1 Tesaloneka 5:21 - Sabahagiꞌ Kitab Tawrat: Panagnaan ni Awwal Jaman maka Kitab Injil

²¹ Sugaꞌ pus na masampay, pindogahan bi doꞌ bong pataꞌ hinasi umanat na atawa niyaꞌ. Bong hati bistahan bi tud mattan lakka man Rū Sutsiꞌ, malaingkan kannahun bi; bong niyaꞌ, san daa na.

1 Tesaloneka 5:21 ပူးပေါင်းရင်းမြစ်များ

Lukas 12:57

“Pamikihan bi na bong oy pataꞌ pabuwat bi padpad yaꞌ gi kam kalabuan hukuman Tuhan.

Yahiya 15:4

“Yaꞌ sina luu dapat engas anggul buwaꞌ bong yaꞌ langkit ka poon na. Damikiyan kaam pun, bong kam yaꞌ langkit ka aku, yaꞌ du luu dapat bi buwat kaayaran ma sinukuꞌ meꞌ Tuhan ningkaam. Sangkon subay kam tattog langkit ka aku. Basta meꞌ naa, aku pun tattog du langkit ka kaam.

Yahiya 8:31

Pag-anu, yuk si Isa ni siga Yahudi ndooy ma pitsayaꞌ niiya, “Bong ina kam tattap mmeꞌ ni tōꞌ ku, malaingkan kaam na mulit ku sabanna

Salsila siga Rasul 11:23

Si Balnabas siꞌ tu jama mahap maka sukup pangando. Boꞌ na, ssob na ya meꞌ Rū Sutsiꞌ. Pag takka na pilay, tud bay gāk ya batan ni lilingan na luu na pin supaat Tuhan ni jataꞌ siga sukuꞌ si Isa ndooy. Dari lay ya muwansangan sila nohoꞌ magkanaalla ngisbat Papuꞌ ni mimon hilas atay da. Labba mandooy, tud bay meka na jama pasampun mmeꞌ ni Papuꞌ Isa ni daira looy.

Salsila siga Rasul 14:22

Ni siga daira looy siꞌ, bbuwatan da mataggu iman siga sukuꞌ si Isa sampay muwansangan sila yaꞌ nohoꞌ ngalabbahan pangando da ni Papuꞌ Isa. Maka lay gi sila maintoman sila ndooy, yuk da, “Mastiꞌ luu jaꞌ sina jinisan katiksaan talingkaꞌ tabi boꞌ tabi nakka pa jawom pamarinta Tuhan ni sulgaꞌ.”

Salsila siga Rasul 17:11

Na siga Yahudi ndooy ni Bereya, mas mahap baw arat-tabiat da man siga Yahudi ndooy ni Tesaloneka. Tinagi sila pakale ni umanat ga si Pol sampay lay du hinasi meꞌ da. Dari llaw pa dangallaw, wā sila maliksaꞌ njawom kitab man da masā bong tud mawjud du bitsala ga si Pol.

Suwat si Pol pa mman Baanan Sukuꞌ si Isa ndooy ni Rom 12:2

Daa na kam mmeꞌ meꞌ uwahan jama ma yaꞌ pitsayaꞌ ni Almasi. Halinun bi na pamiki bi mari sikatuwaꞌ na ka pamiki Almasi. Meꞌ looy ilay, tapabahauwan na leꞌ Tuhan pangatayan bi supaya katoonan bi na kahandak na sampay tapabuwat bi na. Boꞌ inawnan kahandak Tuhan ina, mastiꞌ mahap jaꞌ, boꞌ kagak-gāk lagi maka yaꞌ luu salla na.

Suwat si Pol pa mman Baanan Sukuꞌ si Isa ndooy ni Rom 12:9

Na meꞌ kitabi itu sikaaseꞌ-kaaseꞌ, subay hilas aseꞌ tabi. Subay kitabi wā lammis ni kalaatan. Maka subay kitabi wā makutuꞌ kaayaran.

1 Korin 15:58

Sangkon siga danganakan ku, kakasi ku, pahallotun bi pangando bi ni Papuꞌ Isa maka daa kam kuhi pinagsian. Gam pin pakutuun bi meꞌ bi maghulas-sangsāꞌ kalnaꞌ iya. Ndang-ndang katoonan bi na du, yaꞌ du senseng oy-oy pabuwat bi kalnaꞌ iya.

1 Korin 2:11

Yana meꞌ ilooy njawom pamiki tabi yaꞌ kinatoonan meꞌ manusiyaꞌ sarī man dī tabi, damikiyan, yaꞌ du luu toon njawom pamiki Tuhan sarī man Rū na.

Galatiya 6:10

Sangkon na, bong luu dapat bi buwat mahap ni jama awla na ni siga danganakan bi sukuꞌ si Isa, daa kam paagak.

Epesus 5:10

Sangkon, wā paliksaun bi niyat atay bi bong sikatuwaꞌ ka kahandak Papuꞌ atawa niyaꞌ. Bong ina tud ayad du niyat atay bi, mastiꞌ kasulutan jaꞌ sina Papuꞌ ni tangge-tingkōꞌ bi.

