JƐRƖMAAYA 16:15 - WƖA TENIŊ

¹⁵ Ama ba jaŋ bʋl, ‘La ŋmɩɛsɛ La TƖƖNA sɩ weye, ʋ nɛ kɛŋ Iziral tɩŋŋaa kaa lɩɩ wɩɩpɔsʋŋ nagʋa tinteeŋ arɩ tinteye-la kala lɛ ʋ sɩ kɛmba pɩsa hɛ.’ Mɩ jaŋ bɩra leŋ dɩ ba kʋ tɩɩ tintee-la mɩ sɩ joŋo pɩ ba naabalɩmaba.

JƐRƖMAAYA 16:15 ပူးပေါင်းရင်းမြစ်များ

WƖAA DƖ-SUOMUŊ 28:15

Bee-na, mɩ chɩŋ ŋ harɩŋ nɛ aa beniŋ lee-la kala ŋ sɩɩ mʋ. Mɩ jaŋ kɛnɩŋ mɩɩra kɔ tinteeŋ deeŋ. Mɩ bɩ jaŋ leŋiŋ, see mɩ sɩ ŋaa wɩɩ-la mɩ sɩ sɩ mɩ jaŋ ŋaa pɩŋ.”

WƖA YƖƖLAA 106:47

Laala ta, La Tɩɩna Wɩa. Kɛnla lɩɩ tinteyee nɩaa tʋɔŋ a kʋ hɛ dɔŋɔ, dɩ la wuo lɔllʋŋ a dɛnnɛ ŋ yɩrɩ-balɩŋ sɩ bɩ disiniŋ kɛnɛ.

AZAAYA 14:1

La TƖƖNA jaŋ fá Iziral tɩŋŋaa nenige. Ʋ jaŋ bɩra lɩɩsɛ Iziral tɩŋŋaa dɩ ba ŋaa ʋ nɩaa, a leŋ dɩ ba hɔŋ ba tɩtɩa tinteeŋ lɛ. Nɩwogusuŋ jaŋ kʋ pɛ hɔŋ Jekɔb doho nɩalɩŋ tinteeŋ lɛ dɩ ba niiŋ ŋaa kʋbala.

JƐRƖMAAYA 12:15

Ama dɩ mɩ nɛ churiba dɛrɛ, mɩ jaŋ bɩra fá ba nenige aŋ kɛŋ ba kʋŋkala mɩɩra kɔ ba tinteeŋ arɩ ba dʋa leriŋ.

JƐRƖMAAYA 23:3

Mɩ tɩtɩa jaŋ kɛŋ mɩ nɩaa nɩkaana-la kaa kʋ lɩɩ tinteye-la lɛ mɩ sɩ kiriba mʋ hɛ, a kɛmba mɩɩra kɔ ba tɩtɩa tinteeŋ. Dɩ ba nɛ kɔ nɩmɛ, ba jaŋ lʋl biiriŋ, a pʋŋa yʋgɛ.

JƐRƖMAAYA 23:7

La TƖƖNA bɩra sɩ, “Tapʋlaa ka kɔ nɛ, nɩaa bɩra bɩ jaŋ bʋl, ‘La ŋmɩɛsɛ La TƖƖNA sɩ weye a kɛŋ Iziral tɩŋŋaa kʋ lɩɩ Ijipiti tinteeŋ lɛ.’

JƐRƖMAAYA 23:8

Ama ba jaŋ bʋl, ‘La ŋmɩɛsɛ La TƖƖNA sɩ weye a kɛŋ Iziral tɩŋŋaa kaa lɩɩ wɩɩpɔsʋŋ nagʋa tinteeŋ lɛ arɩ tinteye-la kala lɛ ʋ sɩ kɛmba pɩsa hɛ.’ Ŋɩɩ nɛ ba jaŋ bɩra hɔŋ ba tɩtɩa tinteeŋ lɛ.”

JƐRƖMAAYA 24:6

Mɩ jaŋ beŋ ba nyuŋ dɩ wɩaa zɔmɔ pɩba, a kɛmba mɩɩra kɔ tinteeŋ deeŋ. Mɩ jaŋ leŋ dɩ ba chɩŋ, mɩ bɩ jaŋ leŋ dɩ ba tel. Mɩ jaŋ leŋ dɩ ba naapoloo jʋʋ tinteeŋ, mɩ bɩ jaŋ churiba.

JƐRƖMAAYA 29:14

ma jaŋ namɛ. Mɩ-na ma TƖƖNA nɛ bʋla. Mɩ jaŋ kɛmma mɩɩra lɩɩ yoŋ-baga-la kɔ. Mɩ jaŋ chɛ kɛsɛma a lɩɩ tinteye-la arɩ lere-la kala mɩ sɩ kɛmma pɩsa hɛ lɛ. Mɩ-na ma TƖƖNA nɛ bʋla. Mɩ jaŋ mɩɩra kɛmma kɔ lee-la ma fa sɩ hɛ, ka mɩ kɛmma mʋ yoŋ-baga.”

