RUF 2:12 - WƖA TENIŊ

¹² La TƖƖNA jaŋ timiŋ a tɩŋ wɩalɩŋ kala ŋ sɩ ŋaa lɛ. A leŋ dɩ La TƖƖNA, Iziral tɩŋŋaa Wɩa teeŋ ŋ sɩ kɔ dɩ ʋ pɔŋ, faasa timiŋ yʋgɛ.”

RUF 2:12 ပူးပေါင်းရင်းမြစ်များ

WƖA YƖƖLAA 17:8

Pɔmɛ arɩ ŋ sɩ jaŋ pɔ ŋ tɩtɩa sɩɩ-biiŋ ŋɩɩ. Kɛmmɛ faa ŋ kɩŋkɛnsɩŋ bʋbʋɔŋ.

WƖA YƖƖLAA 19:11

Ba lɛ nɛ ŋ to a kpʋrɩsɛ mɩ-na ŋ tɩntɩnna dɩgɩlaa. Mɩ sɩ sɛɩba, ŋ timmi a yʋgɛ nɛ woruŋ.

WƖA YƖƖLAA 36:7

Ŋ chono-la sɩ bɩ dɛrɛ bɩ magɩa kɛnɛ. Nɩbalaa arɩ nɩbiisiŋ kala hɛ ŋ kɩŋkɛnsɩŋ bʋbʋɔŋ nɛ, ŋ chu tɔba.

WƖA YƖƖLAA 57:1

Fá mɩ nenige, Wɩa, fá mɩ nenige mɩ kʋ yuoruŋ nɛ. Mɩ jʋʋ ŋ kɩŋkɛŋɛ nɛ dɩ ŋ tɔ hɛ mɩ lɛ, dɩ wʋlɔrʋŋ deeŋ bal.

WƖA YƖƖLAA 58:11

Ŋɩɩ nɛ nɩaa jaŋ bʋl, “Tʋɔpʋl tɩŋŋaa sɛnɛ haa laa time nɛ. Wɩa sɛnɛ hɛ nɩmɛ nɛ a didii dʋnɩa nɩaa sarɩya.”

WƖA YƖƖLAA 61:4

Leŋ dɩ mɩ hɛ ŋ dɩa lɛ mɩ mɩɩsɩŋ kala lɛ, dɩ ŋ kɛŋ ŋ kɩŋkɛnsɩŋ chu tɔmɛ.

WƖA YƖƖLAA 63:7

Ŋ sɩɩ pɛ mɩ lɛ wɩaa, mɩ hɛ ŋ kɩŋkɛnsɩŋ bʋbʋɔŋ nɛ aŋ yɩyɩɩ tʋɔtɔrɛ yɩɩlaa.

WƖA YƖƖLAA 91:4

Ʋ jaŋ chu tɔŋ, dɩ wɩɩ sɩ́ŋ jʋʋ. Ʋ wʋtɩtɩɩ jaŋ nagɛ hɔɔ-taala-la laalɩyuoroo sɩ kaa kɛrɛɛ laa bayuori hɛŋŋɛɛ, koo a nagɛ jebiiŋ ba sɩ saa kɛrɛ taŋ a tɔ hɛ ŋ lɛ.

NAMAGABA 11:18

Nɩbɔŋŋɔɔ time bɩ kʋtɩtɩɩ ŋaa, ama nɩalɩŋ sɩɩ ŋaa tʋɔpʋl wɩaa nɛ jaŋ laa kʋtɩtɩɩba.

NAMAGABA 23:18

Dɩ ŋ nɛ ŋaa ŋɩɩ, ʋ kɛŋ maachie nɛ, ŋ yɩɛlaa bɩ jaŋ ŋaa pɛɩ.

JƐRƖMAAYA 31:16

Wɩɩ-la La TƖƖNA sɩ bʋla nɛ ŋ-la: “Má leŋ yele, aŋ fɩɩsɛ ma sɩlɩɩrɩŋ ta, bɛɛ wɩaa mɩ jaŋ tiŋ ma lɔlʋŋ chɩmɩŋ. Mɩ-na ma TƖƖNA nɛ bʋla. Ba jaŋ lɩɩ ba dʋndɔŋŋɔɔ tinteeŋ a mɩɩra kɔ.

