1 Korin 16:13 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹³ Na katapusan bitsala ku, daa kam kuhi usik man umanat mahap ma kinapitsayaan meꞌ tabi. Iyakin kam mari kam yaꞌ taboo magsiꞌ. Subay kam bahani mōꞌ kabanahan. Maka patagguhun bi iman bi.

1 Korin 16:13 ပူးပေါင်းရင်းမြစ်များ

Matiyu 25:13

“Sangkon,” yuk si Isa, “subay ndang saddiya na kam, batan yaꞌ tatunaꞌ bi bong llaw oy atawa lisag dangoy katakka ku ni sinōng.”

Matiyu 26:41

Daa kam ba tuli, arapun maku na pin kam duwaa pa Tuhan mari yaꞌ tungkas iman bi. Batan san ina njawom atay bi doman kam buwat kahandak Tuhan, yaꞌ baw takaya bi ni dī bi.”

Lukas 21:36

Sangkon, subay kam wā saddiya. Maka maku na pin kam duwaa mari taggu iman bi natasan mimon katiksaan ma bay sabbut ku siꞌ. Maka maku na pin kam duwaa, kamura-murahan yaꞌ du luu meꞌ bi hinaꞌ pag taabut bi ngawpan aku, yana Anak Manusiyaꞌ, bbos-bbos.”

1 Korin 14:20

Siga danganakan, kaam ina ma bay kaladjikian mitsala ni siga pallun ag-agan, sibuꞌ du karuha bi ka anak-anak luu kuli-kulihan na bahau tud kinasengan meꞌ na. Sugaꞌ ddong na kam ngakig pamiki anak-anak. Akigun bi na siga matatoa patong pamiki da. Luu baw beꞌ disu pakaradjaan ma pataꞌ man bi ngantanan pamiki anak-anak dikiꞌ, yana hāl meꞌ da yaꞌ kapiki nulun-nulun kalaatan.

1 Korin 15:58

Sangkon siga danganakan ku, kakasi ku, pahallotun bi pangando bi ni Papuꞌ Isa maka daa kam kuhi pinagsian. Gam pin pakutuun bi meꞌ bi maghulas-sangsāꞌ kalnaꞌ iya. Ndang-ndang katoonan bi na du, yaꞌ du senseng oy-oy pabuwat bi kalnaꞌ iya.

2 Korin 1:24

Kamasaꞌ, yaꞌ du baw tu ga subay na pin kam pastul kami ni hāl pangando bi ni Almasi. Ndang katoonan kami na du hallot na pangando bi niiya. Kami tu, doman jaꞌ nabangan kaam supaya yaꞌ maglumba kagakan bi.

Galatiya 5:1

Na siga danganakan, kon ilay Almasi bay maddusan kitabi man jawom sakup saraꞌ supaya kitabi sumunsayaꞌ na. Sangkon amay-amay daa na kam kuhi pinahata meꞌ saraꞌ pabalik. Takkoan bi na kasumunsayaan bi.

Epesus 3:16

Paku ku duwaa pa Tuhan Sangat Kawasa, kamura-murahan ni kaehe kawasa na ka aseꞌ na, binuwanan du kam leꞌ Rū na gaos mari magsasōng na pin taggu iman bi.

Epesus 6:10

Na katapusan bitsala ku, pabasag kam mangasa ni kawasa Papuꞌ nganggaosan kaam mari taggu iman bi.

Pilipi 1:27

Sugaꞌ san gi oy katuwaꞌ niyaku, inaa puntukan banahan, basta subay pataꞌ jaꞌ kawul-piil bi ka kaam jama ma mmeꞌ ni umanat mahap pasal Almasi. Meꞌ naa ina, luu-yaꞌ ku luu nnaa, taaka ku du sina mintu kaam sama-sama magtuyuꞌ kalnaꞌ Almasi. Maka sibuꞌ-sibuꞌ kam magmaksud maka dambuwaꞌ atay bi nanggehan umanat mahap mari jama pitsayaꞌ ni si Isa.

Pilipi 4:1

Sangkon siga danganakan ku, kakasi ku, kannahun bi bana bay bitsala ku siꞌ mari kam tattog njawman Papuꞌ Isa. Tud ngintom na situ ku ningkaam. Kaam ina yana poonan kagakan ka kabantugan mehe niyaku.

Pilipi 4:13

batan man sabapan Papuꞌ Isa nganggaosan aku, yaꞌ luu saꞌ yaꞌ takaya ku.

Kolossa 1:23

basta kam tattap jaꞌ pitsayaꞌ ni umanat mahap pasal si Isa. Sangkon daa na kam kuhi pinagsian man kabanahan njawom umanat mahap ma bay takale bi. Maka daa kam jamu ngaholat Tuhan numan mimon janjiꞌ na njawom umanat mahap. Umanat mahap ina, liput na junyaꞌ man na pinasaplag. Na ni sagannap ma bay pineneꞌ masaplag, kuwan disu, yana aku na situ.

