JƐRƖMAAYA 50:2 - WƖA TENIŊ

² “Heele bʋl tinteyee tʋɔŋ, kɛŋ jɔnjɔŋ je a heele bʋlʋ, sɩ́ wɩɩkala joŋo faa, ama bʋl, ‘Ba jaŋ yuo dii Babɩlɔŋ. Ba jaŋ hɛ vene-la ba sɩɩ yɩrɛ Bɛl hɩɩsɩŋ, fawʋllʋŋ jaŋ faasa jʋʋ vene-la ba sɩɩ yɩrɛ Maduk. Ʋ kɩalɩŋ ba sɩ mɛ kala jaŋ dii hɩɩsɩŋ dɩ fawʋllʋŋ faasa kɛŋ ba tɔŋŋɔɔ.’

JƐRƖMAAYA 50:2 ပူးပေါင်းရင်းမြစ်များ

WƖA YƖƖLAA 64:9

Fawʋllʋŋ jaŋ kɛŋ nʋʋkala. Ba jaŋ bʋl wɩalɩŋ Wɩa sɩ ŋaa, aŋ kɛŋ wɩalɩŋ ʋ sɩ ŋaa a bɩbɩɩnɛ.

WƖA YƖƖLAA 96:3

Má heele bʋl ʋ ballɩŋ wɩaa arɩ tɩntɩŋ-duoru-la ʋ sɩ tɩma a pɩ tinteyee nɩaa kala.

WƖA YƖƖLAA 97:7

Hɩɩsɩŋ dii vʋɩ-kpaaraa nɛ, nɩalɩŋ sɩ kɛŋ vʋɩ-pɛɩpɛɩba-la dɩdagɛ ba tɩtɩa, vesiŋ maa kpirimi La Tɩɩna sɩpaaŋ nɛ.

AZAAYA 12:4

Tapʋlɩɩ-la ma jaŋ bʋl, “Má lɔllɛ La Tɩɩna, má yɩrɛ ʋ yɩrɩŋ, má leŋ dɩ tinteyee nɩaa nɩɩ wɩalɩŋ ʋ sɩ ŋaa, a leŋ dɩ ba jɩŋ arɩ ʋ yɩrɩŋ yʋga.

AZAAYA 13:2

Jɩl dundolo nyuŋ kʋŋkala sɩ tuo, a kɛŋ tuuta je aŋ kpɩa laalɩyuoroo lɛ aŋ kɛŋ nɩsɩŋ dagɛba dɩ ba mʋ taŋ-la nɩaa sɩɩ dagɛ ba tɩtɩa boi-baalaa a yuoba.

AZAAYA 21:9

Lɛɛlɛ, na nʋʋ nɛ hɔŋ toruko lɛ ja-laalɩŋ lɛrɛ kʋkɔ ŋɩɩ. Nɩɩ-la sɩ hɛ toruko-la lɛ bʋl, ‘Babɩlɔŋ tele, Babɩlɔŋ tele, ʋ vesiŋ ma kala nɛ ba ŋmoo pɩsɛ tinteeŋ.’ ”

AZAAYA 37:19

Ba paa ba vesi-la sɩ bɩ Wɩa ŋaa a nyɩgɛ nɛ. Daasɩŋ arɩ tabɩaa nɛ nuhuobiinee kaa ŋaaba.

AZAAYA 39:1

Bʋa-la lɛ baal kʋbala ba sɩɩ yɩrɛ Merodak-Baladaŋ nɛ fa ŋaa Babɩlɔŋ kuoro. Ʋ fa ŋaa Baladaŋ nanʋala nɛ. Ʋ sɩ nɩa dɩ Hezikaaya wɩɩla nɛ aŋ duori, ʋ ŋmʋnsɛ teniŋ a joŋ kɩaa pɛ, a tɩŋ nɩaa dɩ ba kaa mʋ dii zile ʋ lɛ.

AZAAYA 46:1

Babɩlɔŋ vesi-la ba sɩɩ yɩrɛ Bɛɛl arɩ Nɛbɔ wɩaa dɛrɛ nɛ, ba faa kpaarɛba nɛ, ama lɛɛlɛ ba nɛ ba paa hɛ pʋsʋŋ toruko lɛ ŋɩɩ. Ba mɩɩra ŋaa chʋga nɛ a pɩ pʋsʋ-la, ba chʋŋ a bɛsɩmɛ.

AZAAYA 48:20

Má lɩɩ Babɩlɔŋ lɛ, má fá kagɛ Babɩlɔŋ tɩŋŋaa lɛ. Má heele bʋl arɩ tʋɔtɔrʋŋ: ‘La TƖƖNA laa ʋ nɩaa Iziral tɩŋŋaa ta nɛ.’ ” Má leŋ dɩ dʋnɩa sɛmɛ na-kala nɩɩ.

