1 Korin 6:11 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹¹ Kaam pun ina maruhuꞌ, meꞌ naa du bay kadarihan bi kasohean. Lipara, lay na kam sinutsiꞌ, maka lay na kam binuwat sukuꞌ Tuhan sampay initung intong. Na mimon kaayaran looy siꞌ, yaꞌ silay bay takoleꞌ bi bong saꞌ sabapan pabuwatan Papuꞌ tabi si Isa Almasi ka Rū Tuhan.

1 Korin 6:11 ပူးပေါင်းရင်းမြစ်များ

Matiyu 20:4

Dari yuk na, ‘Bong yaꞌ luu buwatan bi, boꞌ kam doman buwat, pilay kam pa kabbun ku. Pagsipataꞌ ku sa gadji bi ka halloman man bi bay buwat.’

Lukas 18:14

Pag-anu yuk si Isa lagi, “Na pag poleꞌ da ilay, baan ta kam banahan, ni antaraꞌ sila sikaduwa, iya ilay initung intong meꞌ Tuhan yana tukang ninga sukay looy. Boꞌ Parisi looy ilay, niyaꞌ. Batan soysoy ina malangkaw dī na, song hallom, pinadiyoꞌ du sina. Sugaꞌ soysoy ina magpadiyoꞌ, pinalangkaw du sina.”

Yahiya 13:10

Pag tampung si Isa siꞌ tu, “Tiyap-tiyap jama lay na mandi, sutsiꞌ na du baran na labbasakayi. Battis na jaꞌ subay kinosoan balik. Kuwan kaam ina, sutsiꞌ kam, sugaꞌ saꞌ baw tu kam mimon.”

Yahiya 13:8

Sugaꞌ yuk si Pitel baw siꞌ tu, “Yaꞌ bina la sikatuwaꞌ! Basta yaꞌ baw ku kuhi kosoan nu battis ku!” Yuk si Isa baw, “Bong bina yaꞌ bay takosoan ku battis nu, yaꞌ luu sukuꞌ nu niyaku.”

Yahiya 5:4

Bbuwatan da ngagad boheꞌ looy usik batan tamūd luu malaikat Tuhan duwai mungka boheꞌ looy. Boꞌ soysoy bay kaparuhuꞌ pilay paaggom taabut boheꞌ looy binungka, mastiꞌ kaulian jaꞌ san lagi oy saki na.

Salsila siga Rasul 22:16

“Maka yuk si Ananiyas lagi niyaku, ‘Oy gi agad nu? Subay sina ko maku na kaampunan man Papuꞌ Isa, boꞌ nu pinandi mari puwas na mimon dusa nu.’ Dari siꞌ, lay du ya bay asip ku.

Salsila siga Rasul 26:18

makallat mata da supaya sila kapōꞌ na man jawom lindom pa jawom dantaꞌ. Man sabapan pangahati ma pasampay nu ninsila, kapōꞌ na sina mintu sila man jawom sakup Ibilis pa jawom sakup Tuhan. Maka sabapan pangando da ina mintu niyaku, puwas na mimon dusa da, boꞌ da kapatabeꞌ na ni siga sukuꞌ Tuhan.’

Suwat si Pol pa mman Baanan Sukuꞌ si Isa ndooy ni Rom 3:24

Lipara ni kaehe aseꞌ Tuhan, lay na kitabi kaladjikian initung meꞌ na intong man sabapan pabuwatan si Isa Almasi bay muwasan dusa tabi.

Suwat si Pol pa mman Baanan Sukuꞌ si Isa ndooy ni Rom 4:5

Dari bong ina jama buwat mahap sabap kanna da ilooy na man dusa da pinuwasan, magsāꞌ sila. Batan man Tuhan ngitung siga baldusa intong, saꞌ ga sabap pabuwatan da, arapun sabap meꞌ da pitsayaꞌ ni si Isa.

Suwat si Pol pa mman Baanan Sukuꞌ si Isa ndooy ni Rom 5:1

Na kitabi itu, lay na kitabi initung intong sabap meꞌ tabi pitsayaꞌ ni si Isa Almasi. Dari sabapan Papuꞌ tabi si Isa, mahap na kitabi pa Tuhan.

Suwat si Pol pa mman Baanan Sukuꞌ si Isa ndooy ni Rom 5:9

Dari pagka lay na kitabi initung intong sabapan lahaꞌ Almasi bay tumpa, labi na kitabi saꞌ sinalamat meꞌ na man mulkaꞌ Tuhan ni sinōng pagka sukuꞌ na na kitabi.

