JƐRƖMAAYA 29:11 - WƖA TENIŊ

¹¹ Mɩ jɩŋ tʋɔbɩɩna-la mɩ sɩ kɛnɛ arɩ ma nɛ. Mɩ-na ma TƖƖNA nɛ bʋla. Mɩ kɛŋ mɩ tʋɔŋ dɩ mɩ ŋaama woruŋ nɛ, mɩ bɩ chɛ dɩ mɩ ŋaa wʋbɔŋ ma lɛ. Mɩ kɛŋ mɩ tʋɔŋ dɩ mɩ leŋ dɩ ma kɛŋ yɩɛlaa nɛ, dɩ ma chie zɔŋ.

JƐRƖMAAYA 29:11 ပူးပေါင်းရင်းမြစ်များ

JOB 23:13

Ama dɩ Wɩa nɛ chɩna dɩ ʋ ŋaa wɩɩ, nʋʋkala bɩ ʋ wuo kaa bɩrɩmɛ. Ʋ yie ŋaa wɩɩ-la kala ʋ sɩɩ chɛ nɛ.

WƖA YƖƖLAA 33:11

Ama wɩalɩŋ La Tɩɩna-na sɩ bɩɩna dɩ ʋ ŋaa jaŋ chɩŋ a kaa mʋ wuu. Ʋ tʋɔbɩɩnaa jaŋ chɩŋ a kaa mʋ wuu.

WƖA YƖƖLAA 40:5

Mɩ Tɩɩna Wɩa, ŋ ŋaa wʋkpuŋkperisiŋ yʋgɛ nɛ. Wɩalɩŋ ŋ ha sɩɩ bɩɩnʋ dɩ ŋ ŋaa pɩla, nʋʋ bɩ jaŋ wuo dɩɩsɛba. Dɩ mɩ nɩɩ chɛ mɩ dagɛba pɩ nɩaa, ba jaŋ yʋga kɩɩ dɩɩsɩŋ.

WƖA YƖƖLAA 85:9

Ʋ ŋaa siri nɛ dɩ ʋ laa nɩalɩŋ sɩɩ fáʋ a ta, dɩ ŋɩɩ leŋ dɩ ʋ tʋla wuo hɛ la tinteeŋ lɛ.

AZAAYA 27:4

Mɩ bɩra bɩ baanɩŋ na mɩ tɩɩnɛnɛɛ baga-la nyuŋ. Ama dɩ ʋ nɛ fa nagɛ sɔ-lugunuŋ a chɩchɛ dɩ ba walɩmɛmɛ, mɩ jaŋ kpʋba a nyɩga ta.

JƐRƖMAAYA 23:5

La TƖƖNA sɩ, “Tapʋlaa ka kɔ nɛ, dɩ mɩ lɩɩsɛ tʋɔpʋl Tɩɩna Devit doho nɩaa tʋɔŋ, ʋ jaŋ ŋaa kuoru sɩ jaŋ beŋ ʋ nɩaa arɩ wʋjɩmɩŋ. Ʋ jaŋ kɛŋ wʋtɩtɩɩ, a ŋaa wɩaa ba bʋa lɛ tintee-la lɛ.

JƐRƖMAAYA 23:6

Ʋ kuoruŋ bʋa lɛ, ʋ jaŋ laa Juda nɩaa ta, dɩ Iziral nɩaa ma hɔŋ sɔm. Yɩrɩ-la ba sɩ jaŋ yɩyɩrʋ nɛ: La TƖƖNA nɛ ŋaa la kɛŋ tʋɔpʋla koo La TƖƖNA nɛ laala ta arɩ wʋtɩtɩɩ.”

JƐRƖMAAYA 24:5

“Wɩɩ-la mɩ-na ma TƖƖNA, Iziral tɩŋŋaa Wɩa sɩ bʋla nɛ ŋ-la: A nagɛ tutogi-nambɩlɩa-la sɩ zɔmɔ ŋɩɩ, ŋɩɩ nɛ mɩ joŋ Juda nɩalɩŋ ba sɩ kɛsɛ mʋ yoŋ-baga ba ma nagɛ. Ba nɛ mɩ leŋ ba lɩɩ leriŋ deeŋ ŋɩɩ a mʋ Babɩlɔŋ tinteeŋ.

