Ama ba bɩ ʋ wʋlaabʋlla-la teeŋ jegile nɩɩ, aŋ mɔmba a sieri ba lɛ. Ba ŋaa ŋɩɩ nɛ La TƖƖNA baanɩŋ chaasa sii ba nyuŋ, wɩɩkala tuo sɩ jaŋ pɔ dɩ ʋ sɩ́ ba dɔgʋsʋ.
Ba bɩ pɩɛsa chɛmɛ a bʋl, ‘Nɩɩ nɛ La TƖƖNA hɛ?’ Nɩɩ-la sɩ laala ta Ijipiti tɩŋŋaa nɩsɩŋ lɛ a kɛnla lɩɩ, a vɛŋ tintee-hɩlɩŋ tʋɔŋ. Tintee-la fa ŋaa tintee-hɩlɩɩ nɛ, a kɛŋ buotuonuŋ sɩ luŋie. Duonuŋ bɩ nɩmɛ ka nɩɩ, lee-la sɩ bire, nʋʋkala bɩ nɩmɛ ka vɛŋ. Nʋʋkala ma bɩ lee-la hɔnɔ.
Wɩalɩŋ ba sɩ na a nagɛ duosoo tʋɔŋ, arɩ ba vʋgʋrʋ wɩaa ŋaa wʋnyɩɛrɩŋ nɛ. Ba sɩ, ‘La TƖƖNA nɛ bʋla,’ ka mɩ-na ma TƖƖNA bɩ ba tɩma, ka ba ha bɩɩnɛ arɩ wɩalɩŋ ba sɩ bʋla jaŋ kʋ ŋaa wʋtɩtɩɩ.
Ma sɩpaalaara-la yie laa kpalaa nɛ aŋ dii sarɩya, ma Wɩɩsʋllɩ sɩpaalaaraa yie dagɛ nɩaa Wɩa wombiiŋ aa chɛ time. Ma nɩalɩŋ sɩ sɩ ma ŋaa Wɩa wʋlaabʋllaa yie bʋl wɩalɩŋ ma sɩ na aa laa moribiee. Ka ma ha yie bʋl dɩ ma yelli La TƖƖNA nɛ. Ma yie bʋl, “La TƖƖNA hɛ la teeŋ nɛ, wʋlɔrʋ kala bɩ jaŋ jʋʋla.”
Ama, má chɩŋ a bibeŋ, dɩ ʋ nɛ to lee-la ʋ sɩ lɩɩ kɔ, a mʋ taŋ-la ba sɩɩ yɩrɛ Bɛf Sɛmɛs dɩɩrɩŋ, ŋɩɩ daga arɩ La TƖƖNA nɛ joŋ nyanyal-bɔmɔ-la hɛ la lɛ. Ama dɩ ʋ nɛ bɩ nɩmɛ to, la jaŋ bɩra jɩŋ arɩ ʋ dee bɩ nyanyal-bɔmɔ-la joŋo hɛ la lɛ, ba ma ta paala jʋʋla nɛ.”