NƐHƖMAAYA 4:2 - WƖA TENIŊ

² a bʋl ʋ dɩ nɩalɩŋ sɩɩ tɩŋ arɩ Samarɩa laalɩyuori hɩasɩŋ sɩpaaŋ, “Bɛɛ kɩaa wɩaa nɛ Juu tɩŋŋaa nɩpʋgʋnʋŋ deemba ŋɩŋaa ŋɩɩ? Ba jaŋ wuo wasa saa ba jebii-la a kpʋ pʋsʋŋ a ŋaa Wɩɩ-sʋlaa? Ba bɩɩna ba jaŋ wuo saaʋ dɛrɛ tapʋl bala koo? Ba bɩɩna ba jaŋ wuo kuusi tabɩa-la arɩ nyiniŋ sɩ diiba ma kala koo?”

NƐHƖMAAYA 4:2 ပူးပေါင်းရင်းမြစ်များ

ƐZƖRA 4:4

Ŋɩɩ nɛ nɩalɩŋ sɩ hɔnɔ golliba ŋɩŋaa wɩaa dɩ Juda nɩaa nandaasɩŋ yʋɔrɛ, dɩ fawʋllʋŋ kɛmba dɩ ba sɩ wuo saa dɩa-la.

NƐHƖMAAYA 12:27

Bʋa-la ba sɩɩ chɛ dɩ ba joŋ Jerusalɛm jebii-la a hɛ La TƖƖNA nɩsɩŋ lɛ, ba yɩrɛ Levi doho nɩaa ba lɩɩ Juda sɛmɛ na-kala nɛ dɩ ba kʋ gbieli arɩ tʋɔtɔrʋŋ a yɩɩ yɩɩlaa a chɩgɩsɛ buguloo, a du chenniŋ arɩ kɔnɛba a dɛnnɛ La TƖƖNA.

NƐHƖMAAYA 12:43

Tapʋlɩɩ-la ba kpʋ kɩaa yʋgɛ nɛ woruŋ a ŋaa Wɩɩsʋlʋŋ, aŋ jʋjʋɔsɛ, bɛɛ wɩaa Wɩa leŋe ba tʋɔŋ faasa tɔrɛ nɛ. Haalaa arɩ hambiisiŋ kala nɛ faa jʋɔsʋ. Dɩ ŋ nɛ paala hɛ dɩ-bolii ma, ŋ jaŋ wuo nɩɩ nɩaa sɩ jʋɔsa a ŋɩŋaa goŋ Jerusalɛm lɛ.

NƐHƖMAAYA 4:10

Ama Juda nɩaa sɩ, “Tɩntɩnnaa doluŋ kala dɛrɛ nɛ, ka tabɩaa arɩ tɩɛrɩŋ ma daŋ dɔŋɔ lɛ yʋgɛ. Ŋɩɩ leŋ la bɩ jaŋ wuo wasa paa jebii-la saa.”

NƐHƖMAAYA 6:15

Jee-la saanɩŋ dɛrɛ chɛnɛ-la ba sɩɩ yɩrɛ Ɛlʋl tʋɔŋ nɛ, ʋ tapʋlaa mara arɩ banɔŋ chɛɛŋ. Tapʋlaa mahɩŋ balɩa arɩ fii arɩ balɩa nɛ ba joŋo saa jee-la.

WƖA YƖƖLAA 83:4

Ba sɩ, “Má kɔ, má leŋ dɩ la chei ba tintee-la, dɩ Iziral tɩŋŋaa yɩrɩŋ bɩra sɩ́ yɩrʋ.”

JƐRƖMAAYA 26:18

“Mɩka sɩ lɩɩ taŋ-la ba sɩɩ yɩrɛ Mɔrɛsɛf fa bʋl wɩaa Wɩa doluŋ lɛ nɛ bʋa-la lɛ Hezikaaya sɩ ŋaa Juda tinteeŋ kuoro. Ʋ fa bʋla pɩ Juda nɩaa kala: Wɩɩ-la La TƖƖNA doluŋ kala Tɩɩna sɩ bʋla nɛ ŋ-la, ‘Ba jaŋ pɛrɛ Zaayɔŋ a nagɛ baga. Jerusalɛm jaŋ pɩŋ jikpeeŋ a nagɛ pupuluŋ. Wɩa dɩɩ-bal-la sɩ chɩŋ dundolo-la nyuŋ jaŋ lugi a nagɛ duuŋ.’