Pilipi 1:10

mari kam pandoy meneꞌ bong oy pataꞌ subay pabuwat bi llaw pa dangallaw. Batan bong ina mahap pabuwatan bi, mastiꞌ sutsiꞌ jaꞌ kawul-piil bi sampay yaꞌ na luu sutsutan njataꞌ bi pag taabut llaw Almasi pabeleng.

Pilipi 3:16

Sugaꞌ paku ku na ningkaam, basta bogbogan bi na jaꞌ mimon ma ndang katoonan bi numan ni kahandak Tuhan.

Pilipi 4:8

Dambuli man naa siga danganakan, oy-oy mahap ka tawop sinanglitan, oy-oy ma bana, oy-oy pataꞌ pinabuwat, oy-oy intong atawa sutsiꞌ, oy-oy lingkatan sampay tawop binantug, kannahun bi na pin njawom pamiki bi.

1 Tesaloneka 5:15

Luu-luu buwat maat ningkaam, daa subay na pin kam mawos. Gam pin, buwat na pin kam mahap ninsila sampay ni mimon manusiyaꞌ, mmeꞌ, yaꞌ mmeꞌ ni Papuꞌ Isa.

1 Tesaloneka 5:22

Maka ilagan bi na mimon kalaatan.

2 Tesaloneka 2:15

Sangkon, siga danganakan, daa labbahan bi pangando bi. Maka kuwangkutan bi na siga tōꞌ ma bay pinasampay meꞌ kami ningkaam, labba man ilooy ma bay halling kami ningkaam balharapan sampay ni jawom suwat kami.

2 Timuti 1:15

Na ndooy ilay ni Asiya, katoonan nu na du, adak katis na mimon danganakan ta nikutan aku. Sampay ga si Pijilus ka si Helmojinis, lai na du.

2 Timuti 3:6

Kasohean ina sila dutai pa taꞌ lumaꞌ jama mōꞌ tōꞌ palsu. Boꞌ luu gi takoleꞌ da pitsayaꞌ ni tōꞌ da kasohean danda ma kulang iman da, yana sagannap danda ma yaꞌ na taambat dusa da sabap takawum sila meꞌ napsu da ni jinisan.

2 Timuti 4:14

Sarī man naa, iyakin ko ni si Aleksandel, lalla looy ma tukang maba tumbagaꞌ, batan tud bay basag sina ya bay nulang umanat kami. Maka meka sina kalaatan bay pabuwat na niyaku. Sugaꞌ biyahun na, hinisab du sina ya meꞌ Papuꞌ sikapataꞌ ka bay pabuwatan na.

Hibrani 10:23

Sangkon daa na labbahan tabi holat tabi ma pinagbāꞌ meꞌ tabi ni manusiyaꞌ. San kitabi yaꞌ na hawal-hawalan. Ndang-ndang kanaalla du Tuhan numan mimon janjiꞌ na.

1 Yahiya 4:1

Siga kakasi ku, daa kam os-os pitsayaꞌ sukat jama mangaku bahasa tōꞌ na lakka man Rū Tuhan. Arapun pindogahan bi doꞌ duhuꞌ tōꞌ na mari katoonan bi bong mattan ya sosohoan Tuhan atawa niyaꞌ. Batan meka na sina guru palsu njawom junyaꞌ.

Siga Pakaradjaan bay Pinalahil 2:2

“Kaam ina, katoonan ku du kadarihan bi nnaa. Ndaꞌ ku, basag kam maghulas-sangsāꞌ kalnaꞌ awon ku sampay basag kam natasan jinisan kamalasahiyan. Maka katoonan ku du nulang kam jama maat. Sampay lay na tatongkad bi niyat atay siga jama nnaa ma buwat dī da rasul ku, maka tabistu bi na ngandustaꞌ jaꞌ sila.

Siga Pakaradjaan bay Pinalahil 2:25

Basta daa jaꞌ labbahan bi ntan ma ndang luu na bay bogbogan bi ngabut sampay ku pabeleng ni sinōng.

Siga Pakaradjaan bay Pinalahil 3:11

“Indanan bi. Basta tapit na sina katakka ku. Sangkon kuwangkutan bi na pin kabanahan ma ndang luu na ntanan bi mari yaꞌ luu kataban karuna bi. Hati na, mari yaꞌ lungay tungbas ayad ma bay hinalliꞌ meꞌ Tuhan ningkaam.

Siga Pakaradjaan bay Pinalahil 3:3

Kannahun bi na umanat ma bay takale bi sampay bay kinapitsayaan meꞌ bi sibuwa. Daa takupan bi. Maka tawbatan bi na dusa bi. Bong ina kam yaꞌ matiꞌ, malaingkan kakuratan sina kam mintu ni katakka ku ngahukum manusiyaꞌ. Sibuꞌ du sina mintu karuha bi ka jama kakuratan meꞌ sugaru batan yaꞌ katoonan bi bong sumilan katakka ku.