JƐRƖMAAYA 33:11 - WƖA TENIŊ

¹¹ tʋɔtɔrɛ goŋ nɩmɛ. Ha-falaa arɩ ba balaba jaŋ bɩra ŋaa goŋ, dɩ nɩalɩŋ ma sɩ kɛŋ Wɩɩsʋlʋŋ kɩaa kɔ mɩ-na ma TƖƖNA dɩa dɩ ba lɔllɛmɛ bʋl, ‘Má lɔllɛ La TƖƖNA doluŋ kala Tɩɩna, bɛɛ wɩaa ʋ wɩaa zɔmɔ ʋ chonuŋ bɩ dɛrɛ.’ Mɩ jaŋ leŋ dɩ tinteeŋ deeŋ bɩra kɛŋ dʋa arɩ ʋ fa sɩ nagɛ ŋɩɩ. Mɩ-na ma TƖƖNA nɛ bʋla.”

JƐRƖMAAYA 33:11 ပူးပေါင်းရင်းမြစ်များ

1 IZIRAL TƖŊŊAA NAABARƖŊ 16:34

Má lɔllɛ La TƖƖNA, bɛɛ wɩaa ʋ wɩaa zɔmɔ, ʋ chonuŋ bɩ dɛrɛ.

1 IZIRAL TƖŊŊAA NAABARƖŊ 16:8

Má lɔllɛ La TƖƖNA, má yɩrɛ ʋ yɩrɩŋ. Má leŋ dɩ tinteyee nɩaa nɩɩ wɩalɩŋ ʋ sɩ ŋaa.

2 IZIRAL TƖŊŊAA NAABARƖŊ 20:21

Jehosafat sɩ bʋl wɩalɩŋ nɩalɩŋ teeŋ dɛrɛ, ʋ lɩɩsɛ nɩaa dɩ ba laa laalɩyuoro-la sɩpaaŋ a yɩɩ yɩɩlaa a pɩ La TƖƖNA, a dɛnnʋ a tɩŋ ʋ tʋla arɩ zɔmʋŋ wɩaa a bʋl, “Má lɔllɛ La TƖƖNA, ʋ chonuŋ bɩ dɛrɛ.”

2 IZIRAL TƖŊŊAA NAABARƖŊ 29:31

Ŋɩɩ nɛ Hezikaaya bʋla pɩ nɩalɩŋ, “Lɛɛlɛ, ma joŋ ma tɩtɩa a pɩ La TƖƖNA nɛ. Má kɛŋ pʋsʋŋ arɩ Wɩɩsʋlʋŋ kɩaa kɔ La TƖƖNA dɩɩ-bal-la a lɔllʋ.” Ŋɩɩ nɛ nɩalɩŋ ŋaa ŋɩɩ kuoro sɩ bʋla, a kɛŋ pʋsʋŋ arɩ Wɩɩsʋlʋŋ kɩalɩŋ kɔ a lɔllʋ. Ba dɔnsʋŋ ma kɛŋ kʋnyɩgaa Wɩɩsʋlʋŋ kɩaa kɔ ba tʋɔtɔrʋŋ lɛ.

2 IZIRAL TƖŊŊAA NAABARƖŊ 5:13

Ŋɩɩ nɛ nɩalɩŋ sɩɩ ŋmʋʋ nyilli-la arɩ yɩɩlɩ yɩɩra-la, kalenleŋ-duuroo, kɔnɩ-duuro arɩ cheŋ-duuro faasa yɩɩ yɩɩlaa hɛ dɔŋɔ a dɩdɛnnɛ La TƖƖNA aŋ pɛ lɔllʋ a bʋl, “La TƖƖNA wɩaa zɔmɔ, ʋ chonuŋ bɩ dɛrɛ.” Ŋɩɩ nɛ duoŋ-bɩlɩmbaanɩŋ kʋ tɔ La TƖƖNA dɩɩ-bal-la,

2 IZIRAL TƖŊŊAA NAABARƖŊ 7:3

Iziral tɩmma-la kala sɩ na nyiŋ-la sɩ kʋʋ tuu arɩ La TƖƖNA tʋla-la sɩ tɔ Wɩa dɩɩ-balɩŋ, ba kala tuu kpirimi a kɛŋ sɩaa chu tinteeŋ a chʋɔlɛ La TƖƖNA a lɔllʋ a bʋl, “La TƖƖNA wɩaa zɔmɔ, ʋ chonuŋ bɩ dɛrɛ.”

