MALAKAƖ 4:2 - WƖA TENIŊ

² Ama, ma nɩalɩŋ sɩɩ zilmi, mɩ doluŋ jaŋ hɛ ma lɛ a nagɛ wɩɩpɔsʋŋ dɩ ma duori. Ma jaŋ lɩɩ fɩla jʋɔsɛ a nagɛ ba sɩ kɛŋ nɛ-biiriŋ suro ta ba lɩɩ jʋjʋɔsɛ.

MALAKAƖ 4:2 ပူးပေါင်းရင်းမြစ်များ

2 SAMƲƐL 23:4

kuoru-la nagɛ taŋ sɩ pʋla leriŋ pʋllɛ nɛ, duoŋ-bɩlɩmbaaŋ kala tuo, a bɩra nagɛ duonuŋ sɩ nɩa yaŋ nyʋ.’

WƖA YƖƖLAA 103:3

Ʋ nɛ joŋ mɩ wʋbɔŋŋɔɔ kala chɛmɛ, aŋ vaarɛ mɩ nyanyalaa kala.

WƖA YƖƖLAA 147:3

Ʋ leŋe nɩalɩŋ tʋɔŋ sɩ cheye bɩra tɔrɛ nɛ, aŋ vɔɔ tɔ ba naawɩɩlaa ma.

WƖA YƖƖLAA 61:5

Wɩa, ŋ nɩɩ niiri-la kala mɩ sɩ hɛ pɩŋ nɛ, ŋɩɩ nɛ ŋ pɩmɛ kɩalɩŋ ŋ sɩɩ pɩ nɩalɩŋ kala sɩɩ ziliŋ.

WƖA YƖƖLAA 67:1

Wɩa, leŋ dɩ ŋ tʋɔŋ tɔrɛ la nyuŋ, leŋ dɩ la na wʋzɔŋŋɔɔ, suri ŋ sɩaa pɩla.

WƖA YƖƖLAA 84:11

La Tɩɩna Wɩa nagɛ wɩɩpɔsʋŋ nɛ la teeŋ a chu tɔla. La Tɩɩna kɛŋ chonuŋ arɩ zile, ʋ bɩ kʋzɔŋ kala joŋo faa nɩalɩŋ sɩɩ ŋaa wɩaa ba bʋa lɛ.

WƖA YƖƖLAA 85:9

Ʋ ŋaa siri nɛ dɩ ʋ laa nɩalɩŋ sɩɩ fáʋ a ta, dɩ ŋɩɩ leŋ dɩ ʋ tʋla wuo hɛ la tinteeŋ lɛ.

NAMAGABA 4:18

Tʋɔpʋl tɩŋŋaa wombiiŋ nagɛ taŋ sɩ pʋlaa kɔ leriŋ pʋpʋllɛ nɛ, a pʋllɛ ŋɩɩ a mʋ yi bʋa-la lɛ leriŋ sɩ chaasa pʋlla dɛrɛ.

AZAAYA 30:26

Chɛnɛ pʋlʋmʋŋ jaŋ chaanɛ a nagɛ wɩɩpɔsʋŋ, ka wɩɩpɔsʋŋ ma chaanɛ a kɩɩ ŋɩɩ ʋ sɩ vɛnɛ chɩchaanɛ naansɩɩŋ bʋlɩpɛ, a nagɛ tapʋlaa balɩpɛ pʋlʋmʋŋ sɩ kʋ pɛ dɔŋɔ a chaanɛ tapʋl-bala. Wɩaa deemba kala jaŋ ŋaa bʋa-la lɛ La TƖƖNA sɩ jaŋ leŋ dɩ naawɩɩla-la ʋ sɩ hɛ ʋ nɩaa lɛ fɩɛlɛ.

AZAAYA 35:6

Gbɛrɩgɛɛ jaŋ sii fɩla jʋjʋɔsɛ a nagɛ aamɩŋ, ka nɩalɩŋ ma sɩ bɩ wɩaa wuo bʋl jaŋ ŋaa goŋ arɩ tʋɔtɔrʋŋ. Lɩɩŋ jaŋ bul a lɩɩ tintee-hɩlɩŋ lɛ, dɩ fuonuŋ paala pɩŋ nɩmɛ.

