1 Korin 12:12 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹² Na san yaꞌ sibuꞌ-sibuꞌ ladjikiꞌ bay ndean kitabi, masi du sina kitabi tibuuk. Mamintang kam ni baran jama. Tiyap-tiyap disu baran, san meka kalangkapan na, disu baran du ya masi. Damikiyan, kitabi pun itu, san kitabi meka, binilang disu baran du, batan ginalla kitabi baran Almasi.

1 Korin 12:12 ပူးပေါင်းရင်းမြစ်များ

1 Korin 10:17

Na pagka saliꞌ-saliꞌ kitabi mangan tinapay looy dambatang, hati na, san kitabi meka, ingat tabi dī tabi disu baran du.

1 Korin 12:20

sabap tiyap-tiyap ina disu baran, meka jaꞌ jinisan kalangkapan na.

1 Korin 12:27

Na hantak bitsala ku siꞌ, mimon kitabi ma pitsayaꞌ ni Almasi binilang disu baran, yana baran Almasi. Maka saliꞌ-saliꞌ kitabi binilang kalangkapan ni baran na.

1 Korin 12:7

Kitabi itu saliꞌ-saliꞌ binuwanan ladjikiꞌ meꞌ Rū Sutsiꞌ pa kaayaran ni sikamimon pagkahi tabi.

Galatiya 3:16

Meꞌ naa du sina karuha bay pagsulutan Tuhan ka Nabi Ibrahim. Yaꞌ du dari sinampunan atawa kinulangan. Hati na, janjiꞌ Tuhan ni pagsulutan da ka Nabi Ibrahim yaꞌ du tasampunan ka saraꞌ Nabi Musa ma bay pasunuꞌ paddus mpat hatus tallumpūꞌ taun. Na bong ina lay na baw sinampunan ka saraꞌ, malaingkan yaꞌ na sā pagsulutan Tuhan ka Nabi Ibrahim. Na njawom janjiꞌ Tuhan ni Nabi Ibrahim, yuk na, “Bbos-bbos mimon kabangsa-bangsahan sinupaatan man sabapan panubuꞌ nu.” Na jaman Tuhan ilay bay halling, “man sabapan panubuꞌ nu,” saꞌ silay ga panubuꞌ Nabi Ibrahim ma meka bay awnan Tuhan, arapun tuwaꞌ pa disu du panubuꞌ na, yana Almasi.

Epesus 1:23

yana kitabi ma binilang baran na. Baran na ina, ginaosan leꞌ na malahil mimon arat-tabiat na, batan iya nganggaosan mimon-mimon nnoy-nnoy jaꞌ.

Epesus 4:12

Sila ilay bay binuwanan ladjikiꞌ meꞌ looy man da malangkapan siga sukuꞌ Tuhan majatu oy-oy sinukuꞌ meꞌ Tuhan ninsila, maka supaya pasōng na pin hāp sambuhan nyawa sikamimon ma binilang baran Almasi.

Epesus 4:4

Batan mimon itu kitabi ma tibuuk ka si Isa binilang disu baran sa. Maka disu du Rū magmundaan kitabi saliꞌ-saliꞌ, yana Rū Sutsiꞌ. Maka sibuꞌ du kasongan ayad hinolat meꞌ tabi sabap meꞌ tabi saliꞌ-saliꞌ lay na lliyun pa jawom okoman Tuhan.

Epesus 5:23

Batan lla bi ina yana takōk bi meꞌ karuha Almasi yana takōk mimon kitabi ma pitsayaꞌ niiya, ma binilang baran na. Boꞌ iya ina, saꞌ sina ya sat takōk tabi, arapun tukang nalamat kitabi lagi. Sangkon, yana meꞌ kitabi ma pitsayaꞌ niiya maglillaꞌ jaꞌ niiya, damikiyan kaam pun siga karandahan, subay du maglillaꞌ ni lla bi.

Epesus 5:30

sabap kitabi itu yana siga kalangkapan baran na.

Kolossa 1:18

Iya ina pa-mmean tabi sikamimon ma pitsayaꞌ niiya. Dari iya takōk tabi maka kitabi binilang baran na. Iya ina yana poonan kaallum tabi bahau. Maka iya bay duhuꞌ pinakallum pabalik ddas ka baran ma yaꞌ na kuhi matoy. Kon na meꞌ looy supaya tumatandaꞌ iya patingkat man mimon-mimon.

Kolossa 1:24

Na san ku tu batnaa tiksaꞌ sabap meꞌ ku wā masaplag, yaꞌ du tu lungay kagakan ku. Kon meꞌ looy batan lay jaꞌ du bay pa kaayaran ningkaam. San pun Almasi, bay du lumingkaꞌ njawom jinisan kamalasahiyan kalnaꞌ siga sukuꞌ na. Pag batnaa, aku na baw pagantiꞌ niiya ngissahan kamalasahiyan kalnaꞌ sagannap ma pitsayaꞌ niiya, yana kitabi ma binilang baran na.

Kolossa 2:19

Ga jama meꞌ looy ilay yaꞌ na ngantanan tōꞌ Almasi. Padahal Almasi ina, yana takōk ningkitabi ma binilang baran na. Iya sina poonan man mimon kalangkapan baran na koleꞌ oy-oy gunahan ninsila. Dari tiyap-tiyap ina baran langkit ka kōk na, tibuuk jaꞌ sina sikamimon. Mimon kalangkapan na sama-sama usik. Boꞌ magsasōng na pin meꞌ da sampulnaꞌ magbēꞌ ka gantaan Tuhan.

Kolossa 3:15

Tuhan ina bay ngaliyun kitabi supaya kitabi tibuuk pa disu baran sa njawman Almasi maka supaya kitabi wā njawom kasalassayan. Sangkon daa kam buwat oy maka oy na ma kalangkat ni kasalassayan ma lakka man Almasi. Maka subay kam tattap magsuku pa Tuhan.