ƐZƖRA 6:22

Ba gbieli gbiele-la ba sɩ yie gbieli a dii boroboro sɩ bɩ sɩbʋrʋŋ kɛnɛ tapʋlaa balɩpɛ nɛ arɩ tʋɔtɔrʋŋ, bɛɛ wɩaa La TƖƖNA leŋe tʋɔtɔrʋŋ vɔgɛba nɛ, ʋ sɩ kɛŋ Asiiria kuoro tʋɔŋ bɩrɩmɛ ʋ pɛ ba lɛ ba saa Iziral tɩŋŋaa Wɩa dɩɩ-balɩŋ.

NƐHƖMAAYA 12:43

Tapʋlɩɩ-la ba kpʋ kɩaa yʋgɛ nɛ woruŋ a ŋaa Wɩɩsʋlʋŋ, aŋ jʋjʋɔsɛ, bɛɛ wɩaa Wɩa leŋe ba tʋɔŋ faasa tɔrɛ nɛ. Haalaa arɩ hambiisiŋ kala nɛ faa jʋɔsʋ. Dɩ ŋ nɛ paala hɛ dɩ-bolii ma, ŋ jaŋ wuo nɩɩ nɩaa sɩ jʋɔsa a ŋɩŋaa goŋ Jerusalɛm lɛ.

NƐHƖMAAYA 8:12

Ŋɩɩ nɛ nɩalɩŋ kala mʋ dɩ ba dii kɩaa aŋ nyʋa kɩaa a gbieli arɩ tʋɔtɔrʋŋ, aŋ pɛ ŋaa kʋdiile-la pɩ ba dɔnsʋŋ tɩŋŋaa, bɛɛ wɩaa ba nɩɩ wɩalɩŋ kala ba sɩ karɩma pɩba sɩaa nɛ.

WƖA YƖƖLAA 106:1

Má dɛnnɛ La Tɩɩna. Má lɔllɛ La Tɩɩna, bɛɛ wɩaa ʋ wɩaa zɔmɔ, ʋ chonuŋ bɩ dɛrɛ.

WƖA YƖƖLAA 107:1

Má lɔllɛ La Tɩɩna, bɛɛ wɩaa ʋ wɩaa zɔmɔ, ʋ chonuŋ bɩ dɛrɛ.

WƖA YƖƖLAA 107:22

Ʋ maga dɩ ba kpʋ pʋsʋŋ a ŋaa Wɩɩsʋlʋŋ a lɔllʋ, a yɩɩ yɩɩlaa arɩ tʋɔtɔrʋŋ a dagɛ wɩalɩŋ ʋ sɩ ŋaa.

WƖA YƖƖLAA 116:17

Mɩ jaŋ kpʋ pʋsʋŋ a ŋaa Wɩɩsʋlʋŋ a lɔllɛ La Tɩɩna, a yɩrɛ ʋ yɩrɩŋ.

WƖA YƖƖLAA 147:13

Ʋ nɛ ŋaa ma taŋ boi-baalaa kɛŋ doluŋ, aŋ ŋaa wʋzɔŋŋɔɔ ma pɩ ma nɩaa sɩ hɛ taŋ-la lɛ.

WƖA YƖƖLAA 85:7

La Tɩɩna, dagɛla ŋ chono-la sɩ bɩ dɛrɛ, aŋ laala ta.

AZAAYA 35:10

Nɩalɩŋ La TƖƖNA sɩ laa ta jaŋ mɩɩra kɔ, ba jaŋ yɩyɩɩ yɩɩlaa arɩ tʋɔtɔrʋŋ a jʋʋ Jerusalɛm. Tʋɔtɔrʋŋ dʋndʋŋa nɛ jaŋ ŋaa ba kʋa, tʋɔ-cheeŋ jaŋ fá lɛl ba teeŋ.

