JƐRƖMAAYA 4:13 - WƖA TENIŊ

¹³ Má bee na, dʋndɔmɔ ka kɔ nɛ a nagɛ duoŋ-bɩlɩmbaanaa, ʋ janɩŋ torukoba ka kɔ nɛ a nagɛ pel-vinvilimiŋ, ka ʋ janɩŋ naasɩŋ lɩma kɩɩ kachuunuŋ sɩɩ fil. Wɩɩŋ puula, la dɩdɛrɩŋ nɛ ŋɩɩ.

JƐRƖMAAYA 4:13 ပူးပေါင်းရင်းမြစ်များ

2 SAMƲƐL 1:23

Nɩaa fa cho Sɔɔl arɩ Jonataŋ nɛ woruŋ, ba kala fa hɛ ba mɩɩsɩŋ lɛ, aŋ kala bɩra to dɔŋɔ a sʋʋ. Ba fa lɩma a kɩɩ kachuunuŋ, ba kɛŋ doluŋ ma a kɩɩ naachigee.

AZAAYA 13:5

Ba lɩɩ tinteyee sɩ bolie nɛ, ba lɩɩ dʋnɩa dɩdɛrɩŋ nɛ. Mɩ-na ma TƖƖNA baanɩŋ chaasa sii nɛ, mɩ kori mɩ laalɩyuori kɩaa kʋkɔ dɩ mɩ chei tintee-la kala nɛ.

AZAAYA 19:1

Wɩɩ-la Wɩa sɩ bʋla pɩmɛ a mʋ tɩgɛ Ijipiti lɛ nɛ ŋ-la: La TƖƖNA to duoŋ-bɩlɩmbaanɩŋ lɛ nɛ a faasa fá kʋkɔ Ijipiti lɛ. Ijipiti tɩŋŋaa tɔŋŋɔɔ kala ka chel nɛ ʋ sɩpaaŋ, ʋ nɩaa ma kala nandaasɩŋ yʋɔrɛ.

AZAAYA 3:8

Jerusalɛm tinteeŋ bɩ chɩna, Juda ma titel, bɛɛ wɩaa ba wʋbʋlaa arɩ ba wʋŋaalaa kala bɩ La TƖƖNA tʋɔŋ ka tɔrɛ, ba vɩaʋ nɛ, ba bɩ kaa faʋ arɩ ʋ sɩ kɛŋ tʋla ma kala.

AZAAYA 5:28

Ba to-hɛŋŋɛɛ kɛŋ niiŋ nɛ woruŋ, ba kɛŋ ba tɩtɩa hɛ dɔŋɔ nɛ dɩ ba yuo ba tosuŋ, ba janɩŋ naachɛŋŋɛɛ ma dolie a nagɛ naŋkpachɩllɩŋ nɛ, ba janɩŋ torukoba ma fɩfá a nagɛ pel-vinvilimiŋ.

AZAAYA 66:15

Má bee na, La TƖƖNA ka kɔ nɛ arɩ nyiniŋ, ʋ janɩŋ torukoba kala nagɛ pel-vinvilimiŋ nɛ. Ʋ jaŋ chaasa na baanɩŋ a joŋ nyiŋgeliŋ dɔgɩsɛ nɩalɩŋ nyuŋ ʋ baanɩŋ sɩ sie.

JƐRƖMAAYA 10:19

Wɩaa puumi, mɩ sɩ bolimo wɩaa. Mɩ naawɩɩlɩŋ bɩ kʋfɩɛlɩɩ ŋaa, ka mɩ ha bʋl mɩ tɩtɩa lɛ, “Mɩ nyanyalɩŋ nɛ ŋ-la, ʋ maga dɩ mɩ nyalɩmɛ nɛ.”

JƐRƖMAAYA 4:12

Pel-duoŋ deeŋ lɩɩ mɩ teeŋ nɛ. Lɛɛlɛ mɩ dii ma sarɩya nɛ.”

JƐRƖMAAYA 4:31

Mɩ nɩa dɩ baa ŋmoo niiŋ a nagɛ haala sɩɩ chɛ dɩ ʋ lʋl ʋ luoruŋ wʋwɩɩ nɛ, a huunoo nagɛ haala sɩɩ chɛ dɩ ʋ lʋl ʋ ha-toli bie. Zaayɔŋ nɩaa nɛ ŋmoo niiŋ ŋɩɩ a wiesee puri, a tɩɛnɛ nɩsaa a bʋl, “Ou, mɩ sʋba. Ba jommi hɛ nɩkpʋʋraa nɩsɩŋ lɛ nɛ.”

