1 Pitel 2:24 - Sabahagiꞌ Kitab Tawrat: Panagnaan ni Awwal Jaman maka Kitab Injil

²⁴ Boꞌ lay gi paglillaꞌ na baran na llansang taꞌ tehang bong pin tatanggung na jaꞌ dusa tabi. Kon na buwat meꞌ looy supaya patagong na kitabi buwat dusa boꞌ tabi makutuꞌ meꞌ buwat kaintongan. Dari meꞌ halling njawom kitab, “Man sabapan siga bakat bisa ni baran na, kaulian na kitabi.”

1 Pitel 2:24 ပူးပေါင်းရင်းမြစ်များ

Panagnaan 22:6

Pag-anu, kinaddoꞌ na meꞌ si Ibrahim kayu looy halliꞌ man nunu kulban, boꞌ lay sohoꞌ na pinanangkit ni si Isahak. Kuwan iya, lay moo koray ka kalangkapan man malakkot api. Pag-anu siꞌ, lay na sila pawus.

Matiyu 27:26

Dari siꞌ, lay na pinōꞌ si Barabas ninsila meꞌ gubnul. Kuwan si Isa, lay na sinohoꞌ llagpiꞌ ni sundalu na, boꞌ nohoꞌ llansang taꞌ tehang.

Matiyu 5:20

Baan ta kam banahan, yaꞌ sina kam tumabeꞌ ni pamarinta Tuhan bong yaꞌ lumabi kaintongan bi man ni siga Parisi ka ga guru saraꞌ agama.”

Matiyu 8:17

Sabap meꞌ looy, lay na binakbul ilooy ma bay tinunaꞌ meꞌ Nabi Isaya maruhuꞌ-ruhuꞌ, ilooy ma yuk na, “Lay tinanggung meꞌ na kasusahan tabi sampay lay ulian na siga saki tabi.”

Malkus 15:15

Dari pagka Gubnul Pilatu doman nulut baanan jama ndooy mari yaꞌ hiluhalaꞌ, lay na pōꞌ na man jawom jīl si Barabas. Kuwan si Isa, lay na sohoꞌ na llagpiꞌ, boꞌ lay na pa-ntan na pa mman siga sundalu na nohoꞌ llansang taꞌ tehang.

Lukas 4:18

“Inassob na ku meꞌ Rū Sutsiꞌ batan lay ku pineneꞌ meꞌ na masaplag umanat mahap pa mman siga jama miskin. Sinohoꞌ ku meꞌ na mahati sagannap ma tapalisu njawom komkoman Ibilis, inaa, bukaꞌ na lawang man da pōꞌ. Maka sinohoꞌ ku pitu masaplag ni sagannap ma buta supaya sila ngita na maka ni sagannap ma tinakkon mari sila kapaddus na.

Yahiya 1:29

Pag meꞌ sumawung, takita si Yahiya na si Isa pasōng pa mman na. Dari yuk na ni baanan jama ndooy, “Alu na lalla ma ginalla Bili-bili Tuhan ma muwasan dusa manusiyaꞌ.

Yahiya 19:1

Pag-anu siꞌ, lay na sohoꞌ Gubnul Pilatu llagpiꞌ si Isa ni siga sundalu na.

Salsila siga Rasul 10:35

Batan san gi oy bangsa manusiyaꞌ, basta sila tawu jaꞌ pa Tuhan ka buwat kaintongan, hinasi jaꞌ sina meꞌ Tuhan.

Salsila siga Rasul 10:39

“Mimon bay pabuwat na ni sikaliput Yahudiya sampay ndooy ni Jerusalem, kami mismu bay kasakup. Sugaꞌ san meꞌ looy na siꞌ kaayaran na, lay gi ya pinapatoy meꞌ siga pa-mmean Yahudi nohoꞌ llansang taꞌ tehang.

Salsila siga Rasul 13:29

“Dari pag lay jaꞌ binakbul mimon ma bay tinunaꞌ njawom kitab pasal meꞌ da buwat iya, lay na pinaduwai mayat na man taꞌ tehang, boꞌ na kinubu njawom lowang pampang.

Salsila siga Rasul 5:30

Boꞌ kaam baw tu, gam pin lay gi sohoꞌ bi si Isa pinapatoy llansang taꞌ tehang. Lipara lay du ya pinakallum meꞌ Tuhan kabboꞌ-bboan tabi.

