1 Korin 8:1 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Na ni kapasal bay tilaw bi hāl mangan sumbalian ma sinongan meꞌ siga kapil ni siga tuhan-tuhan da, ndang tahati tabi na du bong kinawnan siga tuhan-tuhan, yaꞌ luu kawasa da samasakali. Sugaꞌ paayad-ayad kam, batan mangkin ina pasōng pangahati ta, pasōng du sina abbu ta. Boꞌ abbu ina, yaꞌ kasambu ni nyawa pagkahi ta. Iya kasambu yana aseꞌ.

1 Korin 8:1 ပူးပေါင်းရင်းမြစ်များ

Salsila siga Rasul 15:10

Dari ongoy baw taggahaꞌ doman gi kam malasu Tuhan? Tatammu bi lagi niksaꞌ ga danganakan tabi ma saꞌ Yahudi nohoꞌ mogbogan saraꞌ bangsa tabi? Ongoy kam manangkitan sila boonan ma yaꞌ san bay pingkaꞌ takaya tabi ka ga kabboꞌ-bboan tabi.

Salsila siga Rasul 15:29

Ilagan bi mangan sumbalian ma bay sinongan ni siga tuhan-tuhan. Maka daa kam nginum lahaꞌ atawa mangan sumbalian yaꞌ bay tiis lahaꞌ na. Maka daa kam ubay ka jama bong saꞌ lla bi atawa nda bi. Bong siꞌ ina bean bi jaꞌ ilooy siꞌ, katuwaꞌ na sina kam. Ngkod naa jaꞌ bitsala kami. Wassalam.”

Salsila siga Rasul 21:25

“Sugaꞌ saꞌ baw lay siꞌ maksud kami subay na pin binogbogan saraꞌ agama tabi meꞌ siga bangsa saꞌ Yahudi ma pitsayaꞌ na ni si Isa. Sugaꞌ subay du bean da tugun bay pag-isunan tabi ma bay pinokonan ninsila njawom suwat. Njawom suwat looy siꞌ, ndang katoonan nu na du, lay sila tinugun subay sila yaꞌ mangan oy-oy sumbalian bay sinongan ni tuhan-tuhan jama. Maka subay sila yaꞌ nginum lahaꞌ atawa mangan sumbalian yaꞌ bay tiis lahaꞌ na. Maka yaꞌ sila dari ubay ka jama bong saꞌ lla da atawa nda da.”

Suwat si Pol pa mman Baanan Sukuꞌ si Isa ndooy ni Rom 11:25

Na siga danganakan, supaya kam yaꞌ ngabbu saula-ula patingkat kam man siga Yahudi, bakkasan ta na kam disu kabanahan ma yaꞌ gi bay tahati maruhuꞌ. Minsan kaekahan Yahudi tohas kōk da yaꞌ kuhi pitsayaꞌ, ndang ilooy silay gantaan ninsila ngkod-ngkoran yaꞌ gi tatuman garaꞌ Tuhan matabeꞌ kabangsa-bangsahan saꞌ Yahudi ni sukuꞌ na.

Suwat si Pol pa mman Baanan Sukuꞌ si Isa ndooy ni Rom 12:16

Maka ingatun bi dī bi pantay-pantay ka siga pagkahi bi. Daa kam maglangkaw atay, gam pin subay kam mangatas panun ka jama miskin. Maka daa kam mista halul-akka gi kam man kasohean.

Suwat si Pol pa mman Baanan Sukuꞌ si Isa ndooy ni Rom 14:10

Sangkon ddong na kitabi nahawi mbuwaꞌ danganakan tabi sukuꞌ si Isa. Yaꞌ sikatuwaꞌ bong diyoꞌ meꞌ tabi ngandaꞌ sila. Indanan bi. Luu sina mintu masa tabi sikamimon siawop ka Tuhan hinukum.

Suwat si Pol pa mman Baanan Sukuꞌ si Isa ndooy ni Rom 14:14

Kamasaꞌ meꞌ aku itu disu jama tibuuk ka Papuꞌ Isa, basta katoonan ku baw tu, yaꞌ luu lawuk hinaram meꞌ Tuhan. Sugaꞌ bong baw luu pagkahi tabi mista luu lawuk haram niiya, malaingkan subay yaꞌ kakan na. Bong ilay ya bay mangan, dari dusa niiya batan nulang ni honaꞌ-honaꞌ na.

