JƐRƖMAAYA 29:8 - WƖA TENIŊ

⁸ Wʋtɩtɩɩ, wɩɩ-la La TƖƖNA doluŋ kala Tɩɩna, Iziral tɩŋŋaa Wɩa bɩra sɩ bʋla nɛ ŋ-la: “Má sɩ́ leŋe dɩ ma nɩalɩŋ sɩ sɩ ba ŋaa mɩ wʋlaabʋllaa arɩ ma vʋgʋra-la sɩ guoli ma tʋɔŋ nyɩsɛma. Má sɩ́ jegile nɩɩ ba duoso-la ma sɩ yie leŋ ba nyuŋ nyaasɛ ba duduosi.

JƐRƖMAAYA 29:8 ပူးပေါင်းရင်းမြစ်များ

JƐRƖMAAYA 14:14

Ŋɩɩ nɛ La TƖƖNA bɩra bʋla pɩmɛ, “Nɩaa deemba bɩ mɩ wʋlaabʋllaa ŋaa, baa nyɩɛ wɩaa nɛ mɩ yɩrɩŋ lɛ. Mɩ bɩ ba tɩma koo a lɩɩsɛba koo a bʋl wɩɩ pɩba. Wɩalɩŋ ba sɩ na a nagɛ duosoo tʋɔŋ a bʋla pɩma ŋaa wʋnyɩɛrɩŋ nɛ, wʋyaayaasɩ-la ba sɩ vʋga nɩna, arɩ ba tɩtɩa tʋɔbɩɩnaa wɩalɩŋ ka nyɩsɛba nɛ.

JƐRƖMAAYA 23:16

Wɩɩ-la mɩ-na ma TƖƖNA doluŋ kala Tɩɩna sɩ bʋla nɛ ŋ-la: Má sɩ́ nɩalɩŋ sɩ nyɩɛ wɩaa arɩ ba ŋaa mɩ wʋlaabʋllaa a bʋl wɩalɩŋ pɩpɩma teeŋ jegilu. Ba leŋe ma kɛŋ yɩɛlaa sɩ bɩ jaŋ kʋ ŋaa wʋtɩtɩɩ nɛ. Ba yie bʋl wɩalɩŋ ba tɩtɩa sɩ bɩɩna nɛ a pɩpɩma, mɩ-na ma TƖƖNA dee bɩ wɩalɩŋ bʋla.

JƐRƖMAAYA 23:21

Mɩ dee bɩ wʋlaabʋllaa deemba tɩma, ama ba tɩtɩa tɩndaarɩŋ nɛ ba kaa mʋ. Mɩ bɩ wɩɩ bʋla pɩba, ka ba mʋ bʋl wɩaa mɩ yɩrɩŋ lɛ.

JƐRƖMAAYA 23:25

Mɩ nɩa dɩ nɩalɩŋ sɩ nyɩɛ bʋbʋl wɩaa mɩ yɩrɩŋ lɛ sɩ, ‘Mɩ duoso nɛ! Mɩ duoso nɛ.’

JƐRƖMAAYA 23:27

Ba bɩɩna ba sɩ bʋl duosoo wɩaa pɩpɩ dɔŋɔ ŋɩɩ jaŋ leŋ dɩ mɩ nɩaa yʋ mɩ wɩaa, arɩ ba naabalɩmaba sɩ kpaarɛ vene-la ba sɩɩ yɩrɛ Baal a yʋ mɩ wɩaa ŋɩɩ.

JƐRƖMAAYA 27:9

Ŋɩɩ wɩaa, má sɩ́ ma nɩalɩŋ sɩ sɩ ba ŋaa mɩ wʋlaabʋllaa, ma vʋgʋraa, ma nɩalɩŋ sɩɩ dagɛ duosoo bʋbʋɔŋ, ma chichiribee arɩ kantɔŋ yɩrɩraa teeŋ jegilu, nɩalɩŋ sɩ bʋla pɩma arɩ ma bɩ jaŋ tɩma pɩ Babɩlɔŋ kuoro.

