JƐRƖMAAYA 23:8 - WƖA TENIŊ

⁸ Ama ba jaŋ bʋl, ‘La ŋmɩɛsɛ La TƖƖNA sɩ weye a kɛŋ Iziral tɩŋŋaa kaa lɩɩ wɩɩpɔsʋŋ nagʋa tinteeŋ lɛ arɩ tinteye-la kala lɛ ʋ sɩ kɛmba pɩsa hɛ.’ Ŋɩɩ nɛ ba jaŋ bɩra hɔŋ ba tɩtɩa tinteeŋ lɛ.”

JƐRƖMAAYA 23:8 ပူးပေါင်းရင်းမြစ်များ

AZAAYA 11:11

Dɩ bʋa-la nɛ yie, La TƖƖNA jaŋ tiire laa ʋ nɩkaanaa a lɩɩ Asiiria arɩ Ijipiti sɛmɛ-la sɩ hɛ bʋbʋɔŋ arɩ Ijipiti sɛmɛ sɩ hɛ nyuŋ arɩ Kus, Ɛlam, Babɩlɔŋ, Hamaf a pɛ tinteye-la kala mʋgʋ-balɩŋ sɩ gollo chu lɛ.

AZAAYA 14:1

La TƖƖNA jaŋ fá Iziral tɩŋŋaa nenige. Ʋ jaŋ bɩra lɩɩsɛ Iziral tɩŋŋaa dɩ ba ŋaa ʋ nɩaa, a leŋ dɩ ba hɔŋ ba tɩtɩa tinteeŋ lɛ. Nɩwogusuŋ jaŋ kʋ pɛ hɔŋ Jekɔb doho nɩalɩŋ tinteeŋ lɛ dɩ ba niiŋ ŋaa kʋbala.

JƐRƖMAAYA 16:14

La TƖƖNA bɩra sɩ, “Tapʋlaa ka kɔ nɛ, nɩaa bɩra bɩ jaŋ bʋl, ‘La ŋmɩɛsɛ La TƖƖNA sɩ weye, ʋ nɛ kɛŋ Iziral tɩŋŋaa kʋ lɩɩ Ijipiti tinteeŋ lɛ.’

JƐRƖMAAYA 16:15

Ama ba jaŋ bʋl, ‘La ŋmɩɛsɛ La TƖƖNA sɩ weye, ʋ nɛ kɛŋ Iziral tɩŋŋaa kaa lɩɩ wɩɩpɔsʋŋ nagʋa tinteeŋ arɩ tinteye-la kala lɛ ʋ sɩ kɛmba pɩsa hɛ.’ Mɩ jaŋ bɩra leŋ dɩ ba kʋ tɩɩ tintee-la mɩ sɩ joŋo pɩ ba naabalɩmaba.

JƐRƖMAAYA 23:3

Mɩ tɩtɩa jaŋ kɛŋ mɩ nɩaa nɩkaana-la kaa kʋ lɩɩ tinteye-la lɛ mɩ sɩ kiriba mʋ hɛ, a kɛmba mɩɩra kɔ ba tɩtɩa tinteeŋ. Dɩ ba nɛ kɔ nɩmɛ, ba jaŋ lʋl biiriŋ, a pʋŋa yʋgɛ.

JƐRƖMAAYA 29:14

ma jaŋ namɛ. Mɩ-na ma TƖƖNA nɛ bʋla. Mɩ jaŋ kɛmma mɩɩra lɩɩ yoŋ-baga-la kɔ. Mɩ jaŋ chɛ kɛsɛma a lɩɩ tinteye-la arɩ lere-la kala mɩ sɩ kɛmma pɩsa hɛ lɛ. Mɩ-na ma TƖƖNA nɛ bʋla. Mɩ jaŋ mɩɩra kɛmma kɔ lee-la ma fa sɩ hɛ, ka mɩ kɛmma mʋ yoŋ-baga.”

JƐRƖMAAYA 30:10

Ŋɩɩ wɩaa, má sɩ́ fawʋllʋŋ fá, mɩ tɩntɩnna Jekɔb doho nɩaa. Iziral tɩmma, má sɩ́ leŋe dɩ ma niiree maa. Mɩ-na ma TƖƖNA nɛ bʋla. Mɩ jaŋ sɛnɛ laama ta tintee-bolii-la ma sɩ hɛ lɛ a kɛmma kɔ dɩa. Mɩ jaŋ laa ma doho nɩalɩŋ sɩ hɛ yoŋ-baga lɛ ta. Iziral tinteeŋ jaŋ bɩra kɛŋ fɩɛlɩŋ dɩ ba hɔŋ sɔm, nʋʋkala bɩ jaŋ ŋaa dɩ fawʋllʋŋ kɛmba.

JƐRƖMAAYA 30:3

Tapʋlaa ka kɔ nɛ, mɩ-na ma TƖƖNA jaŋ kɛŋ mɩ nɩaa Iziral tɩŋŋaa arɩ Juda nɩaa mɩɩra lɩɩ yoŋ-baga kɔ, a bɩra leŋ dɩ ba hɔŋ tintee-la mɩ sɩ joŋo pɩ ba naabalɩmaba ʋ ŋaa ba kʋŋ lɛ. Mɩ-na ma TƖƖNA nɛ bʋla.”