AZAAYA 49:6

La TƖƖNA bɩra sɩ, “Ŋ bɩ jaŋ ŋaa mɩ tɩntɩnnʋ, a kɛŋ Iziral doho doho-la dʋndʋŋ mɩɩra kɔ mɩ teeŋ Jekɔb doho nɩkaana-la sɩ bɩ sʋba, ama mɩ ha jaŋ leŋ dɩ ŋ nɛ ŋaa nɩalɩŋ sɩ bɩ Juu tɩŋŋaa ŋaa ma pʋlʋmʋŋ, dɩ mɩ laatanɩŋ wuo yi dʋnɩa sɛmɛ na-kala.”

AZAAYA 50:10

Ma nɩalɩŋ kala sɩɩ zil La TƖƖNA, a sɛɩ wɩalɩŋ kala ʋ tɩntɩnna sɩ bʋla, dɩ ma nɩɩ vɛŋ birimiŋ lim tʋɔŋ a bɩ nyiniŋ kɛnɛ ma, má laa La TƖƖNA dii, a bibeŋ ma Wɩa lɛ.

AZAAYA 53:5

Ba pɩrʋ a tɩŋ la wʋbɔŋŋɔɔ wɩaa nɛ. Wʋbɔmɔ-la la sɩ ŋaa wɩaa nɛ ba tɩma vɩɩrʋ. Hɛɛ-la ʋ sɩ na nɛ leŋe la kɛŋ yarɩfɩɛlaa. Ba sɩ pɩrʋ, ŋɩɩ nɛ tɩɩ dɩ la nɛ wɩɩla ma, la yie duori.

AZAAYA 9:2

Nɩalɩŋ sɩɩ vɛŋ birimiŋ tʋɔŋ na pʋlʋŋ-bal nɛ. Tintee-la nɩaa fa sɩ hɛ birimiŋ lim tʋɔŋ, pʋlʋmʋŋ lɛɛlɛ chaanaa hɛ ba lɛ nɛ.

JƐRƖMAAYA 17:14

La TƖƖNA, vaarɛmɛ, dɩ ŋ nɛ ŋaa ŋɩɩ, mɩ jaŋ duori. Dɩ ŋ nɛ laamɛ ta, mɩ jaŋ na wiese, ŋ nɛ mɩɩ dɛnnɛ.

JƐRƖMAAYA 30:17

Ama mɩ jaŋ bɩra pɩma yarɩfɩɛlaa, a ŋaa dɩ ma naawɩɩlaa ma fɩɛlɛ, a tɩŋ nɩaa sɩ sɩ Zaayɔŋ nɩaa ŋaa nɩ-kire taalɩa nɛ, nʋʋkala bɩ ba wɩaa chɩla. Mɩ-na ma TƖƖNA nɛ bʋla.”

JƐRƖMAAYA 33:6

Ama arɩ ŋɩɩ kala, mɩ ha jaŋ pɩ mɩ nɩaa yarɩfɩɛlaa dɩ ba duori. Mɩ jaŋ vaarɛba a leŋ dɩ ba tinteeŋ chaasa kɛŋ fɩɛlɩŋ dɩ ba hɔŋ sɔm.

ƐZƖKƖƐL 47:12

Tɩɩ-doho kala sɩɩ nɛŋ jaŋ nyʋ a kɩɛlɛ fuo-la sɛsɩŋ kala a nɛŋ. Tɩɩsɩ-la pɩpaarɩŋ bɩ jaŋ hɩl koo ba vɩa nɛnɩŋ. Ba jaŋ nɩnɛŋ chɛnɛ kala, bɛɛ wɩaa fuo-la lɩɩŋ sɩ pɛllɛɛ lɩɩ Wɩa dɩɩ-bal-la lɛ ka jʋʋba nɛ. Tɩɩsɩ-la nɛnɛɛ jaŋ ŋaa kʋdiilee, dɩ ba kɛŋ ba pɩpaarɩŋ ma vɩvaarɛ nɩaa.”

