JƐRƖMAAYA 6:7 - WƖA TENIŊ

⁷ A nagɛ lɩɩŋ sɩ yie bul a lɩlɩɩ viliŋ lɛ ŋɩɩ, ŋɩɩ nɛ Jerusalɛm wʋbɔŋŋɔɔ ŋaanɩŋ nagɛ. Yuosuŋ arɩ leriŋ cheyiŋ yʋga ʋ lɛ. Mɩɩ na ʋ nɩaa nyanyalaa arɩ ʋ naawɩɩlaa kala nɛ.

JƐRƖMAAYA 6:7 ပူးပေါင်းရင်းမြစ်များ

NAMAGABA 4:23

Kɛŋ ŋ tʋɔbɩɩnaa woruŋ, bɛɛ wɩaa, ba nɛ jaŋ leŋ dɩ ŋ wʋŋaalaa tʋʋlɛ.

AZAAYA 1:6

A chɩŋ ma naachɛyɛɛ a kaa jɩl ma nyuŋ yarɩfɩɛlaa tuo. Ma yaraa kala nɛ firise a ŋaa naawɩɩlaa. Ma bɩ chɛsɛ, ma bɩ vɔɔ tɔ, ma bɩ daalusuŋ ma ŋaa hɛ.

AZAAYA 57:20

Ama nɩbɔŋŋɔɔ-na nagɛ mʋga lɩɩŋ sɩ gɔllɔɔ wulli nɛ, a bɩ dɩ-bala wuo pɩŋ, a kɛŋ mʋga-la vʋchɔɔŋ kukuosi bʋa na-kala.”

AZAAYA 59:6

Ma badɛrɛ chakʋʋrɩba-la ma sɩ ŋaa, ba ŋaa pɛɩ nɛ ba bɩ jaŋ wuo pilime tɔ ma wʋbɔmɔ-la. Ma wɩɩkala ŋaa nɩbɔŋ wɩɩ nɛ, ma wʋŋaalaa kala ŋaa yuosuŋ nɛ.

JƐRƖMAAYA 20:8

Dɩ mɩ nɛ bʋl wɩaa bʋa na-kala, mɩ yie yel nɛ a heele bʋbʋl doluŋ sɩ diila arɩ cheeriŋ sɩ puula. La TƖƖNA niiŋ wɩaa joŋ joŋŋoo arɩ hɩɩsɩŋ nɛ a hɩhɛ mɩ lɛ tapʋlɩɩ kala.

JƐRƖMAAYA 30:12

Wɩɩ-la La TƖƖNA sɩ bʋla nɛ ŋ-la: “Nʋʋ bɩ ma naawɩɩlɩŋ wuo tɩɩbɛ. Ma pɩrɩna-la bɩ vaarɩna kɛnɛ.

JƐRƖMAAYA 30:13

Nʋʋkala tuo dɩ ʋ sʋla laama, ma naawɩɩlɩŋ bɩ daaluno kɛnɛ. Ma bɩ vaarɩna kɛnɛ.

JƐRƖMAAYA 30:15

Bɛɛ nɛ tɩɩ ma yiyel ma naawɩɩlaa wɩaa, ma hɛɛ-la sɩ bɩ daaluno kɛnɛ wɩaa? A tɩŋ ma cheeriŋ arɩ ma wʋbɔŋŋɔɔ sɩ yʋga wɩaa ŋɩɩ nɛ tɩɩ mɩ joŋ wɩaa deemba ŋaa ma lɛ.

JƐRƖMAAYA 32:31

A chɩŋ tapʋlɩɩ-la ba sɩ saa tabalɩŋ deeŋ a kaa kɔ jɩnɩŋ, ba leŋe mɩ baanɩŋ chaasa sii nɛ. Mɩ baanɩŋ sie nɛ a magɛ mɩ leŋ dɩ tabal-la nyɩɩgɛ mɩ sɩaa lɛ.

JƐRƖMAAYA 8:22

Naawɩɩlaa nʋʋŋ tuo Gɩlɩad lɛɛ? Daalusuŋ tɩɩna kala tuoo? Bɛɛ nɛ saa tɩɩ mɩ nɩaa naawɩɩlaa bɩ fɩɛlɛ?

ƐZƖKƖƐL 21:29

Má sɩ́ wɩalɩŋ ba sɩ na a nagɛ duosoo tʋɔŋ arɩ wɩalɩŋ ba sɩ vʋga na a tɩgɛ ma lɛ kaa tɩŋ. Ba ŋaa wʋnyɩɛrɩŋ nɛ. Ma ŋaa nɩbɔmɔ nɛ a ŋɩŋaa wʋbɔŋŋɔɔ. Tapʋlɩɩ-la ba sɩ jaŋ dɔgɩsɛma yie nɛ. Tokobiiŋ nɛ ba jaŋ kaa keri ma baŋŋaa.

ƐZƖKƖƐL 24:7

Jerusalɛm nɩaa sɩ kpʋ nɩalɩŋ chalɩŋ jaasɛ ba tabalɩŋ lɛ nɛ. Chal-la jaasɛ bʋ-taala nyuŋ nɛ, ʋ bɩ tinteeŋ jaasa, lee-la hagɩla sɩ bɩ jaŋ wuo tɔ.

ƐZƖKƖƐL 45:9

Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: “Iziral sɩpaalaaraa, ma ŋaa wʋbɔŋŋɔɔ kieli nɛ. Má leŋ doluŋ diiniŋ arɩ nɩaa dɔgʋsʋŋ, aŋ to wʋtɩtɩɩ a ŋɩŋaa wɩaa ba bʋa lɛ. Má leŋ mɩ nɩaa tinteeŋ kaa laanɩŋ. Mɩ-na ma TƖƖNA Wɩɩjarɩbakɔ nɛ bʋla.

ƐZƖKƖƐL 7:11

Doluŋ diiniŋ paala pʋrɩgɛ nɛ a nagɛ toŋguluŋ sɩ je dɩ ʋ dɔgɩsɛ nɩbɔŋŋɔɔ. Nɩalɩŋ kʋŋkala bɩ jaŋ ka, nɩ-daŋ-la, ba dʋa arɩ ba kʋŋkala ma sɩ kɛŋ yuŋuŋ.

ƐZƖKƖƐL 7:23

Ba libi chɔrʋmɔɔ ba sɩ jaŋ kaa vɔɔ nɩaa, bɛɛ wɩaa nɩaa kpʋnʋŋ su ba tintee-la kala nɛ, ba tasɩŋ ma su arɩ yuosuŋ.

ZEFANAAYA 3:1

Wɩaa puu Jerusalɛm, ʋ nyagɛ nɩaa bil nɛ, a vɩa dagɩŋ aŋ ŋaa wɩaa a kɛŋ disiniŋ.