Suwat si Pol pa mman Baanan Sukuꞌ si Isa ndooy ni Rom 14:19

Sangkon, pagbuli-bulihan bi meꞌ bi wā njawom kasalassayan ka siga pagkahi bi. Maka sipaintom-paintom kam supaya pataggu na pin iman bi dambaanan.

Suwat si Pol pa mman Baanan Sukuꞌ si Isa ndooy ni Rom 14:22

Dari oy-oy pamiki bi pasal ilooy ma bay sabbut ku siꞌ, sukup kaam na jaꞌ ka Tuhan tau. Tud gāk sina kitabi bong katoonan tabi na kabanahan maka bong tatantu tabi tuwaꞌ pabuwatan tabi.

Suwat si Pol pa mman Baanan Sukuꞌ si Isa ndooy ni Rom 14:3

Na sagannap ma mangan oy-oy lawuk, subay yaꞌ diyoꞌ meꞌ da ngandaꞌ siga pagkahi da ma niyaꞌ mangan. Damikiyan, kuwan sila ma mangan utan-utanan sadjaꞌ, daa du baw sila manding pagkahi da pa kalaatan ma mangan oy-oy lawuk. Ndang-ndang saliꞌ-saliꞌ du sila tinimaꞌ meꞌ Tuhan.

Suwat si Pol pa mman Baanan Sukuꞌ si Isa ndooy ni Rom 15:14

Na siga danganakan, manganna situ ku kaam tud jama mahap maka lawom pangahati bi ni kabanahan pasal Tuhan. Sangkon, bistahan ku pandoy du sina kam sipaintom-paintom.

1 Korin 1:5

Man sabapan pagkatibuuk bi ka Almasi, lay na kam kaladjikian jinisan supaat. Sangkon luu na pangahati bi ni kabanahan. Maka pandoy na kam mahatiyan jama palman Tuhan,

1 Korin 10:15

Kaam ina, luu du kam ka honaꞌ-honaꞌ bi. Sangkon bong ina kam mindoga paayad, tabista bi du sina bana bitsala ku.

1 Korin 10:28

Sugaꞌ bong baw luu pagkahi bi ndooy, boꞌ yuk na, “Lawuk tuu bay pingkaꞌ sinongan pa tuhan-tuhan,” daa na kam mangan kalnaꞌ iya, taggahaꞌ lingog na baw pamiki na bong ya ngita kaam mangan.

1 Korin 14:20

Siga danganakan, kaam ina ma bay kaladjikian mitsala ni siga pallun ag-agan, sibuꞌ du karuha bi ka anak-anak luu kuli-kulihan na bahau tud kinasengan meꞌ na. Sugaꞌ ddong na kam ngakig pamiki anak-anak. Akigun bi na siga matatoa patong pamiki da. Luu baw beꞌ disu pakaradjaan ma pataꞌ man bi ngantanan pamiki anak-anak dikiꞌ, yana hāl meꞌ da yaꞌ kapiki nulun-nulun kalaatan.

1 Korin 15:34

Sangkon, mamiki doꞌ kam paayad. Pakutuun bi na kaintongan maka tagongan bi na meꞌ bi buwat dusa. Batan kaam ina nnaa ma amu-amu buwat dusa, tumatandaꞌ na masi gi kam awam pasal Tuhan. Kon ku halling meꞌ tuu mari kam iyaꞌ.

1 Korin 4:10

Ni bandingan manusiyaꞌ ina, biddaꞌ na dupang kami sabap meꞌ kami amu-amu masaplag pasal Almasi. Boꞌ kaam baw ina, kanna bi halul-akka na kam ni hāl Almasi. Kami itu, ni bandingan jama, lammaꞌ kawasa kami. Boꞌ kaam baw tu, subay ga kam jama sukup kawasa. Kami itu pinag-udjuꞌ. Gam ina kaam, pinaehe gi.

1 Korin 4:18

Kaam ina nnaa kasohean, pannoꞌ na meꞌ abbu batan kanna bi yaꞌ na ku pabeleng pilu.

1 Korin 4:6

Na siga danganakan, aku ilay siꞌ bay nabbut pabuwatan kami ka si Apolos man ku muwanan kaam pamintangan. Maksud ku mari kam yaꞌ palabi man siga tōꞌ njawom kitab. Intong na, ddong na kam mantug disu danganakan saula-ula patingkat ya man kasohean.