Kolossa 4:12

Maka luu gi ntuu jama lahat bi du, yana si Epapras, lay du bay nohoꞌ masampay salam duwaa na ningkaam. Iya itu sabana-bana sosohoan si Isa Almasi. Basag ya makuhan kaam duwaa supaya taggu iman bi maka supaya tatantu bi bong oy kahandak Tuhan ningkaam.

Kolossa 4:2

Na kaam sikamimon, maku na pin kam duwaa pa Tuhan. Maka bila kam maku duwaa, jagahan bi niyat atay bi maka muwan kam pagsukuhan pa Tuhan.

1 Tesaloneka 3:8

Dari ko ngawon, lassa sulig dahakka na ga kami pag lay jaꞌ katoonan kami yaꞌ bay kuhi maglumba pangando bi ni Papuꞌ Isa.

1 Tesaloneka 5:6

Batan jama sukuꞌ sangom ina, katanaman da wā tuli atawa maglangohan. Sangkon pagka kitabi siga sukuꞌ llaw, daa na kitabi ngakig sagannap ma meꞌ sapantun wā tuli. Arapun subay kitabi iyakin, wā saddiya buwat kahandak Tuhan. Maka subay kitabi papatong. Kitabi itu meꞌ karuha sundalu njawom bonoꞌ mehe. Tiyap-tiyap sundalu langkap, luu ampi bassi na para dakan na ka saruk bassi para kōk na mari ya yaꞌ binasa. Kuwan kitabi baw itu, ilooy ya tabilang ampi dakan tabi, yana pangando tabi pa Tuhan ka aseꞌ tabi niiya. Maka saruk bassi tabi yana holat tabi pa Tuhan majatu kasalamatan tabi.

2 Tesaloneka 2:15

Sangkon, siga danganakan, daa labbahan bi pangando bi. Maka kuwangkutan bi na siga tōꞌ ma bay pinasampay meꞌ kami ningkaam, labba man ilooy ma bay halling kami ningkaam balharapan sampay ni jawom suwat kami.

1 Timuti 6:12

Pagbuli-bulihan nu matangge kabanahan pasal Papuꞌ Isa san du pooy basag jama nulang kau. Meꞌ kau ina lay na lliyun pa jawom okoman Tuhan, kuwangkutan nu na kasampulnaan nyawa ma yaꞌ luu katapusan na. Awnan ku ilay siꞌ kasampulnaan nyawa ma bay takoleꞌ nu jaman nu bay māꞌ ni awpan baanan jama mmeꞌ na ko ni si Isa.

2 Timuti 2:1

Na Timuti, anak, mangasa jaꞌ ko ni aseꞌ-tabang si Isa Almasi nganggaosan kau.

2 Timuti 4:5

Na kuwan kau Timuti, subay ko wā ngagak dī nu ni mimon kahalan nu. Bong ko tumabbaꞌ njawom kamalasahiyan kalnaꞌ Papuꞌ, tatasan nu jaꞌ. Pagbuli-bulihan nu masaplag umanat mahap pasal si Isa. Pajatuhun na mimon ma bay hinalap meꞌ Tuhan ningkau.

2 Timuti 4:7

Sugaꞌ san situ ku matoy na, ndang-ndang lay na du ku bay magtuyuꞌ matangge kabanahan san du pooy meꞌ bay naggaꞌ aku. Ibaratan sundalu ni bonoꞌ mehe, lay na du pupusan ku basag ku ngatu. Ibaratan jama maglumbaꞌ sonse, lay na pulan ku basag ku sampay lay na taabut ku tōng lumbaan. Tud lay na silay bogbogan ku kabanahan ma kinapitsayaan meꞌ tabi.

1 Pitel 4:7

Na katapusan junyaꞌ ina, yaꞌ na hallom. Sangkon paayarun bi na pamiki bi maka ilagan bi dī bi supaya yaꞌ na luu kasanggalang ningkaam maku duwaa pa Tuhan.

1 Pitel 5:8

Iyakin kam maka papatong kam mamiki sabap Ibilis ina, yana banta bi, doman jaꞌ nasat supaya kam patatak man si Isa. Sibuꞌ du sina karuha Ibilis ka halimaw ngallong, parampong-parampong miha sabbatan na.

Siga Pakaradjaan bay Pinalahil 16:15

Na siga sultan looy siꞌ, lay du takoleꞌ meꞌ siga seytan looy inoyo-oyohan sampay lay na binoo ddas ka ga sundalu da pa lahat inawnan Armageddon ni pallun Hibrani. Pag-anu siꞌ, takale ku na baw suwara Papuꞌ Isa, yuk na, “Indanan bi. Ni katakka ku ina mintu, kakuratan sina manusiyaꞌ meꞌ karuha jama kakuratan meꞌ sugaru. Sugaꞌ njawom supaat sina soysoy ma ngilagan dī na ka saddiya ni katakka ku. Sibuꞌ du sina mintu karuha na ka jama ndang lay na mamakoy, saddiya ni katakka bōs na. Yaꞌ sina ya mintu meꞌ karuha jama kaiyaꞌ-iyaan taabut nantang.”