1 Tesaloneka 1:8 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁸ Maka sabapan bi, lataꞌ na man umanat mahap pasal Papuꞌ Isa pinasaplag ni sikaliput Masidunya ka Akaya sampay pa kalahat-lahatan ni katāhan. Batan paninggai-paninggai jaꞌ kami, ndaꞌ kami luu na jaꞌ jama bay kaakahan pasal pangando bi ni Tuhan. Dari san kami yaꞌ na bay magtuyuꞌ mahati ninsila oy maka oy na.

1 Tesaloneka 1:8 ပူးပေါင်းရင်းမြစ်များ

Salsila siga Rasul 18:12

Na kuwan siga Yahudi ndooy ni Korin ma yaꞌ pitsayaꞌ ni si Isa, lay isun naggaꞌ si Pol. Dari lay na baw ya sungkuban da boꞌ na binoo pa mman si Galliyo pinalkalaꞌ. Si Galliyo ilay maggubnul ndooy ni Akaya jaman looy.

Suwat si Pol pa mman Baanan Sukuꞌ si Isa ndooy ni Rom 1:8

Duhuꞌ-duhuꞌ bitsala ku, ni awon si Isa Almasi, magsuku ku pa Tuhan sabapan bi sikamimon. Magsuku ku sabap aka pasal pangando bi ni si Isa tanyag na ni sikaliput junyaꞌ.

Suwat si Pol pa mman Baanan Sukuꞌ si Isa ndooy ni Rom 15:26

Batan ni gasad bayaꞌ sukuꞌ si Isa man Masidunya ka Akaya, lay sila ngumpo sīn man nulung siga pagkahi da sukuꞌ si Isa ma miskin ndooy ni Jerusalem.

Suwat si Pol pa mman Baanan Sukuꞌ si Isa ndooy ni Rom 16:19

Boꞌ kaam ina, kinatoonan na meꞌ sikamimon kanaalla kam mmeꞌ ni kahandak Papuꞌ Isa. Sangkon tud gāk ku ningkaam. Sugaꞌ doman na pin baw ku maintoman kaam supaya tiggo kam buwat kaayaran maka supaya yaꞌ luu kabigiꞌ-bigian bi ni kalaatan.

1 Korin 14:36

Na bong luu nnaa yaꞌ kasulutan ni palbiatan tuu siꞌ, intomun bi, saꞌ silay kaam bay duhuꞌ-duhuꞌ mōꞌ umanat Tuhan. Maka daa kam mista isu-isu kaam bay tapasampayan umanat man Tuhan.

2 Korin 2:14

Sugaꞌ san meꞌ looy, magsuku ku pa Tuhan sabap luu na pin ya magmundaan kami supaya wā kami tumanjataꞌ san gi oy katuwaꞌ ningkami. Kon meꞌ looy sabap tibuuk na kami ka Almasi. Batnaa pinakoy na pin situ kami meꞌ Tuhan ngalataan kalahat-lahatan masampay umanat mahap pasal Almasi. Umanat mahap ina meꞌ sapantun bawu insallan hamut ma muhag-muhag ni sikaliput lahat.

2 Korin 3:4

Na kami itu, yaꞌ kami duwa-duwa, tud bay situ kami pineneꞌ meꞌ Almasi binuwat sosohoan na kalnaꞌ Tuhan.

Kolossa 3:16

Kannahun bi banahan mimon tōꞌ Almasi. Maka pakoyun bi na pangahati ma bay dean Tuhan ningkaam man bi sitoꞌ-tōꞌ atawa pun sipaintom-paintom. Maka ngalang kam siga kalangan pudji pa Tuhan meꞌ sapantun kalangan man jawom Kitab Jabul atawa kalangan sarī ma kasulut ni Tuhan tandaꞌ mehe meꞌ bi magsuku niiya.

2 Tesaloneka 1:4

Sangkon bila kami maglaw-lamud ka baanan sukuꞌ Tuhan ni kalahat-lahatan, wā kami nanglitan kaam. Bāꞌ kami ninsila, minsan kam kansang nilaugan atawa pun tumabbaꞌ njawom kamalasahiyan, basta tinatasan na jaꞌ meꞌ bi. Maka yaꞌ na pin kam kuhi patatak pitsayaꞌ ni Papuꞌ Isa.

2 Tesaloneka 3:1

Siga danganakan, sarī man inaa, luu situ paku ku ningkaam. Bong anu, pakuhan bi doꞌ kami duwaa. Kamura-murahan tinabangan du kami meꞌ Tuhan supaya patanyag na deꞌ-dēꞌ umanat mahap pasal Papuꞌ Isa. Maka maku kam duwaa, kamura-murahan sagannap ma kale umanat mahap, meꞌ kaam na du pitsayaꞌ.

1 Timuti 2:8

Na nnoy-nnoy jaꞌ man sukuꞌ si Isa kumpo-kumpo numba Tuhan, tugun ku ni kalallahan, subay tatantu da sutsiꞌ na kawul-piil da boꞌ angkat da tangan da maku duwaa. Subay yaꞌ luu lasu da atawa laat atay da ni jama.

2 Timuti 2:9

Salla na, sabap meꞌ ku masaplag, daran na ga ku bininsanaꞌ. Sampay lay na ga taabut man ku tatalungkuꞌ njawom jīl binuwat subay ga jama tukang ngalangga saraꞌ. Sugaꞌ san itu ku pinusas ka karina, bong inawnan umanat Tuhan, basta yaꞌ baw sina takoleꞌ kinarinahan.

3 Yahiya 1:12

Disu danganakan ma arat na mahap inakig, yana si Demetiri. Mimon danganakan ta nanglitan iya batan kawul-piil na magbēꞌ jaꞌ ka kabanahan. Kami pun ntuu kabāꞌ du mawjud iya jama mahap. Boꞌ bong itu kami māꞌ, katoonan nu na du, yaꞌ kami ngandustaꞌ.

Siga Pakaradjaan bay Pinalahil 14:6

Pag-anu siꞌ, ngita na baw ku disu malaikat lomeng taꞌ langit moo umanat mahap ma yaꞌ halin saumu. Umanat looy siꞌ pinasaplag meꞌ na ni sikamimon kabangsa-bangsahan taꞌ babaw junyaꞌ ni mimon kalahat-lahatan, kaniya-kaniya ka jinisan pallun da.

Siga Pakaradjaan bay Pinalahil 22:17

Pag-anu, yuk Rū Tuhan ka sagannap ma ginalla pangantin ma danda, yana mimon sukuꞌ Papuꞌ Isa, “Pitu na ko.” Damikiyan sagannap ma pakale ni bitsala njawom kitab tuu siꞌ halling du, “Pitu na ko.” Na soysoy tohoꞌ kallong bi, pitu na kam nginum boheꞌ ma muwan kaallum. Libre jaꞌ sina ni soysoy doman nginum.