JOSUA 18:16 - WƖA TENIŊ

¹⁶ Bʋa-la bɩra joŋ ŋɩɩ nɛ a tuu peel taala-la, a tʋʋlɛ Bɛŋ Hɩnɔm fuonaa-la a to Rafaɩ tɩŋŋaa fuonaaŋ wɩɩpɔsʋŋ nagʋa dɩɩrɩŋ. Ʋ nɛ ha to ŋɩɩ a tuu Hɩnɔm fuonaa-la, a joŋ ŋɩɩ mʋ to Jebus tɩŋŋaa taŋ-la wɩɩpɔsʋŋ nadiiŋ dɩɩrɩŋ tintee-la sɩ chulloo tuu a joŋo tuu taŋ-la ba sɩɩ yɩrɛ Ɛŋ-Rogɛl.

JOSUA 18:16 ပူးပေါင်းရင်းမြစ်များ

2 SAMƲƐL 17:17

Abɩata nanʋala Jonataŋ arɩ Zadɔk bie Ahɩmaas fa hɛ Ɛŋ-Rɔgɛl lɩɩ-bulo-la leriŋ nɛ, Jerusalɛm niiŋ aa gbɛrɛ, bɛɛ wɩaa dɩ ba nɛ naba dɩ baa jʋʋ taŋ-la, ʋ bɩ jaŋ zɔŋ a pɩba. Tɩntɩnnɩ hantolibie kʋbala nɛ fa yie mʋ bʋl wɩalɩŋ kala sɩ ŋaa a pɩba, ba ma kaa mʋ bʋla pɩ kuoro Devit.

2 SAMƲƐL 5:18

Bʋa-la lɛ dɩ Fɩlɩsɩtɩa tɩmma-la kʋ lɩɩ jɛrɛ su Refem fuonaaŋ.

1 KUOROO 1:9

Ŋɩɩ nɛ Adonija kpʋ piesee, nɛ-belliŋ, nɛ-pɔrɔɔ sɩ nɛrɛ a ŋaa Wɩɩsʋlʋŋ Dɩmɩŋ tabɩɩ-la lɛ, a kpagɛ Ɛŋ-Rɔgɛl. Ŋɩɩ nɛ ʋ yɩrɛ ʋ naambiiriŋ kala sɩ ŋaa kuoro biiriŋ, a pɛ Juda baala-la kala sɩ ŋaa kuoro tɩntɩnnɩ-hɩasɩŋ.

2 KUOROO 23:10

Josaaya fa bɩra chei vesiŋ dɩ-kpaara-la ba sɩɩ yɩrɛ Tɔfɛf a hɛ Bɛŋ Hɩnɔm fuonaaŋ lɛ, dɩ nɩaa bɩra sɩ́ ba biiriŋ kaa mʋ kpʋ a nyɩga pɩ vene-la ba sɩɩ yɩrɛ Mɔlɛk.

1 IZIRAL TƖŊŊAA NAABARƖŊ 14:9

Bʋa-la lɛ dɩ Fɩlɩsɩtɩa tɩmma-la kʋ lɩɩ su Refem fuonaaŋ a yuo dii tabiisi-la sɩ kpagɛ lee-la.

2 IZIRAL TƖŊŊAA NAABARƖŊ 28:3

Ʋ fa kpʋ pʋsʋŋ a nyɩgɛ nɛ Bɛŋ Hɩnɔm fuonaaŋ lɛ, a paala kɛŋ ʋ tɩtɩa hambolibiisiŋ kpʋ a nyɩga pɩ vesiŋ a ŋaa wɩalɩŋ sɩɩ kɩsʋ La TƖƖNA teeŋ. Wɩalɩŋ tɩtɩa nɛ tinteye-la nɩaa fa ŋɩŋaa tintee-la lɛ, La TƖƖNA kiriba ta ka Iziral tɩŋŋaa kʋ hɔŋ.

2 IZIRAL TƖŊŊAA NAABARƖŊ 33:6

Ʋ kɛŋ ʋ tɩtɩa hambolibiisiŋ mʋ Hɩnɔm Fuonaaŋ a kpʋ nɛ a nyɩga pɩ vesiŋ. Ʋ faa vʋgʋ nɛ, a ŋɩŋaa chichiribi wɩaa arɩ hɩl wɩaa, a yɩyɩrɛ kantɔŋŋɔɔ arɩ lɛlɛɛ. Ʋ fa ŋaa wʋbɔŋŋɔɔ yʋgɛ nɛ woruŋ a leŋ La TƖƖNA baanɩŋ chaasa sii ʋ nyuŋ.