Suwat si Pol pa mman Baanan Sukuꞌ si Isa ndooy ni Rom 6:11

Kuwan kitabi, pagka kitabi tibuuk na ka si Isa Almasi, subay ingat tabi pagkajama tabi maruhuꞌ lay na matoy mari kitabi yaꞌ na buwat dusa. Pag batnaa, luu na kaallum tabi bahau ma moo kabantugan pa Tuhan.

Suwat si Pol pa mman Baanan Sukuꞌ si Isa ndooy ni Rom 6:13

Amay-amay daa na pakoy tabi baran tabi buwat dusa. Gam pin paglillaꞌ tabi na baran tabi labbasakayi pa Tuhan supaya tapakoy man buwat kaintongan. Batan pagkajama tabi maruhuꞌ ma baldusa lay na matoy, pag batnaa, luu na kaallum tabi bahau.

Suwat si Pol pa mman Baanan Sukuꞌ si Isa ndooy ni Rom 6:16

Bong yaꞌ katoonan bi, soysoy ina duwan ta, inaa na sina papuꞌ ta. Sangkon bong ina kita nganduwan napsu ta buwat dusa, malaingkan dusa yana papuꞌ ta mahata kita. Pag toklas na, tiksaꞌ nyawa ta. Sugaꞌ bong ina inaa ya duwan ta kahandak Tuhan, malaingkan Tuhan yana Papuꞌ ta. Kuwan kita yana ata na. Pag toklas na, intong na jaꞌ kawul-piil ta.

Suwat si Pol pa mman Baanan Sukuꞌ si Isa ndooy ni Rom 6:2

Sugaꞌ yaꞌ baw lay sikatuwaꞌ! Saꞌ ba, meꞌ tabi ngingat lay na kitabi tabeꞌ ni si Isa matoy? Dari pagka meꞌ looy, pooy gi baw meꞌ tabi sigi-sigi buwat dusa?

Suwat si Pol pa mman Baanan Sukuꞌ si Isa ndooy ni Rom 6:22

Kahapan, lay na kitabi pinaddusan man kawasa napsu tabi ma bay kaboo-boo ningkitabi buwat dusa. Pag batnaa, lay na kitabi dari ata Tuhan. Dari sutsiꞌ na arat-tabiat tabi maka luu na kasampulnaan nyawa tabi saumu-umu.

Suwat si Pol pa mman Baanan Sukuꞌ si Isa ndooy ni Rom 6:7

Batan tiyap-tiyap ina jama lay na matoy, paddus na ya man kawasa napsu na ma bay kaboo-boo iya buwat dusa.

Suwat si Pol pa mman Baanan Sukuꞌ si Isa ndooy ni Rom 7:6

Kahapan batnaa, pagka lay na kitabi tabeꞌ ni kapatoy Almasi, paddus na kitabi man jawman sakup saraꞌ. Dari pagka luu na kaallum tabi bahau, yaꞌ na kitabi makutuꞌ meꞌ mogbogan saraꞌ man tabi maehe Tuhan. Ilooy ya man tabi maehe Tuhan batnaa, yana meꞌ tabi ngasip ni Rū Sutsiꞌ ma patannaꞌ njawom atay tabi.

1 Korin 15:3

Kaam ina, ndang lay na pasampayan ku siga tōꞌ ma hagaan banahan ni umanat mahap ma bay pinalahil niyaku. Duhuꞌ, yana si Isa Almasi bay nongan umu na supaya tatanggung na dusa tabi, meꞌ ndang bay tinunaꞌ njawom kitab.

2 Korin 6:17

“Palawak na kam man sagannap ma buwat maat. Pasakkat na kam mman da. Maka daa na kam palamud ni oy-oy kalalamaan, boꞌ bi hasi ku.

Galatiya 3:13

Boꞌ kitabi itu, ndang katoonan tabi na mimon manusiyaꞌ ngalangga saraꞌ Tuhan. Sangkon pataꞌ kitabi minulkaan bbos-bbos. Lipara, luu na Almasi bay nongan umu na llansang taꞌ tehang supaya tapaddusan na na kitabi man mulkaꞌ Tuhan. Iya ilay gantiꞌ tabi minulkaan. Boꞌ magbēꞌ du silay ka suwat njawom kitab, ilooy ma yuk na, “Soysoy pinapatoy siniitan taꞌ tehang, tumatandaꞌ lay minulkaan meꞌ Tuhan.”

Epesus 5:9

Batan tiyap-tiyap ina jama njawom karantaan, mastiꞌ tumatandaꞌ ni tangge-tingkōꞌ na kaayaran, kaintongan ka kabontohan.