AZAAYA 51:11

Nɩalɩŋ La TƖƖNA sɩ laa ta jaŋ mɩɩra kɔ ʋ teeŋ. Ba jaŋ yɩɩ yɩɩlaa arɩ tʋɔtɔrʋŋ kʋ jʋʋ Jerusalɛm. Ba jaŋ nɩɩ sɩma a kaa mʋ wuu. Tʋɔtɔrʋŋ jaŋ faasa yʋgɛ ba teeŋ, dɩ hɛɛŋ arɩ tʋɔ-cheeŋ fa lɛl.

AZAAYA 51:3

Mɩ-na ma TƖƖNA jaŋ nyagɛ Zaayɔŋ nɩaa bɔyɛ a fá Jerusalɛm nɩaa nisusuŋ arɩ nɩalɩŋ kala sɩ hɛ ʋ jikpeeni-la lɛ. Mɩ jaŋ leŋ dɩ ʋ tintee-hɩlɩŋ kala mɩɩra nagɛ mɩ-na ma TƖƖNA ŋmaŋkaa-la fa sɩ hɛ Ɛdɩŋ lɛ. Ʋ tintee-hɩlɩɩ-la jaŋ nagɛ mɩ ŋmaŋkaaŋ. Tʋɔtɔrʋŋ jaŋ hɛ nɩmɛ, dɩ ba yɩɩ yɩɩlaa a dɩdɛnnɛmɛ.

AZAAYA 52:8

Nɩalɩŋ sɩ pɔ Jerusalɛm kala ka ŋaa goŋ nɛ arɩ tʋɔtɔrʋŋ. Dɩ La TƖƖNA nɛ mɩɩra kɔ Zaayɔŋ, ba jaŋ naʋ arɩ ba sɩɩŋ.

AZAAYA 52:9

Má gbaara yɩɩ yɩɩlaa arɩ tʋɔtɔrʋŋ, ma nɩalɩŋ sɩ ka Jerusalɛm jikpeeŋ lɛ. La TƖƖNA jaŋ laa Jerusalɛm nɩaa ta, aŋ nyagɛ ba nɩaa bɔyɛ.

JƐRƖMAAYA 16:9

Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla nɛ ŋ-la: Ŋ mɩɩsɩŋ lɛ, ŋ sɩɩŋ jaŋ na dɩ mɩ leŋe dɩ tʋɔtɔrɛ goŋ-la ba sɩɩ ŋaa kala dɛrɛ, dɩ ha-falaa arɩ ba balaba goŋ ma dɛrɛ leriŋ deeŋ.

JƐRƖMAAYA 17:26

Nɩaa jaŋ lɩɩ Juda tasɩŋ arɩ tabiisi-la sɩ golli Jerusalɛm a kɔ. Dɔnsʋŋ ma jaŋ lɩɩ Bɛnjamɩŋ tinteeŋ arɩ wɩɩjʋʋlʋŋ dɩɩrɩŋ dundollu-la sɩ hɛ peelee bʋbʋɔŋ, arɩ wɩɩpɔsʋŋ nadiiŋ tintee-la peelee sɩ yʋga. Ba jaŋ kɛŋ kʋnyɩgaa Wɩɩsʋlʋŋ kɩaa, pʋsʋŋ ma ba sɩ jaŋ kpʋ ŋaa Wɩɩsʋlʋŋ, mɩaa Wɩɩsʋlʋŋ kɩaa, kʋsʋɔrʋsʋŋ arɩ Wɩɩsʋlʋŋ kɩaa ma ba sɩ jaŋ kaa lɔllɛmɛ a kaa kɔ mɩ-na ma TƖƖNA dɩa.

JƐRƖMAAYA 25:10

Mɩ jaŋ leŋ dɩ tʋɔtɔrɛ goŋ-la ba sɩɩ ŋaa dɛrɛ, dɩ goŋ-la ha-falaa arɩ ba balaba ma sɩɩ ŋaa dɛrɛ. Nɔmʋŋ ma bɩra bɩ jaŋ dɔŋ, ba bɩ jaŋ nyɩgɛ chaanaa ma nɩmɛ.