JƐRƖMAAYA 28:15

Ŋɩɩ nɛ Wɩa wʋlaabʋlla Jɛrɩmaaya bʋla pɩ wʋnyɩɛrɩ Wɩa wʋlaabʋlla Hananaaya, “Hananaaya, jegile nɩɩ, La TƖƖNA dee bɩŋ tɩma, ka ŋ nyɩɛ wɩaa a leŋ tinteeŋ deeŋ nɩaa laa ŋ wʋnyɩɛrɩ-la dii.

JƐRƖMAAYA 29:1

Teŋ-la Jɛrɩmaaya sɩ ŋmʋnsa Jerusalɛm lɛ a kaa mʋ pɩ nɩhɩasɩ-la sɩ hɛ yoŋ-baga lɛ arɩ Wɩɩsʋllɩ sɩpaalaaraa, Wɩa wʋlaabʋllaa arɩ nɩalɩŋ kala Nebukadineza sɩ kɛsɛ lɩɩ Jerusalɛm a kaa mʋ Babɩlɔŋ nɛ ŋ-la.

JƐRƖMAAYA 29:15

Ma jaŋ wuo bʋl, “La TƖƖNA lɩɩsɛ ʋ wʋlaabʋllaa pɩla nɛ Babɩlɔŋ lɛ.”

JƐRƖMAAYA 29:21

Wɩɩ-la mɩ-na ma TƖƖNA doluŋ kala Tɩɩna, Iziral tɩŋŋaa Wɩa sɩ bʋla tɩgɛ Kolaaya nanʋala Ahab arɩ Maasɛya nanʋala Zedikaaya lɛ nɛ ŋ-la. Ba nyɩɛ wɩaa nɛ pɩpɩma mɩ yɩrɩŋ lɛ: Mɩ jaŋ jomba hɛ Babɩlɔŋ kuoro Nebukadineza nɩsɩŋ lɛ dɩ ʋ kpʋba ma sɩɩŋ lɛ.

JƐRƖMAAYA 29:23

Ba ŋaa wɩalɩŋ sɩ bɩ bana kɛnɛ nɛ Iziral tinteeŋ lɛ. Ba kɛŋ ba dɔnsʋŋ tɩŋŋaa haalaa pɩŋ nɛ, aŋ nyɩɛ wɩaa ma mɩ yɩrɩŋ lɛ, ka mɩ bɩ wɩɩ bʋla pɩba. Mɩ jɩŋ wɩɩ-la ba sɩ ŋaa nɛ, aŋ ŋaa nʋʋ sɩ pɛ na wɩɩ-la. Mɩ-na ma TƖƖNA nɛ bʋla.”

JƐRƖMAAYA 37:9

Wɩɩ-la mɩ-na ma TƖƖNA sɩ bʋla nɛ ŋ-la: Má sɩ́ ma tɩtɩa nyɩsʋ a bʋl, ‘Babɩlɔŋ tɩmma-la jaŋ lenla.’ Ba bɩ jaŋ lemma.

JƐRƖMAAYA 5:31

Mɩ wʋlaabʋllaa sɩ nyɩɛ wɩaa arɩ baa bʋl wɩaa Wɩa doluŋ lɛ nɛ. Ka Wɩɩsʋllɩ sɩpaalaaraa ma mɩɩra ŋɩŋaa wɩaa ba tɩtɩaba doluŋ lɛ. Mɩ nɩaa ma cho ŋɩɩ ba sɩɩ ŋaa. Ama wʋbɛɛ nɛ ma jaŋ ŋaa wɩaa deemba dɩdɛrɩŋ?”

JEMBIEE 2:14

Wɩalɩŋ ma Wɩa wʋlaabʋllaa sɩ na arɩ duosoo tʋɔŋ, ŋaa wʋnyɩɛrɩŋ nɛ a bɩ bʋbʋɔ kala kɛnɛ. Ba bɩ leŋe ma jɩŋ dɩ ma ŋaa wʋbɔŋŋɔɔ, dɩ ŋɩɩ fa leŋ dɩ ma sɩ́ yoŋ-baga mʋ. Wɩalɩŋ ba sɩ bʋla pɩma ŋaa wʋnyɩɛrɩŋ nɛ a kɛmma yeŋŋi.

