8 Ʋ jaŋ nagɛ tɩa ba sɩ chɔnsɔ a kpagɛ lɩɩŋ, ʋ naapoloo tɛllɛ mʋ jʋʋ fuoŋ. Ʋ bɩ lɩmɩŋ ka fá. Ʋ pɩpaarɩŋ yie biri nɛ bʋa na-kala lɛ. Ʋ-na sɩpaa tuo, dɩ hɩlɩŋ nɛ chɩna ma, ʋ yie nɩnɛŋ bʋa na-kala lɛ nɛ.
Mɩ fa nagɛ tɩa nɛ, mɩ naapoloo tuu tɩgɛ lɩɩŋ lɛ, nyalɩŋ ma nyala hɩhɛ mɩ naakelee lɛ tɩtaŋ na-kala.
Ba nagɛ tɩa sɩ vɔgɛ lɩɩŋ nɛ, ka wɩa ma pɔsɔ hɩhɛ ʋ lɛ, ʋ naakelee jɛrɛ laa tinteeŋ kala.
Ba nagɛ tɩɩsɩŋ ba sɩ chɔnsɔ fuoŋ niiŋ nɛ, ba nɩnɛŋ ba bʋa lɛ, ba pɩpaarɩŋ bɩ yuori. Wɩɩ na-kala nɛ dɩ nɩaa deemba ŋaa, ʋ yie vɛŋ woruŋ nɛ a pɩba.
Nɩɩ-la kala sɩ joŋ ʋ yɩɛlaa hɛ ʋ dʋa lɛ, ʋ jaŋ tel, ama tʋɔpʋl tɩŋŋaa wɩaa jaŋ vɩvɛŋ woruŋ a nagɛ tɩa sɩɩ waa ʋ bʋa lɛ.
Mɩ-na ma TƖƖNA jaŋ pɔma bʋa na-kala lɛ. Mɩ jaŋ pɩma kʋzɔmɔ-la kala ma sɩɩ chɛ tintee-hɩlɩŋ lɛ, a leŋ dɩ ma kɛŋ doluŋ arɩ yarɩfɩɛlaa. Ma jaŋ nagɛ lɩga ba sɩɩ mɩsɛ lɩɩŋ bʋa na-kala, a bɩra nagɛ lɩɩ-bul sɩɩŋ sɩ bɩ kɛrɛ.
Tʋɔ-chei-la nɩalɩŋ sɩ hɛ Zaayɔŋ lɛ sɩ kɛnɛ, ʋ jaŋ leŋ dɩ ba mɩɩra kɛŋ tʋɔtɔrʋŋ, dɩ tʋɔ-chei-la lɛl. Ba tʋɔŋ fa sɩ chei ŋɩɩ, ba jaŋ mɩɩra yɩɩ tʋɔtɔrɛ yɩɩlaa. Ba kala jaŋ nagɛ tɩɩsɩŋ La TƖƖNA tɩtɩa sɩ chɔnsɔ. Ba jaŋ ŋaa wɩalɩŋ sɩ zɔmɔ a leŋ dɩ La TƖƖNA yɩrɩŋ yɩrɛ.
Mɩ jaŋ laaŋ ta. Ŋ bɩ jaŋ sʋʋ laalɩŋ lɛ, ŋ jaŋ fori a laa ŋ mɩɩsɩŋ, bɛɛ wɩaa ŋ laamɛ dii nɛ. Mɩ-na ŋ TƖƖNA nɛ bʋla.’ ”
Bee na Asiiria, ʋ fa nagɛ kuolu tɩa sɩ hɛ Lɛbanɔŋ lɛ nɛ. Ʋ naakelee zɔŋ woruŋ, a lugo tɔ duu-la a jɩl wɩa-nyuŋ woruŋ, ʋ nyu-gbaŋa jɩla kieli tɩɩsɩ-la.
Tɩɩ-doho kala sɩɩ nɛŋ jaŋ nyʋ a kɩɛlɛ fuo-la sɛsɩŋ kala a nɛŋ. Tɩɩsɩ-la pɩpaarɩŋ bɩ jaŋ hɩl koo ba vɩa nɛnɩŋ. Ba jaŋ nɩnɛŋ chɛnɛ kala, bɛɛ wɩaa fuo-la lɩɩŋ sɩ pɛllɛɛ lɩɩ Wɩa dɩɩ-bal-la lɛ ka jʋʋba nɛ. Tɩɩsɩ-la nɛnɛɛ jaŋ ŋaa kʋdiilee, dɩ ba kɛŋ ba pɩpaarɩŋ ma vɩvaarɛ nɩaa.”