JƐRƖMAAYA 33:24

“Ŋ bɩ nɩa arɩ nɩaa ka bʋl arɩ mɩ vɩa kuori gentisiŋ deemba balɩa mɩ sɩ lɩɩsa ta nɛɛ? Ŋɩɩ wɩaa ba sɩɩŋ bɩ mɩ nɩaa ka su, a bɩra bɩ bene arɩ ba ŋaa tintee ma.

DANƖƐL 9:25

Jɩŋ wɩɩŋ deeŋ sɩaa woruŋ: A chɩŋ bʋa-la lɛ ba sɩ pa wombiiŋ dɩ ba paa Jerusalɛm wasa saa, a kaa kɔ bʋa-la lɛ Wɩa sɩ jaŋ lɩɩsɛ sɩpaalaarʋ-la dɩ ʋ kɔ, jaŋ ŋaa yɔɔsʋŋ balɩpɛ sɩ bala lɛ. Ba sɩ jaŋ bɩra bil wombiee ma a lu bʋɔsʋŋ ma a kaa pɔ ba tɩtɩa Jerusalɛm lɛ jaŋ ŋaa jɩsɩŋ zɔɔ-banɛsɛ arɩ mahɩŋ banɛsɛ arɩ batori lɛ. Ama bʋa deeŋ lɛ wʋjʋʋlaa jaŋ hɛ nɩmɛ.

HABAKU 3:2

La TƖƖNA, mɩ nɩɩ ŋ yɩrɩŋ wɩaa nɛ. La TƖƖNA, ŋ wʋŋaalaa kperimi nɛ. Bɩra wasa ŋaa wɩalɩŋ la ma mɩɩsɩŋ bʋa lɛ, dɩ la jɩmba. Dɩ ŋ nɛ na baanɩŋ ma, fá la nenige.

ZƐKARƖYA 12:8

Tapʋlɩɩ-la, mɩ-na ma TƖƖNA jaŋ chu tɔ nɩalɩŋ sɩ hɛ Jerusalɛm lɛ, dɩ ba tʋɔŋ nɩɩ-la sɩ paala pʋgʋsɛ kɛŋ doluŋ a nagɛ kuoro Devit, dɩ Devit doho nɩaa ma nagɛ mɩ-na Wɩa, a nagɛ mɩ-na ba TƖƖNA tɩndaarʋ-la sɩ laa ba sɩpaaŋ.

ZƐKARƖYA 4:10

Má sɩ́ bee gʋʋnɛ wɩaa dɩ-suomuŋ sɩ muuro. Nɩaa tʋɔŋ jaŋ tɔrɛ dɩ ba nɛ na Zerubabɛl kori dɩɩsaarɩ-ŋmɛnɩŋ. Chaaŋ ŋmɛsɩ-la balɩpɛ nɛ ŋaa mɩ-na Wɩa sɩaa mɩ kaa bibeŋ dʋnɩa kala.”

1 Kɔrɩntɩ Nɩaa 1:27

Wɩa paala chaasa lɩɩsɛ nɩalɩŋ dʋnɩa nɩaa sɩ sɩ ba ŋaa nɩyaara nɛ, dɩ ʋ wuo hɛ dʋnɩa nɩaa wʋjɩnnaa hɩɩsɩŋ lɛ. Wɩa bɩra lɩɩsɛ nɩalɩŋ ma dʋnɩa nɩaa sɩ sɩ ba ŋaa nɩpʋgʋnʋŋ nɛ, dɩ ʋ wuo hɛ nɩduoruŋ hɩɩsɩŋ lɛ.