JƐRƖMAAYA 29:14

ma jaŋ namɛ. Mɩ-na ma TƖƖNA nɛ bʋla. Mɩ jaŋ kɛmma mɩɩra lɩɩ yoŋ-baga-la kɔ. Mɩ jaŋ chɛ kɛsɛma a lɩɩ tinteye-la arɩ lere-la kala mɩ sɩ kɛmma pɩsa hɛ lɛ. Mɩ-na ma TƖƖNA nɛ bʋla. Mɩ jaŋ mɩɩra kɛmma kɔ lee-la ma fa sɩ hɛ, ka mɩ kɛmma mʋ yoŋ-baga.”

JƐRƖMAAYA 30:19

Ba jaŋ yɩɩ yɩɩlaa a lʋlɔllɛmɛ, aŋ ŋaa goŋ a jʋjʋɔsɛ. Mɩ jaŋ leŋ dɩ ba pʋŋa pɛ, ba bɩ jaŋ muuri. Mɩ jaŋ leŋ dɩ nɩaa zizilba, ba bɩ jaŋ bee gʋʋnɛba.

JƐRƖMAAYA 30:3

Tapʋlaa ka kɔ nɛ, mɩ-na ma TƖƖNA jaŋ kɛŋ mɩ nɩaa Iziral tɩŋŋaa arɩ Juda nɩaa mɩɩra lɩɩ yoŋ-baga kɔ, a bɩra leŋ dɩ ba hɔŋ tintee-la mɩ sɩ joŋo pɩ ba naabalɩmaba ʋ ŋaa ba kʋŋ lɛ. Mɩ-na ma TƖƖNA nɛ bʋla.”

JƐRƖMAAYA 32:44

Nɩaa jaŋ joŋ warɩpʋla a yɔɔ ŋmaŋkaanɩŋ, dɩ ba ŋmʋnsɛ tenniŋ a joŋ neniee, a kɛŋ tenni-la pilime tɔ ka dɩ nɩaa dii ŋaa pɛ-naaraa. Wɩɩŋ deeŋ jaŋ ŋaa Bɛnjamɩŋ tinteeŋ arɩ tabiisi-la sɩ golli Jerusalɛm lɛ. Ʋ jaŋ ŋaa Juda tasɩŋ arɩ tintee-la peelee sɩ yʋga lɛ, a pɛ wɩɩjʋʋlʋŋ dundollu-la sɩ hɛ peelee bʋbʋɔŋ arɩ wɩɩpɔsʋŋ nadiiŋ dɩɩrɩŋ, bɛɛ wɩaa mɩ jaŋ leŋ dɩ ba bɩra mɩɩra kɔ ba tinteeŋ. Mɩ-na ma Tɩɩna nɛ bʋla.”

JƐRƖMAAYA 33:26

ŋɩɩ-na mɩ fa jaŋ vɩa Jekɔb doho nɩaa arɩ mɩ tɩntɩnna Devit, a bɩ jaŋ lɩɩsɛ ʋ hambolibiisiŋ dɔŋɔ dɩ ʋ beŋ Abɩraham, Aɩzɩk arɩ Jekɔb doho nɩaa. Mɩ jaŋ leŋ dɩ ba bɩra mɩɩra kɔ ba tinteeŋ a fá ba nenige.”

JƐRƖMAAYA 33:7

Mɩ jaŋ kɛŋ Juda arɩ Iziral nɩaa mɩɩra lɩɩ yoŋ-baga-la ba sɩ yuo kɛsɛba mʋ a kɔ, a leŋ dɩ ba chɩŋ a nagɛ ŋɩɩ ba fa sɩ naga.

JƐRƖMAAYA 7:34

Mɩ jaŋ leŋ dɩ tʋɔtɔrɛ goŋ-la ha-falaa arɩ ba balaba sɩɩ ŋaa dɛrɛ Juda tasɩŋ arɩ Jerusalɛm womporunuŋ lɛ, bɛɛ wɩaa ba tinteeŋ jaŋ pɩŋ hoi.”

AMƆS 9:14

Mɩ jaŋ kɛŋ mɩ nɩaa Iziral tɩŋŋaa mɩɩra lɩɩ yoŋ-baga kɔ ba tɩtɩa tinteeŋ. Ba jaŋ paa ba tasɩ-la sɩ pɩŋ jikpeeŋ saa a jʋjʋʋ. Ba jaŋ pɛrɛ girep tɩɩsɩŋ bagɩsɩŋ a nyʋnyʋa ba sɩnɩŋ. Ba jaŋ pɛrɛ bagɩsɩŋ, a dii ba kɩaa.

