1 Pitel 2:8 - Sabahagiꞌ Kitab Tawrat: Panagnaan ni Awwal Jaman maka Kitab Injil

⁸ Maka luu gi suwat njawom kitab pasal Almasi, ilooy ma yuk na, “Iya na sina batu man jama sumantuk sampay habbaꞌ.” Na ngkon da ilay binilang sumantuk niiya sabap yaꞌ sila kuhi pitsayaꞌ ni umanat mahap pasal iya. Mingkan man maruhuꞌ lagi, ndang ilooy na bay ginantaꞌ ni soysoy yaꞌ pitsayaꞌ.

1 Pitel 2:8 ပူးပေါင်းရင်းမြစ်များ

Lukas 2:34

Pus meꞌ looy, lay doꞌ sila pakuhan si Simiyun supaat. Maka yuk na ni si Mariyam, “Gantaan man Tuhan, sabapan anak-anak tuu, meka sina mintu bangsa Israil binasa sabap meꞌ da yaꞌ pitsayaꞌ niiya. Sugaꞌ meka du baw sina salamat man sabapan na du. Iya ina mintu yana padduman ma magmundaan manusiyaꞌ pa Tuhan. Salla na, meka jama nuwak iya.

Suwat si Pol pa mman Baanan Sukuꞌ si Isa ndooy ni Rom 9:22

Damikiyan, meꞌ naa du sina Tuhan. Bong ya doman makitahan ehe duga na ni kalaatan jama sampay ehe kawasa na midjalaꞌ sagannap ma pataꞌ minulkaan, mastiꞌ iya du magbayaꞌ. Sugaꞌ bong ina bistahan na mas mahap tatasan na lagi pahallom kalaatan sagannap ma pataꞌ minulkaan, magbayaꞌ na jaꞌ du sina.

1 Korin 1:23

Boꞌ kami baw itu, bbuwatan kami masaplag pasal si Isa Almasi bay pinapatoy llansang taꞌ tehang kalnaꞌ manusiyaꞌ. Sugaꞌ bila takale meꞌ siga Yahudi, sarī parasahan da. Kuwan siga bangsa saꞌ Yahudi baw, bila takale da, baꞌ-bāꞌ da na baw karupangan jaꞌ.

Galatiya 5:11

Siga danganakan, bong luu nnaa māꞌ aku magnasihat talpaksaꞌ subay binogbogan hāl meꞌ ngislam man ta initung intong, daa kam hidjab. Bong ina bana bitsala da, ongoy taggahaꞌ masi ku llaugan meꞌ siga pagkahi ku Yahudi? Maka bong ina bana ninsila, yaꞌ na lammis siga Yahudi niyaku san ku masaplag pasal kapatoy si Isa taꞌ tehang.

1 Tesaloneka 5:9

Boꞌ pataꞌ du silay ningkitabi ngaholat meꞌ looy batan ndang garaꞌ Tuhan ina nalamat kitabi. Inaa sina kon na bay mapitu Papuꞌ tabi si Isa Almasi pa junyaꞌ. Saꞌ kahandak na ngalabuan kitabi mulkaꞌ.

1 Pitel 2:6

Na bitsala ku ilay siꞌ pasal si Isa magtuntun du ka palman Tuhan njawom kitab, ilooy ma yuk na, “Ndaun bi sa. Luu sina mintu batu lambu ma hagaan banahan bay peneꞌ ku binuwat pananggehan lumaꞌ ku. Nnaꞌ ku ya ndooy ni Zayon. Soysoy ina pitsayaꞌ niiya, yaꞌ luu masa na kaap-apan.”

1 Pitel 2:7

Sangkon na ina, bong inawnan Almasi, mastiꞌ hagaan banahan ningkitabi ma pitsayaꞌ niiya. Boꞌ sagannap ma yaꞌ pitsayaꞌ, niyaꞌ san ya gunahan ninsila. Subay siꞌ mamintang doꞌ sila ni halling njawom kitab, ilooy ma yuk na, “Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon.”

2 Pitel 2:3

Ni kamulakab napsu ga guru meꞌ looy ilay, bbuwatan da ina mintu nulun-nulun siga dustaꞌ bong pin koleꞌ jaꞌ sila sīn mman bi. Sugaꞌ jama meꞌ sila ina, man maruhuꞌ lagi ndang bay sinukuꞌ meꞌ Tuhan minulkaan. Boꞌ kabinasahan da ina mintu, ndang luu na bay sinaddiya.

Suwat Lakka man si Jūd 1:4

Kon ku itu ngawalan kaam sabap luu na sina nnaa bay pasalluk ni siga baanan bi ga jama yaꞌ mahap. Yaꞌ san luu tawu da pa Tuhan. Boꞌ tinabid lagi meꞌ da kabanahan pasal aseꞌ Tuhan ni manusiyaꞌ. Baꞌ-bāꞌ da, dari na konoꞌ san kitabi buwat oy-oy kasabuhan ma kinanapsuhan meꞌ tabi. Ndang-ndang mehe du konoꞌ aseꞌ Tuhan ngampun. Na man sabapan laat kawul-piil da ina, tumatandaꞌ yaꞌ sila kuhi mangaku isu-isu si Isa Almasi yana Papuꞌ sikamimon. Sugaꞌ ndang luu na sina mulkaꞌ hinalliꞌ ninsila meꞌ ndang bay tinunaꞌ jawom kitab maruhuꞌ-ruhuꞌ.