Suwat si Pol pa mman Baanan Sukuꞌ si Isa ndooy ni Rom 8:30

Na sagannap ma bay pineneꞌ meꞌ Tuhan binuwat sukuꞌ na, lay doꞌ silay sila duhuꞌ lliyun meꞌ Tuhan. Lay jaꞌ sila takoleꞌ lliyun, lay na pinuwasan dusa da. Puwas jaꞌ siꞌ dusa da, lay na baw sila pinatabeꞌ meꞌ Tuhan ni kabantugan na labba man junyaꞌ sampay pa ahirat.

Suwat si Pol pa mman Baanan Sukuꞌ si Isa ndooy ni Rom 8:33

Dari pagka Tuhan bay meneꞌ kitabi binuwat sukuꞌ na sampay bay ngitung kitabi intong, ongoy subay na pin paruli tabi bong luu ngawnan kitabi baldusa?

1 Korin 1:2

pa mman bi ma pitsayaꞌ ni si Isa nnaa ni Korin. Kaam ina, lay na lliyun meꞌ Tuhan pa jawom okoman na sampay lay na sinutsiꞌ sabapan pagkatibuuk bi ka si Isa Almasi. Dari lay na kam dari sukuꞌ Tuhan tabeꞌ ni sikamimon jama nnoy-nnoy lahat ma ngisbat si Isa Almasi, yana Papuꞌ da sampay na ningkitabi labbasakayi.

1 Korin 1:30

Kahapan man kahandak Tuhan, tibuuk na kitabi ka si Isa Almasi, yana poonan man tabi koleꞌ kapandoyan man Tuhan. Lagiꞌ na, sabapan si Isa Almasi, lay na kitabi initung meꞌ Tuhan intong sampay lay na kitabi dari sukuꞌ Tuhan. Maka sabapan si Isa, lay na kitabi pinaddusan man hukuman ni mimon dusa tabi.

1 Korin 12:2

Batan bay jaman bi ina yaꞌ gi pitsayaꞌ ni si Isa Almasi, katoonan bi du, bay jaꞌ kam taboo-boo numba siga tuhan-tuhan yaꞌ san kabitsala.

Galatiya 2:16

Sugaꞌ batnaa, labbahan ta na pamiki meꞌ looy. Batan katoonan ta na, ilooy ya man manusiyaꞌ initung meꞌ Tuhan intong yana sabap meꞌ da pitsayaꞌ ni si Isa Almasi, saꞌ ga sabap meꞌ da mogbogan saraꞌ. Inaa sina kon kita bay pitsayaꞌ niiya. Tabista ta na yaꞌ luu san disu jama koleꞌ kaintongan pa Tuhan meꞌ na bay mogbogan saraꞌ.

Galatiya 3:11

Sangkon tarang-tarang na yaꞌ luu jama initung meꞌ Tuhan intong sabap meꞌ da mogbogan saraꞌ agama. Boꞌ sikatuwaꞌ du ka suwat njawom kitab, ilooy ma yuk na, “Sagannap ma initung meꞌ Tuhan intong sabapan pangando da niiya, mastiꞌ koleꞌ kasampulnaan nyawa saumu-umu.”

Galatiya 3:24

Dan jinis meꞌ halling, saraꞌ ilay meꞌ sapantun tukang jaga bay magbayaan kami ngkod-ngkoran yaꞌ gi bay takka Almasi. Noy takka na Almasi boꞌ kami sumunsayaꞌ sampay initung na intong sabap meꞌ kami pitsayaꞌ niiya.

Galatiya 3:8

Sarī gi, man maruhuꞌ-ruhuꞌ lagi, ndang luu na garaꞌ Tuhan ngitung manusiyaꞌ intong lakka man mimon kabangsa-bangsahan basta sila pitsayaꞌ ni Almasi. Umanat mahap looy ilay siꞌ bay pinalahil meꞌ Tuhan ni Nabi Ibrahim. Batan njawom kitab, yuk Tuhan niiya, “Bbos-bbos kau ina poonan man mimon kabangsa-bangsahan taꞌ babaw junyaꞌ koleꞌ supaat.”

Epesus 5:26

supaya kitabi dari sukuꞌ na. Pag batnaa, lay na baw kitabi sinutsiꞌ meꞌ na sabap meꞌ tabi bay pitsayaꞌ ni umanat na sampay bay pinandi.

Epesus 5:8

Bana na, maruhuꞌ sibuꞌ du kam ka sila njawom kalindoman, boꞌ batnaa luu na kam njawom karantaan sabap tibuuk na kam ka Papuꞌ Isa. Sangkon subay sikatuwaꞌ tangge-tingkōꞌ bi ka jama ma tattap njawom karantaan.

