1 Korin 14:20 - Sabahagiꞌ Kitab Tawrat: Panagnaan ni Awwal Jaman maka Kitab Injil

²⁰ Siga danganakan, kaam ina ma bay kaladjikian mitsala ni siga pallun ag-agan, sibuꞌ du karuha bi ka anak-anak luu kuli-kulihan na bahau tud kinasengan meꞌ na. Sugaꞌ ddong na kam ngakig pamiki anak-anak. Akigun bi na siga matatoa patong pamiki da. Luu baw beꞌ disu pakaradjaan ma pataꞌ man bi ngantanan pamiki anak-anak dikiꞌ, yana hāl meꞌ da yaꞌ kapiki nulun-nulun kalaatan.

1 Korin 14:20 ပူးပေါင်းရင်းမြစ်များ

Matiyu 11:25

Pus si Isa halling meꞌ looy, yuk na na baw pa Tuhan, “Maꞌ, meꞌ kau Papuꞌ mimon-mimon taꞌ gumi sampay taꞌ langit, magsuku ku ningkau. Batan kabanahan ma bay limbuhan nu ni siga jama ma milang dī da halul-akka ka lawom pangahati, palahil nu na ni jama ma kuhi tinoan meꞌ karuha anak-anak.

Matiyu 18:3

Pag-anu, yuk na, “Ddong na kam ba ngulihal meꞌ bi patingkat. Baan ta kam banahan, bong ina yaꞌ halin bi pamiki bi supaya diyoꞌ pangatayan bi meꞌ karuha anak-anak tuu, malaingkan yaꞌ kam kapatabeꞌ ni pamarinta Tuhan.

Matiyu 19:14

Pag ndaꞌ si Isa meꞌ looy, yuk na ni ga mulit na, “Pabiyahun bi na ba pitu siga anak-anak naa pa mman ku. Daa na saggongun bi, batan pamarinta Tuhan ina ndang para ni jama diyoꞌ pangatayan meꞌ karuha ga anak-anak naa.”

Matiyu 19:4

Tampung si Isa ninsila, “Ongoy, yaꞌ kam kina bay matsa jawom kitab jaman Tuhan bay mapayak manusiyaꞌ? Lay silay ya buwat disu lalla ka disu danda.

Malkus 10:15

Baan ta kam banahan, bong ina pangando jama pa Tuhan saꞌ meꞌ karuha pangando anak-anak ni induꞌ-mmaꞌ na, malaingkan yaꞌ ya kapatabeꞌ ni pamarinta Tuhan.”

Lukas 18:17

Baan ta kam banahan, bong ina jama yaꞌ mangando pa Tuhan meꞌ karuha pangando anak-anak ni induꞌ-mmaꞌ na, malaingkan yaꞌ ya kapatabeꞌ ni pamarinta Tuhan.”

Suwat si Pol pa mman Baanan Sukuꞌ si Isa ndooy ni Rom 1:13

Siga danganakan, daa kam mista siga noy batnaa na bohoꞌ ku bay kapiki pilu pa mman bi. Min meka na ku situ bay maru pilu. Sugaꞌ ngabut sampay batnaa, yaꞌ gi ku bay tabawus batan luu na pin jinisan kasanggalang niyaku. Kainagon ku bong ku mintu takka pilu, luu gi nnaa jama taboo ku mmeꞌ ni si Isa meꞌ karuha ni kalahat-lahatan kasohean.

Suwat si Pol pa mman Baanan Sukuꞌ si Isa ndooy ni Rom 16:19

Boꞌ kaam ina, kinatoonan na meꞌ sikamimon kanaalla kam mmeꞌ ni kahandak Papuꞌ Isa. Sangkon tud gāk ku ningkaam. Sugaꞌ doman na pin baw ku maintoman kaam supaya tiggo kam buwat kaayaran maka supaya yaꞌ luu kabigiꞌ-bigian bi ni kalaatan.

1 Korin 13:11

Batan meꞌ tuu karuha na: Bay jaman tabi ina anak-anak, bitsala tabi ka pamiki tabi meꞌ ni anak-anak du. Maka akka tabi pun, akka anak-anak du. Sugaꞌ pag lay jaꞌ sangkad ehe tabi, lay na labbahan tabi bay akka tabi jaman tabi anak-anak.

1 Korin 14:19

Sugaꞌ bong baw sasang ku njawom baanan siga jamaa, gam na ku makoy san lasa lima kabtang jaꞌ ma tahati mari pasōng pangahati jama man ku nnaa mōꞌ sapū libu kabtang ni pallun ma yaꞌ tahati. Boꞌ kaam baw ina, ilooy ya ladjikiꞌ patingkat ningkaam yana mitsala ni siga pallun ag-agan.

1 Korin 2:6

Na kami tu, saꞌ baw ga yaꞌ na kami mōꞌ tōꞌ lawom. Batan tuktuk kami noan sagannap ma taggu iman da, mastiꞌ mōꞌ du kami. Sugaꞌ tōꞌ lawom ma pinasampay meꞌ kami saꞌ ga tōꞌ ma hagaan ni jama ma yaꞌ pitsayaꞌ ni si Isa. Maka saꞌ du tōꞌ ma hagaan ni siga pa-mmean ni junyaꞌ ma yaꞌ ngisbat Tuhan, yana sagannap ma yaꞌ luu kasongan da.

Epesus 4:13

Pag toklas na, dambuwaꞌ atay na kitabi mmeꞌ ni umanat mahap. Maka pasōng na pin meꞌ tabi toon Almasi, yana Anak Tuhan. Dari song hallom, sukup iman na tabi ngabut sampay sumibuꞌ na du arat-tabiat tabi ka Almasi.

Pilipi 1:9

Aku tu makuhan kaam na pin duwaa, kamura-murahan magsasōng na pin aseꞌ bi pa Tuhan sampay pa mimon manusiyaꞌ. Maka kamura-murahan pasōng na pin pangahati bi ka bistuhan bi

Pilipi 3:15

Sangkon kaam ma taggu na iman bi, sapatut na dambuwaꞌ pamiki na kam ka aku ni hāl angan-angan tabi. Sugaꞌ bong luu nnaa kasohean yaꞌ numan ni pamiki da bay bitsala ku siꞌ, bbos-bbos pinalahil du sina meꞌ Tuhan kabanahan ningkaam.

1 Pitel 2:2

Pagka lay na takissa bi kaayaran Tuhan, kannahun bi na palman na. Yana meꞌ anak-anak bahau pinamaddihan magkainagon ni boheꞌ duruꞌ, kaam pun subay du meꞌ naa kainagon bi ni palman Tuhan. Batan palman Tuhan ina balanjaꞌ pulnaꞌ para ni nyawa bi. Sangkon kannahun bi na supaya magsasōng na pin meꞌ bi ngikut arat-tabiat Tuhan ngabut sampay magjatu na kasalamatan bi.

2 Pitel 3:18

Katapusan bitsala ku: Duhunan bi na pin meꞌ bi ngikut arat-tabiat Papuꞌ tabi si Isa Almasi, yana tukang nalamat kitabi. Maka mangasa na pin kam ni aseꞌ-tabang na ningkaam. Songan bi lagi meꞌ bi lungbid ka iya. Kamura-murahan pinudji na pin ya labba man batnaa sampay saumu-umu! Amin. Wassalam