1 Korin 3:12 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹² Sagannap ma kanaalla buwat ni lumaꞌ looy ilay, sibuꞌ karuha da ka siga tukang buwat lumaꞌ ma makoy kalangkapan numbul satu meꞌ sapantun mmas, pilak porol, ka palmata hagaan. Sugaꞌ sagannap ma yaꞌ kanaalla ina, sibuꞌ karuha da ka siga tukang buwat lumaꞌ ma makoy jaꞌ kalangkapan simpi-simpi meꞌ sapantun baruti niyug atawa bōꞌ ka parang.

1 Korin 3:12 ပူးပေါင်းရင်းမြစ်များ

Salsila siga Rasul 20:30

Minsan ina kaam, luu na du sina mintu kasohean ni baanan bi nabid umanat kabanahan. Bbuwatan da ina mintu moo-moo siga pagkahi bi magsiꞌ. Kainagon da ina mintu, luu na jama taboo-boo da mmeꞌ ni ntan da.

Suwat si Pol pa mman Baanan Sukuꞌ si Isa ndooy ni Rom 16:17

Siga danganakan, junjung ku na ningkaam, iyakin kam ni siga jama ma moo pagsaggaan ni baanan bi sabap meꞌ da nulang kabanahan ma bay tinōꞌ ningkaam. Ilagan bi sila

1 Korin 3:11

Subay katoonan da bong inawnan tehang ma lay na patangge ku, yaꞌ dari ginantian. Batan tehang ma awnan ku ilay siꞌ yana si Isa Almasi.

1 Korin 3:13

Sugaꞌ kinatoonan du sina ni llaw hukuman bong mamooy tukang buwat lumaꞌ bay kanaalla ni pabuwatan bay hinalap ninsila. Batan pabuwatan da ina mintu ibaratan kalangkapan lumaꞌ, mastiꞌ sinuwayan jaꞌ sina ka api bong natas ka niyaꞌ.

2 Korin 2:17

Kahapan, man tabang Tuhan, takaya kami na. Salla na, meka na batnaa yaꞌ kanaalla masaplag umanat Tuhan. Ilooy du puhung da sīn. Boꞌ ningkami itu, yaꞌ baw tapiki kami meꞌ naa. Ilu na Tuhan pakale-kale, tud hilas situ meꞌ kami masaplag. Meꞌ kami itu sosohoan Tuhan sampay tibuuk ka Almasi, mastiꞌ kanaalla sadjaꞌ umanat kami.

2 Korin 4:2

Lay na labbahan kami mimon pabuwatan kaiyaꞌ-iyaꞌ ma subay na pin tinapuk. Dari yaꞌ situ kami ngandupang jama atawa pun nabid isi umanat mahap ma bay hinalap ningkami meꞌ Tuhan. Isu-isu kabanahan pasampay kami. Bong siꞌ ina jama bonto, basta tabista da jaꞌ situ bana bitsala kami. Lagiꞌ na, katoonan Tuhan du sina.

Kolossa 2:8

Iyakin kam taggahaꞌ takawum na baw kam meꞌ jama ma mōꞌ tōꞌ palsu. Batan luu sina jinisan ilmuꞌ pinōꞌ ma mahap pinakale, sugaꞌ yaꞌ luu kapuspusan na. Luu ina mōꞌ tōꞌ lakka man arat kabboꞌ-bboan da, bong saꞌ tōꞌ lakka man jinisan aturan pinabuwat-buwat meꞌ manusiyaꞌ. Tōꞌ da ina saꞌ lakka man Almasi.

1 Timuti 6:3

Iyakin ko, batan kasohean ina jama, sarī tōꞌ da. Tōꞌ da ina yaꞌ magbēꞌ ka tōꞌ ma kasampulnaꞌ lakka man Papuꞌ tabi si Isa Almasi. Maka yaꞌ katabang ni jama ngikut arat-tabiat Tuhan.

