi ni Papuꞌ tabi si Isa poonan kagakan mehe ningkami. Maka sabapan pangando bi, tatantu kami magsasōng na pin meꞌ bi nulut kahandak Tuhan ngabut sampay pa katapusan. Meꞌ kami ngingat, kaam ina meꞌ sapantun karuna dorogan ma bay sinangon taꞌ kōk kami man kami koleꞌ kabantugan pag beleng Papuꞌ Isa.

1 Tesaloneka 3:11

Kamura-murahan pinatakka du kami pilu meꞌ Mmaꞌ tabi Tuhan ka Papuꞌ tabi si Isa.

1 Tesaloneka 3:13

Meꞌ looy ilay, tattap na pin kasutsian bi maka yaꞌ luu sutsutan njataꞌ bi ni pag-awpan Mmaꞌ tabi Tuhan pag beleng Papuꞌ tabi si Isa ka siga malaikat na.

1 Tesaloneka 4:3

Kahandak Tuhan ina subay kitabi sutsiꞌ. Sangkon bong kinawnan jina, basta palawak kam.

1 Tesaloneka 5:22

Maka ilagan bi na mimon kalaatan.

2 Tesaloneka 3:16

Kamura-murahan ni mimon kahalan bi, binuwanan na pin kam kasannangan jawom atay bi meꞌ Papuꞌ, yana poonan kasannangan. Maka kamura-murahan luu na pin ya ngunungan kaam labbasakayi.

Hibrani 13:20

Tuhan ina poonan kasannangan. Ni kaehe kawasa na, lay ya makallum Papuꞌ tabi si Isa. Dari si Isa na sina numbul satu tukang ngipat kitabi ma awnan na siga bili-bili na. Man sabapan lahaꞌ na bay tumpa, inaa na kasāhan ni pagsulutan bahau ma yaꞌ luu katapusan na antaraꞌ Tuhan ka sukuꞌ na.

Hibrani 2:11

Dari pagka si Isa bay nutsiꞌ atay tabi, tibuuk na kitabi ka iya. Sangkon Mmaꞌ na ina, yana Mmaꞌ tabi na du. Dari ilooy na silay kon si Isa yaꞌ iyaꞌ ngawnan kitabi ga danganakan na.

Hibrani 4:12

Na palman Tuhan ina kawasahan boꞌ kabuwan gi kaallum bahau. Dari ko ngawon, palman na tawom gi man kataliꞌ batan ngassob sina pa jawom atay tabi sampay pa nyawa tabi. Maka palman na ina, inaa na man tabi mindoga bong mahap atawa maat pamiki tabi ka niyat atay tabi.

Yaꞌkub 1:4

Sangkon tatasan bi jaꞌ san gi oy katuwaꞌ ningkaam. Bong siꞌ ina kam natas, pag toklas na, taggu na iman bi ngabut sampay yaꞌ na luu salla ni kawul-piil bi samasakali.

1 Pitel 1:2

Halloman tabi yaꞌ gi bay lahil pa junyaꞌ, ndang katoonan Tuhan na pitsayaꞌ kitabi ni si Isa bbos-bbos. Dari man gantaan Tuhan, lay na kitabi sinutsiꞌ meꞌ Rū na. Maksud na supaya kitabi ngasip ni si Isa Almasi, maka supaya puwas na dusa tabi sabapan lahaꞌ si Isa bay pinaduwai kalnaꞌ kitabi. Kamura-murahan lipat man lipat na pin kasannangan ningkaam ka barakat man Tuhan.

1 Pitel 5:10

Sugaꞌ pus bi bay natas samantalaꞌ njawom kabinsanaan, tinabang du sina kam meꞌ Tuhan. Pahallotan na sina pangando bi maka pinataggu meꞌ na iman bi supaya kam meꞌ karuha poon kayu ma yaꞌ kuhi habbaꞌ sabap lawom gamut na. Bistahun bi doꞌ, ni kaehe aseꞌ-tabang Tuhan, lay na kam liyun na pa jawom okoman na. Maksud na supaya kam tumabeꞌ ni kabantugan na man sabapan pagkatibuuk bi ka si Isa Almasi. Boꞌ kabantugan na ina yaꞌ luu katapusan na.

2 Pitel 3:14

Sangkon, siga kakasi ku, halloman bi ngagad siga pakaradjaan looy mintu binakbul, subay kam tattap paintong. Maka subay yaꞌ luu sutsutan njataꞌ bi supaya mahap na jaꞌ kam pa Tuhan.

Suwat Lakka man si Jūd 1:1

Aku itu si Jūd, disu ata si Isa Almasi. Maka aku itu danganakan si Yaꞌkub. Itu suwat ku pa mman bi, sagannap ma bay lliyun meꞌ Mmaꞌ tabi Tuhan binuwat sukuꞌ na, yana kaam ma kinaasean meꞌ na sampay inayaran meꞌ si Isa Almasi.

Suwat Lakka man si Jūd 1:24

Pudji tabi Tuhan. Iya na sina katabang ningkitabi supaya yaꞌ na kitabi taboo-boo buwat dusa. Damikiyan, iya na du sina kapuwasan dusa tabi supaya yaꞌ na luu sutsutan njataꞌ tabi pag mintu taabut tabi nangge ni awpan sahayaꞌ na. Ndooy ilay mintu ni pag-awpan na, tud gāk na kitabi saꞌ alang-alang.