AZAAYA 30:33

Ba gɩrɛ daasɩŋ nɛ lee-la ba sɩɩ yɩrɛ Tɔfɛf lɛ faafaa kala a gbɩgbɛrɛ Asiiria kuoro. Ba leŋe nyiŋ-la bʋa luŋ nɛ aŋ jal ma, nyiniŋ arɩ daasɩŋ yʋga nɛ a hɛ nɩmɛ. La TƖƖNA wiese jaŋ nagɛ juribiiŋ sɩ chol nyiŋgeliŋ a jomba dii.

JƐRƖMAAYA 19:11

aŋ bʋla pɩba, ‘Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: Mɩ jaŋ yɛrɛ tinteeŋ deeŋ arɩ tabalɩŋ deeŋ a nagɛ ŋɩɩ taga deeŋ sɩ yɛrɛ, ŋ bɩra bɩ ʋ wuo kaa mɛrɛ dɔŋɔ. Ba jaŋ hugi sʋʋnʋŋ Tɔfɛf lɛ ŋɩɩ halɩɩ dɩ ʋ tinteeŋ kala dɛrɛ.

JƐRƖMAAYA 19:2

dɩ ma mʋ Bɛŋ-Hɩnɔm fuonaaŋ sɩ kpagɛ kanchelliŋ boi-baalɩŋ. Dɩ ma nɛ mʋ nɩmɛ, bʋl wɩalɩŋ mɩ sɩ jaŋ bʋla pɩŋ.

JƐRƖMAAYA 19:6

Ŋɩɩ wɩaa, má jɩŋ wɩɩŋ deeŋ lɛ, Mɩ-na ma Tɩɩna nɛ bʋla tapʋlaa ka kɔ nɛ nɩaa bɩra bɩ jaŋ yɩrɛ leriŋ deeŋ Tɔfɛf koo Bɛŋ Hɩnɔm fuonaaŋ, ama ba jaŋ yɩrʋ fuonaa-la lɛ ba sɩɩ kpʋ nɩaa.

JƐRƖMAAYA 32:35

Ba saa vesiŋ dɩ-kpaaraa nɛ Bɛŋ Hɩnɔm fuonaaŋ lɛ a pɩ vene-la ba sɩɩ yɩrɛ Baal dɩ ba kɛsɛ ba hambolibiisiŋ arɩ ba hantolibiisiŋ a kpaarɛ vene-la ba sɩɩ yɩrɛ Mɔlɛk. Wɩɩ mɩ sɩ bɩ ba daga, ŋɩɩ paala bɩ mɩ tʋɔbɩɩnaa ma kɔ arɩ ba jaŋ ŋaa wʋkɩsɩŋ deeŋ a leŋ dɩ Juda ŋaa wʋbɔŋ.

JOSUA 15:63

Juda doho nɩaa bɩ wuo kiri Jebus tɩmma-la sɩ hɔŋ Jerusalɛm lɛ. A kaa kɔ arɩ jɩnɩŋ kala Jebus tɩmma-la ha hɛ Juda nɩaa tʋɔŋ.

JOSUA 18:28

Zɛla, Haɩlɛf, arɩ Jebus tɩŋŋaa taŋ-la (ʋ nɛ ha Jerusalɛm), Gɩbɩa arɩ Kɩrɩaf. Tabalaa ŋaa fii arɩ banɛsɛ nɛ arɩ ba tabiisiŋ. Bɛnjamɩŋ doho nɩaa nyɩŋ-nɩa nyɩŋ-nɩa sɩ laa tintee-la ʋ ŋaa ba kʋŋ nɛ ŋɩɩ.

SƖPAALAARAA 1:21

Ama Bɛnjamɩŋ doho nɩaa-na bɩ wuo kiri Jebus tɩmma-la sɩ hɛ Jerusalɛm lɛ. Arɩ jɩnɩŋ kala, Jebus tɩŋŋaa ha hɛ Bɛnjamɩŋ doho nɩaa tʋɔŋ nɛ.

SƖPAALAARAA 1:8

Juda doho nɩaa bɩra mʋ yuo Jerusalɛm ma, a yuo diiu. Ŋɩɩ nɛ ba kpʋ taŋ-la nɩaa aŋ nyɩgɛ taŋ-la.

SƖPAALAARAA 19:10

Ama baal-la bɩra bɩ chɛ dɩ ʋ chʋa lee-la. Ʋ paa ʋ kakusuŋ gbagaa daŋ ʋ kakusuŋ nyuŋ, a kɛŋ ʋ haala arɩ ʋ tɩntɩnna ba to Jebus dɩɩrɩŋ a mʋmʋ (Jebus nɛ ha baa yɩrɛ Jerusalɛm).