1 Korin 5:2

Boꞌ kaam baw nnaa, sannang jaꞌ kam ngabbu saula-ula kanaalla kam buwat kaintongan. Subay siꞌ gam pin magkasusahan kam. Maka subay siꞌ bay pinōꞌ meꞌ bi lalla looy man baanan bi.

1 Korin 5:6

Bong ina luu na pin lamud kalalamaan meꞌ naa ni baanan bi, yaꞌ sina sikatuwaꞌ bong kam ngabbu lagi bahasa kaam jama kanaalla mmeꞌ ni kahandak Papuꞌ. Subay siꞌ katoonan bi na bong kinawnan dusa pinabiya, kalamin ni sikamimon. Bong dalil ta pa pasulig, san ina dangkitiꞌ du, lataꞌ na sina man na ngassob.

1 Korin 8:2

Soysoy mista dī na halul-akka, boꞌ yaꞌ luu aseꞌ na, mastiꞌ kulang pangahati na.

1 Korin 8:4

Na balik ta pa hāl sumbalian ma bay sinongan meꞌ kapil pa tuhan-tuhan da, katoonan tabi na du dari du kinakan. Batan bong kinawnan siga tuhan-tuhan, yaꞌ du luu tahal-hāl da batan yaꞌ san llum. Boꞌ na, katoonan tabi du disu du Tuhan, yaꞌ luu sarī.

1 Korin 8:7

Sugaꞌ luu gi du baw sina kasohean pagkahi tabi masi kulang pangahati. Sangka da luu kawasa siga tuhan-tuhan. Meꞌ da mista bong sila mangan sumbalian ma bay sinongan pa disu tuhan-tuhan, sibuꞌ du sila ka bay numba tuhan-tuhan looy, batan ndang inaa na bay kabiyasahan da maruhuꞌ. Dari bong sila alang-kapalang mangan sumbalian meꞌ looy, boꞌ da amu-amu mangan, pangissahan da ndusa sila pa Tuhan, batan nulang sila ni honaꞌ-honaꞌ da.

Epesus 4:16

Kuwan kitabi ma pitsayaꞌ niiya meꞌ karuha baran na. Na tiyap-tiyap baran manusiyaꞌ, mimon kalangkapan na langkit ka tibuuk. Maka baran ina, bong siga kalangkapan na saliꞌ-saliꞌ buwat ilooy ma bay sinukuꞌ ninsila, mastiꞌ paehe jaꞌ sina maka pabasag na pin. Damikiyan, meꞌ naa du sina baran si Isa bong kitabi sikaaseꞌ-kaaseꞌ ka sama-sama buwat ilooy ma bay sinukuꞌ meꞌ na ningkitabi.

Kolossa 2:18

Sangkon daa na kam hidjab bong luu māꞌ yaꞌ sā kasalamatan bi bong kam yaꞌ bay niksaꞌ dī bi ngikut jinisan aturan agama da. Maka daa kam mmeꞌ ni ilmuꞌ kasohean ma nohoꞌ jama numba siga malaikat. Ga jama meꞌ looy ilay tinagi nuntutan kaam kajinisan bahasa bay pinalahil meꞌ Tuhan ninsila. Mingkan, ilooy du mehe ninsila ngabbu, meꞌ ndang tabiat manusiyaꞌ ma mandang hāl junyaꞌ.

Siga Pakaradjaan bay Pinalahil 2:14

Sugaꞌ luu gi du baw ina man ku kasallahan ningkaam. Kasohean kam nnaa, bbuwatan bi ngikut akka si Balaam mattoꞌ ma bay magpandoyan Sultan Balak bong pooy meꞌ na magsian bangsa Israil. Sabapan palbiatan si Balaam, lay na ga bay taboo-boo siga sukuꞌ Tuhan mangan sumbalian ma bay pingkaꞌ sinongan pa siga tuhan-tuhan, boꞌ lay gi sila taboo-boo magjina.

Siga Pakaradjaan bay Pinalahil 2:20

Sugaꞌ luu gi du baw situ man ku kasallahan ningkaam. Bbuwatan bi mabiya si Jesebel magsian sagannap ma ngisbat aku. Iya ilay danda jahallis, bahasa iya tukang masampay palman Tuhan. Boꞌ ko, njawom tōꞌ na, yaꞌ du konoꞌ dari hāl na san jama buwat kajinahan atawa pun mangan sumbalian ma bay pingkaꞌ sinongan pa siga tuhan-tuhan.