2 Timuti 2:20

Na ni kapasal Tuhan ka siga sukuꞌ na, meꞌ tuu situ karuha na: Ni lumaꞌ sawraga, magjinisan manganan na. Kasohean manganan na pilak porol atawa pun mmas bay binaba halliꞌ man motang ni siga llaw mulliya. Kuwan kasohean, yana manganan biyasa, ma binasaanan sadjaꞌ.

2 Timuti 3:13

Batan jama maat ina ka jama pangakka, magsasōng na pin sina mintu kalaatan da. Ngakkahan sila jama, sugaꞌ sila pun inakkahan du.

2 Timuti 3:7

Ga danda meꞌ naa ina, inaa katagihan da pakale ni jinisan tōꞌ bahau. Salla na, yaꞌ sila pandoy nilang mamooy tōꞌ palsu ka mamooy tuwaꞌ.

2 Timuti 4:3

Kon nu ina sohoꞌ ku na masaplag batnaa batan luu sina mintu masa kaekahan manusiyaꞌ yaꞌ na doman pakale ni tōꞌ sabanna. Ilooy du ina mintu katagihan da pinakale, yana tōꞌ ma magbēꞌ ka kainagon da buwat oy-oy kinanapsuhan meꞌ da. Dari bbuwatan da ina mintu miha siga guru ma mōꞌ bitsala ma lassa ni tinga da.

Hibrani 13:9

Sangkon, daa na kam kuhi binoo magsiꞌ ka jinisan tōꞌ ma yaꞌ sikatuwaꞌ ka kabanahan bay hasi bi. Kasohean ina nōꞌ luu lawuk haram. Tōꞌ meꞌ looy ilay yaꞌ du luu paluntungan na ninsila ma mogbog. Batan hāl makanan ina yaꞌ du kasambu ni nyawa tabi. Arapun iya kasambu yana aseꞌ-tabang Tuhan ningkitabi.

1 Pitel 1:7

Kamalasahiyan meꞌ looy ilay nuwayan pangando bi ni si Isa bong bana atawa niyaꞌ. Pangando bi ina meꞌ karuha mmas. Sugaꞌ saehe-ehe hagaꞌ mmas ma luu gi ngkoran na, mas mehe gi hagaꞌ pangando bi. Yana meꞌ mmas subay doꞌ bay pingkaꞌ njawom api man ngalakkahan sakot na mari porol maka hagaan, damikiyan, subay du kam lumingkaꞌ njawom kamalasahiyan mari tumatandaꞌ na porol pangando bi. Dari bong ina mintu bana-bana du pangando bi, mastiꞌ koleꞌ jaꞌ sina kam sanglit ka kabantugan mehe pag beleng si Isa Almasi.

Siga Pakaradjaan bay Pinalahil 2:14

Sugaꞌ luu gi du baw ina man ku kasallahan ningkaam. Kasohean kam nnaa, bbuwatan bi ngikut akka si Balaam mattoꞌ ma bay magpandoyan Sultan Balak bong pooy meꞌ na magsian bangsa Israil. Sabapan palbiatan si Balaam, lay na ga bay taboo-boo siga sukuꞌ Tuhan mangan sumbalian ma bay pingkaꞌ sinongan pa siga tuhan-tuhan, boꞌ lay gi sila taboo-boo magjina.

Siga Pakaradjaan bay Pinalahil 21:18

Kutaꞌ looy siꞌ bay pinabuwat ka palmata jaspel. Kuwan daira looy, labbasakayi lay pinabuwat ka mmas porol banahan, boꞌ tallak meꞌ sammin na.

Siga Pakaradjaan bay Pinalahil 3:18

Sangkon sohoꞌ ta na kam malli niyaku mmas porol ma bay na llakkahan sakot na ka api supaya kam dayahan na ni mata Tuhan. Maka malli na kam pamakoy poteꞌ niyaku mari katambunan na kaiyaan bi nantang. Maka malli na kam niyaku uliꞌ man bi muusan mata bi mari kam ngita.