HOSIA 6:1

Iziral tɩŋŋaa sɩ, “Má kɔ dɩ la mɩɩra mʋ La TƖƖNA teeŋ. Ʋ kɛnla pʋɔsɛ muno muno nɛ, ama ʋ jaŋ vaarɛla. Ʋ pɩrɛla nɛ, ama ʋ jaŋ vɔɔ tɔ la naawɩɩlaa.

HOSIA 6:3

Má leŋ dɩ la jɩŋ La TƖƖNA. Má leŋ la hɛ doluŋ aŋ jɩmʋ. Ʋ jaŋ kʋ lɩɩ, a nagɛ wɩɩpɔsʋŋ sɩ yie pɔsɛ. Ʋ jaŋ kɔ la teeŋ a nagɛ tafaaŋ duonuŋ, a nagɛ yɩ-biiniŋ duonuŋ sɩ yie nɩɩ ŋɩɩ leriŋ fɩɛlɛ.”

MALAKAƖ 3:16

Ŋɩɩ nɛ nɩalɩŋ kala sɩɩ fá La TƖƖNA bʋl wɩaa dɔŋɔba teeŋ, La TƖƖNA jegile nɩɩ, aŋ leŋ ba ŋmʋnsɛ nɩalɩŋ kala sɩɩ fáʋ a zizilu yɩraa hɛ teniŋ tʋɔŋ dɩ ʋ liliisi ba wɩaa.

Matiu 11:5

Nyʋlɩmaa sɩaa ka suri nɛ, gbɛrɩgɛɛ vɩvɛŋ, gbegisiŋ ma duduori. Taŋŋaa nɩnɩɩ wɩaa, nɩalɩŋ sɩ sʋba sisii sʋʋŋ lɛ. Summoo ma wuo nɩnɩɩ Wɩa wʋzɔŋŋɔɔ.

Matiu 23:37

Ma Jerusalɛm nɩaa, ma kpʋ Wɩa wʋlaabʋllaa nɛ, a joŋ tabɩaa yagɛ tɩndaara-la Wɩa sɩ tɩma dɩ ba kɔ ma teeŋ. Naansɩɩŋ yʋga nɛ mɩ fa cho dɩ mɩ chu tɔ ma nɩaa kala arɩ jimiŋ sɩ yie chu tɔ ʋ biiriŋ ŋɩɩ, ka ma bɩ sɛyɛ.

Luuk 1:50

Ʋʋ fá nɩalɩŋ kala sɩɩ fáʋ nenige nɛ, doho-na kala lɛ.

Luuk 1:78

Wɩa kɛŋ zile aŋ fɩfá nɩaa nenige. Ʋ jaŋ laala ta a leŋ dɩ la hɔŋ pʋlʋmʋŋ tʋɔŋ.

Luuk 2:32

Bie deeŋ jaŋ nagɛ pʋlʋmʋŋ a dagɛ nɩalɩŋ sɩ bɩ Juu tɩŋŋaa ŋaa wombiiŋ, ka dɩ ŋ nɩaa Iziral tɩŋŋaa ma na.”

Jɔɔŋ 1:14

Ŋɩɩ nɛ wɩɩ-la bɩrɩmɛ nuhuobiine a kʋ hɛ la tʋɔŋ. Ʋ fa hɛ la teeŋ a fɩfá la nenige woruŋ, a kɛŋ wʋtɩtɩɩ. La na ʋ tʋla. Tʋla deeŋ ʋ Nyɩmma Wɩa nɛ joŋo pʋ, arɩ ʋ nɛ ŋaa ʋ Bie kala.

Jɔɔŋ 1:4

Wɩɩ-la fa weye nɛ a kɛŋ pʋlʋmʋŋ kaa kʋ pɩ nɩaa.

Jɔɔŋ 1:8

Jɔɔŋ fa dee bɩ pʋlʋŋ-la ŋaa, ama ʋ ta kɔ dɩ ʋ bʋl pʋlʋŋ-la wɩaa nɛ a pɩ nɩaa.