JƐRƖMAAYA 30:10

Ŋɩɩ wɩaa, má sɩ́ fawʋllʋŋ fá, mɩ tɩntɩnna Jekɔb doho nɩaa. Iziral tɩmma, má sɩ́ leŋe dɩ ma niiree maa. Mɩ-na ma TƖƖNA nɛ bʋla. Mɩ jaŋ sɛnɛ laama ta tintee-bolii-la ma sɩ hɛ lɛ a kɛmma kɔ dɩa. Mɩ jaŋ laa ma doho nɩalɩŋ sɩ hɛ yoŋ-baga lɛ ta. Iziral tinteeŋ jaŋ bɩra kɛŋ fɩɛlɩŋ dɩ ba hɔŋ sɔm, nʋʋkala bɩ jaŋ ŋaa dɩ fawʋllʋŋ kɛmba.

JƐRƖMAAYA 30:9

Ama, ba jaŋ tɩma pɩ mɩ-na ba TƖƖNA Wɩa a tɩma pɩ Devit doho nɩɩ-la mɩ sɩ jaŋ lɩɩsɛ dɩ ʋ ŋaa ba kuoro.

JƐRƖMAAYA 33:6

Ama arɩ ŋɩɩ kala, mɩ ha jaŋ pɩ mɩ nɩaa yarɩfɩɛlaa dɩ ba duori. Mɩ jaŋ vaarɛba a leŋ dɩ ba tinteeŋ chaasa kɛŋ fɩɛlɩŋ dɩ ba hɔŋ sɔm.

JEMBIEE 3:26

Ʋ ŋaa wʋzɔŋ nɛ dɩ ŋ nyalɩmɛ a gbɛrɛ La TƖƖNA dɩ ʋ laaŋ ta.

ƐZƖKƖƐL 11:16

Ŋɩɩ wɩaa, bʋla pɩ nɩalɩŋ sɩ hɛ yoŋ-baga lɛ, ‘Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Mɩ nɛ fa leŋe ba mʋ tintee-wogusuŋ a kɛmba pɩsa hɛ tinteyee sɩ bolie lɛ, ama mɩ hɛ ba teeŋ nɛ a pɔba tinteye-la kala lɛ ba sɩ mʋa.’

HOSIA 3:5

Ʋ ŋɩɩ harɩŋ lɛ, Iziral tɩŋŋaa jaŋ mɩɩra chɛ ba TƖƖNA Wɩa arɩ ba kuoro Devit leriŋ. Ba jaŋ fɩfá La TƖƖNA a kɔ ʋ teeŋ tapʋlaa dɩdɛrɩŋ a chɩchɛ dɩ ʋ pɛ ba lɛ dɩ ba na wʋzɔŋŋɔɔ.

MƖKA 4:12

Ama ba bɩ mɩ-na ma TƖƖNA tʋɔbɩɩnaa jɩŋ, ba bɩ wɩalɩŋ mɩ sɩɩ bɩɩnʋ dɩ mɩ ŋaa bʋbʋɔŋ jɩŋ. Mɩ kɛmba kʋ hɛ dɔŋɔ lɛ a nagɛ mɩɩ-jagɩsɩŋ ba sɩ kaa hɛ dɔŋɔ taha lɛ nɛ.

ZƐKARƖYA 1:6

Ama mɩ niiŋ wɩaa arɩ mɩ niiri-la mɩ sɩ joŋo dagɛ mɩ tɩntɩnnaa sɩ ŋaa mɩ wʋlaabʋllaa dii ma naabalɩmaba nɛ. Ŋɩɩ nɛ ba bɩrɩma lɩɩ ba wʋbɔŋŋɔɔ lɛ aŋ bʋl, ‘La TƖƖNA doluŋ kala Tɩɩna joŋ la wombiee arɩ la wʋŋaalaa sɩ nagɛ ŋɩɩ chɩmɩŋ nɛ a tiŋ la lɛ, arɩ ŋɩɩ ʋ sɩ bɩɩna dɩ ʋ ŋaa.’ ”

ZƐKARƖYA 13:9

Kʋbala deeŋ ma, mɩ jaŋ joŋu hɛ nyiniŋ lɛ. Mɩ jaŋ wasɛba ta a nagɛ ba sɩ yie joŋ hɔpʋla hɛ nyiniŋ lɛ a lɩɩsɛ ʋ hɔɔ-bɩnɩŋ ta ŋɩɩ. Mɩ jaŋ magɩsɛba na a nagɛ ba sɩ yie joŋ sɛlɩmɛ hɛ nyiniŋ lɛ a magɩsa na ʋ zɔmʋŋ ŋɩɩ. Ba jaŋ yɩrɛmɛ dɩ mɩ sɛɩ. Mɩ jaŋ bʋl, ‘Ba ŋaa mɩ nɩaa nɛ,’ dɩ ba ma bʋl, ‘La TƖƖNA nɛ la Wɩa.’ ”