ƐZƖKƖƐL 13:6

Wɩalɩŋ ba sɩ na a nagɛ duosoo tʋɔŋ, arɩ ba vʋgʋrʋ wɩaa ŋaa wʋnyɩɛrɩŋ nɛ. Ba sɩ, ‘La TƖƖNA nɛ bʋla,’ ka mɩ-na ma TƖƖNA bɩ ba tɩma, ka ba ha bɩɩnɛ arɩ wɩalɩŋ ba sɩ bʋla jaŋ kʋ ŋaa wʋtɩtɩɩ.

MƖKA 2:11

Dɩ wʋnyɩɛrʋ nɛ fa kʋ nyɩsɛma a bʋl, ‘Mɩ jaŋ bʋl wɩaa Wɩa doluŋ lɛ arɩ girep nɛnɛɛ sɩnɩŋ arɩ sɩ-duoruŋ jaŋ pʋrɩgɛ,’ wʋlaabʋlla deeŋ doho nɛ ma nɩaa deemba chɩchɛ.”

ZƐKARƖYA 13:4

Tapʋlɩɩ-la, hɩɩsɩŋ jaŋ kɛŋ wʋnyɩɛrɩ wʋlaabʋllʋ kala a mʋ tɩgɛ wɩalɩŋ ʋ sɩɩ na arɩ duosoo tʋɔŋ lɛ. Ʋ bɩ jaŋ laalɛ ʋ wʋnyɩɛrɩ wʋlaabʋllʋ gɛrɩŋ sɩ kɛŋ pʋnaa aa nyɩsɛ nɩaa.

Matiu 24:24

Nɩaa dɔnsʋŋ jaŋ sii fugo bʋl dɩ ba nɛ ŋaa Kirisito, nɩɩ-la Wɩa sɩ lɩɩsa. Dɔnsʋŋ ma jaŋ sii fugo bʋl ba ŋaa Wɩa wʋlaabʋllaa nɛ. Ba jaŋ ŋaa wʋmagɩlaa arɩ wʋkpuŋkperisiŋ kala a chɩchɛ dɩ ba nyɩsɛ nɩalɩŋ Wɩa sɩ lɩɩsa dɩ baa toba, dɩ ba nɛ wuolo.

Luuk 21:8

Ŋɩɩ nɛ Yesu bʋla pɩba, “Má kɛŋ ma tɩtɩa woruŋ dɩ nʋʋkala sɩ́ ma nyɩsʋ,” a bɩra bʋl, “Nɩaa jaŋ yʋgɛ a kɔ a joŋ mɩ yɩrɩŋ hɛ arɩ ba nɛ ŋaa Kirisito, a bʋl dɩ bʋa-la dʋnɩa sɩ jaŋ dɛrɛ kpaga nɛ. Ama má sɩ́ ba harɩŋ to.

Luuk 6:26

Dɩ nɩaa kala nɩɩ bɛsɛ ma lɛ, ma ma jaŋ na hɛɛŋ, bɛɛ wɩaa la naabalɩmaba Juu tɩŋŋaa ma bɛsɛ nɩalɩŋ fa sɩ nyɩɛ wɩaa arɩ ba ŋaa Wɩa wʋlaabʋllaa lɛ nɛ.”

Rom Tɩŋŋaa 16:18

Nɩaa deemba bɩ La Tɩɩna Kirisito tɩntɩŋŋaa ka tɩŋ, ama ba tɩtɩa wʋchooloo nɛ baa ŋaa. Ba yie kɛŋ nii-sɩma a nyɩsɛ nɩalɩŋ sɩ bɩ wɩaa jɩŋ.