JONA 2:9

Mɩ jaŋ yɩɩ yɩɩlaa a dɛnnɩŋ, aŋ ŋaa Wɩɩsʋlʋŋ pɩŋ. Mɩ sɩ hɛ niire-la kala, mɩ jaŋ chaarɛba. La TƖƖNA nɛ ŋaa Laataara.”

NAHUM 1:7

La TƖƖNA wɩaa zɔmɔ, ʋ nɛ nɩaa yie mʋ yuori dɩ wɩaa nɛ jʋʋba. Ʋʋ beŋ nɩalɩŋ kala sɩ laaʋ dii nyuŋ nɛ,

ZEFANAAYA 3:14

Zaayɔŋ nɩaa, má yɩɩ yɩɩlaa, Iziral tɩmma, má kpɩa wɩaa. Jerusalɛm nɩaa, má leŋ dɩ ma tʋɔŋ faasa tɔrɛ, dɩ ma jʋjʋɔsɛ.”

ZƐKARƖYA 10:7

Efirem nɩaa jaŋ mɩɩra nagɛ nɩduoruŋ dɩ ba tʋɔŋ tɔrɛ a nagɛ nɩa sɩ nyʋa girep nɛnɛɛ sɩnɩŋ. Ba biiriŋ jaŋ na ŋɩɩ dɩ ba tʋɔŋ tɔrɛ, dɩ ba jʋjʋɔsɛ mɩ-na ba TƖƖNA teeŋ.

ZƐKARƖYA 8:19

Wɩɩ-la La TƖƖNA doluŋ kala Tɩɩna sɩ bʋla nɛ ŋ-la: “Ma sɩ yie vɔɔ niiŋ chɛŋ-nɛsɛ, chɛŋ-nɔŋ, chɛŋ-pɛɩ arɩ chɛŋ-fii lɛ ŋɩɩ, ba jaŋ ŋaa jʋɔsa tapʋlɩa arɩ tʋɔtɔrɛ gbielee a pɩ ma Juda nɩaa. Ŋɩɩ wɩaa má cho wʋtɩtɩɩ, a hɔŋ arɩ fɩɛlɩŋ.”

ZƐKARƖYA 9:17

Ba jaŋ ŋaa nɩa sɩ zɔmɔ a kɛŋ buno. Bapʋɔsaa jaŋ dii tintee-la kɩaa a waa woruŋ, dɩ hatoloo ma nyʋa girep nɛnɛɛ sɩ-falɩŋ a kɛŋ buno.

Jɔɔŋ 3:29

Ha-falɩŋ tɩɩna nɛ tɩɩ haala, ama dɩ ha-falɩŋ tɩɩna nandɔŋɔ nɛ chɩŋ nɩmɛ a jijegili wɩalɩŋ ba sɩɩ bʋl, ʋ tʋɔŋ yie tɔrɛ nɛ dɩ ʋ nɛ nɩɩ ha-falɩŋ tɩɩna-la yikoro. Ŋɩɩ tɩtɩa nɛ mɩ tʋɔŋ ma tɔrɛ woruŋ Yesu nyuŋ.

Hiburu TƖŊŊAA 13:15

Ŋɩɩ wɩaa, la nɩalɩŋ sɩ wuo suri la niiŋ a bʋl arɩ Wɩa nɛ ŋaa La Tɩɩna, má leŋ dɩ la to Yesu Kirisito lɛ a dɛnnʋ bʋa na-kala lɛ, a leŋ dɩ ʋ yɩrɩŋ yɩrɛ.

Jɔɔŋ Wʋnaalaa 18:23

Chaanaa ma bɩra bɩ jaŋ chaanɛ ʋ tʋɔŋ. Baalaa arɩ haalaa bɩra bɩ jaŋ jaa dɔŋɔ ʋ lɛ. Babɩlɔŋ bayalaa nɛ fa ŋaa nɩbalaa dʋnɩa deeŋ lɛ. Ʋ kɛŋ ʋ chichiribi wɩaa a nyɩsɛ dʋnɩa nɩaa kala.