Jɔɔŋ 12:40

Ʋ sɩ, “Wɩa tɔ ba sɩaa nɛ aŋ nyɩrɛ ba tʋɔŋ, dɩ ba sɩaa sɩ́ kʋŋkala wuo na, dɩ ba sɩ́ wɩaa bʋbʋɔŋ ma wuo jɩŋ. Dɩ ŋɩɩ dee, ba fa jaŋ kɔ Wɩa teeŋ dɩ ʋ pʋllɛ ba tʋɔŋ, dɩ mɩ laaba ta.”

Jɔɔŋ 8:12

Ŋɩɩ nɛ Yesu bɩra suomi a dɩdagɛ nɩaa, a bʋla pɩba, “Mɩ nɛ ŋaa dʋnɩa nɩaa pʋlʋmʋŋ, nɩɩ-la kala sɩ tomi, ʋ bɩ jaŋ vɛŋ birimiŋ tʋɔŋ. Ama ʋ jaŋ kɛŋ pʋlʋŋ sɩɩ pɩ nɩaa mɩɩsɩŋ.”

Jɔɔŋ 9:4

La sɩ na wombiiŋ, má leŋ dɩ la tɩŋ tɩntɩmɩɩ-la nɩɩ-la sɩ tɩmmɛ dɩ mɩ tɩŋ. Bʋa kʋbala jaŋ yi nʋʋkala bɩra bɩ jaŋ wuo tɩŋ tɩntɩmɩɩ-la.

Tɩntɩŋŋaa 13:26

Mɩ naambiiriŋ Abɩraham doho nɩaa arɩ ma nɩalɩŋ sɩ bɩ Juu tɩŋŋaa ŋaa a hɛ daha a fɩfá Wɩa, la wɩaa nɛ ba tɩŋ dɩ ba bʋl wɩaa deemba sɩ jaŋ wuo laala ta.

Tɩntɩŋŋaa 13:47

Wɩa nɛ bʋla pɩla dɩ la ŋaa ŋɩɩ. Ʋ bʋl wɩɩŋ deeŋ Wɩa teniŋ sɛmɛ dɔŋɔ. Ʋ sɩ, ‘Mɩ nɛ lɩɩsɩŋ dɩ ŋ ŋaa nɩalɩŋ sɩ bɩ Juu tɩŋŋaa ŋaa pʋlʋmʋŋ. Ŋ jaŋ bʋl Wɩa niiŋ wɩaa dʋnɩa sɛmɛ-na kala, dɩ Wɩa laa nɩalɩŋ ta.’ ”

Tɩntɩŋŋaa 26:18

Mɩ jaŋ tɩmɩŋ dɩ ŋ mʋ bʋl wɩaa a suri ba sɩaa, dɩ ba bɩrɩma lɩɩ birimiŋ lɛ a kʋ jʋʋ pʋlʋmʋŋ tʋɔŋ, a ŋaa dɩ ba lɩɩ Sɩtaanɩ nɩsɩŋ lɛ a kɔ Wɩa teeŋ. Dɩ ba nɛ ŋaa ŋɩɩ a laa mɩ wɩaa dii, Wɩa jaŋ joŋ ba wʋbɔŋŋɔɔ chɛba. Ba jaŋ na leriŋ nɩalɩŋ Wɩa sɩ lɩɩsa tʋɔŋ.’

2 Tɛsalonaaka Nɩaa 1:3

La naambiiri, ʋ maga dɩ la lɔllɛ Wɩa nɛ bʋa na-kala a pɩma. Ŋɩɩ maga dɩ la ŋaa nɛ, bɛɛ wɩaa ŋɩɩ ma sɩ laa Wɩa dii pʋŋaa pɛ nɛ, chono-la ma ma sɩ kɛnɛ arɩ dɔŋɔ pʋŋaa pɛ.