JƐRƖMAAYA 46:18

Mɩ-na ma TƖƖNA doluŋ kala Tɩɩna yɩrɩŋ nɛ La TƖƖNA. Mɩ sɩ weye wɩaa, a nagɛ peel-la ba sɩɩ yɩrɛ Tabɔ sɩ sii kɩɩ peelee kala ŋɩɩ, peel-la ba sɩɩ yɩrɛ Kamɛl ma sii kɩɩ mʋgʋ-balɩŋ ŋɩɩ, ŋɩɩ nɛ nɩɩ-la sɩ jaŋ kʋ yuoma doluŋ jaŋ nagɛ.

JƐRƖMAAYA 48:40

Wɩɩ-la La TƖƖNA sɩ bʋla nɛ ŋ-la: “Má bee na, kachuuŋ nɛ file kʋʋ tuu a jɛrɛ kɩŋkɛnsɩŋ Mʋab nyuŋ.

JƐRƖMAAYA 49:22

Dʋndɔmɔ jaŋ kʋ tuu ba lɛ a nagɛ kachuuŋ a kɛŋ kɩŋkɛnsɩŋ jɛrɛ tɔ Bozira lɛ. Tapʋlɩɩ-la Ɛdɔm laalɩyuoroo bɔyɛ jaŋ joŋ a nagɛ haala sɩɩ chɛ dɩ ʋ lʋl ʋ bɔyɛ jujoŋ ŋɩɩ.

JƐRƖMAAYA 6:23

Ba nyɩgɩla nɛ a kori tosuŋ arɩ ba tiŋŋee, ba ŋaa laalɩyuori tʋɔhɛɩ tɩmma nɛ, a bɩ nɩaa nenige ka fá. Ba sɩ jɩl ba janɩŋ, ba dɔmɔ nagɛ mʋgʋ-balɩŋ sɩɩ huuru nɛ. Ba ŋaa nɩaa sɩ nyɩgɩla dɩ ba yuo laalɩŋ nɛ a kɔ dɩ ba yuo ŋ-na Jerusalɛm.”

JƐRƖMAAYA 9:19

La nɩa dɩ baa ŋmoo niiŋ nɛ Zaayɔŋ lɛ a bʋbʋl, ‘La cheye dɛrɛ nɛ. La hɩɩsɩŋ chaasa yʋgɛ nɛ. Ʋ maga dɩ la lɩɩ la tinteeŋ lɛ nɛ, bɛɛ wɩaa la dɩɩsɩŋ kala nɛ ba ŋmoo lo.’ ”

JEMBIEE 4:19

Nɩalɩŋ sɩ kiree to la harɩŋ naachɛɛŋ lɩma a kɩɩ kachuuŋ sɩɩ fil. Ba kirila baarɛ peelee nyuŋ nɛ, a faa gbɛrɛla tintee-hɩlɩŋ lɛ.

ƐZƖKƖƐL 26:10

Ʋ janɩŋ jaŋ yʋgɛ kɩŋkɛŋ dɩ ba kʋŋkɔlʋŋ sii tɔŋ. Ʋ laalɩŋ janɩŋ jaŋ lɛrɛ janɩŋ torukoba arɩ torukoba a to ŋ boi-baalaa jʋʋ a nagɛ tabal-la ba sɩ yuo dii. Dɩ ba nɛ jʋa, ba dɔmɔ jaŋ leŋ dɩ ŋ jeyee jigisi.

ƐZƖKƖƐL 38:9

Ŋ dɩ ŋ laalɩyuoroo arɩ tintee daŋ-la nɩaa sɩ hɛ ŋ teeŋ kala jaŋ mʋ tintee-la lɛ a nagɛ duoŋ-peliŋ, a tɔ ʋ kala a nagɛ duoŋ-bɩlɩmbaanɩŋ.”

DANƖƐL 11:40

Dʋnɩa dɩdɛrɩ-la Wɩa sɩ daga nɛ yie, Ijipiti tinteeŋ kuoro jaŋ sii mʋ dɩ ʋ yuo Siiria kuoro. Siiria kuoru-la jaŋ kɛŋ ʋ laalɩŋ janɩŋ torukoba arɩ ja-jɩllaa a pɛ lɩɩŋ daboru-dandaŋ lɛ a lɩɩ chemu. Ʋ jaŋ mʋ tɔ tinteyee yʋgɛ hɛ a yuoba a nagɛ lɩɩŋ sɩ tɔ leriŋ.