Ɛfɛsɩs Nɩaa 4:14

Ŋɩɩ-na la bɩra bɩ jaŋ ŋaa hambiisi Wɩa wɩaa lɛ, dɩ wʋwogusu-la nɩaa dɔnsʋŋ sɩɩ dagʋ a mʋ tɩgɛ Wɩa wɩaa lɛ kɛnla begili. La bɩ jaŋ to nɩalɩŋ sɩɩ nyɩɛ wɩaa, a kɛŋ badɛrɩŋ nyɩnyɩsɛ nɩaa, dɩ ba joŋ wɩalɩŋ ba sɩ laa dii ta.

Ɛfɛsɩs Nɩaa 5:6

Má sɩ́ leŋe dɩ nʋʋkala kɛŋ wʋnyɩɛrɩŋ a nyɩsɛma. Wɩaa deemba nɛ leŋe Wɩa baanɩŋ sisii nɩalɩŋ sɩ bɩ ʋ niiŋ ka to nyuŋ.

2 Tɛsalonaaka Nɩaa 2:3

Má sɩ́ leŋe dɩ nʋʋkala nyɩsɛma wombii kala lɛ. Tapʋlɩɩ-la bɩ jaŋ yi, see dɩ nɩaa sii ŋaa taawɛɩ a vɩa Wɩa. Ŋɩɩ harɩŋ lɛ wʋbɔŋŋɔɔ kuoro, nɩɩ-la Wɩa sɩ jaŋ joŋo hɛ nyiniŋ lɛ, jaŋ kɛŋ ʋ tɩtɩa kaa dagɛ nɩaa.

2 Timoti 3:13

Ama nɩbɔŋŋɔɔ arɩ nɩalɩŋ sɩ gɔllɔɔ nyɩsɛ nɩaa jaŋ wasa ŋɩŋaa wʋbɔŋŋɔɔ. Ba jaŋ nyɩsɛ nɩaa aŋ pɛ nyɩnyɩsɛ ba tɩtɩa maa.

1 Jɔɔŋ 4:1

Mɩ bii-chooloo, dɩ nɩaa nɛ sɩ dɩ ba kɛŋ doluŋ a wuo bʋl wɩaa, Wɩa Dɩŋ-zɔŋ-la doluŋ lɛ, má sɩ́ guu laa dii arɩ baa bʋl wʋtɩtɩɩ nɛ. Má laa sɩpaaŋ magɩsɛba na arɩ ba sɛnɛ ŋaa Wɩa wʋlaabʋllaa nɛɛ. Bɛɛ wɩaa wʋnyɩɛrɩ Wɩa wʋlaabʋllaa yʋga nɛ a hɛ dʋnɩa lɛ.

Jɔɔŋ Wʋnaalaa 13:14

A tɩŋ wʋmagɩla-la ba sɩ pʋ doluŋ ʋ ŋaa bumbuŋ baga kʋ-la nyuŋ, ʋ nyɩsɛ dʋnɩa nɩaa dɩ ba mɛ kʋŋ sɩ nagɛ bumbuŋ baga kʋ-la, kʋ-la ba sɩ pɩra arɩ tokobiiŋ ka ʋ ha wei.

Jɔɔŋ Wʋnaalaa 19:20

Nɩɩ-la sɩ jɩl jɔɔ-la arɩ ʋ laalɩyuoroo yuo dii baga kʋ-la a kɛŋ ʋ dɩ nɩɩ-la sɩ nyɩɛ wɩaa arɩ ʋ ŋaa Wɩa wʋlaabʋllʋ kala. Nɩɩ-la fa sɩ ŋaa wʋmagɩlaa baga kʋ-la nyuŋ a wuo nyɩsɛ nɩalɩŋ sɩ kɛŋ baga kʋ-la magɩlɩŋ, aa chʋɔlɛ baga kʋ-la nagɩsɩŋ ba sɩ mɛ bil. Nɩaa deemba balɩa kʋweyee nɛ ba joŋo yuo hɛ Wɩa nyiŋ-la sɩɩ dii a nagɛ jiribiiŋ lɛ.