2 Pɩɩta 1:19

Wɩaa deemba leŋe la wasa laa wɩalɩŋ Wɩa wʋlaabʋllaa ma fa sɩ bʋla dii nɛ. Má jegile nɩɩba, bɛɛ wɩaa wɩalɩŋ ba sɩ bʋla nagɛ chaanɩŋ nɛ a chaanɛ birimiŋ tʋɔŋ. Ʋ jaŋ chaanɛ ŋɩɩ halɩɩ a mʋ yi bʋa-la lɛ Yesu Kirisito pʋlʋmʋŋ sɩ jaŋ chaanɛ ma tʋɔŋ lɛ, a nagɛ nanyʋɔlʋŋ sɩ yie chaanɛ ŋɩɩ.

2 Pɩɩta 3:18

Má leŋ dɩ ma wʋjɩmɩŋ pʋŋa pɛ La Tɩɩna Yesu Kirisito wɩaa, Nɩɩ-la sɩ ŋaa la Laataara. Dɩ ma nɛ ŋaa ŋɩɩ, ʋ jaŋ pɛ ma lɛ. Ʋ yɩrɩŋ nɛ nɩaa jaŋ yɩrɛ lɛɛlɛ a kaa mʋ wuu. Amɩɩ.

1 Jɔɔŋ 2:8

Ama ʋ saa naga arɩ wʋfalɩɩ nɛ mɩ sɩ ŋmʋnsa pɩpɩma, bɛɛ wɩaa wɩɩŋ deeŋ kʋ ŋaa wʋtɩtɩɩ Kirisito mɩɩsɩŋ lɛ arɩ ma ma mɩɩsɩŋ lɛ. Bʋa deeŋ lɛ birimiŋ ka lɛl nɛ, aŋ ka pʋlʋmʋŋ suomo chɩchaanɛ.

Jɔɔŋ Wʋnaalaa 11:18

Dʋnɩa nɩaa fa na baanɩŋ nɛ ŋ nyuŋ. Ama bʋa-la ŋ baanɩŋ sɩ jaŋ sii ba nyuŋ yie nɛ. Bʋa-la lɛ ŋ sɩ jaŋ dii nɩalɩŋ sɩ sʋba sarɩya yie nɛ, arɩ bʋa-la lɛ ŋ sɩ jaŋ siili ŋ tɩntɩnnaa sɩ ŋaa ŋ wʋlaabʋllaa, a pɛ ŋ nɩaa kala lɛ, arɩ nɩalɩŋ sɩɩ ziliŋ lɛ, nɩhɩasɩŋ arɩ hambiisiŋ kala, Bʋa-la yie nɛ dɩ ŋ chei nɩalɩŋ sɩ chei dʋnɩa.”

Jɔɔŋ Wʋnaalaa 2:28

Mɩ jaŋ leŋ dɩ tɩɩna tʋtʋl a nagɛ nanyʋɔlʋŋ.

Jɔɔŋ Wʋnaalaa 22:16

Mɩ-na Yesu nɛ tɩŋ mɩ tɩndaara dɩ ʋ kɔ ma teeŋ a bʋl wɩaa deemba pɩ nɩalɩŋ sɩ laa mɩ wɩaa dii a hihilimi lee na-kala. Mɩ ŋaa Devit dɩa nɩaa gentine nɛ, a ŋaa ʋ doho nʋʋ. Mɩ nɛ ŋaa nanyʋɔlʋŋ.”

Jɔɔŋ Wʋnaalaa 22:2

a pɛllɛ to tabal-la womporuŋ tʋtʋɔbaanɩŋ, ka tɩa-la sɩɩ pɩ nɩaa mɩɩsɩŋ chɩŋ fuo-la cholluŋ balɩa-la kala lɛ. Tɩa-la yie nɛŋ nɛŋ-dosunuŋ naansɩɩŋ fii arɩ balɩa jɩna kala. Chɛnɛ kala ʋ yie nɛŋ bala. Tɩa-la pɩpaarɩŋ nɛ tinteyee nɩaa kaa vɩvaarɛ ba tɩtɩa.

RUF 2:12

La TƖƖNA jaŋ timiŋ a tɩŋ wɩalɩŋ kala ŋ sɩ ŋaa lɛ. A leŋ dɩ La TƖƖNA, Iziral tɩŋŋaa Wɩa teeŋ ŋ sɩ kɔ dɩ ʋ pɔŋ, faasa timiŋ yʋgɛ.”