DANƖƐL 7:4

Bumbuŋ kʋa nagɛ naachigiŋ aŋ kɛŋ kachuuŋ kɩŋkɛnsɩŋ. Mɩɩ benu ka ʋ kɩŋkɛnsɩ-la kala churi, ka ba kɛnʋ chʋʋla kɩɩ ʋ hui-naasɩŋ balɩa nyuŋ a nagɛ nuhuobiine. Ba joŋ nuhuobiine tʋɔbɩɩnaa hɛ ʋ lɛ.

HOSIA 8:1

La TƖƖNA sɩ, “Má ŋmʋʋ banyile, dʋndɔŋŋɔɔ nagɛ kachuuŋ nɛ aa zaarɛ mɩ-na ma TƖƖNA dɩa nyuŋ, bɛɛ wɩaa mɩ nɩaa chei nii-la sɩ hɛ mɩ dɩ ba pɛgɛ nɛ, a vɩa wombii-la ma mɩ sɩ bile dɩ ba tuto.

MƖKA 2:4

Tapʋlɩɩ-la nɩaa jaŋ sieri ma lɛ, ba jaŋ yɩɩ nisusu yɩɩlɩŋ deeŋ a sieri ma lɛ, ‘La wɩaa chaasa chei nɛ, ba kɛŋ mɩ nɩaa kɩaa kpaa nɛ. La TƖƖNA kaa laa mɩ teeŋ nɛ, a joŋ la bagɩsɩŋ a pɩ nɩalɩŋ sɩ yuo diila.’ ”

NAHUM 1:3

La TƖƖNA baanɩŋ bɩ lɩma lɩma ka sii, ama ʋ kɛŋ doluŋ nɛ woruŋ. Ʋ bɩ jaŋ leŋ nɩalɩŋ sɩ ŋaa wɩaa chei pɛɩ, ʋ jaŋ dɔgɩsɛba. Ʋ wombiiŋ hɛ pel-vinvilimiŋ arɩ duoŋ-peliŋ tʋɔŋ nɛ, ʋ naasɩŋ bʋmbʋgʋŋ nɛ duoŋ-bɩlɩmbaanaa.

HABAKU 1:8

Ba janɩŋ ma naaŋ lɩma a kɩɩ kpeyee, ba kɛŋ baanɩŋ a kɩɩ guŋguro losuŋ sɩ kɛnɛ dɩdaanɩŋ nɛ. Ba ja-laalɩŋ paa puu dɔŋɔ nɛ a kʋkɔ. Ba ja-jɩllaa lɩɩ dɩ-bolii nɛ a kʋkɔ. Ba file nɛ a kʋkɔ ba dʋndɔŋŋɔɔ lɛ a nagɛ kachuuŋ sɩɩ tuu dɩ ʋ joŋ kʋa.

ZƐKARƖYA 6:1

Mɩ bɩra beŋ, a na laalɩŋ janɩŋ torukoba banɛsɛ dɩ ba lɩɩ kɔlɩɩŋ peelee balɩa pɛgɛ a kʋkɔ.

Matiu 24:30

Ŋɩɩ nɛ ma jaŋ na mɩ-na Nuhuobiine Bie magɩlɩŋ wɩa-nyuŋ. Dɩ dʋnɩa nɩaa nɛ naʋ, ba kala jaŋ yel. Ŋɩɩ lɛ nɛ ma jaŋ na mɩ-na Nuhuobiine Bie, dɩ mɩ to duoŋ-bɩlɩmbaanaa tʋɔŋ kʋʋ tuu. Mɩ jaŋ kɛŋ doluŋ yʋgɛ a chaanɛ.

MOSIS BƖRA WULLI WƖA WOMBIIŊ 28:49

La TƖƖNA jaŋ kɛŋ tinteeŋ nɩaa yikoro ma sɩ bɩ nɩɩ a lɩɩ dʋnɩa lee sɩ bolie a kʋ hɛ ma lɛ dɩ ba yuoma a nagɛ kachuuŋ sɩ yie kʋ tuu jiŋŋee lɛ ŋɩɩ.

Jɔɔŋ Wʋnaalaa 1:7

Má bee na, ʋ nɛ to duoŋ-bɩlɩmbaanaa tʋɔŋ a kʋkɔ. Nʋʋkala jaŋ naʋ. Nɩalɩŋ ma sɩ joŋ kɩaa tɔbʋ jaŋ naʋ. Dʋnɩa nɩaa kala jaŋ yel ʋ wɩaa. Ŋɩɩ sɛnɛ jaŋ ŋaa. Amɩɩ.