AZAAYA 48:6

Ma nɩɩ wɩaa deemba kala nɛ, a naba ma dɩ ba ŋaa. Lɛɛlɛ ma bɩ jaŋ sɛɩ arɩ wɩalɩŋ kala ŋaa wʋtɩtɩɩba nɛɛ? A chɩŋ lɛɛlɛ a kaa mʋ, mɩ jaŋ bʋl wʋfalaa ma sɩ bɩ jɩŋ a pɩma.

JƐRƖMAAYA 10:11

Má bʋl ŋ-la pɩ nɩalɩŋ: “Vʋɩyaa deemba ba sɩ to dee bɩ wɩa-nyuŋ arɩ tinteeŋ ŋaa, ba jaŋ nyɩɩgɛ tinteeŋ lɛ a lɛl dʋnɩa kala lɛ.”

JƐRƖMAAYA 10:15

Ba bɩ bʋbʋɔ kala kɛnɛ. Ba ŋaa kɩaa sɩ kɛŋ mɔmʋŋ nɛ. Dɩ ba sarɩya diiniŋ tapʋlʋŋ nɛ yie, ba jaŋ cheiba.

JƐRƖMAAYA 31:10

Tinteyee nɩaa, má jegile nɩɩ mɩ-na ma TƖƖNA wɩaa. Má heele bʋlba a pɩ nɩalɩŋ sɩ hɔŋ mʋgʋ-balɩŋ niiŋ dɩ-bolii. Mɩ-na nɛ kɛŋ Iziral tɩŋŋaa pɩsɛ, mɩ saa jaŋ bɩra kɛmba kʋ hɛ dɔŋɔ. Mɩ jaŋ beŋ mɩ nɩaa nyuŋ a nagɛ pie-daara sɩɩ beŋ ʋ piesee ŋɩɩ.”

JƐRƖMAAYA 4:16

Má bʋl wɩɩŋ deeŋ pɩ tinteyee nɩaa, má heele bʋla pɩ Jerusalɛm nɩaa. Laalɩyuoroo sɩ golli tasɩŋ chu a yuyuo nɛ lɩɩ tintee bolii a kʋkɔ, a ŋɩŋaa laalɩyuori goŋ dɩ ba yuo Juda tabalaa.

JƐRƖMAAYA 4:6

Má hɛ duoso pɩ nɩaa dɩ ba fá mʋ Jerusalɛm. Má fá a laa ma tɩtɩa, má sɩ́ dienu. Mɩ kɛŋ wʋlɔrʋŋ nɛ lɩɩ wɩɩpɔsʋŋ nagʋa dɩɩrɩŋ kʋkɔ, ʋ ŋaa wʋlɔrʋ sɩ bɩ bana kɛnɛ.”

JƐRƖMAAYA 46:14

“Má heele bʋl wɩɩŋ deeŋ Ijipiti arɩ Mɩgɩdɔl lɛ. Má heele bʋlʋ Memfis arɩ Tapanhɛs ma lɛ: ‘Má chɩŋ ma dɩchɩnaa a ŋaa siri, bɛɛ wɩaa laalɩŋ ka dii nɩalɩŋ sɩ gollima nɛ.’

JƐRƖMAAYA 50:46

Dɩ Babɩlɔŋ nɛ tele, dʋnɩa jaŋ jigisi. Tinteyee nɩaa jaŋ nɩɩ ba nii-ŋmobo.

JƐRƖMAAYA 51:12

Má kɛŋ tuuta je dɩ ba mʋ ŋmoo kɛrɛ-la sɩ golli Babɩlɔŋ a lo. Má leŋ dɩ laalɩyuoro-la sɩɩ pɔ leriŋ faasa yʋgɛ, a chɩŋ ba dɩchɩnaa a bibeŋ. Má leŋ dɩ laalɩyuoro faa a pɔ. La TƖƖNA jaŋ ŋaa wɩalɩŋ ʋ sɩɩ chɛ ʋ ŋaa, wɩalɩŋ ʋ sɩ daga arɩ ʋ jaŋ ŋaa Babɩlɔŋ nɩaa lɛ.

JƐRƖMAAYA 51:27

Má kɛŋ tuuta je tintee-la lɛ. Má ŋmʋʋ banyilliŋ tinteyee lɛ. Má leŋ dɩ tinteye-la nɩaa ŋaa siri a yuo Babɩlɔŋ. Má yɩrɛ kuori-gentisiŋ deemba kala hɛ ʋ lɛ: Ararat, Mini arɩ Asɩkɛnas. Má lɩɩsɛ laalɩyuori-hɩaŋ dɩ ʋ laa nɩalɩŋ sɩpaaŋ dɩ ba mʋ yuou. Má leŋ dɩ janɩŋ mʋ ʋ lɛ a nagɛ hɔbɩ-laalɩŋ.