Matiu 23:37

Ma Jerusalɛm nɩaa, ma kpʋ Wɩa wʋlaabʋllaa nɛ, a joŋ tabɩaa yagɛ tɩndaara-la Wɩa sɩ tɩma dɩ ba kɔ ma teeŋ. Naansɩɩŋ yʋga nɛ mɩ fa cho dɩ mɩ chu tɔ ma nɩaa kala arɩ jimiŋ sɩ yie chu tɔ ʋ biiriŋ ŋɩɩ, ka ma bɩ sɛyɛ.

Matiu 5:12

Má leŋ dɩ ma tʋɔŋ tɔrɛ dɩ ma jʋjʋɔsɛ, bɛɛ wɩaa ma time jaŋ yʋgɛ Wɩa-jaŋ lɛ. Ba sɩ to ma naasɩŋ dʋdɔgɩsɛma ŋɩɩ, ŋɩɩ tɩtɩa nɛ ba fa dɔgɩsɛ Wɩa wʋlaabʋllaa ma.

Matiu 6:1

Yesu bɩra dagɛ ʋ harɩ-tooroo a bʋl, “Dɩ ŋ nɩɩ chɛ dɩ ŋ ŋaa wʋzɔŋ a pɩ ŋ dɔŋɔ tɩɩna, sɩ́ wʋzɔŋ-la joŋo ŋaa ʋ lɛ nɩaa tʋɔŋ. Dɩ ŋ nɛ ŋaa ŋɩɩ, ŋ bɩ time kɛnɛ ŋ Nyɩmma sɩ hɛ Wɩa-jaŋ lɛ teeŋ.

Luuk 6:35

Ama wɩalɩŋ mɩ sɩɩ chɛ dɩ ma ŋaa nɛ ŋ-la: Má cho ma dʋndɔŋŋɔɔ a ŋɩŋaa wʋzɔŋŋɔɔ ba lɛ, a joŋ kɩaa chɩmba aŋ sɩ́ gbɛrɛ dɩ ba timma. Dɩ ma nɛ ŋaa ŋɩɩ, Wɩa jaŋ leŋ dɩ ma ŋaa ʋ-na Wɩɩ-balɩŋ biiriŋ, dɩ ʋ joŋ kʋbalbal timma. Wɩa yie pɛ nɩbɔŋŋɔɔ arɩ nɩalɩŋ ma kala sɩ kɛŋ sɩɩŋ lɛ nɛ.

Koloosi Nɩaa 2:18

Má sɩ́ leŋe dɩ nʋʋkala joŋ cheeriŋ pɩma, nɩalɩŋ sɩ bɩɩna arɩ ba ŋaa nɩbala nɛ a tɩŋ ba sɩɩ na wɩaa a nagɛ duosoo tʋɔŋ a pɛsɛ ma lɛ dɩ ma kɛŋ ma tɩtɩa a muuri, a chʋchʋɔlɛ Wɩa tɩndaaraa. Ba bɩ wɩɩkala kɛnɛ sɩ maga dɩ ba bibigisi ba tɩtɩa lɛ. Ba yie ŋaa ŋɩɩ a tɩŋ ba sɩ yie bɩɩnɛ ba yaraa wɩaa nɛ.

2 Timoti 1:18

Wɩa jaŋ leŋ dɩ La Tɩɩna Kirisito fá ʋ nenige sarɩya chɛ-diiliŋ. Ŋ ma jɩŋ ŋɩɩ ʋ sɩ faasa pɛ mɩ lɛ nɛ bʋa-la lɛ mɩ fa sɩ hɛ Ɛfɛsɩs lɛ.

2 Timoti 4:8

Lɛɛlɛ, La Tɩɩna Yesu sɩ ŋaa sarɩya diiru-la sɩ kɛŋ wʋtɩtɩɩ, ʋ ŋaa tʋɔpʋl kuoru nyunchuulo nɛ a bil dɩ ʋ joŋo siilimi, tapʋlɩɩ-la ʋ sɩ jaŋ mɩɩra kɔ. Mɩ dʋndʋŋa dee ʋ jaŋ ŋaa ŋɩɩ pa, ama nɩalɩŋ kala sɩ chou a gbɛrʋ dɩ ʋ mɩɩra kɔ, ba ma jaŋ laa ba siilee.