2 Tesaloneka 2:13

Boꞌ kaam ina, siga danganakan, pabiddaꞌ man sila. Sangkon pataꞌ du kami wā muwan pagsukuhan pa Tuhan sabapan bi, yana siga kakasi Tuhan. Labba man sibuwa lagi, ndang lay na kam peneꞌ Tuhan tabeꞌ ni sukuꞌ na. Maksud Tuhan supaya kam salamat man sabapan Rū na nutsiꞌ pangatayan bi maka sabap meꞌ bi pitsayaꞌ ni kabanahan.

Hibrani 10:22

Patapit na kitabi pa Tuhan ni kahilas atay tabi ka ni kabasag pangando tabi niiya. Tatantu tabi na hinasi jaꞌ kitabi meꞌ Tuhan batan lay na sinutsiꞌ atay tabi ka lahaꞌ si Isa. Baran tabi pun, lay na du bay pinandi ka boheꞌ sutsiꞌ. Maka yaꞌ na du luu jawom honaꞌ-honaꞌ tabi ga masi kitabi dusahan pa Tuhan.

Hibrani 10:29

Na bong meꞌ naa bohat pidjalaꞌ ni jama ma bay nuwak saraꞌ, labi na saꞌ bohat pidjalaꞌ ni sagannap ma nikutan Anak Tuhan saula-ula puus boboꞌ sadjaꞌ ya. Sat da saꞌ māꞌ yaꞌ na luu kapansahaliyan lahaꞌ si Isa bay pinaduwai. Padahal, lahaꞌ na ilay bay man da pingkaꞌ sinutsiꞌ sampay muwan kasāhan ni pagsulutan bahau antaraꞌ Tuhan ka manusiyaꞌ. Ga jama meꞌ looy ilay, sibuꞌ du sila ka bay mahinaꞌ Rū Sutsiꞌ ma bay masampayan sila aseꞌ.

Hibrani 2:11

Dari pagka si Isa bay nutsiꞌ atay tabi, tibuuk na kitabi ka iya. Sangkon Mmaꞌ na ina, yana Mmaꞌ tabi na du. Dari ilooy na silay kon si Isa yaꞌ iyaꞌ ngawnan kitabi ga danganakan na.

1 Pitel 1:2

Halloman tabi yaꞌ gi bay lahil pa junyaꞌ, ndang katoonan Tuhan na pitsayaꞌ kitabi ni si Isa bbos-bbos. Dari man gantaan Tuhan, lay na kitabi sinutsiꞌ meꞌ Rū na. Maksud na supaya kitabi ngasip ni si Isa Almasi, maka supaya puwas na dusa tabi sabapan lahaꞌ si Isa bay pinaduwai kalnaꞌ kitabi. Kamura-murahan lipat man lipat na pin kasannangan ningkaam ka barakat man Tuhan.

1 Pitel 1:22

Na pagka lay na du kam mmeꞌ ni tōꞌ sabanna, pasutsiꞌ na pin sina pangatayan bi. Sangkon pakutuun bi na meꞌ bi sikaaseꞌ-kaaseꞌ. Maka subay hilas aseꞌ bi meꞌ karuha jama magdanganakan.

1 Pitel 3:21

Kasalamatan da ilay ni boheꞌ dunuk looy mattoꞌ, tadalil tabi pa boheꞌ man tabi bay pinandi tandaꞌ tabi lay na salamat man hukuman Tuhan. Kitabi ilay bay pinandi, saꞌ ga pandihan man ngalakkahan lumut ni baran tabi. Arapun pandihan tabi ina yana sipat lay na kitabi maku ampun man Tuhan mari hayang na pamiki tabi. Boꞌ kasalamatan tabi itu mawjud na batan lay na pinakallum pabalik si Isa Almasi.

1 Yahiya 2:12

Siga anak ku, suwatan ta kam batan lay na kam inampun meꞌ Tuhan ni mimon dusa bi man sabapan pabuwatan si Isa Almasi.

Siga Pakaradjaan bay Pinalahil 1:5

Maka kamura-murahan binuwanan na pin kam kasannangan ka barakat meꞌ si Isa Almasi, ilooy ma kanaalla masampay kabanahan pasal Tuhan. Iya ilay bay duhuꞌ pinakallum pabalik ka baran ma yaꞌ na kuhi matoy. Maka iya du marintahan mimon panghuluꞌ ni sikaliput junyaꞌ. Ni kaehe aseꞌ na ningkitabi, atas na man lahaꞌ na bay tumpa supaya tapaddusan na kitabi man hisab ni dusa tabi.

Siga Pakaradjaan bay Pinalahil 7:14

Pag tampung ku, “Tuwan, yaꞌ katoonan ku. Kau ya bina toon.” Dari yuk na niyaku, “Inaa na sina ga jama ma bay na lumingkaꞌ njawom kabinsanaan mehe. Labbasakayi sila bay mopoan juba da ka lahaꞌ Bili-bili looy supaya poteꞌ na, hati na, puwas na dusa da.