JƐRƖMAAYA 51:31

Tɩndaaraa paa puu dɔŋɔ nɛ, dɩ ba mʋ heele pa Babɩlɔŋ kuoro arɩ ba yuo dii ʋ tabalɩŋ kala nɛ.

JƐRƖMAAYA 51:44

Mɩ jaŋ dɔgɩsɛ vene-la ba sɩɩ yɩrɛ Bɛl sɩ hɛ Babɩlɔŋ lɛ, a leŋ dɩ ʋ lusi kɩalɩŋ kala ʋ sɩ liŋe. Tinteyee nɩaa bɩra bɩ jaŋ kpaarʋ, Babɩlɔŋ kɛrɛ jaŋ tel.

JƐRƖMAAYA 51:47

Bʋa kʋbala sɛnɛ jaŋ kɔ, dɩ mɩ dɔgɩsɛ Babɩlɔŋ tɔŋŋɔɔ. Mɩ jaŋ hɛ Babɩlɔŋ tinteeŋ kala hɩɩsɩŋ. Ʋ nɩalɩŋ mɩ sɩ jaŋ kpʋ jaŋ pɩŋ ʋ tinteeŋ lɛ.

JƐRƖMAAYA 51:52

Ama mɩ sɩ bʋa dɔŋ ka kɔ nɛ, mɩ jaŋ chei tɔmɔ-la kala sɩ hɛ Babɩlɔŋ tinteeŋ, ʋ tinteeŋ kala lɛ, dɩ nɩalɩŋ sɩ bolimo huhuuni. Mɩ-na ma TƖƖNA nɛ bʋla.

JƐRƖMAAYA 51:8

Babɩlɔŋ jaŋ guu tel a bori. Má yel ʋ lɛ. Má chɛ daalusuŋ a hɛ ʋ lere-la sɩɩ wɩɩ, kapo ʋ jaŋ wuo duori.

JƐRƖMAAYA 52:31

Ba fa sɩ kɛŋ Juda tinteeŋ kuoro Jehoyachiŋ tɔ bɩnɩŋ dɩa Babɩlɔŋ lɛ, ʋ jɩsɩŋ mara arɩ fii arɩ balɩpɛ lɛ, ŋɩɩ nɛ baal kʋbala baa yɩrɛ Nɩbɔmʋŋ-Merodak kʋ dii Babɩlɔŋ tinteeŋ kuoruŋ, a leŋ ba lɩɩsɛ Juda kuoro Jehoyachiŋ, chɛŋ fii arɩ balɩa tapʋlaa mara arɩ banɔŋ chɛɛŋ.

JƐRƖMAAYA 6:18

Ŋɩɩ wɩaa tinteyee nɩaa, má jegile nɩɩ, máa beŋ, a na wɩɩ-la mɩ sɩ jaŋ ŋaa mɩ nɩaa lɛ.

DANƖƐL 1:2

La Tɩɩna joŋ Juda kuoro Jehoyakim hɛ ʋ nɩsɩŋ lɛ, ʋ pɛ paa tɩntɩnnɩ kɩalɩŋ dɔnsʋŋ sɩ hɛ Wɩa dɩɩ-balɩŋ lɛ. Ʋ paa kɩaa deemba a kaa mʋ Babɩlɔŋ nɛ a bil ʋ vene dɩa lɛ, lee-la ʋ sɩɩ bil ʋ sɩɩfɩaŋ kɩaa.

DANƖƐL 3:14

Nebukadineza pɩɛsɛba, “Wʋtɩtɩɩ nɛɛ, Sadɩrak, Mɛsak arɩ Abedinego, ma bɩ mɩ vesiŋ ka kpaarɛ koo aa chʋɔlɛ kʋ-la mɩ sɩ leŋe ba kɛŋ sɛlɩmɛ ŋaa bil?

ZEFANAAYA 2:11

La TƖƖNA jaŋ chei vʋɩya-la kala sɩ hɛ tintee-la lɛ, dɩ fawʋllʋŋ faasa jʋʋba. Tinteyee kala sɩ hɛ dʋnɩa lɛ jaŋ kpirimi ʋ sɩpaaŋ, nʋʋ na-kala jaŋ ŋaa ŋɩɩ ʋ tɩtɩa tinteeŋ lɛ.

Jɔɔŋ Wʋnaalaa 18:2

Ŋɩɩ nɛ ʋ faasa suri ʋ yikoro a bʋl, “Babɩlɔŋ tele, Babɩlɔŋ tabal-la tele. Ʋ lɛɛlɛ bɩrɩmɛ jɩŋ-bɔŋŋɔɔ arɩ diibiisiŋ sɩ kɛŋ disiniŋ arɩ kɩalɩŋ ba sɩɩ kɩɩsʋ kala dɩjʋʋlʋŋ nɛ.