Hiburu TƖŊŊAA 11:26

Mosis kɛŋ ʋ tɩtɩa hɛ dɔŋɔ dɩ ʋ dii hɩɩsɩŋ nɛ a tɩŋ Kirisito wɩaa, Nɩɩ-la Wɩa sɩ lɩɩsa. Ʋ jɩma arɩ hɩɩsɩ-la ʋ sɩ jaŋ dii a tɩŋ ʋ wɩaa time nɛ yʋga a kɩɩ kʋzɔmɔ-la kala ʋ sɩ jaŋ na Ijipiti tinteeŋ lɛ. Ʋ ŋaa siri dɩ ʋ laa time-la Wɩa sɩ jaŋ joŋo pʋ maachie nɛ.

Hiburu TƖŊŊAA 11:6

Dɩ nʋʋ nɛ bɩ Wɩa laa dii, ʋ bɩ jaŋ wuo ŋaa wɩɩkala dɩ Wɩa tʋɔŋ tɔrɛ. Nɩɩ-la kala sɩɩ chɛ dɩ ʋ kɔ Wɩa teeŋ, ʋ maga dɩ ʋ laa sɩpaaŋ laa dii arɩ Wɩa hɛ nɩmɛ nɛ, a bɩra laa dii arɩ nɩɩ-la kala sɩ bee chɩchɛ Wɩa, ʋ tɩɩna jaŋ laa ʋ time Wɩa teeŋ.

Hiburu TƖŊŊAA 6:10

Wɩa kɛŋ wʋtɩtɩɩ, ʋ bɩ jaŋ yʋ tɩntɩmɩɩ-la ma sɩ tɩma pʋ arɩ chono-la ma sɩ daga pʋ a pɛ ʋ nɩaa lɛ aŋ ha pɩpɛ ba lɛ.

RUF 1:16

Ama Ruf ma sɩ, “Sɩ́ mɩ kiru ŋ harɩŋ. Lee-la kala ŋ sɩɩ mʋ, mɩ ma jaŋ mʋ, lee-la kala ŋ sɩ jaŋ hɛ, mɩ ma jaŋ hɛ nɩmɛ. Ŋ nɩaa jaŋ ŋaa mɩ nɩaa, dɩ ŋ Wɩa ma ŋaa mɩ Wɩa.

RUF 2:11

Ŋɩɩ nɛ Bʋas bɩra bʋla pʋ, “Mɩ nɩɩ wɩalɩŋ kala ŋ sɩ ŋaa pɩ ŋ bala naaŋ nɛ, ŋ bala sʋʋŋ harɩŋ. Mɩ nɩɩ ŋɩɩ ŋ sɩ leŋ ŋ nyɩmma arɩ ŋ naaŋ arɩ ŋ jaŋ aŋ kɔ dɩ ŋ hɛ nɩaa teeŋ ŋ ha sɩ bɩ jɩŋ.

RUF 2:13

Ŋɩɩ nɛ Ruf bʋl, “Mɩ nɩhɩaŋ, ŋ zilmi kɩŋkɛŋ nɛ a leŋ mɩ yaraa faasa fɩɛlɛ, a tɩŋ ŋ sɩ fɩɛla bʋl wɩaa mɩ teeŋ. Mɩ paala bɩ mɩ tɩtɩa wuo kaa magɩsɛ ŋ tɩntɩnnɩ-haala-la kʋbala ma.”

RUF 4:15

Ŋ bii-haala choŋ nɛ, ʋ paala kɩɩ hambolibiisiŋ balɩpɛ. Lɛɛlɛ ʋ lʋl nihiŋ sɩ jaŋ leŋ dɩ wɩaa bɩra zɔmɔ pɩŋ nɛ ŋ mɩɩsɩŋ lɛ, dɩ ŋ nɛ kʋ hɩɛsɛ ma ʋ jaŋ bibeniŋ.”

1 SAMƲƐL 24:19

Dɩ nʋʋ nɛ na ʋ dʋndɔmɔ, ʋ jaŋ leŋu ta dɩ ʋ mʋ pɛɩ? La Tɩɩna jaŋ timiŋ woruŋ a tɩŋ wʋzɔŋ-la ŋ sɩ ŋaa mɩ lɛ jɩnɩŋ.

1 SAMƲƐL 24:20

Mɩ chaasa jɩŋ arɩ ŋ jaŋ dii kuoruŋ Iziral tinteeŋ lɛ, dɩ tintee-la wɩɩkala chɩŋ woruŋ ŋ nɩsɩŋ lɛ.