JƐRƖMAAYA 31:8

Má bee na, mɩ jaŋ kɛmba lɩɩ wɩɩpɔsʋŋ nagʋa tinteeŋ dɩɩrɩŋ a kɔ, mɩ jaŋ kɛmba lɩɩ dʋnɩa sɛmɛ na-kala a kʋ hɛ dɔŋɔ. Nyʋlɩmaa arɩ gbɛrɩgɛɛ jaŋ hɛ ba tʋɔŋ, hapuugoo arɩ haalaa sɩɩ chɛ ba lʋl ba luoruŋ wʋwɩɩ ma jaŋ hɛ ba tʋɔŋ. Ba jaŋ yʋgɛ woruŋ a mɩɩra kɔ.

JƐRƖMAAYA 32:37

Mɩ jaŋ sɛnɛ kɛsɛba hɛ dɔŋɔ lɛ a kaa lɩɩ tinteye-la kala lɛ mɩ sɩ chaasa na baanɩŋ mɩ yaraa hosi mɩ kiriba hɛ lɛ. Mɩ jaŋ kɛmba mɩɩra kɔ leriŋ deeŋ dɩ ba hɔŋ sɔm.

JƐRƖMAAYA 8:3

Lee na-kala mɩ sɩ vɩa tintee-bɔmʋŋ deeŋ nɩaa ta, nɩkaana-la sɩ bɩ sʋba jaŋ cho sʋʋŋ a kɩɩ mɩɩsɩŋ. Mɩ-na ma TƖƖNA doluŋ kala Tɩɩna nɛ bʋla.”

ƐZƖKƖƐL 28:25

Wɩɩ-la mɩ-na ma TƖƖNA Wɩɩjarɩbakɔ sɩ bʋla nɛ ŋ-la: Dɩ mɩ nɛ kɛŋ Iziral tɩŋŋaa lɩɩ lere-la kala ba sɩ pɩsa hɛ a kaa kʋ hɛ dɔŋɔ, tinteye-la jaŋ jɩŋ arɩ mɩ bɩ disiniŋ kɛnɛ. Iziral tɩŋŋaa jaŋ hɔŋ ba tɩtɩa tinteeŋ lɛ, tintee-la mɩ fa sɩ joŋo pɩ mɩ tɩntɩnna Jekɔb.

ƐZƖKƖƐL 34:13

Mɩ jaŋ lɩɩsɛba tintee-wogusuŋ lɛ, a kɛmba hɛ dɔŋɔ a mɩɩra kɛmba kɔ ba tɩtɩa tinteeŋ. Mɩ jaŋ kɛmba mɩɩra kɔ Iziral tinteeŋ dɩ ba dii yaŋ peelee arɩ ba fuo-luŋoo arɩ lere-la kala ba sɩ hɔnɔ lɛ.

ƐZƖKƖƐL 36:24

Mɩ jaŋ kɛmma lɩɩ tintee-wogusuŋ kala tʋɔŋ, a kɛmma mɩɩra kɔ ma tɩtɩa tinteeŋ.

ƐZƖKƖƐL 36:35

Ba jaŋ bʋl, ‘Tinteeŋ deeŋ fa sɩ pɩŋ kʋŋkʋlʋŋ ŋɩɩ, lɛɛlɛ ʋ mɩɩra nagɛ Ɛdɩŋ ŋmaŋkaa-la nɛ, tabalaa deemba fa pɩŋ jikpeeŋ nɛ a ŋaa hoi a kala chei, ba lɛ nɛ nɩaa lɛɛlɛ hɛ ŋɩɩ a saa kɛrɩsɩŋ golli.’

ƐZƖKƖƐL 37:25

Ba jaŋ hɔŋ tintee-la mɩ fa sɩ joŋo pɩ mɩ tɩntɩnna Jekɔb lɛ, lee-la ba naabalɩmaba fa sɩ hɔnɔ. Ba dɩ ba biiriŋ arɩ ba nihee kala jaŋ hɔŋ nɩmɛ a kaa mʋ wuu. Mɩ tɩntɩnna Devit nɛ jaŋ ŋaa ba sɩpaalaara a kaa mʋ wuu.

ƐZƖKƖƐL 39:28

Ŋɩɩ lɛ nɛ mɩ nɩaa jaŋ jɩŋ arɩ mɩ nɛ ba TƖƖNA Wɩa, a kɛmba mʋ yoŋ-baga tintee-wogusuŋ lɛ, aŋ kɛmba mɩɩra kɔ ba tɩtɩa tinteeŋ. Ba kʋbala ma bɩ harɩŋ ka.

JOWƐL 3:7

Má bee na, mɩ jaŋ kɛmba lɩɩ lere-la ma sɩ yallɛba hɛ. Mɩ jaŋ joŋ wɩɩ-la ma sɩ ŋaa ba lɛ a timma.

MƖKA 7:15

Ŋɩɩ nɛ La TƖƖNA bʋl, “Mɩ jaŋ ŋaa wʋmagɩlaa dagɛma a nagɛ bʋa-la mɩ fa sɩ kɛmma kʋ lɩɩ Ijipiti tinteeŋ lɛ.”

ZEFANAAYA 3:20

Bʋa-la lɛ, mɩ jaŋ kɛsɛma kʋ hilimi. Bʋa-la nɛ yie, mɩ jaŋ kɛsɛma kɔ dɩa. Mɩ jaŋ leŋ dɩ dʋnɩa nɩaa kala bɩbɛsɛ ma lɛ a zizilma dɩ mɩ nɛ leŋe dɩ ma bɩra dʋa ba sɩɩŋ lɛ.” La TƖƖNA nɛ bʋla.