Pilipi 1:11

Kamura-murahan tattap na pin kam buwat kaintongan man tabang si Isa Almasi ni jataꞌ bi, pamaehe sanglit ka kabantugan pa Tuhan.

Kolossa 2:14

Ni sabana na, kitabi itu sikamimon bay jaꞌ du pingkaꞌ buwat jinisan dusa. Dari ko ngawon, tahaꞌ na bay listahan dusa tabi ngalangga siga saraꞌ Tuhan. Lipara, lay na bay pawman Tuhan. Batan lay na tanggung Almasi dusa tabi jaman na bay nilansang taꞌ tehang.

Kolossa 2:20

Na kitabi itu sukuꞌ Almasi, meꞌ tabi ngingat, lay na kitabi tabeꞌ ni kapatoy na. Sangkon paddus na kitabi man siga aturan ma binista meꞌ kasohean subay binogbogan man da salamat. Sugaꞌ kaam baw tu, tatammu bi na baw ga mean siga aturan ma inikut meꞌ jama ma saꞌ sukuꞌ Almasi. Kuhi-kuhi jaꞌ kam mmeꞌ bong yuk da,

Kolossa 3:3

Batan pagkajama tabi ina maruhuꞌ lay na matoy. Pag batnaa, luu na kaallum tabi bahau njawom okoman Tuhan batan tibuuk na kitabi ka Almasi.

Hibrani 10:10

Dari pagka lay na si Isa Almasi nongan umu na man na nganduwan kahandak Tuhan, ilooy na bay poonan tabi initung sutsiꞌ pa Tuhan. Boꞌ kapatoy na ilay, san yaꞌ na binalikan, batan tasakup na na saumu-umu para muwasan dusa manusiyaꞌ.

Hibrani 10:5

Sangkon, pag pitu Almasi pa junyaꞌ, yuk na ni Tuhan, “Katoonan ku du saꞌ siga hayop kinulban atawa siga jakat hagaan ningkau. Sangkon bay takdil nu baran tuu niyaku sinongan pa mman nu.

Hibrani 12:13

Nūs jaꞌ kam lān intong supaya luu inuru meꞌ pagkahi bi ma yaꞌ gi takkoꞌ pangando da. Meꞌ looy ilay, yaꞌ sila magsiꞌ, gam pin pabasag pangando da sabapan bi.

Hibrani 7:26

Danan si Isa ilay tawop binuwat panghuluꞌ imam ma asahan tabi sabap sutsiꞌ ya. Yaꞌ luu sutsutan njataꞌ na maka yaꞌ luu tamak na. Yaꞌ ya bay pingkaꞌ mmeꞌ meꞌ uwahan siga baldusa. Maka sa langkaw-langkaw langit, mas langkaw gi kabantugan na ka kapatut na.

Hibrani 9:28

Damikiyan Almasi pun, sakayi du bay matoy mari tatanggung na dusa manusiyaꞌ. Pabeleng gi du ya ni sinōng, sugaꞌ saꞌ na maksud na mintu nanggung dusa. Arapun ilooy sa kon na lahil pabalik supaya tasalamat na sagannap ma ngagad ni katakka na.

Yaꞌkub 5:16

Sangkon bong kam bay kapabuwat dusa, subay du kam mangaku ni pagkahi bi sampay sipaku-paku duwaa supaya kam kaulian meꞌ Tuhan. Na bong ina jama intong maku duwaa pa Tuhan, mastiꞌ kawasahan jaꞌ duwaa na.

1 Yahiya 2:29

Almasi ina, ndang katoonan tabi du, wā intong. Sangkon tatantu tabi soysoy buwat kaintongan, malaingkan anak Tuhan du ya.

1 Yahiya 3:7

Siga anak, daa kam kuhi pinagsian meꞌ jama bong sila māꞌ bahasa dari san kitabi buwat dusa. Arapun ituu ya kannahun bi: Sagannap ma tattap buwat kaintongan, sila na jama intong meꞌ karuha Almasi.

Siga Pakaradjaan bay Pinalahil 22:2

Boꞌ ngaliyud ni tangngaꞌ lān daira looy. Ni sikaduwambilaꞌ sōng looy luu poon kayu ma muwan du kaallum saumu. Kayu looy siꞌ tu buwaꞌ buwan-buwan, min sapu-duwa njawom dantaun. Kuwan dawun na, pinakoy man ngulian jama ni mimon kabangsa-bangsahan.