JƐRƖMAAYA 3:18

Bʋa-la lɛ Juda nɩaa jaŋ mʋ pɛ Iziral nɩaa lɛ. Ba kala jaŋ to dɔŋɔ a lɩɩ wɩɩpɔsʋŋ nagʋa tintee-la a kɔ tintee-la mɩ sɩ joŋo pɩ ma naabalɩmaba ʋ ŋaa ba kʋŋ.”

JƐRƖMAAYA 30:10

Ŋɩɩ wɩaa, má sɩ́ fawʋllʋŋ fá, mɩ tɩntɩnna Jekɔb doho nɩaa. Iziral tɩmma, má sɩ́ leŋe dɩ ma niiree maa. Mɩ-na ma TƖƖNA nɛ bʋla. Mɩ jaŋ sɛnɛ laama ta tintee-bolii-la ma sɩ hɛ lɛ a kɛmma kɔ dɩa. Mɩ jaŋ laa ma doho nɩalɩŋ sɩ hɛ yoŋ-baga lɛ ta. Iziral tinteeŋ jaŋ bɩra kɛŋ fɩɛlɩŋ dɩ ba hɔŋ sɔm, nʋʋkala bɩ jaŋ ŋaa dɩ fawʋllʋŋ kɛmba.

JƐRƖMAAYA 30:3

Tapʋlaa ka kɔ nɛ, mɩ-na ma TƖƖNA jaŋ kɛŋ mɩ nɩaa Iziral tɩŋŋaa arɩ Juda nɩaa mɩɩra lɩɩ yoŋ-baga kɔ, a bɩra leŋ dɩ ba hɔŋ tintee-la mɩ sɩ joŋo pɩ ba naabalɩmaba ʋ ŋaa ba kʋŋ lɛ. Mɩ-na ma TƖƖNA nɛ bʋla.”

JƐRƖMAAYA 31:8

Má bee na, mɩ jaŋ kɛmba lɩɩ wɩɩpɔsʋŋ nagʋa tinteeŋ dɩɩrɩŋ a kɔ, mɩ jaŋ kɛmba lɩɩ dʋnɩa sɛmɛ na-kala a kʋ hɛ dɔŋɔ. Nyʋlɩmaa arɩ gbɛrɩgɛɛ jaŋ hɛ ba tʋɔŋ, hapuugoo arɩ haalaa sɩɩ chɛ ba lʋl ba luoruŋ wʋwɩɩ ma jaŋ hɛ ba tʋɔŋ. Ba jaŋ yʋgɛ woruŋ a mɩɩra kɔ.

JƐRƖMAAYA 32:37

Mɩ jaŋ sɛnɛ kɛsɛba hɛ dɔŋɔ lɛ a kaa lɩɩ tinteye-la kala lɛ mɩ sɩ chaasa na baanɩŋ mɩ yaraa hosi mɩ kiriba hɛ lɛ. Mɩ jaŋ kɛmba mɩɩra kɔ leriŋ deeŋ dɩ ba hɔŋ sɔm.

JƐRƖMAAYA 50:19

Ama mɩ jaŋ mɩɩra kɛŋ Iziral tɩŋŋaa kaa kɔ ba tinteeŋ, ba jaŋ dii kɩaa Kamɛl peel-la nyuŋ arɩ Basaŋ fuonaaŋ lɛ. Ba jaŋ dii kɩaa a vɔgɛ Efirem arɩ Gɩlɩad dundolluŋ nyuŋ.

ƐZƖKƖƐL 36:24

Mɩ jaŋ kɛmma lɩɩ tintee-wogusuŋ kala tʋɔŋ, a kɛmma mɩɩra kɔ ma tɩtɩa tinteeŋ.

ƐZƖKƖƐL 39:28

Ŋɩɩ lɛ nɛ mɩ nɩaa jaŋ jɩŋ arɩ mɩ nɛ ba TƖƖNA Wɩa, a kɛmba mʋ yoŋ-baga tintee-wogusuŋ lɛ, aŋ kɛmba mɩɩra kɔ ba tɩtɩa tinteeŋ. Ba kʋbala ma bɩ harɩŋ ka.

JOWƐL 3:1

La TƖƖNA sɩ, “Dɩ bʋa-la nɛ yie, mɩ jaŋ leŋ dɩ Juda arɩ Jerusalɛm nɩaa mɩɩra lɩɩ yoŋ-baga kɔ.

AMƆS 9:14

Mɩ jaŋ kɛŋ mɩ nɩaa Iziral tɩŋŋaa mɩɩra lɩɩ yoŋ-baga kɔ ba tɩtɩa tinteeŋ. Ba jaŋ paa ba tasɩ-la sɩ pɩŋ jikpeeŋ saa a jʋjʋʋ. Ba jaŋ pɛrɛ girep tɩɩsɩŋ bagɩsɩŋ a nyʋnyʋa ba sɩnɩŋ. Ba jaŋ pɛrɛ bagɩsɩŋ, a dii ba kɩaa.

AMƆS 9:15

Mɩ jaŋ leŋ dɩ Iziral tɩŋŋaa naapoloo chaasa jʋʋ tintee-la mɩ sɩ joŋo pɩba. Nʋʋkala bɩra bɩ jaŋ wuo churiba a kaa mʋ wuu. Mɩ-na ma Tɩɩna Wɩa nɛ bʋla.”